الدموع الناطقة الجزء الأول

في رثاء النبي (صلّى الله عليه وآله وسلّم) وآله (عليهم السلام)

الشاعر جابر الكاظمي

مقدمة

- قلّما يظفر المتأمل في سجل التاريخ بحادثة كحادثة الطف وقضية كقضية أبي الأحرار الإمام الحسين بن علي بن أبي طالب (عليهم السلام) في إثارتها للوجدان الجماهيري وتحريمها للعاطفة الإنسانية بصورة مستمرة وبنفس الزخم الذي زلزلت به ساحة الأحداث في المقطع الذي وقعت فيه تلك الملحمة الخالدة التي تراءت للناس أسطورة في ما عرضته من مشاهد وسطّرته من معاني وخلّفته من آثار.

ولئن كان للسماء دورها الرئيس في التخطيط لهذه القضية والتبليغ لها والعمل على إبقائها حية وهّاجة مهما تقدم بها السن، فإنها لقاعدتها التي تبنتها وتعهدت بالنضال في سبيلها هدفاً وفكراً ومنهجاً ورصيداً وعملاً، ودوراً لا يغفل في إدامتها وترسيخها في الألباب والقلوب، إنها ظاهرة تناغم أخّاذ بين هذه القضية التي توقد بحرارتها النفوس فتطفق تعبّر عما يجول فيها من رؤى ومشاعر وبين هذه النفوس التي جنّدت لأداء وظيفتها إزاء هذه القضية كالزيت يحترق بالنار فيموّنها لتبقى شعلتها ملتهبة وملهبة ما دام له وجود.

ويبرز الشعر من بين فعاليات هذه القاعدة بما له من قوة في صياغة الفكر وقدرة في التعبير عنها وفعل في التحريك لها ليحتل مساحة مرموقة ويملأ فراغاً لا يُملأ بغيره من ألوان التصوير والتعبير.

وهكذا كان للقضية منذ البداية وعلى طول الخط جيش من الشعراء رفعوا راية الدم وعلقوا أوسمة الطف وبرزوا بعد ما تشبعت بأبعاد كربلاء أذهانهم وجاشت بالمأساة نفوسهم ليصوروا في قصائدهم ما نهلوه من معين قضيةٍ كان العطش معلماً من معالم المظلومية والمأساة فيها، فكان لتلك القصائد الأثر الكبير في الدفاع عن قضية كربلاء وفي إحيائها وفي تعظيمها.

ومن هنا كان تأكيد الأئمة (صلوات الله عليهم) على هذا الحقل ودعمهم للدور الرسالي الذي يمكن أن يقوم به، فهذا ـ على سبيل المثال ـ أبو هارون المكفوف يقول: قال لي أبو عبد الله (عليه السلام): (يا أبا هارون أنشدني في الحسين (عليه السلام) فأنشدته فقال: أنشدني كما تنشدون ـ يعني بالرّقة ـ قال فأنشدته:

أمرر على جدث الحسين فقــــل لأعــظمه الزكيّة

قال: فبكى ثم قال زدني فنشدته القصيدة الأخرى قال: فبكى، فسمعت بكاءً من خلف الستر فلما فرغت قال: يا أبا هارون من أنشد في الحسين شعراً فبكى وأبكى عشرة كتبت لهم الجنة، ومن أنشد في الحسين شعراً فبكى وأبكى خمسة كتبت لهم الجنة، ومن أنشد في الحسين شعراً فبكى وأبكى واحداً كتبت لهما الجنة، ومن ذكر الحسين عنده فخرج من عينه من الدمع مقدار جناح ذبابة كان ثوابه على الله ولم يرض له بدون الجنة).

ويروي الكميت بن زيد فيقول: دخلت على أبي جعفر (عليه السلام) فقال: والله يا كميت لو كان عندنا مال لأعطيناك منه ولكن لك ما قال رسول الله (صلّى الله عليه وآله) لحسان: (لا يزال معك روح القدس ما ذببت عنا).

ويطالعنا الإمام الرضا (صلوات الله وسلامه عليه) فيما ورد عنه في مقام تجليل شعراء أهل البيت (عليهم السلام) بقوله: (ما قال مؤمن فينا شعراً يمدحنا به إلا بنى الله تعالى له مدينة في الجنة أوسع من الدنيا سبع مرات يزوره فيها كل ملك مقرّب وكل نبيّ مرسل).

نعم إنها رسالة الشعر حين ينطق ليحرّك الناس في خط الحق وليساهم في دحر الباطل وليؤدي دوره في مسيرة خلافة الله تعالى في أرضه.

و(الدموع الناطقة) حلقة من هذه الحلقات المتواصلة ذرفها شاعر موهوب من شعراء أهل البيت (عليهم السلام) وأنجبته الكاظمية المقدسة وهو الشاعر جابر الكاظمي، ويمثل الدموع الناطقة ديوانه الشعري الذي يتميز به من إبداع في التصوير وجمال في التعبير وإخلاص في العمل ورسالية في الطرح وجلال في المادة قد ملأ فراغاً كان لابدّ أن يسد تراثنا الأدبي الشعبي، الأمر الذي يبعث على أن نشدّ على يديه ونحيي جهوده ونكرم أعماله وندعو الله تعالى له بالقبول والتسديد.

في قصائد الگعدة

وا محمداه

ضلعين هشّمها الدهر واشتد المصاب

صدرين واحد بالحرب والثاني بالباب

زماني شچم طفل يَتَّم وتدري شچم ظلع هَشَّم

ضلعين هشّمها الدهر واشتد المصاب

* * *

يا رسول الله بحياتك كابدت آلام كثره

خانت الأمة وصيتك عگبك وغدرت العتره

وهشّموا ضلعين منك ضلع أبو اليمه والزهره

أول ضلع صابه الألم من دفعة الباب انجسم

والثاني بالطف انهشم جالت الخيل إعله صدره

كسرين من دفعة الباب ومن الخيول

جرحين ما ظن الألم من عدهن يزول

ولا ظن بعد تتبلسم وتدري شچم ضلع هشّم

ضلعين هشّمها الدهر واشتد المصاب

* * *

وگع من الزهره محسن من بعد كسرة ضلعها

هذا أوّل طفل منكم گضه وللعترة فجعها

الثاني عبد الله الرضيع ورگبته الظالم گطعها

يا ذنب عامل هالطفل بالسهم نحره ينفصل

محسن بها المحنه أصل وصار عبد الله فرعها

نحرين صوّبها الزمان وتعلم شصار

طفلين واحد بالسهم والثاني بسمار

يا هو الأكثر اتألّم تدري شچم ضلع هشّم

ضلعين هشّمها الدهر واشتد المصاب

* * *

أمتك يالهادي عگبك نقضت عهود الوصيّه

اتلاهبت نارين منهم واحده بدار الزچيّه

وثاني نار الوجروها إعله الخيم بالغاضريّه

باب البتول اموجره ونار المخيّم مسعره

والعتره ظلّت حايره بين ثاني وآل اُميّه

شمرين هجموا عالبتول وشبّوا النار

جمرين واحد بالخيم والثاني بالدار

ولمّن شب المخيم تدري شچم ضلع هشم

ضلعين هشّمها الدهر واشتد المصاب

* * *

من عگب محنة الزهره ريتك الحيدر تشوفه

ابن ملجم صاب راسه واصرعه بمسجد الكوفه

اصوابه خلّه العمد يفضخ راس عباس اِبحتوفه

حامي الحمه بسيف إنطبر ومثله انفظخ راس الگمر

من طاح مرمي اعله النهر ويمّه متگطعه چفوفه

راسين صوّبهن ابن ملجم ابعامود

چفين فوگ النهر گطعوها من الزنود

وجسم الكافل إتخذّم تدري شچم ضلع هشّم

ضلعين هشّمها الدهر واشتد المصاب

* * *

گطّعوا چبدين منكم وانته يالمختار تعلم

چبد الأول آل اميه من الحسن گطعوه بالسم

وچبد أبو السجاد مثله بسهم المثلث تخذّم

چبدين تدري تگطعن گطعوها عبّاد الوثن

چبد أبو اليّمه والحسن والهضم عالعتره خيّم

چبدين واحد للحسن والثاني لحسين

گلبين فايض دمها ويه دمعة العين

دمعنه تفايض إويه الدم وتدري شچم ضلع هشّم

ضلعين هشّمها الدهر واشتد المصاب

* * *

يا رسول الله بوفاتك گيّدوا حامي الحميّه

وانغصب عالبيعه عگبك من اجل حفظ الوصيّه

وثاني گيد بهالعليل الگيدوه اعلوج اميّه

حيدر گيَّد بالصبر ومثله العليل ابها الأمر

من طلع مگيود بيسر ويّه العيال السبيّه

گيدين ابرگبة حيدره ورگبة السجاد

جيدين طوّگها الدهر بأغلال وأصفاد

ابكل هاي المحن تعلم وتدري شچم ضلع هشّم

ضلعين هشّمها الدهر واشتد المصاب

* * *

وانته يالمختار تدري ابكربلا اشصارت مصايب

جثث أولادك رميّه، ودارت اعليها الكتايب

والأشد من هاي واعظم ظلّن ابناتك غرايب

يالهادي هذي كربلا وموقف حزن نتامله

من يسروا هالعايله

گبل ما تطلع العيله لليسر نادتك زينب

وين يالمختار عنّي وتنظر الخدر المسلّب

وباليسر تطلع بناتك هذي حاله عليك تصعب

بصوت الحزن يالمصطفه صاحت عله الدنيه العفه

ودم المدامع تذرفه

يزيد مثل الثاني وانته تدري بيهم يا محمد

* * *

طهران / ١٩٨١ م

تغريد القلوب

تصيح الگلوب ابحبك انذوب

يا علي الباري فرض حبك علينه واحنه من عالم الذر بيك اقتدينه

تصيح الگلوب ابحبك انذوب

* * *

يا علي ابسابق النشأة البيها صرنه من البدايه

الباري طينتنه انتجبها من قعر بحر الولايه

امتزجت ابماي الهدايه، المن ولاك ارتشف مايه

حبك ابطينتنه انمزج وضامرنه بالنور ابتهج

ولسانّه باسمك لهج يلّي اسمك أشرف آيه

وجنّة الروح منك اتفوح

يا عطر دوحة الإيمان ويقينه إحنه من عالم الذر بيك اقتدينه

تصيح الگلوب ابحبك انذوب

* * *

يا علي انته الأصول الخمسة للدين وقوامه

منك التوحيد يبدي والنبوة والإمامه

والعدل حكمه بوجودك وانته ميعاد القيامه

يالحبك بدمي اتّحد يا قل هو الله أحد

يالبيك دين الله انوجد وانته دستوره ونظامه

انته احكام دين الإسلام

انته دين الله وعلى هديك مشينه واحنه من عالم الذر بيك اقتدينه

تصيح الگلوب ابحبك انذوب

* * *

يا علي اتغذّيت حبك من ثدي صافي المرضع

امي غذتني الولايه وصار الي بهالنعمه مرتع

والدي امنحني المحبه وفرعي من أصله تفرّع

استارثت حبك من هلي وأصبح مذاقي ومنهلي

وانغمر گلبي يا علي وابشرف حبّك تولّع

واليواليك يلتزم بيك

عهد حبك بالضمير مسجلينه واحنه من عالم الذر بيك اقتدينه

تصيح الگلوب ابحبك انذوب

* * *

يا علي استخلصت حبك من گلب صافي وموالي

وظهر ناتج هالمحبه نور يسطع بالمعالي

واتحد نور الولايه بروحي وبخالص اعمالي

يا علي ومن هز المهد حبك ويه الروح اتحد

وكل مفصل بجسمي شهد حبك متمم كمالي

طينتك نور بجانب الطور

يا علي اتكونّه من فاضل الطينه واحنه من عالم الذر بيك اقتدينه

تصيح الگلوب ابحبك انذوب

* * *

يا علي كوّنك ربك من سنائه ولطف ذاته

وصاغلك حلية صفات امطعّمه بجوهر صفاته

ومد سلك مرضات بينه وبينك لمكسب رضاته

تياره نور ولايتك ورحمة الباري رحمتك

واللي صفح عن سيرتك صيامه ميفيده وصلاته

انته سلطان هاي الأكوان

الرايد يضاهيك يا أبا الحسن وينه واحنه من عالم الذر بيك اقتدينه

تصيح الگلوب ابحبك انذوب

* * *

يا علي هاتف القدرة من العرش وجّه نداءه

وگفت گباله الخلائق ويه رسله وأنبياءه

نظرت اعله اللوح شافت اسمك ايشع بضياءه

واشلون وگفه صادقه مخلوق گابل خالقه

بمعجزة شخصك واثقة وصاحوا إنقر بولاءه

انكتبت اعهود حبك شهود

عهد بالتوحيد والثاني بنبينه واحنه من عالم الذر بيك اقتدينه

تصيح الگلوب ابحبك انذوب

* * *

يا علي گلوب التودك هايمه ابشوگ المحبه

وكل موالي بقلم حبك اسمك امسجّل بگلبه

خطّته حروف الولايه النوّرت مصباح دربه

يا تاج أشراف المله ابهديك تسير القافله

لا مبعده ولا فاصله اشما تصير المشيه صعبه

احنه ماشين بمنهج الدين

هذا عهد الملتزم باحكام دينه احنه من عالم الذر بيك اقتدينه

تصيح الگلوب ابحبك انذوب

* * *

يا علي لسلمان انته حضرته وتولّيت دفنه

وجهّزت اچفانه بيدك وأبد ما خيَّبت ظنه

اشلون ظل حسين جسمه إعله الثره ومحّد يچفنه

ليش حسين ظل جسمه فوگ الغبره

عالتربان متغسل بدم نحره

يا كرار شنهو السبب متحضره

* * *

يا علي تناديك زينب ليش متلبّي نداها

تظن بعده اللي ذخرته للحرم يحمي حماها

انگطعت چفوف الكفاله وطاح من هاشم لواها

والايتام فرت ومذعورة راي

تنادي بصوت وين اليهزهم نخواي

يا عباس يا عمّي جزنه من الماي

بس نريدك ترجعّنه للوطن وانته كفلتنه

* * *

دمشق ١٩٨٠ م

مسلم بن عقيل

هذا معروف العايش ايشوف

بالخيانة منوصف مجمع الكوفه

بكل عصر لو تطّلع تگدر تشوفه

هذا معروف العايش أيشوف

* * *

مو نظم شاعر خيالي وسارح ابعالم خياله

ولا قلم كاتب يريد ايبيّن الفن والجزاله

لاچن انبيّن حقايق كل بشر حسب امتثاله

وانشوف ميزان الدهر من يخدع أهواء البشر

للعدل ميخلّي أثر ويرفض التهوه العداله

واللي مغرور يا خذه السور

اليمشي عالحبلين ويساير ظروفه

بكل زمن لو تطّلع تگدر تشوفه

هذا معروف العايش أيشوف

* * *

انظر ابعين البصيرة لو ردت للحق تنوله

ابدي من يوم الغدير ابفكرك استعرض فصوله

يا سبب خلّه الإله أيأكّد الخطبة رسوله

والخطبة موقفها انشهد وانأخذ ميثاق العهد

واللي خلف عن الوعد ترك دينه من أصوله

أمره مشهود نقض العهود

واليشوف العدل جدّامه ويعوفه

ابكل عصر لو تطّلع تگدر تشوفه

هذا معروف العايش أيشوف

* * *

ضامره المملي خيانه، للعهد خلاّ يعوفه

ومجرم الخاين البيعه بكل عصر تگدر تشوفه

عرّج ابفكر النزاهه وانظر المجمع الكوفه

بعثوا لبو اليّمه كتب انبايعك بايمان الگلب

وبجبهتك سلم وحرب اشما الدهر غيّر صروفه

هذا مضمون ناتجه اشلون

انتظر ناتج مجمع الكوفه اِبألوفه

بكل عصر لو تطّلع تگدر تشوفه

هذا معروف العايش أيشوف

* * *

الكوفه من شافت تأخر گامت اتضخ ابكتبها

وابو السجاد الرحلته بكل نواتجها حسبها

وانبعث مندوب عنّه وغايته يلبّي طلبها

للكوفه مسلم من وصل ابصفوة كوادرها اتّصل

وبشخص أبو اليمه امتثل وفتحت لمسلم گلبها

رحّبت بيه وأثنت اعليه

نقل الهم راي أبو اليمه ابحروفه

بكل عصر لو تطّلع تگدر تشوفه

هذا معروف العايش أيشوف

* * *

انتهت فترات الخطابه أو وثق مسلم بالركيزه

اثنعش الف أوياه صارت لاچن ابفتره وجيزه

وقاعدة وصف الخيانه اتصير بالخائن غريزه

متمالكوا حقد النفس ورائدهم أصبح يحترس

هالجمع يشرحلك درس كل بشر يمتلك ميزه

الرحبت بيه ثارت عليه

بيا عصر المعزّب ايخون ابضيوفه

بكل عصر لو تطلّع تگدر تشوفه

هذا معروف العايش أيشوف

* * *

خانت بمسلم الكوفه وگومها اتغيرت ابسرعه

اشما سجايه الأصل تخفي تالي تتبيّن ابفرعه

التزموا ابفتوة شُريح وأمر مسلم صار بدعه

ناس اليضنها ابجانبه صارت ابدمّه امطالبه

ومسلم لفه ابروح الابه وخبّه نفسه بدار طوعه

مسلم احتار بين الاشرار

التجأ صامد والعزم فايض ابجوفه

بكل عصر لو تطّلع تگدر تشوفه

هذا معروف العايش أيشوف

* * *

وابن طوعه حين شاهد مسلم ابيته تأثر

طلع من طيبه الخبيث بهالفعل للآيه فسّر

مسرع اتعنه لمحمد ابن الاشعث عنه خبّر

وللخبر لمن بيّنه أصبح لعق عالألسنه

والطاغيه بسرعه اعتنه راح لابن زياد بشّر

وحاكم الجور گلبه مسرور

وظالم اللّي طوّق الدار بسيوفه

بكل عصر لو تطّلع تگدر تشوفه

هذا معروف العايش أيشوف

* * *

طلع من الدار مسلم قاتل عداه ابجداره

اخذ بيهم وطر ثابت لاچن اتغير قراره

استنزفوا عزمه وخذوه اميسر الگصر الاماره

وصدّر ابن زياد الأمر إحضار مسلم للگصر

ما بين سطوات الغدر خايف او دمعه أيتجاره

لا تظن خاف من الأجلاف

لجل أبو السجاد مسلم چان خوفه

بكل عصر لو تطّلع تگدر تشوفه

هذا معروف العايش أيشوف

* * *

من القصر مسلم رموه وهشّموا جسمه الأعادي

ويدري من بعده تضحي بكربلا صفوة الهادي

وچنّه يسمعها لحميده بنته برض الطف تنادي

يا بويه انظر حالتي طفله ويتيمه بغربتي

واليتم گطّع چبدتي

مثل حال اسكينه حالي ومثل حالك حال أبوها

* * *

دمشق ١٩٨٠ م

مسيرة الحسين (عليه السلام)

