الدموع الناطقة الجزء الثالث

في رثاء النبي (صلّى الله عليه وآله وسلّم) وآله (عليهم السلام)

الشاعر جابر الكاظمي

مقدمة

قلّما يظفر المتأمل في سجل التاريخ بحادثة كحادثة الطف وقضية كقضية أبي الأحرار الإمام الحسين بن علي بن أبي طالب (عليهم السلام) في إثارتها للوجدان الجماهيري وتحريمها للعاطفة الإنسانية بصورة مستمرة وبنفس الزخم الذي زلزلت به ساحة الأحداث في المقطع الذي وقعت فيه تلك الملحمة الخالدة التي تراءت للناس أسطورة في ما عرضته من مشاهد وسطّرته من معاني وخلّفته من آثار.

ولئن كان للسماء دورها الرئيس في التخطيط لهذه القضية والتبليغ لها والعمل على إبقائها حية وهّاجة مهما تقدم بها السن، فإنها لقاعدتها التي تبنتها وتعهدت بالنضال في سبيلها هدفاً وفكراً ومنهجاً ورصيداً وعملاً، ودوراً لا يغفل في إدامتها وترسيخها في الألباب والقلوب، إنها ظاهرة تناغم أخّاذ بين هذه القضية التي توقد بحرارتها النفوس فتطفق تعبّر عما يجول فيها من رؤى ومشاعر وبين هذه النفوس التي جنّدت لأداء وظيفتها إزاء هذه القضية كالزيت يحترق بالنار فيموّنها لتبقى شعلتها ملتهبة وملهبة ما دام له وجود.

ويبرز الشعر من بين فعاليات هذه القاعدة بما له من قوة في صياغة الفكر وقدرة في التعبير عنها وفعل في التحريك لها ليحتل مساحة مرموقة ويملأ فراغاً لا يُملأ بغيره من ألوان التصوير والتعبير.

وهكذا كان للقضية منذ البداية وعلى طول الخط جيش من الشعراء رفعوا راية الدم وعلقوا أوسمة الطف وبرزوا بعد ما تشبعت بأبعاد كربلاء أذهانهم وجاشت بالمأساة نفوسهم ليصوروا في قصائدهم ما نهلوه من معين قضيةٍ كان العطش معلماً من معالم المظلومية والمأساة فيها، فكان لتلك القصائد الأثر الكبير في الدفاع عن قضية كربلاء وفي إحيائها وفي تعظيمها.

ومن هنا كان تأكيد الأئمة (صلوات الله عليهم) على هذا الحقل ودعمهم للدور الرسالي الذي يمكن أن يقوم به، فهذا على سبيل المثال أبو هارون المكفوف يقول: قال لي أبو عبد الله (عليه السلام): (يا أبا هارون أنشدني في الحسين (عليه السلام) فأنشدته فقال: أنشدني كما تنشدون يعني بالرّقة قال فأنشدته:

أمرر على جدث الحسين فقل لأعظمه الزكيّة

قال: فبكى ثم قال زدني فنشدته القصيدة الأخرى قال: فبكى، فسمعت بكاءً من خلف الستر فلما فرغت قال: يا أبا هارون من أنشد في الحسين شعراً فبكى وأبكى عشرة كتبت لهم الجنة، ومن أنشد في الحسين شعراً فبكى وأبكى خمسة كتبت لهم الجنة، ومن أنشد في الحسين شعراً فبكى وأبكى واحداً كتبت لهما الجنة، ومن ذكر الحسين عنده فخرج من عينه من الدمع مقدار جناح ذبابة كان ثوابه على الله ولم يرض له بدون الجنة).

ويروي الكميت بن زيد فيقول: دخلت على أبي جعفر (عليه السلام) فقال: والله يا كميت لو كان عندنا مال لأعطيناك منه ولكن لك ما قال رسول الله (صلّى الله عليه وآله) لحسان: (لا يزال معك روح القدس ما ذببت عنا).

ويطالعنا الإمام الرضا (صلوات الله وسلامه عليه) فيما ورد عنه في مقام تجليل شعراء أهل البيت (عليهم السلام) بقوله: (ما قال مؤمن فينا شعراً يمدحنا به إلا بنى الله تعالى له مدينة في الجنة أوسع من الدنيا سبع مرات يزوره فيها كل ملك مقرّب وكل نبيّ مرسل).

نعم إنها رسالة الشعر حين ينطق ليحرّك الناس في خط الحق وليساهم في دحر الباطل وليؤدي دوره في مسيرة خلافة الله تعالى في أرضه.

و(الدموع الناطقة) حلقة من هذه الحلقات المتواصلة ذرفها شاعر موهوب من شعراء أهل البيت (عليهم السلام) وأنجبته الكاظمية المقدسة وهو الشاعر جابر الكاظمي، ويمثل الدموع الناطقة ديوانه الشعري الذي يتميز به من إبداع في التصوير وجمال في التعبير وإخلاص في العمل ورسالية في الطرح وجلال في المادة قد ملأ فراغاً كان لابدّ أن يسد تراثنا الأدبي الشعبي، الأمر الذي يبعث على أن نشدّ على يديه ونحيي جهوده ونكرم أعماله وندعو الله تعالى له بالقبول والتسديد.