فكر واعي وگلب مومن بالمصير

امن المدينه لكربله يريد المسير

للشهادة يبيّن استعداده خل نتابع غاية استشهاده

نشوف بالتالي شيصير تبگه يم اهل الضمير

* * *

كل نبي ومرسل يلاگي بتأدية دوره مصاعب

والنجاح بحكم صبره اشما صبر يكسب تجاوب

كلهم بهالنهج ساروا صبروا وأدّوا الواجب

كل مرسل بدوره اكتفه بالصبر تمم موقفه

لاچن نشوف المصطفه حمل انواع المتاعب

بالمسيره لاگه چم موقف خطير

منها تبليغ الوحي بيوم الغدير

بلِّغ بمنزَّل حسب تشريعه بعدك لحيدر تكون البيعه

ليش هالموقف خطير تبگه يم اهل الضمير

* * *

كثره من هاي المواقف جابه الهادي بحياته

واظهرت أحقاد گومه من دنت ساعة وفاته

انظلمت الذريّه بعده وبدت لوعة نايباته

والفتنه بعده اتبيّنت وأحكام دين الله انفنت

لاچن اُبات اتعيّنت للظلم تعلن مماته

القى نظره خاطفه وقيس الابعاد

وشوف أبيّ الظيم من ناده الجهاد

علن ثوره اموقّته وموعده حين شاف الظلم جاز حدوده

ليا هدف أصبح يشير تبگه يم اهل الضمير

* * *

رزم ظعن الثوره وأنوه لكربله ووجّه رحاله

خل نرد ونشوف ليش حسين إخذ ويّا عياله

وليش من مكه الشريف لكربله إنّقلت أمواله

يا دافع اللّي حفّزه ويا دور رايد ينجزه

أهل الفكر مو عاجزه لو تجي وتدرس الحاله

حسين ثائر لنصرة الحق مستطيع

ليش ويّاه إخذ عبد الله الرضيع

هالأسرار الرايد استكشافها يدرس الثوره وبُعد أهدافها

يشوف ناتجها الأخير تبگه يم أهل الضمير

* * *

وصل لأرض الغاضريه امتوَّج ابتاج البساله

بسبعه وثمانين ثائر والعدد تم اكتماله

وخطة الحرب الرسمها انوضعت بأمر الجلاله

خطة حرب متعنونه ميسره وقلب وميمنه

والقائد اللي عيّنه كافل بنات الرساله

لگمر هاشم سلّمه أربع مهام

صارم وجود اولوه وحرس الخيام

قائد ورايته تريد تشوفه عالنهر لمن يضحّي چفوفه

بيد يا فارس تصير تبگه يم اهل الضمير

* * *

اتجسّمت هاي المواقف وأبو اليمه احسابه عنده

ويدري من بعد العضيد بكربله ينفرد وحده

وينچتل بين إيد زمره بايعت وأنقضت عهده

هالموقف أصبح يتضح وبكل زمن يعرض شرح

لو حسن الإسلام بجرح بالدمه لجرحه نضمده

حسين قدَّم إلنه أسمى التضحيات

بدرسه وضَّح عزة الحق بالممات

دينّه وإحنه النضمد اجروحه وبالدماء اسنجّل الاطروحه

بالنتائج ما نحير تبگه يم اهل الضمير

* * *

كربله اتجسّمت إلنه وابن هند اتضح ظلمه

وشفنه أبو السجاد مرمي وعالصعيد ايسيل دمه

وانفضح ذاك التجافي والغدر من ذيچ الامه

والظالم ابفعله انعرف والخلف من ذاك السلف

وبن أبو سفيان انكشف المثله ما ينقبل حكمه

احنه عالحگ عنه أبداً ما نميل

اشما يصير الدرب بالمسلك طويل

مثل أبو اليمه نقدم أرواحنه ومثل دمه يسيل دم اجراحنه

واللي عالباطل تسير تبگه يم أهل الضمير

* * *

كل عصر يملك شهيد ومثل أبو السجاد ثاير

وكل عصر يملك يزيد الطاغيه وبالحكم جاير

هذي صوره واقعيه ومشهد لأهل الضماير

وذاك التجافي والغدر أصبح يدور ابكل عصر

أقسم وحگ هتك الخدر انسقّطه ابدم المناحر

من يزيد لهاليزيد الاتصال

مثله متربّع على عرش الضلال

طاغي يتغطرس ابسوء أعماله وعالهلاك اتقرّبت آجاله

التقبل الظالم أمير تبگه يم أهل الضمير

* * *

حسين من أجل العقيده استشهد وضحّه أبو جوده

ورسم للأجيال صفحه امعنونه ابهمّة جهوده

ومن دمه جروح البجسمه للشرع ضامن خلوده

جسم حسين لمن وگع عالغبره

ابفيض ادماه سجّل شعار الثوره

وهالمظلوم أصبح چتيل العبره

استوحدوه أشرار اميّه لا معين ولا نصير

* * *

حسين لمن گضه نحبه وعيلته ظلّت غريبه

لا كفيل ولا محامي وجارت اعليها المصيبه

اتشوف صيوان أبو اليمه والخدر شاجر لهيبه

والايتام تاهت عگب واليها

ونار الگوم تنطفي وتسعر بيها

ابدرب الشام صار الشمر حاديها

وسادس أهل العصمة ويّه العايله أخذوه يسير

* * *

الكاظمية المقدسة ١٩٧٩ م

نداء السيف

ليل مظلم لمّن أيزول الظلام

تسكت الالسن وللسيف الكلام

والزمان اشما تجور سنينه ما يموت الوهب دمه الدينه

والنصر مسك الختام هذا تصريح الإمام

* * *

اصطفت الصفوه الشريفه ابليل متلبّد ظلامه

وصدر تبليغ الجلاله ووضّحه لسان الإمامه

ولبسوا أكفان الشهاده والمجد هيأ وسامه

ما بين آمال وصبر تنتظر مطلاع الفجر

وحسين صدّر هالأمر صاحت اصحاب الشهامه

هاي ليله وننتظر فجر الحروب

والشهاده من الدمه اتفصّل الثوب

ننتظر يكشف ظلام الليله وكل مجاهد مصرعه اليوحيله

وندخل الحومه ابنظام هذا تصريح الإمام

* * *

هذي ليلتنه الأخيره وأحلى من كل الليالي

وباچر أصوات الجهاد اتردد ابأوج المعالي

نشتري الحق ابدمانه اشما يصير الثمن غالي

جناح الحرب من ينخفض چلمة الألسن تنرفض

والسيف يبدأ باللفظ ويبدي رايه ابصوت عالي

هاي حومه وبيها مقيام الرجال

الما يهاب الموت يدخل للقتال

السيف عن الحرب ما يتغاضه لو نطق ميحوّر ابألفاظه

ابضربته أيوضح الكلام هذا تصريح الإمام

* * *

بالحرب أصدق لسان السيف من يبدي ابخطابه

ايمثّل الچف اليحمله ولو سأل بالچف جوابه

بالحرب لو راد يظمه امن العده ينبع شرابه

بالحرب لو صابه الظمه الچف اليحمله أيكلمه

مشتاق چاسات الدمه ويرتوي بساعه ضرابه

السيف آيه ومن يسدد عن يقين

للمجاهد يضمن الفتح المبين

ومن يعيّن ضربته القهّاره بالحرايب تنكشف أسراره

وضربة الحق باستقام هذا تصريح الإمام

* * *

اشما تصير الحاله صعبه تسهل وهيهات تصعب

گبالنه الطاغيه امهيأ إلينه سبعين ألف مرحب

وسبعه وثمانين حيدر إحنه للأمثال مضرب

وأمر الحرايب لو صدر بسيوفنه انلقّن عبر

والقائد اببسمة ثغر لراية الإيمان ضهضب

امن الجلالة لو صدر النه القرار

بالمعاره سيوفنه اتشن الدمار

والأمرنه ابهالمهام أيشوفنه نشرح ابنود الأمر بسيوفنه

نتّبعها بألتزام هذا تصريح الإمام

* * *

بالحرب سيف المجاهد ينطق ابحكم الجلاله

وبالوميض امن المعاره للعله يصير اتصاله

ولو گطع گلب الاعادي ايضمّده الگلب الرساله

السيف اليحتّم كل حتم لو علن ساعات الحسم

ابجبهة الطاغي تنرسم للغدر صفحة أفعاله

بالمهالك يوگع ابسوء الافعال

بالمعارك يفشل البيوم القتال

والطغاة اشما تجور اليالها حتماً اتشوف المماة گبالها

وينقري اعليها السلام هذا تصريح الإمام

* * *

الطاغية اشما زاد ظلمه حتماً انهدّم كيانه

هذا تصريح الجهاد البلغه السيف ابلسانه

اليفتدي النهج العقيده ينجح ابيوم امتحانه

ولو دارت صفوف الحرب للموت يفتحله الگلب

ابيوم الحرب ما ينغلب وبالحرب يكشف ضمانه

هاي شدّه وعن المبدأ ما تزول

اله بالصارم وتهذيب العقول

ابساعة الحرب اللي يعقد رايه يكسب الجوله وينول الغايه

ويقتدي ابراي الحسام هذا تصريح الإمام

* * *

احنه أنصار العقيدة الساميه والباري يعلم

هذي غايتنه الأصيلة نكتب المنهاج بالدم

وثغر ام الحزن زينب بالنصر كون ايتبلسم

ولمن تروح اميسره ابشخص أبو اليمه ثايره

والابن هند اتدهوره وعلى الذله الطاغي يرغم

من دمانه انسجل احروف الكتاب

وبالتفادي ينشرح فصل الخطاب

ثوره تمتاز ابكلام اسيوفها ومثل هالثوره الدهر ميشوفها

وبالوصف تعجز أقلام هذا تصريح الإمام

* * *

دمشق / ١٩٨٠ م

الأسرار

أسرار أسرار هذا العالم أسرار

واليتّبع أخباره يگدر يكشف أسراره

هذا العالم أسرار

* * *

كل بشر حسب إطلاعه يكشف أسرار ابفكرته

واحد اتوصله البحوث وواحد اتوصله فطرته

أو واحد ايشوف الحقيقه ابعينه وايغالط نظرته

واحد يعجبك ظاهره وما تدري شنهو ابضامره

وواحد طفل تتصوره وهوه علاّمه ابخبرته

أنوار أنوار نهج العلم أنوار

واليهتدي بأنواره يگدر يكشف أسراره

هذا العالم أسرار

* * *

بالعلم كل شخص يگدر ينظر الحق بأطلاعه

هذي جوله ابلا نهايه الحق مع الباطل صراعه

من بدأ تكوين آدم لحد ما تُعلَن الساعه

ابواقع نعيشه وبالكتب باطل وحگ دوم ابحرب

ننتظر والناتج صعب اتفوز يا قدره إبّراعه

أدوار أدوار حرب انقسمت أدوار

واللّي أيسلسل ادواره يگدر يكشف أسراره

هذا العالم أسرار

* * *

انسلسل أدواره ونشوف الباري من كوّنه لآدم

حذّره من ابليس گلّه لا تتابع رايه تسلم

ليش خالف أمر ربه واليخالف ربه يندم

لهذا النبي ابليس اخدعه وابجولة الحرب اصرعه

لو چان للربّ طايعه على الشِجره ما تقدم

محتار محتار آدم صبح محتار

يريد الذنبه اغفاره يگدر يكشف أسراره

هذا العالم أسرار

* * *

بالتسلسل نبگه نمشي ونطّلع عن ثاني صوره

ليش قابيل إبن آدم غدر هابيل ابشروره

لو طمع چان اليدفعه؟ لو فعل ناتج غروره؟

وابفكرك اتعمّق بعد واتشوف ابن نوح انفرد

عن السفينه من ابتعد بالهلاك انكشف دوره

أضرار أضرار ظلم النفس أضرار

واليجتنب أضراره يگدر يكشف أسراره

هذا العالم أسرار

* * *

نتركه العاد وثمود وكلمن اتميّز ابظلمه

ونترك إبراهيم يم نمروده يتباصر ابحكمه

ونتركه الموسى وعصاته النزلت اعله الظلم نقمه

واليوسف انوجه النظر بأضغان اخوته من انغدر

عن والده انكف البصر وعكف يعگوب اعله همه

أشرار أشرار اخوة يوسف أشرار

وحقد اخوته الغداره يگدر يكشف أسراره

هذا العالم أسرار

* * *

نرجع انواصل شرحنه ونوضع لكل نقطه مرصد

چم جمع من هالتنافر من بعد شمله تبدد

وننظر المجمع قريش اللي بزغ منهم محمّد

كوكب وخاتم للرسل ابدستوره يجمع كل شمل

ما يركن لبرج الأفل ونوره للأفكار فرقد

أفكار أفكار مرسل محي الأفكار

الراد أينوّر أفكاره يگدر يكشف سراره

هذا العالم أسرار

* * *

حاربوا نهجه قريش وظل رسول الله صامد

غايته يأدي الرساله وثبّت ابمكه القواعد

وطلع من مكه الشريفه امهاجر ابصيغة مجاهد

من بعده چم ثائر طلع لاچن المكه ما رجع

فوگ الرمح راسه ركع وجسمه فوگ الغبره ساجد

أحرار أحرار حسين أيريد أحرار

المد سلكه اعله تياره يگدر يكشف أسراره

هذا العالم أسرار

* * *

كربلا اتوضح حقايق بين حگ وبين باطل

بالنهايه انشوف يا هو الفاز بيها ويا هو فاشل

الگطِّعت جسمه السيوف ابدمه وهّج هالمشاعل

بالدمه الفاض ابمنحره شعلة الحق امنوّره

بالدهر ظلت زاهره وكشفت أسرار الأوائل

أبرار أبرار حسين أيريد أبرار

ابدمه تمم اظهاره يگدر يكشف أسراره

هذا العالم أسرار

* * *

دمشق ١٩٨٠ م

الحرّ الرياحي

للنضال للشهاده والوضوح باعتقاده

قائد ومتمركز ابساحة قتال ابيا صفوف ابفكره يوثِق الاتصال

خل نتابع استناده للنضال للشهاده

* * *

كل بطل يملك عقيده راسخه والها يناضل

لغايته ايقدّم حياته انچان حگ انچان باطل

وتنرسم غايته ابعينه ابعزمه عن فكره يقاتل

معروفه هاي الظاهره كل بطل صاحب مقدره

يملك عقيده ابظامره وابعزم گلبه يواصل

بالطفوف بطل ضاهر بالمعارك وگف حاير

جبهتين گباله تحمل اعتقاد جبهه عالباطل وجبهه اعله الرشاد

ويه يا جبهه اعتقاده للنضال للشهاده

* * *

بين جبهات القتال انشوف هذا البطل حاير

وگف بين الجبهتين النهج يا جبهه يناصر

جبهه حگ وجبهه باطل والشدد كشف السرائر

الحر من وگف بين الجمع الكشف الحقيقه يطّلع

للجانبين أبده السمع وكشف مقياس الضماير

الاتعاظ باستماعه والرشاد باطلاعه

شاف نفسه ابين جنه وبين نار والشهم ينجح بيوم الاختبار

وتبدي من عنده الافاده للنضال للشهاده

* * *

من سمع خطبة حسين الحر إخذ منها اتّعاضه

وعرف بابن زياد لجل الطمع هذا الحدث خاضه

ندم عن مبدأ طلوعه والدمع بالجفن فاضه

الحر الرياحي من وگف وارتعدت أعضائه ورجف

من مبدأ الفطره هتف صوت ومعطّره الفاظه

بالضمير اهتمامي وبالمبادئ التزامي

هالبطل يبدي ابضميره الاهتمام وبطريق العدل يمشي باستقام

ابفكره يبحث عن رشاده للنضال للشهاده

* * *

(والمهاجِر ابن الآوس) انبهر من شاهد ذِهوله

ناده يا حر اشجرالك يا رمز معنى الرجوله

لو ينشدوني اعله عزمك ما عدوتك بالبطوله

رَد الفعل من ينعكس للعالم أيوضح درس

كل ثمر يرجع للغرس وكل فرع يتبع أصوله

التزام بالعقيده الموت لاجل الدين عيده

اتوجّه الصوب أبو اليمه بانكسار أو وجهه بالإيمان يتبهلل أنوار

السيرة الحق انشداده للنضال للشهاده

* * *

من وصل يم أبو اليمه ابوجهه مرسومه الندامه

وگف يم حسين لاچن الانكسار أحنى قِوامه

وصاح استغفر الباري وتبت بين ايد الإمامه

وحسين للحر خاطبه تُغفر ذِنوب التائِبه

وابن الرياحي جاوبه يا شفيعي بالقيامه

للحروب أرد أواصل بين أيدك أرد أقاتل

امن الندم ما نزل عن ظهر الجواد وسيفه متمركز ابچف الاعتقاد

والجهاد اشرف عباده للنضال للشهاده

* * *

للحرب قدّم (بُكَير) وشاهد استشهاد ابنه

وخاطبه الحر بالشهاده يولدي مبارك تهنه

والوعد يم الرسول ومربعك روضة الجنّة

واگف الحر وينتظر امن حسين إصدار الأمر

وللدين يضمنله النصر وبالنصر ما خاب ضنّه

للقتال صدر أمره للجهاد ابتسم ثغره

وارتجز من گلب ما يعرف الخوف روّع العسكر وابو اليمه يشوف

أبدع الحر بجهاده للنضال للشهاده

* * *

گطع گلب الحرب سيفه وروّع الحومه ابجهاده

وبالنصر حصّل الغايه أو مكث بربوع الشهاده

وصار مضرب للامثال ابنصرة الحق اعتقاده

وحسين ناداه يا شهم سمّتك أمك والنعِم

حر وانطبق بيك الاسم وبالحشر نلت السعاده

كل غيور من يجاهد بالزمان يبگه خالد

انجاهد إو بالحر يكون الامتثال وبالشهادة ايصير حبل الاتصال

ومثله نحصل عالسعاده للنضال للشهاده

* * *

جثة الحر على الغبره امخضبه بدم المنيه

وأسرعت آل الرياحي ودفنته الراعي الحميه

بس أبو السجاد ظلت جثته فوگ الوطيه

محّد دفن راعي الشيم

واتسلّبت عگبه الحرم

واتلاهبت نار الخيم

وعيلته ظلت غريبه لا كفيل ولا محامي

* * *

دمشق ١٩٨٠ م

صرخة أنصار الحسين (عليه السلام)

نفديك يحسين بالروح والدم

والتضحيه اليوم موقف اتحتم

يحسين هاي الثورة نتمناها ابعين الشهاده لكربله ارصدناها

موقف اتحتم

* * *

انفتحت أبواب النضال ورفرف اجناح السعاده

والجهاد أشرف حديث وعن أبو اليمه استناده

وابجهاد الظلم نكسب أسمى غايات العباده

احرار نبگه بكل زمن وما نرضخ لعابد وثن

والدين لو ركنه انرجن انشيّده بدم الشهاده

احرار احرار والباري يعلم

صوت النحر صاح مو لفظه بالفم

هالصرخه من جوف النحر صحناها ابعين الشهاده لكربله ارصدناها

موقف اتحتم

* * *

احنه أحرار ونظل أحرار مثلك يبو اليمه

اشما الطاغي اعلينه جار وبالاحقاد ايزيد ظلمه

نقسم ابدم الكرامه حتماً لعرشه نهدمه

أنصارك بروح وعدد وبدمنه نبني المعتقد

والنحر لو ينسه العهد أيذكّره بهالعهد دمه

والوعد لو حان والعالم اظلم

نقمع الطغيان وهيهات نهتم

النه لقاء بكربلا ويّاها ابعين الشهاده لكربلا ارصدناها

موقف اتحتم

* * *

ليلة الظلم رهيبه وننتظر طلعة فجرنه

بكربلا لو صدر أمرك للحرب نفتح صدرنه

توگف اصفوف القتال وللوغه انصافح سمرنه

بالطف نخوض الملحمه والنحر لو فاض بدمه

لنهج الإسلام انترجمه لكل لغه اتعايش عصرنه

والدمه لو سال للنهج ترجم

اطروحة إيمان للبشر قدّم

هاي الشروح ابنهجك درسناها ابعين الشهاده لكربلا ارصدناها

موقف اتحتم

* * *

انته قرآن الاله النطق بأحكام البلاغه

تنطق ابحق الجلاله وصاغك الخالق صياغه

ترجمانك من دمانه وللكفر نعلن ادماغه

ندمغ دياجير الكفر من تنرفع بيض وسمر

ننتظر اصدار الأمر وللحرب نملي فراغه

أمرك المحتوم اصداره لو تم

عن صدر الإسلام ينزال كل هم

خوض المعارك بالوفه اشمحلاها ابعين الشهاده لكربله ارصدناها

موقف اتحتم

* * *

كعبة الأحرار انته واحنه للكعبه ضحيه

يا منار التضحيات الزهه بآفاق الثريه

بنورك اتنوّر گلبنه بهالعقيده المبدئيه

يا مصحف الحق والعدل بمنهج ودادك نتصل

ما يوم عنك ننفصل ابجنتك آخره ودنيه

واليثأر عليك شيطان مُبرم

قاعده الشيطان بالحجر يُرجم

وسيوفنه ابهالأمر وصيناها ابعين الشهاده لكربله ارصدناها

موقف اتحتم

* * *

انته مدرسة الإله وبيك تحريك الضماير

وثورتك منهاج حق المؤمن العالظلم ثاير

واحنه انصارك وگبلك نفتدي بگطع المناجر

واحنه انذخرنه لثورتك نضحي الأرواح النصرتك

غايتنه من سر غايتك وبالحرب كشف السرائر

بالدمه الفيّاض نكشف المبهم

وسر النصر لاح والواعي يفهم

مجمل أسرار النصر وضّحناها ابعين الشهاده لكربله ارصدناها

موقف اتحتم

* * *

يا حسين انصارك إحنه وبالحروب انزيل همك

انريد دمنه يسيل بالطف من گبل ميسيل دمك

والنواظر تأبه تنظر عالترب منصرع جسمك

گبلك نضحي بكربلا

ونحرس حدود العايله

وگطع النحر بالطف حله

ما نريد انشوف دمك يجري بالطف گبل دمنه

* * *

الكاظمية المقدسة ١٩٧٩ م

راية الإيمان

هالرايه مصباح وليل الحرب جّن

وابچف الإيمان صار الها مسكّن

رايه ابسماء المعتقد منشوره لبدر الهواشم من علي مذخوره

وليل الحرب جن

* * *

رايه بالإيمان رفت والعزم بيها تطرّز

شامخه بأوج المعالي وبالعدل صار إليها مغرز

اتوالفت ويه بطلها وصار إلها ابچفه مركز

حاملها حيدر للنصر والفها من وقعة بدر

بإيمانه إلها مقتدر وغيره من هالرايه يعجز

لو ردت برهان ابخيبر تبرهن

حملتها فرسان خايبه بالظن

والرايه ردت للنبي مكسوره لبدر الهواشم من علي مذخوره

وليل الحرب جن

* * *

غير حيدر ما حملها ولا عجيد انطاها حگها

عشگت القائد الرايه وقائد الرايه عشگها

شمعته بيوم الحرايب وبنصر دينه علگها

من حان تسليم الذمم من علي العباس استلم

رايته السادت عالأمم وايده للرايه طلگها

مجمع كرامات بالرايه حفّن

وقائدها عباس بيها تعنون

اتبسّم الدين برايته المنصوره لبدر الهواشم من علي مذخوره

وليل الحرب جن

* * *

ثلاثه وثمانين غزوه حيدر امشيّد نصرها

رادها تواصل نصرها لچف گمر هاشم ذخرها

ورادها بيوم الحرايب بالنصر تتبع أثرها

ابهالرايه يدري حيدره يكفيها چف الذاخره

بزود وجداره ومقدره شبله يتولّه أمرها

لهالرايه چفّين گدرن يكفّن

بحملات الحروب للنصر ضمنن

چف حيدر وابنه اليتابع دوره لبدر الهواشم من علي مذخوره

وليل الحرب جن

* * *

التزم عباس القياده يا فخر أهل القياده

زم لوه إلاسلام بيده وما صفح عن اعتقاده

ساميه ترفرف بإيده وضمن للرايه السعاده

رفت على صهوه رشد وبكربلا حان العهد

قائدها بالرايه استعد وللحرب هيأ جهاده

جبهات الحروب بالحرب صفّن

بچف گمر عدنان هالرايه عرفن

ترفرف الرايه وبالمجد معموره لبدر الهواشم من علي مذخوره

وليل الحرب جن

* * *

كربلا دارت رحاها وحان للعباس يومه

شاهد گباله المعاره وبالزلم ماجت الحومه

وابسمه الميدان شاف الكون متلبّده اغيومه

عباس يعبس بالوغه بيمينه لو رف بيرغه

يدحر الطاغي اللي طغه بالحرب واضحه علومه

واليحتمي بيه گلبه أيتأمن

واليثأر عليه من خوفه يحزن

يرجّف الكون بضربته المشهوره لبدر الهواشم من علي مذخوره

وليل الحرب جن

* * *

ضربة الصارم تلوگ وتحله من چف الغضنفر

من يلوح السيف بيده بالوغه يرجّف العسكر

من يشن عالجيش حمله اتگول هذا الطلع حيدر

وسط الحرايب من وگف عن حيدر أبداً مختلف

لغيومه بالصارم كشف وزينب من تشوفه تستر

صاحت يعباس جفوني تدمّن

وعيالك اليوم ظلن يحنّن

وين اليطفّي گلوبها المجموره لبدر الهواشم من علي مذخوره

وليل الحرب جن

* * *

من سمع زينب تنادي هاجت بجمسه الحماسه

غضب وأرعد من تمطّه وگطّع ارچاب الفراسه

صاح عونچ يالعقيله ورايته ترف إعله راسه

وعيناچ يا بت فاطمه لو أطفي جمرات الضمه

لو أترس الجود إبدمه واگطع المي من أساسه

لازال العيال بالعطش حسّن

من ينضح السيف خل أيتروّن

واگطع الشاطي لو طلع من طوره لبدر الهواشم من علي مذخوره

وليل الحرب جن

* * *

گمر هاشم لاح مهره وامتلك ماي الشريعه

ترس جوده ورجع لاهف رايد يروّي الوديعه

والگدر جدامه حومه وطاحت چفوفه گطيعه

من الگمر طاح العلم

وعيونه طفّاها السهم

ما گدر يوصل للخيم

وظلت گلوب الفواطم ذايبه ابجمرة ضماها

* * *

دمشق ١٩٨٠ م

للقاسم آيات

معرس وسبعين ألف عالگه شموعه

تنتظر من الخيم موعد طلوعه

طلع الهم محرب ابسيف وعقيده

ويدري جاسم حنته من دم وريده

ورمله تتأمل رجوعه رمله تتأمل رجوعه

* * *

جلّت الخالق قدرته الصوّر الجسام صوره

وين أبن يعگوب يوسف خل يجي ويشوف نوره

مثل قرص الشمس واگف للحرب ينتظر دوره

ما بي نقص حسن الصوَر لاچنّه يخدع بالنظر

مره شمس مره گمر اتعطّر العنبر عطوره

اشلون شاب المقتدي بأحكام دينه

للشهاده من المهد مفتوحه عينه

وبالتفادي منغمر والحرب عيده

ويدري جاسم حنته من دم وريده

ورمله تتأمل رجوعه رمله تتأمل رجوعه

* * *

يسحر العين التنظره لو تريد اتشوف حسنه

رشأ لو راد أيتغطرس غصن لو راد ايتثنه

ومن يميل اتگول ورده ومالت ابروضة الجنة

وردة عطر شطبة ثمر جاسم سحر كل البشر

مثل الگمر نوره انتشر والكواكب حاوطنّه

من طلع من الخيم حيدر ابعينه

مبتسم للمعركه وسيفه ابيمينه

وثغره ويه الصارم ايردد نشيده

ويدري جاسم حنته من دم وريده

ورمله تتأمل رجوعه رمله تتأمل رجوعه

* * *

واگف ابصدر المخيم ينظر البرج المعاره

امتوّج ابهيبة محمّد الحيدر يمثّل أدواره

طلع مثل الحسن يمشي والوجه تسطع انواره

للتضحية ثغره ابتسم من طلع من بين الخيم

والنصر بجبينه انرسم والحرب تكشف أسراره

لبو اليمه أيمثّله بالصبر جاسم

وضربة الصارم مثل بدر الهواشم

ومثل الأكبر من يشد عالسيف ايده

ويدري جاسم حنته من دم وريده

ورمله تتأمل رجوعه رمله تتأمل رجوعه

* * *

لمن اتوسط الحومه ابحالة الأكبر تذكّر

التهب سيفه ابنار زوده ونار حزنه ابگلبه تسعر

صاح لو أگلب الحومه لو أوفّي بثار الأكبر

صوّت على صفوف الحرب لو أطفي نيران الگلب

لو اگلب الحومه گلب ابعزم گلبي وسيف حيدر

وگف جاسم يرتجز وسط المعاره

لابن عمه الأكبر ايطالب ابثاره

يريد يوم الخندق ابسيفه يعيده

ويدري جاسم حنته من دم وريده

ورمله تتأمل رجوعه رمله تتأمل رجوعه

* * *

غايته نصر العقيده والحرايب ما تهمه

ورمله من شافت ولدها يرتجز بسم ابن عمه

نادته حيّاك يبني من الدليل اكشفت همّه

نِعم الولد نِعم الولد حاشاك تنقض بالعهد

ابچفك حُسام المعتقد لو حسم واثق ابحسمه

يطفي جمر الگلب من ينضح حسامك

والشهادة ابدمك اتطرز وسامك

والمجاهد موقفه اليضمن رصيده

ويدري جاسم حنته من دم وريده

ورمله تتأمل رجوعه رمله تتأمل رجوعه

* * *

انفرد جاسم بالصفوف وشال البنود او گطعها

ولوه الجنحين او گلبها على الگلب واختل وضعها

ابرنّة الصارم خطابه أو بالرمح منهج شرعها

ابسيفه الشهم أبده الوعظ الماچانت اتأدي الفرض

أرغمها تسجد عالأرض أو بالرمح يحسب ركعها

من يأذن سيفه تسجدله المعاره

والوضوء إيصير من دمها التجاره

ابشسع نَعله الگدر ناصبله المكيده

ويدري جاسم حنته من دم وريده

ورمله تتأمل رجوعه رمله تتأمل رجوعه

* * *

انگطع شسع النعل منّه او عالارض أحنه قوامه

او لا تگول ابحرب واگف واگف ابروضة هيامه

او عيّن الأزدي طبرته والگدر شائت أحكامه

الجاسم تصوّر منظره هلال او تكوّر عالثره

او بالدمه اتفايض منحره حنته دموم الكرامه

هوت فوگ الثره من العليّه الثريه

وانطفت أنوارها ابكهف المنيه

هوّه هذا الأمل هالمعرس يريده

ويدري جاسم حنته من دم وريده

ورمله تتأمل رجوعه رمله تتأمل رجوعه

* * *

هلال جاسم على الغبره طاح من برج الثريه

ورمله صاحت آه يبني بين مصابك عليّه

ريت من گبلك يجاسم كون تآخذني المنيه

يبن الحسن خان الدهر

خلاني محنيه الظهر

من شاهدت جسمك وذر

اعرفت يا جاسم أروح اميسره بين آل اميه

* * *

دمشق ١٩٨٠ م

جهاد الأكبر عليه السلام

آنه الأكبر وبجهادي النصر ديني اضمنه

وصفحة الاجيال تبگه ابفيض دمي معنونه

هذي آفاق الإمامة اتصير للمؤمن علامه

ابفيض دمي امعنونه (الله) النصر ديني اضمنه

* * *

آنه الأكبر من جهادي شرّعت نهج الكرامه

وصفي من وصف النبوه وفرعي من أصل الإمامة

اشبه المصطفى بخلقه وخُلقه وبمنطق كلامه

بأوصاف جدي منوصف وعن النبي ما اختلف

وبالحرب أنعد بألف وشدة الصارم علامه

أرسم ابساحة قتالي صور لأهل الفاكره

صور جذّابه أبوصفها من معاني حيدره

الزود والعز والشهامه اتصير للمؤمن علامه

ابفيض دمي معنونه (الله) النصر ديني اضمنه

* * *

هِمّة الوجدان أصدق هِمّه للرايد يجاهد

ينظر الهمّة جهادي لو طلب للوصف شاهد

ابذلت للمعتقد روحي وعن سنن أحكامه ذائد

من شفت الأنصار انتهت وابدمها للعز اشترت

ابحجر الشهاده من هوت بيّنت صدق العقائد

من هوت أنصار ديني للعزم سيفي استعد

وافتحت چف الشهاده وخذت سيف المعتقد

كل بطل يعرف مهامه اتصير للمؤمن علامه

ابفيض دمي معنونه (الله) النصر ديني اضمنه

* * *

موقفي الحاسم يضمّن شرح منهاج البطوله

والقرار إبحكم چفي وصارمي ايضمّن فصوله

واسمى غايه اللي ردتها نصر دين الله ورسوله

تنجح الغايه الساميه لو دار گطب التضحيه

ابدم الأحرار الواعيه ترتوي فروعه واصوله

أصفه أنواع النسوغ التنطي للدين الثمر

هوه دم الاعتقاد اليجري من گطع النحر

وللظلم يكشف ظلامه اتصير للمؤمن علامه

ابفيض دمي معنونه (الله) النصر ديني اضمنه

* * *

اسلكت درب التضحيات وأبد ما اغيّر مسيري

هذا سيف الاعتقاد ابچفي ويقرر مصيري

بالحرب رنّة السيف اتصرّح ابمنطق ضميري

حاسم يمثل معتقد وايعبّد ادروب الرشد

ويّه العزم سيفي اتّحد ويعجز أيكفّيه غيري

كل بطل سيفه اليمثله لو دخل للمعركه

وآنه سيفي بالمعارك سيف عزمي ايشاركه

وسيرة الحق باستقامه اتصير للمؤمن علامه

ابفيض دمي معنونه (الله) النصر ديني اضمنه

* * *

الرايد أيجاهد ابعزمه يدخل الحومه ويجاهد

الثرثره ما تنصر الحق ولا تخلّي الدين خالد

اليدّعي ابنفسه مجاهد خلي دمه ايصير شاهد

بدمه يقدّم شاهده للحگ ضميره أيردده

ولحسين آنه معاهده اشرح ابدمي العقائد

آنه الأكبر من أجاهد عن بصيره ومعرفه

وأبد ما أنحرف خطوه عن طريق المصطفه

اقتدي ابسيرة نظامه اتصير للمؤمن علامه

ابفيض دمي معنونه (الله) النصر ديني اضمنه

* * *

اسمعنه صرخة علي الأكبر وينه اليطبّق أقواله

ومثله يوگف بالمعاره ويفتدي النهج الرساله

اتصوّر الأكبر ويومه او وگفته ابساحة قتاله

يحامي ويذب عن غايته واحسب جروح الصابته

وطبرة العبدي ابهامته وشوف أبوه اشلون حاله

وامّه من خيمتها نادت يا شبيه المصطفه

والدك ناداك عگبك يبني عالدنيه العفه

وبالصبر گلبه اهتمامه اتصير للمؤمن علامه

ابفيض دمي معنونه (الله) النصر ديني اضمنه

* * *

وليله من شافت ولدها منصرع فوگ الوطيه

امچفن بذاري الرمال امغسل بدم الحميه

هلّت دموع المصيبه وشاهدت عگبه المنيه

ظل جسم الأكبر عالثره

وجثّته ابدمه امعفره

دارت عليه الدايره

أشبه الوادم ابجده وجسمه عالغبره تعفر

من الخيم فزعت العيله تريد تنظر حال الأكبر

صدگ فوگ الغبره مرمي وطاح من ظهر المسفسر

زينب جبيلة هالحرم

من إطلعت من الخيم

گلب ام الأحزان انجسم

شافت حسين اعله جثة الأكبر ظلوعه حناها

يصيح يا هاشم إسرعوا شيلوا هالجثه ابدماها

وينكم يهل الشهامه چبدتي الأكبر سلاها

ما اگدر احمل جثته

حيلي انضهد لمصيبته

وهاشم ابهمه شالته

للخيم ودّت الأكبر والحرم حاطت اتشمه

* * *

دمشق ١٩٨٠ م

من أجل العقيدة

ثوره من أجل العقيده اموهّجه ابدم النحر

زاهره ابشعلة هدفها تحيي آفاق الفكر

غاية اليضمن رصيده ثوره من أجل العقيده

موهّجه ابدم النحر (الله) تحيي آفاق الفكر

* * *

هذي ثورة اعتقاد اتفجرت بارض الكرامه

ترفض اللي راد عرش الحكم من أجل الزعامه

تريد من دور التبنّي تظهر اليبدي اهتمامه

ودور التبنّي بكل عصر أيقاده مشعل للفكر

ويفتّح ابواب النصر ويشد للمؤمن وسامه

ظهر ناتج هالتبنّي اويه الفكر من ائتلف

لا مسيره بلا عقيده ولا عقيده بلا هدف

اليوم عاشوراء نعيده ثوره من أجل العقيده

موهّجه ابدم النحر (الله) تحيي آفاق الفكر

* * *

شرح هذا الدور واضح اسس كل فرد اعتقاده

يسلك الحق عن بصيره وعالنفس يبني اعتماده

وكل شخص يعتبر نفسه ابذاته مختصّه القياده

هالحاله مرآة النفس بحكم المواقف تنعكس

لكل مجتمع تشرح درس نصرة الحق بالشهاده

بالوفه انخوض المعارك وبعزمنه انشاركه

وكل شخص يعتبر نفسه قائد بهالمعركه

يآخذ الحگ اليريده ثوره من أجل العقيده

موهّجه ابدم النحر (الله) تحيي آفاق الفكر

* * *

ثورة المجتمع أعظم ثوره عالظلم وطغاته

تمثّل البركان لمن ينفجر يعرض صفاته

وتنشحن طاقة رجاله ابمعتقدها وخيّراته

ومجتمع هالأمه انعرف اسلامي وابعزمه انوصف

والراد يوصل للهدف يلتزم نكران ذاته

حالة النكران ذات ايكون بيها نتصف

وخطوه عن درب الشهاده ما نميل وننحرف

ونكسب الغايه البعيدة ثوره من أجل العقيده

موهّجه ابدم النحر (الله) تحيي آفاق الفكر

* * *

اليلتزم نكران ذاته وابثقة نفسه يجاهد

ويعمل إبدوره التبنّي ويمضي للغايه ويعاهد

ابعزمه بين آونه وأخرى بالطليعه اتشوفه رائد

بأقدام عزمه اتشاهده راية جهاده ابساعده

وصوت العقيدة أيردده ويقتدي ابسيرة القائد

اليلهج ابصوت الشهادة عن بصيره ومعرفه

أيضوّي مشعل اعتقاده ابدمه لو شافه انطفه

للنصر يعرض وريده ثوره من أجل العقيده

موهّجه ابدم النحر (الله) تحيي آفاق الفكر

* * *

أسمه غايه الانتفاضة لو بدت من الضماير

وأعلى أصوات الجهاد الترتفع من المناحر

وأروع أوصاف المجاهد واعي واعله الظلم ثاير

هاي الأوصاف الساميه تحملها أهل التضحيه

تنجح ربات التوعيه وكل وفي بإيمانه ساير

هذي أوصاف النزاهه اللي بناها المعتقد

انوجدت ابجيش الإسلام أو كتب للأمه عهد

وعالشهاده اتشير ايده ثوره من أجل العقيده

موهّجه ابدم النحر (الله) تحيي آفاق الفكر

* * *

الينظر الجوهر الثوره بكل جوانبها المهمه

أيشوف هالثوره تمد الصله لثورة أبو اليمه

ويظل سيف الاعتقاد ابكل عصر قاطع إبحَسمه

اليوم الحرايب فاصله وللنصر تمشي القافله

وتبگه مواقف كربله تفضح الطاغيه وظلمه

بكل فجر عاشور يصبح والحرايب فاصله

وكل أرض من هالأراضي عدنه صارت كربله

والحرب تبگه مديده ثوره من أجل العقيده

موهجه ابدم النحر (الله) تحيي آفاق الفكر

* * *

صوره من الغاضريه اتجسّمت بأفق الحرايب

تشوف جسم حسين دامي ومنصرع بين الكتايب

وبعد موقف من عقيلة هاشم وجور المصايب

شافت شمس فوگ الثره

لاچنها جثه إموذره

والگمر يم الگنطره

بين شمس وگمر ظلت تعدي والجمره ابصدرها

* * *

دمشق ١٩٨٠ م

رجوع السبايا

رجع يحسين الظعن يريد يحسبلك محن

آنه زينب يبو اليمه اتكفلت هاي الايتام

گوم شوف الغاضريه أشد لو محنة الشام

رجع يحسين الضعن

* * *

يا حسين الظعن عوّد گوم وانظر حال ظعنك

رجع من الشام لاچن هالظعن يعتذر منك

لليسر مغصوب راح وما حضر ساعات دفنك

واُم الخدر نادتك يا والينه

اگعد ودلّينه اعله گبرك وينه

هاليوم من اليسر للطف جينه

ارجعنه تدري ابيا وضع أگعد ومني استمع

يالتگول ابگطع نحري اتحملت كل المهام

گوم شوف الغاضريه أشد لو محنة الشام

رجع يحسين الضعن

* * *

من رحت عنك يسيره وأتركت جسمك مگطع

ما چنت أدري أشوفك بالگبر لو ردت أرجع

اشلون ترضه الغاضريه تصير الك يحسين مضجع

وعرش الجلاله يا شهم يتمناك

يصبح الك مضجع ويزهي بمعناك

يحسين لو تقبل أتوسد ويّاك

ريت يخلص هالعمر ولا يشوفوني ابيسر

اميسره وعدواني تنظر إلي أبعين الانتقام

گوم شوف الغاضريه أشد لو محنة الشام

رجع يحسين الضعن

* * *

باليسر يحسين عگبك نفّذت كل الوصايه

رفرفت عالعيله روحي وعوّضت طيحت الرايه

انشد الراس ويخبرك باليسر راسك اويايه

شاهدني لمن چنت ألم أطفالك

وشاهدني من اتكفلت بعيالك

وكل سهم رجعته ابگلب چتالك

العيله ما شافت ألم من عگب حرگ الخيم

عالحرم خيّمت روحي وعوّضت حرگ الخيام

گوم شوف الغاضريه أشد لو محنة الشام

رجع يحسين الضعن

* * *

يا حسين احسب سهامك وآنه خل أحسب سهامي

وشوف آلامك الأصعب وأشد لو شدة آلامي

لو گلت مگطوع نحري جفني مثل النحر دامي

ولو گلت صوّبني الحجر بالهامه

اجبيني بالمحمل شابهه بآلامه

يحسين گلبك خل يعد سهامه

انصاب بالطف فد سهم وشاف من عنده الألم

لاچن آنه من الشماته اتحملت كثرة سهام

گوم شوف الغاضريه أشد لو محنة الشام

رجع يحسين الضعن

* * *

اگعد واحسب جروحك وآنه خل أحسب جروحي

وشوف جمر العطش أكثر يستعر لو جمر نوحي

والذي غيّبوا روحك باليسر غيّبوا روحي

امن الكوفه ومن الشام عانيت جروح

واليسر ما خلاّلي مهجه ولا روح

ومثل الخيم تستعر جمرات النوح

نار گلبي المضرمه من الليالي المظلمه

اعلگت گلبي لليتامه ونوّرت ذاك الظلام

گوم شوف الغاضريه أشد لو محنة الشام

رجع يحسين الضعن

* * *

گلبي مثل الگمر يزهي ونوّرت ذيچ الليالي

والشمس راسك يخويه عالرمح يزهر گبالي

عالرمح مرفوع طول الدرب يتفگد اعيالي

وبالدرب طفله اعله الترب عفناها

وراسك ثگل للطفله ظل يتناها

والناس تنشد عنّك اسمعناها

راسمن هذا انگطع؟ وعالرمح ليش انرفع؟

جاوبتهم بالمدامع عالرمح راس الإمام

گوم شوف الغاضريه اشد لو محنة الشام

رجع يحسين الضعن

* * *

گلبي بالكوفه والشام اتمسّك ابميثاق صبره

والخيم من وجّروها أصبحت مشعل الثوره

واحملت كل هالمصايب من أجل تنجح الفكره

يحسين اختك زينب وتدريني

ابصبر الگلب نجّحت ثورة ديني

واسبيت بالشام الذي سابيني

زينب آنه الصابره ومثل شخصك ثايره

امن اليسر يحسين اجيتك حصّلت أعظم وسام

گوم شوف الغاضريه أشد لو محنة الشام

رجع يحسين الضعن

* * *

يا حسين اكشف تراب اللحد واتلگّه الضعينه

لمّن اينشدوني عنّك شرد اگول حسين وينه

گوم باصرني شجاوب لو رجعنه للمدينه

وين التكفّل بالحرم

ومرفرف ابچفه العلم

وفراگه أصعب كل ألم

يبو اليمه گوم وانظر حالة العيله اليساره

صوغه جابتلك اوياها النصر وأعظم كل بشاره

گوم ردّلها الجميل ولا تخليها حياره

جابتلك بشارة نصر

لا تغض عنها وتعتذر

خمّد جمرها المستعر

انچان ما تگدر تردهن خلها تنحب فوگ گبرك

* * *

طهران ١٩٨١ م

الحسن بن علي (عليه السلام)

الليله جبرائيل بالسماء أيحوم

ينعه روح الدين والحسن مسموم

* * *

أمسه جبرائيل ناسج مدمعه ابنار المصايب

ايحوم بالسبعه العوالي ابلهجة الآهات ذايب

وأمسه كوكب للمحاسن عن سمه الأحكام غايب

بغيابه آدم منصدع ونوح ابمصابه منفجع

وأمسه الخليل بهالوضع وگلب ابن عمران لاهب

عيسى بن مريم بالحزن مضروم

للنبي يواسوه والحسن مسموم

* * *

الليله أمست عالخلائق ليله مشؤومه ورهيبه

للغري الأملاك نزلت لاچن بحاله غريبه

تواسي حيدر بالمصاب اللي گطع چبدة حبيبه

هالليله فطرس منوجل وميكال للمدمع يهل

بالحزن صعصع متصل وخِذَت دردائيل ريبه

دمعة إسرافيل فايضه من دموم

لحيدر إيواسوه والحسن مسموم

* * *

الليله ليلة حزن دامس والگلب محتار بأمره

من ألم جرح اللي صابه بعد ما يمتلك صبره

شيصبر وشاهد الحور من الحزن تسچب العبره

حوى انزلت متروعه ومريم تحن بالفاجعه

وچبدة خديجه امگطّعه وآسيا ابلوعة الزهره

زينب تنادي من گلب مالوم

يواسن الزهراء والحسن مسموم

* * *

أمست الخمسه الأصول امصوّبه بمنهج شرعها

وظهر عالقرآن حزنه والسور فايض دمعها

والفروع أمست حزينه والصلاه عزّت ركعها

والحزن عالمبدأ ظهر والمصحف أيعزّي السور

چبد الحسن من انفطر اتغيرت الدنيه أو وظعها

تصرخ الآيات والشرع مهظوم

والعقيده تنوح والحسن مسموم

* * *

اتصوّبت مكه الشريفه بهالمصاب اللي دهاها

وبالعيون ايفيض زمزم والحجر الأسود نعاها

والشمس حثها الغروب وغده يحاربها بسماها

اوياها الكواكب لايعه وغابت إبّرج الفاجعه

وشمس المجد متورّعه والگمر غرّب اوياها

كوكب الإيمان غرّب ابهاليوم

والشمس تنعاه والحسن مسموم

* * *

گضه نحبه بين أهله وكل إخوته احضرت يمّه

محمد وبدر الهواشم إخوته اليجلون همّه

بحجر أبو السجاد مرمي يمسح اجبينه ويشمّه

وعياله للمدمع تصب جمرة مصابه بكل گلب

لاچنّه ما مات إبغرب مثل حالة أبو اليمه

حايم المظلوم والدمع مسجوم

وبمصابه يحوم والحسن مسموم

* * *

الحسن بالطف ريته حاضر ينظر لحال الهواشم

شابچه اعليها العوالي اموذره ابحد الصوارم

ويستمع صرخات رمله من وگع عالغبره جاسم

صاحت صوت يوليدي وفّيت رباك

بالميدان أچهَب وطيّعت عداك

عالتربان متغسل بفيض دماك

رمله شافت جسم إبنها كوكب ابين النجوم

* * *

يبني نفّذت الوصيّه مثل ما وصّاك عودك

حجّلت خيل آل اميه بدمها يالحجّلك زودك

چفوفك بدم الكرامه اتحنّت وصارت شهودك

يالوصاك والدك تنصر الإسلام

ترضه اليوم أمشي للكوفه وللشام

بسبي الگوم ويه الحرم والايتام

إنته حصلت الشهاده وآنه حصّلت الهموم

* * *

دمشق ١٩٨٠ م

الكاظم حياتي وروحي

الكاظم حياتي وروحي وجروحه مثل جروحي

أرد اگعد اسحب آلام واشكيله جور الأيام

الكاظم حياتي وروحي

* * *

اتشوف كل مغرم وعاشگ لحظه ميفارگ حبيبه

ومن يغيب المحب عنه ايگول محبوبي اشيجيبه

هاي معروفه المعاني ولا تظن بيها عجيبه

أحچي ابصراحه بلا خجل هايمه الروح بهالأمل

والگلب مصيوب ابعلل وموسى ابن جعفر طبيبه

للكاظم أشكي العلّه وشكوة العاشگ تحله

وابحبه دلالي هام واشكيله جور الأيام

الكاظم حياتي وروحي

* * *

گلبي هايم بالمحبه وأرد أصارح أهل ودّي

انعجنت بهالشوگ روحي وبالمحبه عبرت حدّي

ولجل محبوبي الأحبه الناس كلها اصبحت ضدّي

لجل الأحبه اتغربت وبهالأمر ما حسبت

مثله بمصابه اتصوبت ومثل چبده انگطع چبدي

الكاظم ربيع أيامي وآلامه مثل آلامي

فارگته اكثر من عام واشكيله جور الأيام

الكاظم حياتي وروحي

* * *

عايش أيامي زهيه وگلبي بالكاظم امولّع

ما افارگ روض حبه وصار إلي بهالجنه مرتع

ما چنت أدري الزمان أيخون ومن الجنه أطلع

جنة الكاظم جنتي وگضيت بيها دنيتي

والموسى أعرض شكوتي وانتظر يا يوم ارجع

يا يوم اوصل يمه وذاك الضريح اشتمه

تتحقق النه الأحلام واشكيله جور الأيام

الكاظم حياتي وروحي

* * *

يم ضريحك چنت ذايب سارح ابشوگي وهيامي

وعالبعد هاليوم تسمع الك اشكيلك آلامي

مثل ون الدوح ونّي والدمع بالجفن دامي

عالبعد اشكي حالتي يا موسى تعرف غايتي

شوفت ضريحك منيتي وانتظر ترجع أيامي

أحمل مرار الغربه لاچن فرگتك صعبه

وجرح الگلب ما يلتام واشكيله جور الأيام

الكاظم حياتي وروحي

* * *

ما تهمني الغربه لاچن فرگتك تصعب عليّه

وردت اعرضلك شكايه وتدري يالكاظم اشبيه

وتدري چم عيله ابجوارك ذايبه ابجمر الرزيه

چم طفله تدري وچم طفل حاير وگلبه منوجل

وچم شاب بالسم منچتل ومثلك اتحمل أذيه

چم ام تعنّت يمك تريد الفرج واتحشمك

وآنه مثلهن منظام واشكيله جور الأيام

الكاظم حياتي وروحي

* * *

بالسجن گضّيت عمرك والسجن تدري بمراره

چم موالي اليوم مثلك للسجن جابه أخطاره

تدري چم مؤمنه ومؤمن دنت ساعة احتضاره

ننتظر ساعات الفرج والنار تسعر بالمهج

يالنورك ابورحي ابتهج والگلب شيطفّي ناره

للكاظم أشكي الحاله من دمعتي الهماله

وجفن المجرّح مينام واشكيله جور الأيام

الكاظم حياتي وروحي

* * *

آه يا لوعة الكاظم گلبه متگطع ابسمّه

ومن كثر ثگل السلاسل من گبته يسيل دمه

ومن گضه نحبه غريب وشيعته دفنته الجسمه

وجده الحسين بكربله

دم الكرامه معسله

ولا واحد اتعنه اله

جسمه ظل إعله الوطيه امچفّن بذاري النوايب

* * *

طهران ١٩٨١ م

في قصائد اللطم

محمد بن الحنفية

(البحر الطويل)

زينب آنه يمحمّد أريد اوصفلك الحاله

لمن طاح اخويه حسين رحنه بسبي الجمّاله

* * *

يمحمد يخويه اشلون حاله البيها مرينه

لا وليان لا صيوان وبهالحال ظلينه

آنه ورمله وام كلثوم ورباب وليله وسكينه

لمن غابت الوليان صرنه ابولية العدوان

علينه حرگوا الصيوان

واللي يذبح الوالي بعد ما يرحم عياله

* * *

يمحمّد ابعينك شوف گلبي الدامي المخذّم

متصوّف ابخمس جروح ما ظن بعد تتبلسم

جرح من سهم ابن كاهل گلبي برميته إتألم

العبد الله السهم صابه وبيّه أثر اصوابه

وصفّه حرمله صحابه

أبو اليمه لون مطلوب توفي الطلب أطفاله؟

* * *

وجرح الثاني يمحمّد من الأول أشد وأكثر

لفاني ابطبرة العبدي الصابت هامة الأكبر

ولمن شفت عالغبره شبيه المصطفى اتكوّر

اگعدت ردت أحسب اجروح وروحي رافگت روحه

وچبدي اتلاهب ابنوحه

روحي امتابعه الأكبر وآجالي اويه آجاله

* * *

وثالث جرح يمحمد وسيع وما أظن يلتام

لفاني ابطبرة الأزدي الخلّت بالگلب آلام

ولمن شفت بالحومه طفوا شمعة عرس جسام

طفوّا شمعة اوجودي وجاسم صاح يا عودي

دم التضحيه اشهودي

الوصيه ابدمه وفّاها وبالطف غرّب اهلاله

* * *

ورابع جرح يمحمّد ابعين النايبه اتشوفه

انصبت ابطيحت العباس لمن گطعوا چفوفه

ومشاني سبية گوم للشامات والكوفه

صواب العمد سابيني ودمه اتفايض ابعيني

وسهم الشاطي راميني

من منحر گمر عدنان عين الحرم همّاله

* * *

وخامس جرح يمحمّد كلف ما ينگطع دمه

لفاني ابسهم المثلث الصوّب چبد أبو اليمه

گمر دنياي چان حسين عگبه ليلتي ظلمه

سهم الصاب چبد حسين صارن بالأثر سهمين

ابگطع چبده اگطعوا چبدين

ومثل الشمس راس حسين يزهر فوگ عساله

* * *

يمحمّد وحگ عيناك ما ألّمني كل الصار

هدموا على عيالي الدار روحي انبنت الهم دار

من شبوا خيمنه بنار باجدامي سحگت النار

لاچن الهظم روحي وكثّر ونّتي ونوحي

وعليّه هيّج جروحي

لمن شفت اخويه حسين ثنّه عليه چتّاله

* * *

يمحمّد يريت اتشوف اخويه حسين لمن طاح

كل ظني تعب جسمه ونزل من عالمهر يرتاح

ما ادري ابروحه أيجود وعليه حايم الذباح

يخويه ما حسبت حساب جبهته بالحجر تنصاب

ودم نحره يصير اخضاب

ولا أدري بالمثلث الصابه وگطع دلاله

* * *

يمحمّد لون ميطيح اخويه حسين جدّامي

ما چان اهجمت هالگوم عليّه وحرگت خيامي

ولون ما ينسلب جسمه ما تتسلب ايتامي

نحره انگطع بالبتار سلبوا جثته الاشرار

والحيّرني لمن صار

صدر حسين ميدان وعليه جالت الخياله

* * *

يمحمّد يسبع الخيل ريت اتشوف ذيچ الخيل

من هجمت على الصيوان وعيالك تصيح الويل

ريت اتشوف ذاك الليل من عسعس علينه الليل

اشوف أطفال مسلوبه اشوف خيام منشوبه

اشوف الحرم مرعوبه

خلصت من النهار الفات إجاني الليل وأهواله

* * *

الكاظمية المقدسة ١٩٧٦ م

سر الله المكنون

(الهجري)

يا علي ابحكمه وجودك خالق الكون انعبد

صاح گبل الوحي سيفك (قل هو الله أحد)

* * *

يا علي من لطف ذاته الباري كوّنلك جسم

ونوّرك من نور علمه وصرت مجمع للعلم

علي ومن رفعت علوّك صاغلك هذا الاسم

وابتفاسير المعالي اسمك واسمه اتحد

* * *

يا علي كوّنك ربك من قبل نشأت الروح

وبين ساق العرش نورك زاهر ابحكمه وضوح

عين لام وياء، خط القلم اسمك على اللوح

الباري راد اسمك لاسمه أيشابهه ابمعنه وعدد

* * *

يا علي من عالم الذر الك خصصنه الولاء

أوفياء وياك نبگه بعهد حبك أوفياء

اشلون ننقض بالعهود والك شهدت الأنبياء

بعهد حبك والولايه كل نبي ومرسل شهد

* * *

يا علي لوما ولائك منغفر لآدم ذنب

ولا سفينت نوح ترسي بذاك طوفان الصعب

وجدك إبراهيم شاف گباله نار وتلتهب

قسم عالخالق باسمك واللهب منها خمد

* * *

يا علي معجزة شخصك حليه من جوهر نضيد

وانبجح داود بيها من تليّنله الحديد

وحكمتك ميزان حق الوادم بيوم الوعيد

تنكشف كل الخفايه لو علن يوم الوعد

* * *

يا علي سليمان من گلب صافي هتف

ولعرش بلقيس حصّل گبل ميرد الطرف

وابّساط القدره صارت آيته وبيها انعرف

غبطة اسليمان إنته ومن بحر حبك ورد

* * *

يا علي عطر الولايه ما يضاهيها عطر

من نفح روضة ولائك موسى اصبح مبتشر

سرّك الصوّر عصاته افعى أكّاله سحر

نورك بطور سنين لابن عمران انفرد

* * *

يا علي أثمار حبك بدت من مربع خصيب

والرشف من چاس حبك بالدهر قط ما يخيب

عيسى لو ما رشف چاسك ما تشبّه عالصليب

عيسى مثل ادريس حكمه للعله بسرك صعد

* * *

يا علي اسمك يقين الأنبياء السالفه

كل نبي ومرسل بسرك گدر يتمم موقفه

جلّت الخالق قدرته الأظهرك للمصطفه

معجزة إظهار شخصك صارت الكعبه مهد

* * *

يا علي مهبط يقينك گبل ما يهبط الروح

ومجمل الآيات وصفك والعزم مركز وضوح

اثلاثه وثمانين غزوه بسيفك تقدّم شروح

اتجسدت بيك الأصول وذو الفقار الهن عمد

* * *

يا علي للدين عزمك ضمن هذا الانتصار

سمعنه هاتف من الباري يهتف بكل افتخار

لا فتى إلاّ علي لا سيف إلا ذو الفقار

يا هو مثلك للاعادي بوقعت الخندق صمد

* * *

دمشق ١٩٨٠ م

الحسين (عليه السلام) كعبة الثوار

(الهجري)

حسين للتضحيه اتطوّع مو أمر حتمي انفرض

ومصرعه بعالم العلوي گباله عاللوح انعرض

* * *

حسين يلهج بالشهاده من گبل آدم وشيث

هذا مو أمر اعتباطي لا ولا خدعة حديث

الباري ناداه من تشوف الدين باسمك يستغيث

ضحي يحسين بوجودك لو شفت امره امتعض

* * *

مثل ما واعده الباري لأبو اليمه بعينه شاف

ممتعض دينه ويحس بمنهجه صار اختلاف

والإسلام أصبح غريب إبّين ثُله من الاجلاف

اخذ گلب الدين بيده حسين ويجس النبض

* * *

حسين من شاف بحياته انخذل دين الله الحنيف

وموقفه ابين آل اميه تغيّر وأصبح ضعيف

للرماح وللسيوف تقدّم بنحره الشريف

وانرصد برج الشهاده وجفنه عالذل ما غمض

* * *

حسين من مكه الشريفه رصد برج التضحيات

وعرف من يسيل دمه يصير مشعل للأباة

ثار من أجل العقيده وأبد ما ساوم طغاة

قدّموا زينة الدنيه لقائد الثوره ورفض

* * *

رفض كل المغريات ويدري لو بايع يزيد

يصير أمر الدين قصه ومصحف الباري نشيد

لچن ثار لأجل دينه وشيّده بگطع الوريد

عاهد يضحي بوجوده لدينه وأبداً ما نقض

* * *

لون ما ثورة حسين الدين چان أمره انتهى

وثورته ما چان صارت مدرسه لأهل النهى

حسين واحد ماله ثاني ولا شبيه يشابهه

واليريد يخوض نهجه يدفع المنحر عوض

* * *

بكل عصر تگدر تسير بنهج أبو اليمه الشهيد

طالما كل عصر يملك شخص من زمرة يزيد

واليريد يعيش بالعز لا يمد للذله ايد

والملك إيمان صافي من أبو اليمه اتّعظ

* * *

حسين حصّل عالشهاده وطاح بالمصرع جريح

وبالمباهل صار أعظم من اسماعيل الذبيح

اشما يطول العمر يبگه دم أبو اليمه يسيح

وشرّف العالم العلوي ابنهضت لمن نهض

* * *

دمشق ١٩٨٠ م

ماذا جرى في الطفوف

انجول ميدان الطفوف واللي ما شايف يشوف

جثث متغسّله ابدمها وحرم ما بين الصفوف

واللي ما شايف يشوف

* * *

شوف يالماچنت شايف حالة اعيال الرسول

أمست ابليلة الحادي عشر ماخذها الذهول

وجثث ولياها رميّه وتسحگ اعليها الخيول

وأمست ابدور الهواشم غايبه ابّرج الكسوف

واللي ما شايف يشوف

* * *

شوف يالما چنت شايف جثث وبلايه رؤوس

امصرّعه فوگ الوطيه وتنحبس منها النفوس

وعالعواسل غدت تزهي منوّره مثل الشموس

ومن دمه نحور الشهاده للسور كتبت حروف

واللي ما شايف يشوف

* * *

شوف يالما چنت شايف حال بضعة فاطمه

أمست الليلة غريبه لا كفيل ولا حمه

والكفلها اعله الشريعه مغسّل بفيض الدمه

ورايته الچانت ترفرف طاحت بگطع الچفوف

واللي ما شايف يشوف

* * *

شوف يالما چنت شايف نور وجه المصطفه

يشع من غرّة الأكبر لچن بالحومه انطفه

ولو ردت وصف الرسول ابوجه الأكبر وصّفه

بالحرب وجه النبوه اتخضب بدم الحتوف

واللي ما شايف يشوف

* * *

شوف يالما چنت شايف شاب بالدم حنته

تشوف جاسم عالحرايب لمن صارت زفته

ورمله من جمر المدامع وهّجتله شمعته

معرس بوسط الحرايب زفته رماح وسيوف

واللي ما شايف يشوف

* * *

شوف يالما چنت شايف طفل بالنبله انفطم

هذا عبد الله الرضيع النحره مگطوع بسهم

والرباب اشلون تنظر للوريد ايسيل دم

طفل يتغسل بدمه هذا من جور الصروف

واللي ما شايف يشوف

* * *

شوف يالما چنت شايف جسم ذايب بالألم

وانظر السجاد لمّن حرگوا اعليه الخيم

أيشوف خيل وعده ونار اتحيط ايتام وحرم

حاير بجمع اليتامه وغارت عليه الألوف

واللي ما شايف يشوف

* * *

ما شفت ليلة الحادي عشر بالحومه ظلام

شفت بس أنوار تزهي وتشع من جسم الإمام

وبزغ من برج الشريعه كوكب يشع للايتام

يعوّض عهود الكفاله واخذ عالعيله يطوف

واللي ما شايف يشوف

* * *

قم يا أبا الفضل

(موشح)

إجت زينب والضعينه اوياها گوم يا با الفضل واتلگاها

* * *

يعباس اندفنت اوياك الچفوف اكشف اتراب اللحد وانهض وشوف

هاي زينب عوّدت لرض الطفوف تشكي آلام السبي لولياها

* * *

هاي زينب هاي عد گبر الحسين تنشد السجاد وتشوبح العين

اتصيح دليني بگبر عباس وين إخته ما تنسا وما ينساها

* * *

وأسمع السجاد ناداها بدمع عالنهر عباس تدريه منصرع

اوياه زينب إجت ليك بيا وضع أيهيّج جروحك وضع ممشاها

* * *

زينب اتعنت الگبرك معوله للنهر مهرعه اوياها العايله

تدري باختك منك اشمتأمله گبل جابر تسرع الملگاها

* * *

فوگ گبرك هوت يا عباس هاي زينب وباصرها عالعايله براي

اتگلك أرد أحچيلك شسوّت عداي حگها تشكي اليوم جور عداها

* * *

ولمن شخصك عنها بالطف إنحجب وراس أبو السجاد عالرمح إنّصب

امخيّمك حرگوه والخدر إنسلب ولليسر تالي الشمر ناداها

* * *

نادتك صار اليسر يا با الفضل ابرگبة السجاد من حطّوا الغِل

عگب ذيچ الهيبه لَنها اعله الهزل ونوت للكوفه العده بمسراها

* * *

حال زينب صار من حالك أشد والشماته أمضه من سهم وعمد

باليسر تدريها طبت چم بلد وتدري چم طاغي ابعنف حاچاها

* * *

وأشرف إعله الكوفه ظعن العايله بالشماته الناس إجت تستقبله

اعلينه كلها بالحقد متحامله وحصّل ابن زياد التمناها

* * *

وأدخلونه عليه وشاهدنه اللعين وگومه كلها ابّشرته مستبشرين

صاح اخذنه ثارنه بدم الحسين وهاي زينب علي اسبيناها

* * *

وحگ راسك يعباس اتقدمت ليه وبهمه وجداره اتكلمت

گتله آنه بثار اخوتي اتوزمت ونجحت الثوره اللّي فجرناها

* * *

خاب ظن الطاغيه ورد للشتم ينظر الراس الحسين ويبتسم

گتله مجد حسين لتظن ينهدم هاي عزه وبالدمه شريناها

* * *

ونشد عالسجاد لن جاوبه بصوت انفوس أهل الدين لتظنها تموت

ويبگه دم حسين صيحه بلا سكوت وبالشهاده الغايه حصّلناها

* * *

عگب ما خابت أمانيّه وجزع ومن الشام كتاب لجوابه رجع

ومن الكوفه الظعن متوجه طلع وبنصرنه الكوفه غادرناها

* * *

حال مسره الظعن تدري اشلون حال جايره الحدّايه ونحيفه الجمال

وأدمت الرگبة السجاد الأغلال والحرم سوط الشمر يبراها

* * *

من وصلنه الشام شنوصف الشام چم شمر بيها لگينه وچم قُطام

الشام أهلها متابعه اليعبد أصنام بعيد وبزهوة فرح شفناها

* * *

الها لاحت روسكم من عالرماح يزيد من أعلى القصر مبتشر صاح

العيش طاب لآل اميه بارتياح من لسانه الصيحته سمعناها

* * *

إنغمر بالنشوه وتغطرس بالنصر اتصدر المجلس أمير ومبتشر

أظهر أحقاده وتبجح بالكفر وگال وقعه بدر عادلناها

* * *

بينه آمر وأدخلونه المجلسه وراح يتماده ابمرح بتغطرسه

اعتمد لاسلوب التحدي يمارسه وللنبوه اتنكّر لدعواها

* * *

صار إلي دور الچنت أتأمله وحصلت الوگفه الأخيره الفاصله

ثورة حسين البدايه بكربله وباليسر للشام وصلناها

* * *

صحت صوت ومنه ابن هند ارتعد يبن اكّالة الأكبار إشبعد

چتل إخوتي واليسر وعد وعهد والعهود الدين وفّيناها

* * *

إصحه من نشوتك واسمع يا يزيد حسين نجحت ثورته بگطع الوريد

حسين حي ما مات ميموت الشهيد ودولتك بالثوره أنهيناها

* * *

عگب چتل حسين أيامك عدد يا يزيد وتنظر الشملك بدد

اعليك دور الدايره ورايك فند وبنصرنه الدنيه كرّمناها

* * *

حال أميه وأمره للناس انفضح وابتده السجاد بالخطبه وشرح

غاية الثوره أو وصل گصده ونجح وبخطبته الناس وعّيناها

* * *

من الشام لكربلا انوينه الرجوع وصلنه واعله گبوركم نهمل دموع

للمدينه اشلون لو ردنه الطلوع خويه لعيالك ترد ترعاها

* * *

الكاظمية المقدسة ١٩٧٧ م

يا فرج الله

(موشح)

اعيونّنه ابدمع الصبر فيّاضه والمجد ظلت ممحله ارياضه

* * *

تظل تجري اعيونّه ابدمع الصبر وندّعي بهالصبر حصّلنه الأجر

خدّرت أفكارنه أحلام العمر نحس بالذل وعليه نتغاضه

* * *

الصبر عالذل عار دنيه وآخره والاعذار أضغاث نوم وثرثره

الما طلب حگّه نصيبه المسخره ولو حچه الوادم تحور ألفاضه

* * *

بالصبر نتحجج ومرّت سنين نغض عن الواجب ومتخاذلين

النه غايب دوم اله مستنهضين وما نأدي واجب استنهاضه

* * *

لو صدگ نستنهض ونبدي العتاب للإمام ونشتكيله من الغياب

ايكون گبله للحرب نفتح الباب بالسيوف اللامعه الومّاضه

* * *

خل نكف ادموعنه وخل نستعد وخل نِلم هذا الشتات ونتحد

من دمانه انروّي دوحات المجد وللعهد نثبت صدگ حفّاظه

* * *

مجد عدنه محلت ارياضه ويريد نسگي أرضه الطيّبه بدم الوريد

حسين ما وصانه بس نلعن يزيد ونحفظ التاريخ باستعراضه

* * *

أبو اليمه لمن استبسل وثار وبهدر دمه ضمن هالانتصار

راد دوم انتابعه بهذا المسار ومثله لأهوال المحن خوّاضه

* * *

حسين لمن طاح بالمصرع جريح بصوته چان ودمه يتحدّه ويصيح

المسلم المتمايله هبة الريح مجد دينه إعله الحرب حرّاضه

* * *

والذي يمجّد شرف يوم الطفوف بالفكر خل يدخل الحومه ويشوف

سبعه وثمانين تتحده الألوف وبالوغه لبذل النفس ركّاضه

* * *

الكاظمية المقدسة ١٩٧٧ م

مصرع العباس (عليه السلام)

(موشح)

الگمر عدنان العمد من صابه خلّه زينب بالخيم مرتابه

* * *

من عگب ما أمنت حال العيال وسكّنت روع الحراير والأطفال

للكفلها اطلعت تشكيله الحال وبالدمع رادت تضمد صوابه

* * *

معوله اتعنّت لصوب المشرعه وروحها بهضم المصيبه مروّعه

بالصبر والحلم زينب مدرعه وروح زينب للهضم متهابه

* * *

اشلون وگفه اوگفت يم شاطي النهر حايمه اتدور على جسم الگمر

تدري متشمت بوگفتها الدهر واعله زينب كشّرت انيابه

* * *

وصاحت بصوت الگطع منها الدليل وين جسمك يا من لزينب كفيل

التفتت وشافت گمر هاشم چتيل والعلم دم القياده خضابه

* * *

لمن شافت حاله الها اليسر لاح ومن صميم الحزن گلب الحره صاح

يالبنيت الخدر ذاك الخدر راح من هوت فوگ الثره حجّابه

* * *

من إگطعوا چفينك وطاح العلم إنگطع بينه وطاح صيوان الحرم

وانطفت نار الظمه وگلبي انضرم بجمر نار خيامك اللهّابه

* * *

من لهيب الخيم والآم الحزن مصوّب وملتهب گلبي الممتحن

وحگ عينك يا گمر ما چنت أظن تصير عينك هدف للنشّابه

* * *

والعمود الفضخ بصوابه الجبين حنه ظهر اختك مثل ظهر الحسين

امدوهنه وأتلفّت يسار ويمين وصحت توّه الگدر حل مصابه

* * *

العمد آه العمد خلاني أحوم بكربله وأنخاك يا عباس گوم

لون ميصيبك فلا تهجم الگوم وللخيم ما توصل السلاّبه

* * *

إعتلت فوگ النهر صرخات المصاب وألّمت عباس زينب بالعتاب

اشا تحشّم ما يرد الها الجواب الها بس الصده يرد اجوابه

* * *

دمشق ١٩٨٠ م

يوم عاشوراء

(موشح)

اشلون يوم اعله النبوه وآلها من طحت يحسين فوگ رمالها

* * *

اشلون يوم اعله النبوه اشلون يوم البيه جسمك عالثره تغسله دموم

بمصرعك روح القدس محزن يحوم ينعه روحك واوحى ما اوحالها

* * *

اشلون يوم البيه جدك ينظرك دمك ابترب الطفوف ايعفرك

ابعينه چنه ايشوف حزت منحرك وجثتك شمر الخنه اتثنالها

* * *

اشلون يوم الماجره يبن الرسول اخرس لسان الدهر عنّه شيگول

صار صدر حسين ميدان الخيول جالت ومحّد العنّك حالها

* * *

اشلون يوم مصاب وافجع كل مصاب واللي صابك بي گلب والدك ذاب

اشد من يوم الذي بهامته انصاب ومثل دمع امك دمعته الهالها

* * *

اشلون يوم اشلون حالة فاطمه الراسها من نحرك تخضبه بدمه

عاليتامه بالمصيبه امخيّمه وعگبك لزينب تشارك حالها

* * *

اشلون يوم آلام واحزان ومحن بمصرعك يحسين مصروع الحسن

مثلك اوداجه على اثباجه اشخبن من انرفع راسك على عسّالها

* * *

اشلون يوم وزينب اتشوفك ذبيح گوم وادرك حالي يبن امي تصيح

طلعت اتظنك يبو اليمه جريح وعلى صوت النخوه تتعنالها

* * *

اشلون يوم وشبلك السجاد تم بين شدّة حالته وسلب الخيم

اعليه واعله العايله العسكر هجم اشلون جوله وبالمخيم جالها

* * *

اشلون يوم وغيّر اوضاع الزمان لبست الدنيه عليه ثوب الأحزان

دمع واشجان ونحيب بلا هوان والأرض بي زلزلت زلزالها

* * *

الكاظمية المقدسة ١٩٧٥ م

استنهاض وعتاب

(موشح)

يا شمسنه الزاهره الوضّاحه ليل هجرك ننتظر مصباحه

* * *

يا شمسنه البالسراير مطّلع بظاهر الوادم أبد ما تنخدع

هاشمي فرعك وأنزه كل فرع ورده من طيب الأصل نفّاحه

* * *

يا شمسنه الغايبه إبّرج الصبر يمته هالهجران يبزغله فجر

نار هجرك بالضماير تستعر ودمع فگدك للجفن جرّاحه

* * *

نعتب وهالعتب ندري ما يفيد بالعتب جرح التخزّن ما يهيد

إشما نزيد الصبر محنتنه تزيد وأدمت الجبهات لطم الراحه

* * *

اكبدنه من الظلم آلام ومحن وإلك بالمحجوب كلها اتوضحن

وچنها الأرواح من الأبدان إبرحن وهالارواح من الصبر برّاحه

* * *

إحنه للظالم فسحناله المجال وتالي صرنه انصيح يا ذله الحال

الما يسوگه المرضع وطيب الخصال بالعصي ما ينضمن إصلاحه

* * *

ندّعي ودعوانه من نسج الخيال عدنه إيمان الذي إيهز الجبال

الجلد گلبه ومؤمن ايخوض الأهوال ويدخل الحرب ويجول الساحه

* * *

غرگنه بالأوهام من كثر السذوج وإنحجبنه إبضيمنه وذلة الموج

اسفينه الما تهم بملاطم الروج ترتمس من تكثر الملاّحه

* * *

لون نتكاتف على حكم الطغاة ونمد گبل سيوفنه انحور المماة

ابد ما ننصاب ضيم بهالحياة ولا يكثر الظلم سود أشباحه

* * *

ولو صدگ نثبت جداره ونتّحد نوصل ابوحدتنه ذروات المجد

لچن كل واحد ابرايه مجتهد وأصم أبكم عن حچي النصّاحه

* * *

ندّعي ثوار لاچن بس إسم نسينه ثارات أبو السجاد الشهم

إبنهج أبيّ الضيم يمته نلتزم وناخذ ابثاراته من ذبّاحه

* * *

دمشق ١٩٨٠ م

علي الأكبر

(موشح)

ليله صدّت للمعاره ابعينها اتصيح جثه علي الأكبر وينها

* * *

اطلعت من خيمتها محنيه الظهر عالمعاره ابعينها شبحت نظر

ليله عن الأكبر اتريد الخبر والدمع متفايض ابجفنينها

* * *

فاجده اصبي عينها وفاضت العين والدموع اتصيح الأكبر طاح وي

لن تشاهد بالحرب واگف حسين ويمّه جثة الأكبر اموذرينها

* * *

وشافت حسين أعلى جسم الولد طاح يبني عالدنيه العفه المظلوم صاح

وغده أيوسّم شيبته ابدم الجراح واعله حال حسين زاده ونينها

* * *

حسين لمخيّمه وجّه صيحته لن يشوف ابهمّه هاشم حضرته

شار عالأكبر حسين وشالته للخيم بالجثه متعنينها

* * *

لفوا متعنينها وهيّه اعتنت ليه واعله الولد مصيوبه انحنت

بالسعاده فازت امك وأمنت من اوهبت دمك لنصره دينها

* * *

وانته أول گمر من هاشم تغيب يبني بالفردوس خل عيشك يطيب

ومن تطب للجنه وابدمك خضيب الزهره من دمك تخضب جبينها

* * *

ليله من طبت الفسطاط ابورع صابره وحتى الصبر منها جزع

ما تحسّب ليله شاب الها انصرع لاچن اتحسّب بأمر حسينها

* * *

على صواب الهام دمع الأم جره اتحسّب أمر حسين لو شح ناصره

ينذبح ويطيح مرمي اعله الثره وتنظرم عالعايله اصواوينها

* * *

فوگ ابنها اوگفت ليله ونادته هاشم لجسمك يالأكبر شالته

والدك يا هو اللي يحمل جثته لمن اتحيطه العده صوبينها

* * *

يبني حالة والدك للصم تذيب وسهم المثلث لدلاله يصيب

ويبگه جسمه امخضب ابدمه وتريب وعگبه ليلها امغربه وسابينها

* * *

الكاظمية المقدسة ١٩٧٥ م

فراق علي الأكبر

(موشح)

ليله بالخيمه حزينه اشبيها حسين لو الأكبر يعز اعليها

* * *

اشبيها ليله الودعت أول شباب علي الأكبر من بعد جمع الأصحاب

خايفه اعله الولد من طعن الحراب تريده من الحرب يرجع ليها

* * *

اشبيها ليله امگابله وجه الحسين تنادي اخبرني عن ابني صار وين

وأبو اليمه اعله الحرب شابح العين گومي يا ليله اندعي ايناديها

* * *

طبت لخيمتها محزونه اهتفت حره يا رب ليك باللوعه لفت

هالغريبه لدمعة الغربة اذرفت وقسمت اعله الله بصبر واليها

* * *

يا الهي اوليدي الأكبر رده لي ابجاه صبر حسين وبغربة هلي

مثل رجعت يوسف ارجعلي علي جروح گلبي ابشوفته ايداويها

طلعت من الخيمه مفجوعة گلب تنهض وتعثر وماخذها الرعب

لن تشوف الولد رد من الحرب ابفرحة المنتصر متعنيها

* * *

نادته ادريك ملهوف ارجعت تريد تتوادع عگب ما ودعت

امك آنه وبدماك اتبرعت روح يبني لرگبتك ضحيها

* * *

يالعزيز حسين من عندك أعز لچن عن صبره الصبر عيّه وعجز

حين الك بالحومه بن غانم برز صاح شده وصار الأكبر بيها

* * *

روح صبرلي ابوك وأمنه واطلع لحومتك وامرح بالمنه

مثلي چم حره بولدها مدوهنه ويجي ليها حسين ويسليها

* * *

حگه ابوك الدمع من دم يذرفه وعگبك ينادي على الدنيه العفه

حيث بيك أيشوف جده المصطفه وانته لوصاف النبي حاويها

* * *

اتعنه الأكبر للحسين ايودعه أيصبره لفگده وينشف مدمعه

عگب ما ودعه اتعنه لمصرعه ساعه لن لجثته اموذريها

* * *

الكاظمية المقدسة ١٩٧٦ م

أنا زينب

(موشح)

آنه زينب هاك إخذ اخباري يالتناشد ليش دمعچ جاري

* * *

آنه زينب أنه بت سيد المله آنه بت سر الحمد والبسمله

آنه مجدي عالمجد زاد وعله آنه جبرائيل خادم داري

* * *

آنه زينب آنه بضعة فاطمه عالمه من أصلي ما متعلمه

آنه نوري يشع لعنان السمه وتزهي من نور الهدى انواري

* * *

آنه زينب من ثدي العصمه ارضعت آنه بحجور الكرامه ترعرعت

آنه من أصل النبوه تفرعت ومن نسغ طيب إرتون أثماري

* * *

آنه زينب عالنساء إترجّحت آنه بوشاح البتول إتوشّحت

آنه من عالم الذر ترشّحت وخذت من سر الجليل أسراري

* * *

آنه زينب ولرسول الله أنتسب والأصل هاشم وعبد المطّلب

وبالمصايب أُم الأحزان انحسب ويّه الحسين اقترن تذكاري

* * *

افتحت عيني وشفت ضلع امي انكسر وراس أبويه بمسجد الكوفه إنطبر

وبمصاب الحسن صوبني الدهر لچن بعده مرتفع شنياري

* * *

بزود اخوتي مرتفع شنيار إلي وينتخولي يالعقيله اتدللي

بخدرچ وبالدين وصّانه علي وزود اخوتي مصدر استبشاري

* * *

ومن عگب ذيچ المعزّه والدلال تالي لن أنظر اخوتي إعله الرمال

چنت مكفوله وصرت أكفل إعيال والدهر صاح إعلنت اخطاري

* * *

حسين لو ما يفضخ جبينه الحجر وسهم المثلث يصيبه بالأثر

ما عليّه اتخيّم أخطار الدهر ونار اميه ما تشب دياري

* * *

وراسه عالعسال لو ما يرتفع ما تصل للخيم غارات الجمع

ولون چفين الگمر ما تنگطع خدري ما ينسلب ويّه استاري

* * *

وگمر هاشم من هوه اعله المشرعه وشفت چفين الكفاله مگطعه

اظلمّت الدنيه ولفتني الفاجعه وما أميّز ليلي من نهاري

* * *

الكاظمية المقدسة ١٩٧٧ م

حنان رمله

(موشح)

اوياك گلب امك برز يا ريعه ومثل جسمك بالحرب تگطيعه

* * *

اوياك للحومه گلب رمله برز ومثل صوتك بالميادين إرتجز

منشرح للموت ما عيّه وعجز وصار مثلك عالحرب تطويعه

* * *

اتطوّع أيلازمك وابعهده التزم أمل عنده وعالأمل شد واحتزم

گال عن جسام خل اكشف الهم هالفرع من الحسن تفريعه

* * *

الفرع إنته والحسن هوّه الأصل وهالفرع من الأصل ما ينفصل

اوياك للمصرع يجاسم متصل وبايع المظلوم نفس البيعه

* * *

خل اعطر جعودك بدمعه العين وخل أفرّح خاطري بصبر الحسين

بيع دمك واشتري عزّه الدين ولا تصدّع عمّك بتوديعه

* * *

ولمّن اتودّعه وتسفر عالحرب لا تفكّر ودّعت رمله بغرب

گبلك اعله الموت ودّيت الگلب ومن عزم گلبك كسب تشجيعه

* * *

واعله سيفك يولدي شد اليمين ما يموت إلمِن دما يرتوي الدين

يبني خلّد مجدك بمجد الحسين وهالخلود إحتذر من تضييعه

* * *

لا تضيّع مجدك وخطّه بدماك وساوي علّيين الجنان بعلاك

على لسان حسين صوت الحق دعاك إشما يكلف الثمن كون إتطيعه

* * *

امطالبه بدمع الربه ودر الثدي توفي لو للموت ملهوف اتعدي

امك وعاهدت لحسين افتدي وهالعهد دمك حبر توقيعه

* * *

يبني حنّي چفونك بدم الصواب وتظل شمعه موهجه بدرب الشباب

تعيش بالأفكار من بعد الغياب نهج قرآني بأصل تشريعه

* * *

ريت أبو السجاد يرخصني بأمر اوياك أطلع للحرب وافدي العمر

لاچن المعهود أناصر باليسر واليسر أصعب واشد ترويعه

* * *

الكاظمية المقدسة ١٩٧٨ م

حسين مني وأنا من حسين

(موشح)

چبد أبو اليمه السهم من صابه صوّب إبچبد الرسول اصوابه

* * *

عگب ما ودّع أبو اليمه الحرم وطلع آخر طلعه من بين الخيم

إخذ وطر المرجله ولن السهم صاب چبده وما خط صوّابه

* * *

حسين بصواب السهم بالچبد حس وأشد من طعن الرماح السهم مس

أحنه صدره فوگ كربوس الفرس ودمه صوابه لوجهه صار اخضابه

* * *

السهم مض وصار مطلاعه الظهر وچن المحتّم لبو اليمه سدر

جبهته مفضوخة بصواب الحجر وبعد بس سيف الشمر طلاّبه

* * *

صاح بسم الله ومله الچف بدمه صابر ومحتسب وارما للسمه

نزل للمصرع بأصاويب وضمه وعينه ظلّت شابحه أعله أطنابه

* * *

شاهد العسكر عالخيم هجم صاح يالما إلكم اذمام وشيم

اگصدوني ولا تروعون الحرم وللخدر لا تهتكون إحجابه

* * *

والشمر جاوبه حگّك هالطلب وطلّع الجيش التوسط بالطنب

وللجريمه السيفه من غمده جذب إشلون سيف اللي الشمر جذّابه

* * *

سيف شر والشر يلوح ابصاحبه وابن سعد لهالمهمه نادبه

الگطع منحر خامس أصحاب العبه رِگه صدر ابن النبي وما هابه

* * *

فوگ صدر حسين أثنه ركبته وللذبح وسّط السيف برگبته

الراس فوگ الرمح زينب شافته ويّه رسه تلوح روس أصحابه

* * *

عالخيم اگبلت غارات الخيول من خيمهن طلعن بنات الرسول

شافن إعله حسين خيّاله تجول وچفّنه المصرع بذاري ترابه

* * *

إطلعت زينب من خدرها المنسلب شاهدت حرگ المخيم والنهب

مثل نار البالخيم نار الگلب نار ما تطفه وبگت لهّابه

* * *

الكاظمية المقدسة ١٩٧٧ م

والعصر

(موشح)

يا سُورَ الأحكام يا آياتها يمته تاخذ للسلف ثاراتها

* * *

يا بقيّة هاشم البيك الأمل يا أصل (حي على خير العمل)

الناس ردت تركع لعزّه وهبل ولبست الذلّه حسب مرضاتها

* * *

وشيعتك متلذّعه ابجمرة النوح وما حصل بيها اليعمّر عمر نوح

جسوم تنظرها لچن ما بيها روح والاحياء اتساوت اويه امواتها

* * *

يا عمود الدين يا ركن اليقين طلّسم اسمك وسر الله المتين

ليمته نظل نحسب شهور وسنين واللّي تشكي من يحل شكواتها

* * *

ما يحل شكوه الحبيب الّه الحبيب ومحد أيداوي العلل غير الطبيب

واهم الگال السهم يخطيي ويصيب عدانه ترمي وما خطت رمياتها

* * *

يا طبيب العلل علتنه النفاق والفتن عدنه الذّ من كل مذاق

والشعار اللي نحمله الانشقاق واللي تنكر تبگه هيّه وذاتها

* * *

وين ميميل الهوى ويا نتّجه وكل زمن نظهرعلى الشاشه بوجه

والذي اتصلّح خطئنه وتنتبه انگول هذي خاطئه ابنظراتها

* * *

نرفض اللي توگف اعله المرتفع حيث تعرف كل زوايه المجتمع

وتعرف الناس التعيش إعله الخدع وتكشف الدنيه وسُبل غاياتها

* * *

العدو واحد واحنه آلاف الرجال لچن يا وسفه نعيش إعله الخيال

لو صدگ أحرار ندخل للقتال وللمعارك نلتزم راياتها

* * *

يا طبيب إنريد للعلّه شفه وبعد ما يحوج مرضنه انوصفه

چفك بيا يوم يآخذ مرهفه ويرد للأمه زمان الفاتها

* * *

ننتظر صوتك من الكعبه يصيح الوعد حان ويا لثارت الذبيح

وينضمد كل گلب من عدنه جريح وترتفع من شيعتك أصواتها

* * *

اشمحله من تهتف بثارات السلف اليوم عن الغاضريه مختلف

وبعده دم حسين لسّا ما نشف واليتامه ما تجف عبراتها

* * *

دمشق ١٩٨٠ م

البدور الهاشميّة

(موشح)

هاشم إبدمها تغيّب نورها جسومها امغسّله ابفيض انحورها

* * *

هاشم أمست بالطفوف بأشد حال الروسها عن الجسوم السيف حال

گوّضت والسلب عگب الأهل حال بالخيم والعده اتزايد جورها

* * *

وانسلب خدر الحرم عگب الحمه وراح خدر العايله وراح الحمه

ابغرب ظلّن والگلب منهن حمه على الحومه البيها مهوه ابدورها

* * *

امسلّبات اطلعن ضجّن بالنده صاحن العهدك يبو اليمه نده

لاچن اللي طايح ابولية نده بالظليمه اعداه تاخذ دورها

* * *

يا حمانه چنّه بحماكم ولن إجموع چتالتك لعيالك ولن

ولا گلب حن على أيتاماكم ولن والفواطم سلّبوها اخدورها

* * *

بالهظم زينب لبو اليمه اوصلت وروحها جالت إبلهفتها اوصلت

بيد خوّتها ومدامعها اوصلت جروح أبو السجاد عِزها وسورها

* * *

وظلّت إعله الثره ابناظرها ترب شافت اخوتها الصريعه اعله الترب

نادت الغربه الحرايركم ترب والمصيبه عگب أهلها اتدورها

* * *

وگلب زينب للنهر مسرع عده يشكي حال العايله وجور العده

الساعدك چفّك يبو فاضل عده واجلي حزن العايله من صدورها

* * *

عاتبت عباس زينب وألمت غربتي وطيحتك بالطف والمت؟

والعده للحرم عگبك والمت هِزِل متعوبه ونحيفه اظهورها

* * *

اشلون مرّ انهار بيه اشلون مس عالفواطم والأطفال ابخوف مس

وجمر نار امخيّمك والعطش مس اگلوبها وچفك مصب ابحورها

* * *

گوم باصرني لون صار اليسر وبالظعن لليسر چتالك يسر

حالي لابن ازياد والشامت يسر وتحيي عيد الظفر وسط اقصورها

* * *

الكاظمية المقدسة ١٩٧٧ م

الزهراء (عليها السلام)

حرت وعيوني ما ينشف دمعها

صدگ أم الحسن كسروا ظلعها

أريد أتجاوبوني أريد أتجاوبوني

* * *

وگفت ابّاب ام الحسن محتار

أريد أنشد بعد ما ظلت أفكار

صدگ محسن وگع يم عتبة الدار

والزهره ابصدرها نبت بسمار

وروحي حسّت اليوم ابجزعها العقيده بيا وضع أمسه شرعها

أريد أتجاوبوني أريد أتجاوبوني

* * *

سؤال وعلى لسان الكل تردد

بت من فاطمه مو بت محمد؟

ليش الطاغيه اعليها تعمد

وابرمياته عالإسلام سدّد

تصيح أشلون حيدر ما سمعها وهوّه الضمد للزهره ودرعها

أريد أتجاوبوني أريد أتجاوبوني

* * *

أشلون أهل الغدر والكفر والشر

ظلع أم الحسن منهم تكسّر

من طاح الطفل چاوين حيدر

ما يدري أظن بالنار تسعر

وروحي اتناشد ابلوعة فزعها صدگ هالثاني للوادم خدعها

أريد أتجاوبوني أريد أتجاوبوني

* * *

ظلع الطهر حين الرجس رضّه

صاحت صوت وتنادي يفضّه

محسن وگع وحشايه تلضّه

رگد حيلي بعد ما بيّه نهضه

وفضّه تنادي واتغيّر وضعها ليش الوادم التزمت بدعها

أريد أتجاوبوني أريد أتجاوبوني

* * *

احتارت فضّه من سمعت الزهره

تشكي من الظلع وآلام كسره

اوگفت يم فاطمه تسچب العبره

وگلبها بعد ما يمتلك صبره

وصوت النايبه لفضّه صدعها المكيده ابصورة الناس اشطبعها

أريد أتجاوبوني أريد أتجاوبوني

* * *

دم عيوني فاض إويه المدامع

من هالوادم التهوى المخادع

وحيدر بالغصب اخذوا يبايع

السقيفه أسست كل المطامع

اتعنّت للوصي ابدافع طمعها وهاي التفرقه يا هو جمعها

أريد أتجاوبوني أريد أتجاوبوني

* * *

تگيّد حيدر من الدار بأنجاد

أوبعده گيّدوا رگبة السجاد

هالأصفاد تشبه ذيچ الأصفاد

من چتّفوا رگبة زين العباد

وچفوف الگمر يا هو الگطعها زينب عن أبو اليمه أشمنعها

أريد أتجاوبوني أريد أتجاوبوني

* * *

طهران ١٩٨١ م

الشأن الأعظم

يا علي شانك ما گدر واحد يوصل لأسراره

* * *

كل مغرم ايوصّف حبيبه باسلوب ابحكم انشراحه

بعالم أوصافه لوسرح گلبه ايذوب بوردة ملاحه

وآنه انغمر لمن اوصف المحبوب احچي ابصراحه

يا علي شانك بوصفك العگلي حيّرت افكاره

* * *

لو حانت الساعه وتدور الراحه والراحه راحه

بكوثر ولائك راحة أهل الراحه والراحه راحه

واللي هوى براحك تصافح راحه ما ترد راحه

يا علي شانك سلك النجاة ومنهجك تيّاره

* * *

من يوصف العاشگ نتيجة إحساس منبع غرامه

ومن الولايه اتناولت أطيب چاس چاس الندامه

معرم تراني وخل يلوموني الناس كل الملامه

يا علي شانك بهجة دليلي ومصدر استبشاره

* * *

كوثرك ما يحصل الذْ من مايه والرحمه مايه

بحر العزم بسمك تلاطم مايه يا عزم مايه

وينحرم منّه العن طريقك مايه من سوه مايه

يا علي شانك بالشدد هوّه اللي يحامي جاره

* * *

يا بحر جود الباري والعالم صار قطره بوجودك

وأنت بسرادق عرشه تسطع أنوار شعلة ورودك

والمرسلين ارشفت چاس الأسرار من بحر جودك

يا علي شانك ابعرش الجلاله تزدهر انواره

* * *

يا وصف ذات الخالق وذاتك نور افق المعالي

من نور علمك هاي الأكوان تنور وسبع العوالي

جنّني حبّك يا علي وفكري يدور بعالم مثالي

يا علي شانك خلّه العوالم بالوصف محتاره

* * *

يا أسم الأعظم يا جلالة حرفه أسراره حرفك

أتحفك ربك من لآليء وصفه وانعشگ وصفك

ونفسك انصاغت من جواهر لطفه وازدهر لطفك

يا علي شانك بحر اللطف والأنبياء أنهاره

* * *

يا بهجة الطور الزهت من سيناء واضح سناها

وروحك براها الباري گبل الأشياء من مبتداها

وجوهرة روحك من كنوز العلياء ربّك حباها

يا علي شانك وربّك صهر ذات القدس واختاره

* * *

يا ثروة العلم الإلهي المكنوز ابكنز الجلاله

ومفتاح هالكنز ابيقينك مغروز وبيك امتثاله

هاي الرتب محدّ گدر إلها يحوز غير الأصاله

يا علي شانك غصن المحاسن والرسل أثماره

* * *

يا طالعة شمس المجد والتقديس تزهي ابصفاتك

لاهوتي وصفك للمعالم تغريس ابدورة حياتك

وزهرة علومك أزهرت بالرسريس والثمر ذاتك

يا علي شانك عبّد طريق النهتدي بآثاره

* * *

يا علي بمبدأ حبنه شفنه المضمون قول الرساله

ما يعرفك غير أنه وخالق هالكون رب الجلاله

واليدخل ابروضة ولائك مأمون ابطيبة خصاله

يا علي شانك ميزان حق المجتمع وأخياره

* * *

دمشق ١٩٨٠ م

الثورة المحمدية

ثائر ابروح الإيمان بالثوره شرح القرآن

أفكاره مهبط جبريل بالغاضرية التأويل

بالثوره شرح القرآن

* * *

ثائر واهداف الشرع أهدافه

مجموعه أوصاف الرسل باوصافه

وثقل النبوه ارتكز فوگ اكتافه

وأهدافه تبعد عن رمي الهدّافه

حكم الكتاب ابيمناه والنصر لاح ابعيناه

يحكم ابحكم التنزيل بالغاضريه التأويل

بالثوره شرح القرآن

* * *

حج واعتمر وابهمّه شد اظعونه

وسورة التوبة تجسمت بعيونه

وانصاره أهل المجد ساروا دونه

ميمونه صاحوا ثورتك ميمونه

من مكه طلعوا ثوّار من اهل بيت وأنصار

عن سيرة الحق متميل بالغاضريه التأويل

بالثوره شرح القرآن

* * *

ثائر ولمّن حان موعد مسراه

أربع أوصاف الظعن سارت ويّاه

العفّه بشماله والمجد عن يمناه

والنصر صار ابوجهه والعز بگفاه

بها الظعن مجموع الدين من الأله التعيين

حادي الظعن ميكائيل بالغاضريه التأويل

بالثوره شرح القرآن

* * *

اسرار هذي الثوره جوهر مكنون

وابسورة الإخلاص شرح المضمون

صفوه وبأحكام الشريعه ايحكمون

يوم الغنايم للنصر يغتنمون

رسموا درس للأجيال من شرح سورة الأنفال

خمس الغنايم تكميل بالغاضريه التأويل

بالثوره شرح القرآن

* * *

من حلّت بأرض الشهاده الثوار

ركعوا وسجدوا للعزيز الجبار

ونصبوا خيام امخدرات المختار

وبالرايه راعي الرايه ضارب استار

دركت الحرّه الغايه يحميها راعي الرايه

ويرجّف اصحابه الفيل بالغاضريه التأويل

بالثوره شرح القرآن

* * *

قائد الخطة ثورته راسمها

ناده بحبيب الميمنه اتسلمها

وصاح بزهير الميسره اتقدمها

وقائد الرايه الرايته ايكلّمها

هالرايه ماضيها يعود والصارم ايصير اشهود

يمطر حجر من سجيل بالغاضريه التأويل

بالثوره شرح القرآن

* * *

من بعد القاء الحجج عالعدوان

للحرب دخلوا منها شيب وشبان

رفعوا ابأطراف الرماح الميدان

وخمسين منهم هوت فوگ التربان

والقائد ابدمها يشوف للمصحف اتخط احروف

ورنّة الصارم ترتيل بالغاضريه التأويل

بالثوره شرح القرآن

* * *

لمّن هوت بالحومه كل الأنصار

للمعركة اتقدّم شبيه المختار

وبعده الهواشم غدت تاخذ ادوار

وثائر الدين استوحدوه الأشرار

من انصرع عالتربان كملت حروف القرآن

دم النحر ليش ايسيل بالغاضريه التأويل

بالثوره شرح القرآن

* * *

دمشق ١٩٨٠ م

مصير الأمة

يحسين الحگ اوياك للدين اتضحي ادماك

بأيامك شفت الوادم منجرفه لصوب الظالم

والظالم يتحداك يحسين الحگ وياك

* * *

مو ملحمة شاعر نضمها بأقبال

ولا مدبر ومن خوفه ينسه اشما گال

لاچن نريد انسير ويّه الأجيال

وندرس أحوال الناس عالهالمنوال

ونشوف الناس اشلون عالحق من ينگلبون

ونسمع اصوات الوادم چم صوت يريد الظالم

وشچم صوت الناداك يحسين الحگ وياك

* * *

خل نبدي من يوم الغدير ونسمع

خطبة الهادي ونبتدي من المطلع

ونشد أمر هالأمه المن ودّع

وچم واحد الأيّد خطبته وبايع

يحسين وتدري شصار لمن راح المختار

راح الحگ وتشريعه وانّقضت ذيچ البيعه

وحيدر تدري اشوصّاك يحسين الحگ وياك

* * *

يحسين ذاك الجمع چنت اتشوفه

نفس الأشباح إتمثلت بالكوفه

وغاية مكيدتهم الك مكشوفه

والكوفه باوصاف الغدر موصوفه

من اتخونك لتلوم هالگوم ابناء الگوم

واللي اتأيد ظالمها من اتخونك شيهمها

لو حاربت العاداك يحسين الحگ وياك

* * *

يوم الغدير وكربلا نفس اليوم

وما تختلف هالگوم عن ذيچ الگوم

بالنبل من يرمون جسمك لتلوم

نفس السهام الرمت نعش المسموم

انضمت ذيچ الاحقاد واتبينت بالأولاد

والابن اليطلع حاقد گول السر من الوالد

والباطل ما يدناك يحسين الحگ وياك

* * *

يحسين إنته الما تساوم إنته

للطاغي ما يوم بأمر داهنته

تصريح بلسان الشرف صرّحته

للظالم اليركن يبيع آخرته

وين اليفهم شتگول وايطبّق بالمعقول

ويترك ناس المنصاعه للظالم والأطماعه

وچفّه ايصافح يمناك يحسين الحگ وياك

* * *

يحسين من شفت العنيد اتجبّر

وبالكوفه ثبّت قاعده گوم الشر

بالقوه چان اتبايعه يتصور

ما يدري انته لثورتك تتنطر

من عادات الثوار ما تذعن للاخطار

لنصرة غايتها اتجاهد وما تخلف من اتعاهد

هالاوصاف ابمعناك يحسين الحگ وياك

* * *

يحسين الشيدت ركن الإسلام

ابفيض الدمه وهدّمت عرض الظلام

موقفك خالد بالدهر والأيام

بذكراك نتمسك وآبد ما ننظام

فوگ الاخطار اندوس للدين انضحي انفوس

يللي ادرسنه ابمنهاجك ودمنه ايفيض بأوداجك

انخلّد بالدم ذكراك يحسين الحگ وياك

* * *

يحسين أول قائد انته عرفناك

تنذبح وابدمك تخلّد ذكراك

واحنه المشينه ابنهجك وعاهدناك

بهاي المسيره آخره ودنيه اوياك

دمنه أيردد انشاد ما نخلف بالميعاد

ثائر وايعاهد ثائر ما يسلك درب الجاير

دوم انسير ابمسراك يحسين الحگ وياك

* * *

الكاظمية المقدسة ١٩٧٨م

دستور العقيدة

هالحوفه دستور تتوهج إبنور

واشما تجور الأيام ما تطفه شمعة جسام

تتوهج ابنور

* * *

دستور سر التضحيه لو نبدي باستعراضه

انشاهد حروفه امطرّزه من دمومها الفيّاضه

دستور يزهر بالمجد ما تضمحل ارياضه

أسراره تظهر من گلب هالمعرس بأنباضه

من تزهي بالكون اتوضّح المضمون

وتفسير سرها بأحكام ما تطفه شمعة جسام

تتوهج ابنور

* * *

لو كرّست فكرك على هالتضحيه وغايتها

اتشاهدها صوره منوره إبشمعة وفه صورتها

واللّي رسمها ابحوفته شاب وضمن عزتها

من الوريد المنگطع تالي ارتوت روضتها

بالدمه الفيّاض اتوضّح استعراض

هاذي عروض الإسلام ما تطفه شمعة جسام

تتوهج ابنوره

* * *

كثره المواقف تحتوي من مطلعه التگطيعه

وكل موقف ايحتّم رسم يتجسم ابتنويعه

لو ردنه بيها نبتدي خل نبدي من توديعه

چم گلب لمّن ودّعه بوداعه نشّف ريعه

وشچم گلب ذاب من جمر المصاب

واشما تزيد الآلام ما تطفه شمعة جسام

تتوهج ابنور

* * *

شاهد اگباله ابخيمته حوفة عرس منصوبه

من ودّع اُمه ابضامره جمرة حزن منشوبه

يعرفها رمله ابيا سهم متلوّعه ومصيوبه

عمك يجاسم نادته صيحه ابدمع مصحوبه

خل نسمع امه اشوصته ابعمه

ابدم هامتك خط وسام ما تطفه شمعة جسام

تتوهج ابنور

* * *

يبني يجاسم نادته هاك اخذ دمعة عيني

توصفلك اعهود المضت ما بينك وما بيني

جاوبها أعرف غايتچ وشرايده توصيني

وصّاني گلبچ والدي افتدي بروحي لديني

وصاني عودي ابذل جهودي

من ينهدر دم الهام ما تطفه شمعة جسام

تتوهج ابنور

* * *

أدّه المراسيم وحمل وابچفه زم خطّافه

وذكّرها بعهود السلف للّي نست أسلافه

وعن جده حيدر بالحرب ما تختلف أوصافه

ولو كبّر ابوجه الزلم تتراجف السّيافه

من هاي الأوصاف يرجف السيّاف

إبجمرة الصارم ضرّام ما تطفه شمعة جسام

تتوهج ابنور

* * *

چف الشهاده إمتد إله وحصل على اللي راده

شرّف الكون ابغايته وقدسية استشهاده

وثغر امه بافراح وحزن يترددن انشاده

واعدني جاسم بالوفه وما أخلف ابميعاده

من نار الدموع علگت إله شموع

تضويلها ابدرت الشام ما تطفه شمعة جسام

تتوهج ابنور

* * *

كربلاء المقدسة ١٩٧٨ م

الندبة الجارحة

طيحت گمر عدنان هدمت بيتي

خدر الحرم مفگود من ضربة العامود

هدمت بيتي

* * *

آنه العقيله الصابره المفجوعه ابطيحت كفيلي

وچفين اليّه اعله النهر مگطوعه ابطيحت كفيلي

وگلب الحرم يا هو اليسكّن روعه ابطيحت كفيلي

عالنهر لمن طاح حارس ثنيتي

صار النزل فرهود من ضربة العامود

هدمت بيتي

* * *

لمّن شفت جثة كفيلي بلا راس صوبت عيني

ونبلة الصابت عين أخويه العباس صوبت عيني

شوفت خيمنه الظلت ابلا حرّاس صوبت عيني

عهد الأخوّه ايكون أحفظ وصيتي

ما ظن زماني ايعود من ضربة العامود

هدمت بيتي

* * *

يا گمر هاشم صحت والروح اتحوم يم الشريعه

وسّدت عالتربان گلبي المالوم يم الشريعه

نام ابدليلي انچان ينهالك نوم يم الشريعه

ابمصرعك روحي اتحوم تعرض شجيتي

ونشّفها سهم الجود من ضربة العامود

هدمت بيتي

* * *

حان المگدّر يا گمر هاشم حان بالغاضريه

وگوس المنايه اتوجّه اعله الصيوان بالغاضريه

نيشن سهم وابعيني طاح النيشان بالغاضريه

أنحب وأحاچي العين گولي اشنويتي

جاوبت دمعي أيجود من ضربة العامود

هدمت بيتي

* * *

اتصوّبت عيني وما أوچّد بالعين منگطع بيّه

أقسم ابگطعت منحرك والچفين منگطع بيّه

وين اليدلّيني النهر دربه امنين منگطع بيّه

حايمه بهالوديان وگربت منيتي

ودرب السقايه اشهود من ضربة العامود

هدمت بيتي

* * *

والحرم طلعت مهرعه من الصيوان يا گمر هاشم

وتصرخ أطفالك وين ساقي العطشان يا گمر هاشم

وگلبي تفطّر من حنين الرضعان يا گمر هاشم

وأسمع كفيلي ايصيح زينب وفيتي

وانگطع حبل الزود من ضربة العامود

هدمت بيتي

* * *

العامود يا لوعة اصواب العامود ابدرب السقايه

لو ما يصيبك ما انگطع حبل الزود ابدرب السقايه

ورايتك ما چان انطوت فوگ الجود ابدرب السقايه

ابسهم اللي طفّه العين صارت رزيتي

وشفت الرزايا السود من ضربة العامود

هدمت بيتي

* * *

دمشق ١٩٨٠ م

الصمود أمام الرزايا

انه زينب وخل يشهد زماني ويدري شچم سهم بالطف رماني

مرامي الغاضريه شفت بيها المنيه

* * *

يدهري صوبتني بأربع سهام

سبي وغربه ومنايه وحرگ الخيام

واسهام الشماته إشلون تلتام

وابشفرة أحقادك وذرتني ومثل چثة علي الأكبر غدتني

طعناتك البيه شفت بيها المنيه

* * *

هيهات أرضخ لحكمك يدهري

وشدّيت الگلب بحزام صبري

وبنيت العفّه فوگ أستار خدري

لو شفت الدمع من عيني ساجم تفايض من نحر بدر الهواشم

واچفوفه الرميه شفت بيها المنيه

* * *

زينب يا دهر تشهد الأيام

إشما تحرب عليّ هيهات أنظام

ابوسط گلبي علگت شموع جسام

وابچبدي إنصبت العرس حوفه وابدمه اعجنت حنة چفوفه

واشموعه الزهيه شفت بيها المنيه

* * *

أنه زينب صفت الأحزان عيدي

ونبلة حرمله حزّت وريدي

مثل جيد الطفل طوگت جيدي

من شفت الطفل يم امه مذبوح ابجسمي ما بگت لا مهجه لا روح

والعلّه الخفيه شفت بيها المنيه

* * *

إعرفت يا دهر عالعايله اشسادي

من رد المهر يصهل ينادي

الظليمه اللّي سبت عيلة الهادي

ابسرجه الخالي چنّي اليسر شفته يگلي حسين فوگ الغبره عفته

يزينب هالرزيه شفت بيها المنيه

* * *

على التل اوگفت واحنيت الظلوع

صحت يحسين گوم ورد الجموع

ورخصت يا شهم من عيني الدموع

بس الصده ينابيني من أهتف حرت مدري دمع لو دم أنشف

والونه الشجيه شفت بيها المنيه

* * *

أدري الدهر متشمت ابحالي

لمّن سال دمعي الچان غالي

خلاني زماني ابغير والي

وأشد كل نايبه وكل هاي الآلام رحت متيسره للكوفه والشام

وعيالي السبيه شفت بيها المنيه

* * *

دمشق ١٩٨٠ م

اليوم الخالد

هذا يوم حسين واليناصر وين

يستعد للمعركه هذا يوم حسين

* * *

حسين لمّن صاح يا بني هاشم

ودّعوا العيله وجرّدوا الصارم

الگوم يردونه انبايع الظالم

جاوبوه ابصوت نستعد للموت

والطريقك نسلكه هذا يوم حسين

* * *

لا نبايعهم ما نمد الايد

ننذبح وياك لا نصد لا نحيد

مثلك بهاليوم للشهاده انريد

هالعهد معهود الك كلنه جنود

ونصرتك موتهلكه هذا يوم حسين

* * *

وسمعت الأنصار كل حديث حسين

إجتمعوا ونادوه إحنه متهيئين

للحرب دونك الك منتصرين

ابفجر موعدنه للحرب ردنه

والأمر نتداركه هذا يوم حسين

* * *

لن گمر هاشم صاح يالأنصار

احنه نتقدم للحرب لو صار

جاوبوه اشلون؟ علينه يصبح عار

انتم اتضحون؟ بالبدايه اشلون؟

أول إحنه انشاركه هذا يوم حسين

* * *

إحنه نبديها وارتفع هالصوت

ننتظر فرصه وبعد خاف اتفوت

نريد نستشهد ما نهاب الموت

واحنه موعودين ننتصر للدين

والجهدنه ايباركه هذا يوم حسين

* * *

وانتدب عباس والعلم بيده

صاح ويّه حسين مصرع انريده

واللي ما يلوي على الذل جيده

اويانه للحومه النه محتومه

والأعادي الهالكه هذا يوم حسين

* * *

صاحوا الأنصار يا گمر عدنان

هذي حومتنه والمبارز حان

نريد بامر حسين ندخل الميدان

واحنه ميهمنه نفتدي ابدمنه

والمواقف حالكه هذا يوم حسين

* * *

دخلوا الحومه ونصروا الإسلام

بدمهم النازف كتبوا الأحكام

ابموقف الأنصار تشهد الأيام

هذي نصرتهم هذي صرختهم

للضمير إتحركه هذا يوم حسين

* * *

الكاظمية المقدسة ١٩٧٨ م

مواقف زينبية

چم مصاب گلبي انصاب شاهده ابدمعة عيني

من عفتك اعله الغبره وكمّلت دور الثوره

چم مصاب گلبي انصاب شاهده ابدمعة عيني

* * *

يبن امي يالبيك الشيم محتفّه هاك اخذ عتبي خل يصوبك عتبي

زينب انه الشدّت وسام العفّه من صبر گلبي چم مصاب بگلبي

والشرف بأوصافي تكمّل وصفه يشهد لي ربي وبيّه اعلم ربي

والاسلاف بهالاوصاف بالغانمه امتوجيني

من صبر امي الزهره كمّلت دور الثوره

چم مصاب گلبي انصاب شاهده ابدمعة عيني

يحسين اخذ من جرح گلبي المدمي حالة الخدّر من سبوا هالخدّر

بجور النوايب شاركتني ابهمّي گلبي المفطر عاليتامه اتفطر

حال اليسر عالحرم اصبح حتمي سارت بهالبر يا گطيع المنحر

والايتام بالآلام لمن تحس تاذيني

ابگلبي احملت چم جمره كمّلت دور الثوره

چم مصاب گلبي انصاب شاهده ابدمعة عيني

* * *

يحسين أخذ من دمعي وصف السجاد النظر الحاله حالي يشبه حاله

من ثگل اغلال اليسر والأصفاد تدري شجراله گطّعوا دلاله

ما شايفه عيوني عليل وينگاد لشدّة اغلاله دمعتي الهماله

والسجاد من انگاد بالنايبة يناديني

حيرني شبلك بامره كمّلت دور الثوره

چم مصاب گلبي العناب شاهده ابدمعة عيني

* * *

يحسين أخذ من جمر دمعي الهمال چلمة معاتب والشهم يتعاتب

لو راحت اخته ميسره بذاك الحال بالأخص زينب يا معزة زينب

للكوفه لمّن وصل بينه الجمّال گلبي المصوب بالشماته اتصوب

من إنشال عالعسال راسك غده ايواسيني

وبالسبي لحالي ينظره كمّلت دور الثوره

چم مصاب گلبي انصاب شاهده ابدمعة عيني

* * *

طول الدرب راسك يلوح گبالي وجهك اوصافه المصطفه باوصافه

وانسينه بالبر واحد من اطفالي والظعن عافه اعله الترايب عافه

والراس ظل يتلفت اعله عيالي للطفل شافه ثگل لمن شافه

ابلم عيال وجمع اطفال طول الدرب تلگيني

وحزّمت گلبي بصبره وكمّلت دور الثوره

چم مصاب گلبي انصاب شاهده ابدمعة عيني

* * *

من دخولنه المجلس الطاغي وراد الراسك يشوفه بالشماته يشوفه

بصبر الگلب هدّمت عرش ابن زياد ابطبّت الكوفه اگلبت وجه الكوفه

بالحزن خليناها عگب الاعياد الطاغيه بخوفه انفظح ناتج خوفه

والطغيان بالخسران والنصر صار الديني

ما بين بسمه وعبره كمّلت دور الثوره

چم مصاب گلبي انصاب شاهده ابدمعة عيني

* * *

لمن وصلنه الشام وادخلناها ادّينه موقف ما يجاديه موقف

ثورتك بارض الشام كملناها بايماني اهتف للمظالم اكشف

والخطبته السجاد من ادّاها خطبته توصف ظلم اميه توصف

بذاك اليوم يا مظلوم اسبيت الذي سابيني

ورديت الك منتصره كمّلت دور الثوره

چم مصاب گلبي انصاب شاهده ابدمعة عيني

* * *

دمشق ١٩٨٠ م

الوالد على سر أبيه

هالأبناء عالآباء والگوم أبناء الگوم

هذا الظلم من يومه الطاغي العصر لتلومه

هالأبناء عالآباء والگوم ابناء الگوم

* * *

يا سعد من گلبي تفيض عيوني وتعرف انباضي من تجس انباضي

يا ريت كون الوادم أيخلوني اكشف الماضي والأساس الماضي

لاچن أخاف الوادم أيلوموني والقاضي راضي شتحچي ويه الراضي

من الاجداد للأولاد تقبل تعيش ابذله

وبعيونهم مرسومه الطاغي العصر لتلومه

هالابناء عالآباء والگوم ابناء الگوم

* * *

يا سعد اخذ الحذر من هالطغيان واضح ظلمها ومنكشف ظالمها

چم أخرس بأخرس حچه بلايه لسان محد فهمها والطرش تفهمها

لو ما تمد چفك ابحلگ الثعبان ما تذب سمها والهلاك ابسمها

حذّرناك نبهناك واطرش چنت بالزفه

صفحاتك المشؤمه الطاغي العصر لتلومه

هالابناء عالآباء والگوم ابناء الگوم

* * *

ابحكم الظلم تقبل ابحجة مظلوم تحچي ابشجاعه والضعف بالطاعه

والجهل بعيونك يواهم مرسوم الجاهل أطباعه ما يغير أطباعه

لو چنت تقره الممحي چاليش اليوم بالچلمه ساعه اتبّع ابتباعه

من الظّلام ما تنظام لو چنت لازم دينك

هاي العبر مفهومه الطاغي العصر لتلومه

هالابناء عالآباء والگوم ابناء الگوم

* * *

لو چنت متبصر بأحكام الدين تجعلك فاهم لو چنت ما فاهم

چان اعرفت سيرة حياة الطاغين چم طاغي واهم والأله العالم

من عهد غصّاب الفدك والهالحين شوف المظالم بالدهر چم ظالم

بهذا اليوم وبكل يوم اهل الظلم مكشوفه

ابنظراتها المسمومه الطاغي العصر لتلومه

هالابناء عالآباء والگوم ابناء الگوم

* * *

وجّه اسماعك يا سعد للتنصيت واسمع الهادي من خطاب الهادي

ما اوذيه مرسل مثل ما اوذيت گلبه الينادي مو لسانه ينادي

والهظم بعده اتحوّل بأهل البيت تعلم اشسادي بأهل بيته شسادي

والمختار يدري شصار بناتج حسد هالأمه

حللت سفك دمومه الطاغي العصر لتلومه

هالابناء عالآباء والگوم ابناء الگوم

* * *

اول ظليمه السدت عگب المختار لوعة الزهره يا مصاب الزهره

والطاغي ذاك اللي دفع باب الدار مكشوف امره بكل زمان اتنظره

والهادي يدري ابدفعة الباب شصار المصطفه ابگبره حزن واهوه ابگبره

كسر ظلوع وفيض دموع وآل النبي بهالحاله

متلوّعه ومظلومه الطاغي العصر لتلومه

هالابناء عالآباء والگوم ابناء الگوم

* * *

وزينب من امها استارثت هالآلام شافت مصايب ما مثلها مصايب

ابچتل أبو اليمه حافظت عالأيتام والگلب لاهب عالحرم متلاهب

من كربلا مسبيه راحت للشام والچبد ذايب بالمصايب ذايب

والأطفال بالأهوال متصدعه ومرتابه

انظر يزيد وگومه الطاغي العصر لتلومه

هالابناء عالآباء والگوم ابناء الگوم

* * *

لو ردت تسلم من ظلم هالطغيان الزم أيمانك تنجح بايمانك

والروح من ينسلب منها الإيمان يفشل كيانك لو گصر سعوانك

ومن تلتزم نهج الشهيد العطشان تكسب ضمانك والصبر ميزانك

والبركان عالطغيان فجّره ابصرخة زينب

وبدّد سواد غيومه الطاغي العصر لتلومه

هالابناء عالآباء والگوم ابناء الگوم

* * *

دمشق ١٩٨٠ م

ليلى

(تجليبه)

يالأكبر زماني بيك صوّبني وغرّبني عگب عيناك غرّبني

* * *

تغرّبت وگطعت الأمل يا رجواي يا وردة حياتي الراتعه بحشاي

لو چان الدوه ايطيّب الجرح والدّاي أنه جروحي تطيب ابشوفتك يبني

* * *

گلبي إبشوفتك تتلايم جروحه وترد للجسم روحه يا بعد روحه

يضّي العين عيني عليك مشبوحه اگولن بلچي لأمك تجي متعني

* * *

تتعنه ويرد ذاك الدلال الراح يا مصباح عيني الفاجده المصباح

لمن طحت بيت اللي عليّه طاح إو ونّ الدوح ما يختلف عن ونّي

* * *

أوننّ والدموع تسيل من دمك گوم وشوف حال امك يبعد امك

يريت تراب گبرك يولدي الضمّك من گبلك يالأكبر كون إلي يضمني

* * *

يضمني ولا أظل أنحب على فرگاك شمحله الموت يبني لو يصير وياك

تضن أنساك يالأكبر فلا أنساك الّه يطيب جرح السوط من متني

* * *

ما أنساك لمّن جرح متني ايطيب يا رفعة الراس اللي غزاه الشيب

الذخر لو چان عند الموزمات يغيب چا إلمن ذخرتك يالغبت عني

* * *

غبت عني وحرمت عيوني من ضيّك يا كاسر وجودي الفاجده فيّك

شجاوب من ينشدوني أهل حيّك اگولن بالشدد غاب التكفلني

* * *

تكفلني وطلعت ابشيمته وبحماه وبساعة الشده اتفارگت ويّاه

الخلاّني وحيده إعله الترب خلاّه وصابنّي مرامي الهظم صابني

* * *

مرامي الهظم صابنّي وبگيت أحبي انگطع گلبي ابگطعتك يا ثمر گلبي

يا شمعة وجودي الذايبه ابعتبي أكثر العتب لو أدريك تسمعني

* * *

تسمعني وترد يوليدي ليّه ردود يا صيوان خدري الفاجد العامود

يگولون الصبر لأهل الصبر محمود محّنت الصبر والصبر محّنني

* * *

صبرت وروحي ولها تريد منواها وشفت ام الفصيل تسيل عيناها

تگابلنه ونحن گلمن على اضناها النوب ام الفصيل إجزعت من حنّي

* * *

من حنّي اجزعت وبگيت وحدي هناك احنن وانتحب يالأكبر لفرگاك

گوم وشوف عين امك تهل ادماك ما أنساك الّه المحن ينسنّي

* * *

أنسه وما أگولن ضيعت ضيعه يا ريع الگلب عگبك نشف ريعه

ومثلك بالبواتر صار تگطيعه ومثل جسمك سيوف الهظم وذرنّي

* * *

وذرنني إو ولمهن ما أظن يزول الّه ابشوفتك يدعج يحلو الطول

محن فرگاك هم اتزول يا مدلول لو للگبر يالأكبر يودنني

* * *

كربلاء المقدسة ١٩٧٨ م

اين الكفيل

(درامي)

يا گطعت الچفين گطعت أملنه

وأبطيحت العباس سلبوا خيمنه

* * *

قائد وضحه الروح لجل العقيده

وگطعت حبل الزود گطعت وريده

وأبهيبته الايتام چانت سعيده

وأبفگده صاحت وين كافل أهلنه

* * *

من فرّت الايتام بالغاضريه

وهجمت على الصيوان غارات أميه

والحرم صاحت وين أهل الحميه

من شوفت العباس دهري حرمنه

* * *

البدر الهواشم جيت اعرض شكايه

من طاحت الچفين طاحت الرايه

ومن غابت الأرواح ابكهف المنايه

ذاك الزمان الراح ما يرجع النه

* * *

هم صدگ يا عباس يرجع دلالي

والطيبه بالامال ترجع عيالي

ريتك عدل وتشوف محنة اطفالي

ابگلب اليتامه اليوم زادت الونّه

* * *

واتصل هذه الصوت من الوديعه

للّي بگه مطروح فوگ الشريعه

چفينه يم الجود ظلت گطيعه

وعگب الكفيل اليوم محد كفلنه

* * *

ما حصل راعي الزود يا من ايتامي

عگبك ولا نغار يحرس اخيامي

زينب انه وضليت عنهم احامي

وچم محنه هذا اليوم عگبك حملنه

* * *

لو ردت يا عباس احسب اجروحي

يتمرد الدلال من جمر نوحي

روحي بگت وياك رجعلي روحي

لو ترجع الايتام لديار اهلنه

* * *

ولو تعتذر وتگول سهم البعيني

چم عهد يا عباس بينك وبيني

ولو ما تطفي اليوم جمره ونيني

طفيلي نار اضماي حرگت گلبنه

* * *

من جمرة النارين گلبي تألم

نار الضمه والنوب نار المخيم

انته الگلت هالجود ينترس بالدم

چا وين عهدك وين تنسه عهدنه

* * *

عوف الكفاله عوف آنه الكفيله

حاشاها هالايتام تطلع ذليله

ولو شفت دمع العين فايض مسيله

ردت اطفي يا عباس جمرة عطشنه

* * *

طهران ١٩٨١ م

الأصوات الهادره

(دارمي)

تنادي الشهاده اليوم واتريد اهلها

وين اليضحي الروح ويسارع الها

* * *

وين العلن دعواه مؤمن موالي

لو سمع دينه انضام يرخص الغالي

مو إلّه دينه يصيح منضهد حالي

التتفگد المحبوب تمشي برجلها

* * *

وين اليضحي الروح لجل الشهاده

وبدمه يملي حروف طرس اعتقاده

اليزرع وفه بدنياه يشوفه بحصاده

واليسعي للخيرات حتماً يصلها

* * *

وين الوفي وللدين يبذل جهوده

وما يغفه جفنه بليل يحرس حدوده

ولو شائت الأقدار يرخص وجوده

ولو ألف موته يموت عالحق حملها

* * *

المتطبع اعله الخوف واضح بيانه

وبجبهته مطموغ ختم الخيانه

ولو سمع باسم الموت تنسد اذانه

يمكن نسه الأرواح كلمن أجلها

* * *

يفوز اليحط الموت بملاگه عينه

ما يشتري دنياه وايخلي دينه

واشما يجور الحال يثبت يقينه

ولا تطربه الأوهام برنة حجلها

* * *

واجب علينه اليوم نطلع انقاتل

من أجل حق الدين نرفض الباطل

سألوا أمير الكون من هو العاقل

گال اليضع الأشياء كلها ابمحلها

* * *

العاقل يضع الأشياء كل شيء ابمحله

يقتدي ابنهج الدين يرفض الذله

ومن ثورة المظلوم كل حق تجله

حسين أيعرف هالناس ويندل عللها

* * *

شوف أبو اليمه اشلون عالطاغي من ثار

بالسبعه وثمانين ذاك النصر صار

سبو طعش أهل البيت وسبعين الأنصار

ولو احنه أهل الدين نصبح مثلها

* * *

دمشق ١٩٨٠ م

علي بن الحسين (عليه السلام)

ما أنسه يومك يا چتيل العبره

طول العمر يومك يظل إعله البال يا چتيل العبره

* * *

آنه العليل الفطّرت گلبي الآه والعلّه الخفيه

اتغيبت روحي من النحب والويلاه والونّه الشجيه

ما حصل واحد من هلي حتى انخاه برض الغاضريه

بهالغربه وحدي يا چتيل العبره

وحيّرني يوم العاشر إبجمع عيال يا چتيل العبره

ضاگت ابروحي الواسعه بذاك اليوم والگدر والفها

مره اعله جسمك مره عالشاطي تحوم والحزن خاطفها

يوم الفگدتك بيه راواني هموم ما چنت شايفها

خضبت وجهي يا چتيل العبره

ابدم الضحايه ودمع عيني الهمال يا چتيل العبره

* * *

ما چنت شايف هالمحن والآلام برض الطف شفتها

واتمركزت بعضاي كل الاسقام چم علّه حملتها

واسعرت روحي بنار دمع الايتام والروحي فگدتها

ابگطعت وريدك يا چتيل العبره

كل ساعه يتراوالي وجه الجمّال يا چتيل العبره

* * *

ما چنت شايف گمر يهوى اعله الگاع من گلب الثريه

عالنهر هذا الوصف شفته بأبداع من راعي الحميه

للحرم من عالشاطي يرسل إشعاع لآفاق الثنيه

هالگمر عمي يا چتيل العبره

والشمس راسك زاهر إعله العسال يا چتيل العبره

* * *

ما چنت شايف وجه جدنه المختار متخضب ابدمه

شفته إبوجه الأكبر اليسطع أنوار من بهجة الحكمة

ابجثة أخويه اعله الترب تدري شصار من أشرار الأمه

گطّعوا جسمه يا چتيل العبره

وطبرات الأكبر گطعتلي الدلال يا چتيل العبره

* * *

ما چنت شايف معرس اعله الحومه والسمر زفنّه

بالطف شفت جاسم ابفيض دمومه بچفوفه تحنّه

وشمعة زفافه ابچبدتي مضرومه وزيدتلي الونّه

عرسه المنيه يا چتيل العبره

اتغيرت زفة عرسه من حال لحال يا چتيل العبره

* * *

ما چنت شايف طفل ضامي ومذبوح والنبله بوريده

من دمه صوابه دمع عيني مسفوح وآلامه بعضيده

نبلة ابن كاهل خذت مني الروح من طوّگت جيده

ابذبحت رضيعك يا چتيل العبره

أنشد اميه شچان ذنب الأطفال يا چتيل العبره

* * *

ما چنت شايف خيم تتلاهب نار بس خيم أيتامك

نار اللّي چانت لاهبه اباب الدار اتحوّلت لخيامك

وگوم الطغات الگيّدوا حامي الجار شاهدت جدّامك؟

يسرّوا زينب يا چتيل العبره

وگيّدوا جيدي بنفس ذيچ الاغلال يا چتيل العبره

* * *

دمشق ١٩٨٠ م

غريب بغداد

انصابت أصول الدين بمصاب راعيها

راعي المعاجز وين واتوجرت نارين

بمصاب راعيها

* * *

نارين ظلت تسعر ابدلالي وغيرت حالي

نار اعله همي ونار فگد الغالي وغيرت حالي

ومن أثر جمرتهن سهرت ليالي وغيرت حالي

وابگلبي دار النوح صارت مبانيها

واتهدّمت دارين واتوجرت نارين

بمصاب راعيها

* * *

دارين هاليوم الدهر هدّمها عندك علمها

عز وأبه الدارين ما أعظمها عندك علمها

وجروح گلبي الداميه شيلمها عندك علمها

اصرخ واصيح اجروح گلبي اشيداويها

متصوب ابجرحين واتوجرت نارين

بمصاب راعيها

* * *

جرحين خلّنّي أجر انياحه وما شفت راحه

من يوم ابن جعفر طفوا مصباحه ما شفت راحه

سهمين صابن چبدتي الجرّاحه ما شفت راحه

سهام المصيبه اليوم صابت مراميها

وابجمرة السهمين واتوجرت نارين

بمصاب راعيها

* * *

سهمين نيشنها الدهر بعيوني وغيرت لوني

وگوم اللّي غدروا موسى ما رحموني وغيرت لوني

يا ريت گبله بهالسجن خلوني وغيرت لوني

روحي اويه روحه هناك بالسجن تلگيها

متغيبه الروحين واتوجرت نارين

بمصاب راعيها

* * *

روحين غابت بالسجن تدريها وتعرف اشبيها

روحي اويه روح الكاظم امغيبيها وتعرف اشبيها

الكاظم چبدتي وچبدته امگطعيها وتعرف اشبيها

وأهل المكيده ابهاي نالت امانيها

من گطعوا الچبدين واتوجرت نارين

بمصاب راعيها

* * *

چبدين ظلت بالسجن هذا اليوم تتفايض دموم

چبدي وچبد كاظم الغيظ المسموم تتفايض دموم

سهرانه عيني وأبد ما شافت نوم تتفايض دموم

وسبع العوالي اليوم منگلب عاليها

مصيوبه بمصابين واتوجرت نارين

بمصاب راعيها

* * *

مصابين واحد أفجع من الثاني تسمع بياني

مصابي ومصاب الكاظم ابوجداني تسمع بياني

واتحمّلتها ابمنطلق إيماني تسمع بياني

بالصبر والإيمان متصبّر اعليها

دم فاضت العينين واتوجرت نارين

بمصاب راعيها

* * *

طهران ١٩٨١ م

الزفاف المفجع

(سريع)

يا شاب صارت عالحرب زفته وانعجنت إبدم النحر حنته

* * *

ننشد من أهل المعرفه ونستمع يا شاب ليلة عرسه هل الدمع

وزفته سمر القنه بدال الشمع او وردة حياته إرتوت من دمعته

* * *

عريس وشموعه رِماح العده وبيض الأشفار ايشوفها مجرده

وگباله سبعين ألف متجنده للخيم تربي وتنتظر طلعته

* * *

الهذا الشهم يا معرس ايماثله وحافر الخيل إطبول صارت اله

وبالخيمه امه ايشوفها اموجّله أيساعدها الله الرمله من شافته

* * *

بيا عين رمله لهالولد تنظره عريس دمع وداعها امعطره

وجعوده فوگ امتونه متنشره اسم الله اعله اسمك يولدي نادته

* * *

اوصيك يبني وللوصيه إنتبه وجهك لغير النصر لا يتجه

سبحان رب الصاغك هالوجه جلّت صفات الخالق وقدرته

* * *

جاوبها لا ياخذچ بيّه العجب گبلي وجه الأكبر ابدم انخضب

وابجبهتي ثار ابن عمي انكتب هيهات أنسه الأكبر وفرگته

* * *

من طلع يتخطّه من بين الخيم مثل الغصن يتمايل اويه النسم

حيّاه مأتلفه اويه شخصه الهمم وما تختلف عن الحسن همته

* * *

لاح إعله مهره وعالمعاره انعطف وابشدة الصارم دليله انشغف

ومثّل علي بالحومه لمن وگف وفرّق العسكر من بدت حملته

* * *

ثائر وگلبه للنصر عاشگه وابصارمه الأرواح متعلگه

وصورة الأكبر أبد متفارگه اشما طبر يذكر الأكبر وطبرته

* * *

وسام الشهاده الجاسم ايلوگ اله ونفّذ وصية والده ابكربله

وجسمه تغسّل من دمه المرجله وامه بدمعها وهّجت شمعته

* * *

دمشق ١٩٨٠ م

حديث الأسى

(سريع)

عن هالظلم للعالم إنحدّثه وبكل زمن تتكرر الحادثه

انصفّح التاريخ الذي انصدقه وابفكر واعي ومعرفه اندققه

وبهالاحداث الجاريه انطابقه ونكشف منين إبتدت هالكارثه

* * *

لو ردنه لأسباب الحدث نهتدي من عهد غصّاب الفدك نبتدي

وانشوف ذاك الظالم المعتدي چم طاغي بعده لهالظلم وارثه

* * *

ونرجع نخوض الجوله من الأساس من حرب صفين انوجد الانعكاس

دلالي قيح انترس منكم يناس حيدر لهذا المنطق إمريّثه

* * *

هاي المآسي بالحسن تتصل وابصبر أبوه المرتضى ممتثل

ليش إنرمه نعش الحسن بالنبل؟ ندرس الحاله وللسبب نبحثه

* * *

انحدث وما ننسه حديث الأمين (حسين مني وأنا من حسين)

وانشوف بالطف انگطع يا وتين ونعرف يزيد اليا ثغر ناكثه

* * *

وزين العباد الچبدته مگطعه والباقر امشابهه بهالفاجعه

ومصاب ابنه الصادق أيتابعه من هالاشرار البالكفر جائثه

* * *

وكاظم الغيظ البالصبر منوصف ابسجن الرشيد وظلمه شاف الحتف

وابنه الرضا عنه فلا يختلف وروحه بدياجير الكفر لابثه

* * *

والرضا نحبه انگضه بدار الغرب وموقف الغربه ايصير موقف صعب

المأمون ظالم بالمثل ينضرب ثعبان سّمه ابكل عصر نافثه

* * *

للرضا من اجعله والي العهد كل ضنّه چان بهالمكيده اجتهد

ومأمون هذا العصر ادهى واشد وهذا الظلم ذاك الظلم باعثه

* * *

دمشق ١٩٨٠ م

الحوار اللاذع

زينب ابغثر الإيمان لثمت نحر واليها

ونادته مبارك يحسين بالچنت متمنيها

* * *

طلعت الحره الجسم عود السجاد

من شافت الراس انرفع عالمياد

ما خلفت الموعد مضت عالميعاد

من سمعت الصوت ايصيح لعيالچ اتكفليها

* * *

عالصوت راحت وابصدرها العبره

شافت جسم واليها فوگ الغبره

احتارت بامرها وغدت تنشد نحره

جثتك يبو الاكبر ليش فوگ الثره امخليها

* * *

بسيف الكفر يحسين نحرك حزوه

المطلوب ثار أعرف إبدمه ايوفره

ما سامعه المچتول عاري ايخلوه

والجثتك يا مظلوم ليش العده امسلبيها

* * *

امن الطمع سلبوا جثتك هالاشرار

ومطلوب ثار وصار بيك الماصار

أرد انشد الخياله هم تطلب ثار؟

يبن امي لضلوعك ليش بالحافر مهشميها؟

* * *

صدرك الخيل عداك چان شمطلوب

يا سبب فوگ الرمح راسك منصوب؟

أقسم ابگطعة خنصرك يا مسلوب

غير آل اميه بهالكون ما واحد امسويها

* * *

حيّرني أمرك يا چتيل العبره

اليشوف جثتك ميتمالك صبره

من مثلك امغسليه من دم نحره

للغسل ما يحصل ماي ابفيض الدمه امغسليها؟

* * *

عدوانك ابهالحاله مغزاها اشچان

من ثره المصرع الك تنسج اكفان

كون انته تتچفّن ابذاري التربان

لا وحگ جثتك يحسين المّن الثره امچفنيها

* * *

يا ريت يحضر بالطفوف الهادي

وايشوف بيّه وبيك خويه اشسادي

ويرجع يلم اعيالك من الوادي

حايره ومذعوره الراي والخيل تسحگ بيها

* * *

زينب تحشم جسم أخوها المظلوم

تترجه جثه بلايه راس الها اتگوم

گعدت تشم اصواب نحره المالوم

يحسين زينب تنخاك ما تگعد اتحاچيها

* * *

گطعت گلبي يا گطيع المنحر

ابچبد اختك صواب المثلث أثّر

باصرني نوگ اليسر من تتحضر

عيالك ابدرب الشامات يا هو الذي ايباريها

* * *

دمشق ١٩٨٠ م

حفظ اللسان

لسانك يصاحب ميزان حافظ على ميزانك

* * *

من تحچي يا صاحب تذكر دونك

ميزان بيه الوادم أيقيسونك

لسانك حصانك من تصونه ايصونك

والمثل واضح تنهان لمن تهين لسانك

* * *

لا تجعل لسانك سهم بيه اتصيب

سهم اليخطّي الهدف راعيّه يخيب

وعورات غيرك لو شفتهن لتعيب

يا صاح كلّك عورات والبيّنه ابخفيانك

* * *

لو چنت صاحب ملمات واحساس

من تحكم احكم عدل ما بين الناس

لمن تشيد لا تحط بيدك فاس

من گبل تهديم الغير بي ينهدم بنيانك

* * *

ابدرب المهالك لا تحث بالممشه

والما تنفعك انطي اذن الطرشه

بفالك من اتلم الدهر واتطشه

تشاهد حسابك مظبوط من ينضبط ايمانك

* * *

لو ردت تكرم حاجه لا تبذلها

صاحب الدرّه لو رخصها ايذلها

غايه البعيده لو ردت توصلها

لا تذب زور ابممشاك إمشي ابقدر إمكانك

* * *

من تصعد اعله العالي بالك تغتر

اشما تصعد ابعين اللي حدرك تزغر

وبگطعة الرمانه تلحگ جعفر

وگعتك عالگاع اتصير من منقصه عرفانك

* * *

لو شفت واگع حال ويريدك عون

عينه ولتطغه وتنگلبله فرعون

هل الك يظهر موسى وتشوفه اشلون

حامل عصاته ابيمناه وايغرگك ابطغيانك

* * *

لو صح الك اخ باخوة هابيل

لا تتّبع ويّاه غاية قابيل

لو جاك أبو مره ابتعد عنه وميل

من گبلي گله لقابيل صدته ابشرك بهتانك

* * *

لو والمك منكر تبعّد عنه

لو ردت درب اللي تحصل منه

امشي بدرب سيد شباب الجنه

اتفوز ابنعيم الفردوس من ينشكر سعوانك

* * *

بغداد ١٩٧٥ م

الطفل الرضيع

(عگيلي)

عبد الله ابنبله أيفطمونه

* * *

يبن العسكر من ظل وحده حسين وما من ناصر عنده

رد لعياله ايجدد عهده بآخر توديع ايودعونه

* * *

من رد حسين اتلگنّه ربّات الخدر أيودعنّه

واعليه أهون وايشمنّه وحسين ايشوبح بعيونه

* * *

يشوبح بعيونه اعله اطفاله واعله فراگه ايصبر عياله

عبد الله ابمهده اتراواله ناشد عن امه المحزونه

* * *

زينب نادت يابو اليمه طفلك ذايب گلبه وجسمه

وظلت امه بهمها وهمه وموتتها اعله ابنك مضمونه

* * *

ناداها اعليّه ابعبد الله مهموم وبي خل اتسله

اتعنت بي لحسين اتحمله للوالي ابطفله أيسلونه

* * *

ضم حسين بطفله لصدره راد ايطفّي لابنه الجمره

لن أيشوف النبله ابنحره الطفل بيا ثار أيطلبونه

* * *

من دم نحره الطفل اتخضب والوالد بصوابه اتصوّب

صاح من ايدي اخذي يا زينب ودّيه لأمه المحزونه

* * *

اتودّيه لأمه بيا حاله وبالمدمع ظلت تبراله

مذبوح ابنبلة چتاله والمهده اشلون يودونه

* * *

الكاظمية المقدسة ١٩٧٦ م

البسالة الهاشمية

(عگيلي)

عباس وزم بيده الرايه اشحده اليوصل حد الثايه

* * *

قائد لعهوده معززها وبچفه الرايه مركزّها

وبنصرة دينه مطرزها آيه وبيمينه ترف آيه

* * *

آيه ومن حيدر وارثها ونيران الكون ومورّثها

باد الحمله وما ريثها وفرّت سيّافه ورمّايه

* * *

وبعزمه لميدانه يجوله وظل يتخطه بعرضه وطوله

لن يسمع صوت المكفوله يالكافل جيتك شچّايه

* * *

جيتك يا ضيغم يمچنه يالسيفك باسمك يتغنه

ارد اشكيلك جمر المحنه جمرة فركتكم وضمايه

* * *

والانته موزّم بحماها يا عباس اسمع نخواها

تربي اعله الجود بعيناها ترويها تريدك من مايه

* * *

المعتوب يوفّي بعتّابه بالخيمه عيالك مرتابه

من نار ضماها اللهّابه وتعرف شيطفي اللضّايه

* * *

جودك للنار يطفيها ولگلوب الجفّت يرويها

اشلون بهالحاله مخليها يا بحر الجود وعطّايه

* * *

من صد لايتامه بعيونه وامنها ولوّح ميمونه

ذب جود الماي اعله متونه ونشّف دمعتها الهمّايه

* * *

من فرّح گلب الكافلها لگلوب العسكر جفلها

بميول الصارم ميلها وبرمحه الحومه مغطّايه

* * *

وكف الجيمان المصطفّه وبالصارم للعسكر صفّه

احتل الشاطي بزود وعفّه ومن اسمه العفّه مسماّيه

* * *

من ذب الجود اعله يمينه والمگدر ليه امعينينه

صاب الجود وصوب عينه وايّس عباس من الغايه

* * *

والعامود الصوّب هامه حل ما بينه وبين خيامه

لن يسمع صرخات ايتامه صرخات وظلت دوّايه

* * *

الكاظمية المقدسة ١٩٧٧ م

النعي

العباس (عليه السلام)

هاك اخذ يا عباس شكواي جمر العطش بالگلب سرّاي

مثل الخيم متلاهب حشاي لا تضن اشكيك من ضماي

يا أبا الفضل جزنه من الماي لاچن اجيت اشتكي من عداي

خلت حرمكم فاجده اراي وتنادي وين الكفل بحماي

وينك يمن للعهد وفاي انهض من المصرع يرجواي

وباصرني يا أبا الفضل بهاي لليسر من يصير ممشاي

ترضه الشمر بالظعن حداي

* * *

القاسم بن الحسن (عليه السلام)

يا جاسم مبارك بعرسك طابت بهذا العرس نفسك

بالحومه يبني اسمعت حسك من ابزغت للحرب شمسك

لقنت للعدوان درسك يوليدي بسك بعد بسك

خلي الشهاده تروي غرسك لا زال دمك كتب طرسك

هاك اخذ روح امك تحرسك

* * *

علي الأكبر (عليه السلام)

شمحلاك يوليدي يالأكبر من لوحت ظهر المسفسر

مثلت بالميدان حيدر وذكرت عدوانك بخيبر

ما ادري تالي البدر الأزهر من العليه عالغبره ايتكور

وانظر لعد جسمك اموذر بسيوف عدوانك مطبر

التفگد ابنها اشلون تگدر ماتم صبر الله واكبر

ومن الصبر گلبي تفطر

* * *

الحر الرياحي

الحر الرياحي بالحرايب ابهمته ناصر آل غالب

وبسيفه طيّع هالكتايب راواها للحومه العجايب

وانكشفت اغيوم المصايب ولمن وگع طود المناقب

جثته شالتها الگرايب بس ظلت جسوم الأطايب

متوذره بسيف النوايب چاوينهم آل أبو طالب

ما تدري گلب حسين ذايب وصيوانه بالنيران لاهب

والحرم ما بين النواصب

* * *

الهوسات

للحسين (عليه السلام)

يالسرك نقذ آدم من العصيان

يسفينه السرت وابحرت عالطوفان

يلسان اللي بيه اتميّز سليمان

يچف السلّط ابراهيم عالأوثان

يلّي سرّك امصوّر العصى ثعبان

يا آية موسى المعروفه غايتنه بحبك مكشوفه

* * *

يا سر الزبور ومحتوى الإنجيل

يا تورات موسى وناسخ التضليل

يا محمل القرآن بهدى التاويل

يا من بالمهد ناغاك جبرائيل

صوتك بالضماير نفخة إسرافيل

ماتت وبصوتك تحييها ومن نومة غيها اتصحيها

* * *

يا حجة الباري ومصلح الأمه

يا فرع النبوه ووارث العصمه

يا روح الإسلام ومنهجه وحكمه

يا سيف الإله القاطع ابحسمه

يالنحرك امنور العرش من دمه

يحسين بحبك آمنّه يحسين وتدري شنتمنه

* * *

يلّي اختارك الباري لفداء الدين

يلّي فقت بالتضحية اعله الماضين

لهذا اليوم دمك ما نشف يحسين

وظلت عالنهر جود ولوه وچفين

يحسين وزينب مسبيه وضعنك چتّالك حاديّه

* * *

الكاظمية المقدسة ١٩٧٨ م

للعباس بن علي (عليه السلام)

هذا انته يخويه والحرايب هاي

يا سدة اسكندر يا كفيل حماي

مسني العطش يا عباس شنهو الراي

زينب وتحشم واليها مواعدها يكون يوفّيها

* * *

تغطرس بالعزم واتمطه برچابه

وضهضب اباللوه چنه اسد غابه

ذب جوده اعله متنه واشرع حرابه

شيصبره وزينب عطشانه سيطر عالشاطي وفرسانه

* * *

للجود بيمين الغانمه زمه

لاچن الحماسه احترگت بجسمه

كل همه يجيب الماي كل همه

عباس اتوسط بالحومه شحده اليوصل للملزومه

* * *

وصل للعلگمي وامتلك جاريّه

وعينه اعله المخيم ظلت ربيّه

وجاري العذب لمن غرف من ميّه

واتذكّر بحسين واطفاله واتغير من حاله لحاله

* * *

تذكّر أبو اليمه وفاض دمع العين

وعاتب نفسه بالفاظ الابه والدين

هوني يا نفس من بعد اخويه حسين

من ذب الجود اعله متونه اندارت عالصيوان عيونه

* * *

گمر هاشم ولاح مهنده بينماه

حط السيف بيد وايد بيها لواه

گبل ميحانه صوت التضحيه ناداه

عونك يا ضيغم يمچنه انفتحتلك ابواب الجنه

* * *

الكاظمية المقدسة ١٩٧٨ م

الأبوذيه

يلايم لا تلوم الگلب دمعين

جرح البيه ما يندمل دمعين

فايض بالجفن هاليوم دمعين

على مصاب النبي وظلع الزچيه

* * *

مثل الدوح للونه نبيها

تناوبنه ابحزن واحنه نبيها

اشلون امه الذي خانت نبيها

ونقضت بيعته وأمر الوصيه

* * *

يتاج ابراس أهل الحگ والاشراف

ونور الباري بالهيبه والاشراف

الكعبه الها شرف عالي والاشراف

الك بيت الولاده أصبحت هيه

* * *

الحسين (عليه السلام)

دليلي امصوّب ومحتار بالهام

ابرزية كربلاء ما ركن بالهام

أخويه حسين صابه للحجر بالهام

وطاح من المهر فوگ الوطيه

* * *

الصبر ثوب وتفصّلي وحاله

على اللي ابمصرعه الباري وحاله

حالي اميسره أمشي وحاله

ثلث تيام مرمي اعله الوطيه

* * *

العباس (عليه السلام)

انه زينب وعگلي انشل ورايه

رحت للنهر ومصابي ورايه

إلي چفين عالشاطي ورايه

انطوت يم الگمر فوگ الوطيه

* * *

بسّك يا دهر بالحزن وآنه

دليلي ذاب لمّن كثر وآنه

أخويه اعلى الثره مطروح وآنه

باچر بالحرم أمشي سبيه

* * *

جرعت من النوايب راح من راح

وانطحنت ظلوعي براح من راح

انشدك على كفيلي الراح من راح

دمي ودمعي يتفايض سويه

* * *

علي الأكبر (عليه السلام)

چم گلب ابتله بحزني والي شاب

وحرگته ابجمرة مصابي والي شاب

الي والي انگطع نحره والي شاب

الاكبر واخذته مني المنيه

* * *

يا يوم اخلص من الهظم يا يوم

وعليه الدهر بالاهات يا يوم

حسبتك للدفن تحضرني يا يوم

مچنت احسب حساب الغاضريه

* * *

القاسم (عليه السلام)

يجاسم چنت الي بدنياي فاتن

وسهام الحزن للگلب فاتن

فاتني ليالي البيض فاتن

وطفوا شمعاتك الچانت زهيه

* * *

الگدر كل ساعه الي صوره يجاسم

وسيف مصابك لگلبي يجاسم

اخذ وياك دلالي يجاسم

عنك يشگف سهام المنيه

* * *

الإمام السجاد (عليه السلام)

يعيني جودي بالمدمع يعيني

ولا ريدن بشر بالهم يعيني

عليل وشفته برض الطف يعيني

جمر علته وغارات آل اميه

* * *

مسلم بن عقيل

الدهر غرب هلالاته وهلها

ودموعي دموم اذرفها وهلها

الكوفه خانت بمسلم وهلها

وغريب انچتل ما بين آل اميه

* * *

الحر الرياحي

الحر للعدل خط رايه ولا ظل

بحر الشمس لا كاسر ولا ظل

اهله شالته لجسمه ولا ظل

الماعدهم أهل ظلوا رميه

* * *

جابر الأنصاري

كسير ومحد الكسري يجابر

وتدري بالقدر حكمه يجابر

عن حسين لا تنشد يجابر

هذي عيلته الچانت سبيه

* * *

المباراه

شيعتي مهما شرِبتم عذبَ ماءٍ فاذكروني

الگدر مسرع ويايه بهظم ما أن

ومثل ونّات گلبي گلب ما أن

يشيعه اشما شربتم عذب ما أن

اذكروني بمصاب الغاضريه

* * *

قد كانَ عريساً ولكن بالدما عوضَ الخضاب بكربلا قد خُضبا

شباب الحومته لمن بدلها

صب الرعب من سيفه بدلها

انعجنت حنته لاچن بدلها

تحنه بالدمه وعرسه المنيه

* * *

لَئن قَصَدَ الحجاجُ بيتاً بمكةٍ وطافوا ببَيْتٍ والذبيحُ جَريحُهُ

فاني بواديِ الطفِّ أصبحتُ مُحْرِماً أطوفُ ببيتٍ والحُسَينُ ذَبيحُهُ

اگول ابِيقضتي إو لا هجر بالطف

تكمل الناس حج البيت بالطف

وأنه محرم صبحت اليوم بالطف

احج كعبة ذبيح الغاضريه

* * *

وفتيةٌ من بني عدنان ما نَظَرَتْ عينُ الغزالةِ أعلى مِنْهُمُ حَسَبا

من كلِّ جسمٍ بوجهِ الأرضِ مُنْعَفِرٍ وكلُ رأسٍ برأسِ الرُمْحِ قَدْ نُصِبا

خطب عين الغزاله اتگول سايد

مثل فتية بني عدنان سايد

من كل جسم فوگ الگاع سايد

وكل راس انرفع عالسمهريه

* * *

الموال

في حق الأمير (عليه السلام)

يا علي گلبي بودادك هام الك هام الك

والروح واضح عشگها هام الك هام الك

ما يوم فكري تضنه هام الك هام الك

واستارثت هالمحبه من هلي من هلي

وچاسات حبك رشفها من هلي من هلي

غيرك بهاي العوالم من هلي من هلي

* * *

وسوط النوايب لمتني ياسمه ياسمه

وفلك الإله بيمينك ياسمه ياسمه

هالناس كلهم نجومك ياسمه ياسمه

شخصك صفتله المعاجز عادله عادله

عالشمس شار وقرصها عادله عادله

وصارمك ميزان للحق عادله عادله

* * *

وانغرز سرك بسورة هل اته هل اته

وروحك ازمرد علينه هل اته هل اته

وهلال سعدك صفاتك هل اته هل اته

وسرك رفع كل بله شظل يابله يابله

واسمك لاسم الجلاله يابله يابله

سليمان ذاك العرش من يابله يابله

(متّوج بتاج المعاجز هام الك هام الك)

* * *

طهران - ١٩٨١ م

اجتماعي

شبه الصوافن صرت مره اسرع ومروان

حامل ابضهري العذب لاچن أبد مروان

ما بين فرحه وحزن مره ابتسم مروان

ولو ردت أبث العتب للي تنومس شبث

واللي تشبث عليّ ماني اعله فعله شبث

مروان ابن الحكم مختلف عنّه شبث

لو ردت تعرف شبث اقره بصحف مروان

* * *

بغداد ١٩٧٥ م

للإمام الحجة بن الحسن (عليه السلام)

يالمجزي باحسان للّي عن بغض سايلك

گلبي هوه ابحضرتك يا مالكه سايلك

شاهد نميره نضح لمودتك سايلك

غذتني ابحبك الچانت تهز مهدي

ليك اهتديت الدرب ولغيركم مهدي

للمهدي نخوة محب بيدك يبو المهدي

اتگله محبك الك من الفرج سايلك

* * *

الكاظمية المقدسة ١٩٧٨ م

الفهرس

مقدمة ٢

في قصائد الگعدة ٤

وا محمداه ٥

تغريد القلوب ٨

مسلم بن عقيل ١٢

مسيرة الحسين (عليه السلام) ١٦

نداء السيف ٢٠

الأسرار ٢٣

الحرّ الرياحي ٢٦

صرخة أنصار الحسين (عليه السلام) ٢٩

راية الإيمان ٣٢

للقاسم آيات ٣٦

جهاد الأكبر عليه السلام ٤٠

من أجل العقيدة ٤٤

رجوع السبايا ٤٧

الحسن بن علي (عليه السلام) ٥١

الكاظم حياتي وروحي ٥٤

في قصائد اللطم ٥٧

محمد بن الحنفية ٥٨

سر الله المكنون ٦١

الحسين (عليه السلام) كعبة الثوار ٦٤

ماذا جرى في الطفوف ٦٦

قم يا أبا الفضل ٦٨

يا فرج الله ٧١

مصرع العباس (عليه السلام) ٧٣

يوم عاشوراء ٧٥

استنهاض وعتاب ٧٧

علي الأكبر ٧٩

فراق علي الأكبر ٨١

أنا زينب ٨٣

حنان رمله ٨٥

حسين مني وأنا من حسين ٨٧

والعصر ٨٩

البدور الهاشميّة ٩١

الزهراء (عليها السلام) ٩٣

الشأن الأعظم ٩٦

الثورة المحمدية ٩٩

مصير الأمة ١٠٢

دستور العقيدة ١٠٥

الندبة الجارحة ١٠٨

الصمود أمام الرزايا ١١١

اليوم الخالد ١١٣

مواقف زينبية ١١٥

الوالد على سر أبيه ١١٧

ليلى ١٢٠

اين الكفيل ١٢٢

الأصوات الهادره ١٢٥

علي بن الحسين (عليه السلام) ١٢٧

غريب بغداد ١٢٩

الزفاف المفجع ١٣٢

حديث الأسى ١٣٤

الحوار اللاذع ١٣٦

حفظ اللسان ١٣٩

الطفل الرضيع ١٤١

البسالة الهاشمية ١٤٣

النعي ١٤٥

الهوسات ١٤٧

الأبوذيه ١٥٠

الموال ١٥٥

في حق الأمير (عليه السلام) ١٥٥

اجتماعي ١٥٧

للإمام الحجة بن الحسن (عليه السلام) ١٥٨