في قصائد الگعدة

علي بن أبي طالب (عليه السلام)

يا علي شمس وگمر خل يسلموني

ما عوف حبك ابد لو گطعوني

حبك حياتي وبيك امنياتي

ما عوف حبك ابد لو گطعوني

* * *

يا علي حبك سعاده وانغمرنه بهالسعاده

ومصدر التقديس نورك واحنه ماشين ابرشاده

واللي يصفح عن طريقك ابد متفيده العباده

حبك نريد انوصفه لا عن جهل لا عاطفه

مصدرنه من المصطفه عن بصيره وعن اراده

يا علي حبك شرف اهل الهدايه

وبگلبي من سجلوا اسم الولايه

كملت صفاتي وبيك امنياتي

ما عوف حبك ابد لو گطعوني

* * *

يا علي الباري صهرلك ذات من ذاته وجماله

ومزج اوصافك ابوصفه وكمل وصفك من كماله

ومجمل اسرار الولايه انخزنت ابكنز الجلاله

لشخصك الباري امكمله وبالعالم العلوي اعتله

انته العلي وانته العله واعتلت بيك الرساله

يا علي نورك زهي بأوج المعالي

ولمن اوصفك يسموني مغالي

انته نجاتي وبيك امنياتي

ما عوف حبك ابد لو گطعوني

* * *

يا علي كل نبي ومرسل منك اتعلم دروسه

لنوح صانعله السفينه يللي سرك عصة موسى

من السجن نجيت يوسف وبالمهد كلمت عيسى

ابحكمتك داود انتصر وايوب من صبرك صبر

ويونس نقذته من البحر وانته للعالم شموسه

يا علي ابتوحيدك الباري توحد

واجعلك آية وفه بسورة محمد

ابمعتقداتي وبيك امنياتي

ما عوف حبك ابد لو گطعوني

* * *

يا علي ابوحدت ثباتك خالق العالم توحد

صرت منبع للمعاجز ولك جبرائيل يشهد

باب علم الباري انته والمدينه اصبح محمد

يمثبت حروف السور نورك على الكون انتشر

من جانب الطور ازدهر واتصل بالحجر الأسود

يا علي مولودك ابمركز الكعبه

وگلب اليودك ابد ما ينسه حبه

يا ثمر ذاتي وبيك امنياتي

ما عوف حبك ابد لو گطعوني

* * *

يا علي ابچف اقتدارك ركزت سيف الاطاعه

الجنه والنار اجمعتهن بالحروب بكل براعه

بسيفك النار اشعلتها ووجهك الجنه بشعاعه

من سيفك النار اسعرت وابوجهك الجنه ازهرت

بيك العقيده اتحررت او وضحت معنى الشجاعه

يا حجة الباري يا خازن علومه

گلبي اليودك ردت تكشف همومه

ابساعة مماتي وبيك امنياتي

ما عوف حبك ابد لو گطعوني

* * *

يا علي ابتعيين قدسي اتعينت للدين قائد

واجعلك رب البريه ابگلب كل مؤمن مجاهد

واحملت راية محمد وانشرتها اعله العقايد

وبعدك گمر هاشم حمل هالرايه والنصر اكتمل

ولحسين حققله الامل وكشف عن گلبه الشدايد

يم النهر من وگع كوكب الدري

ناده أبو اليمه خويه اكسرت ظهري

وحانت وفاتي وبيك امنياتي

ما عوف حبك ابد لو گطعوني

* * *

يا علي يا ريت حاضر كربله اتشوف أبو اليمه

عالگمر محنى ويشاهد رايته المرميه يمه

ايصيح عگبك يا عضيدي دنيتي صارت مظلمه

هاذ آنه اخوك حسين حاضر يمك

يا طود عزمي يا هو هدّم عزمك

يا خويه جيتك رايد احمل جسمك

عيلتك يتنطروك ابخيمتي ويتنطروني

* * *

جاوبه العباس خويه جثتي اعله النهر خلها

واعدت سكنه تراني ولو رحت يمها شگلها

لون عندي عيون اروحن يمنها واعصر عيني الها

لاچن يخويه السهم صوب عيني

وانگطعت بسيف الگدر چفيني

خليني مرمي اعله النهر خليني

بيش اروحن للمخيم وانطفت شمعة عيوني

* * *

حسين جاوب گمر هاشم آه يالمصيوب شوفك

بطل حيلي عليك خويه اشلون راح امشي واعوفك

ريت متگطعه چفوفي ولا شفت گطعت چفوفك

يا ابا الفضل روحي الحزينه تنوحك

ما بين ما گاعد واعد جروحك

بين ايدي يا عباس غابت روحك

يبن ابويه انهدم حيلي ابكربله وخابت ضنوني

* * *

بين ايد حسين غابت روح أبو فاضل عضيده

گام چنه هلال ظهره منحني وعالظهر ايده

نشّف دموع المصيبه النوح يدري ما يفيده

واظهرت هاي الچلمه من گلب حسين

ودعتك الله يا گطيع الچفين

راح ارجع لعيلتك يا نور العين

شرد اجاوب هاليتامه والحرم من ينشدوني

* * *

عيون بالصيوان تربي من الارامل واليتامه

تنتظر وليان الها بلچن تعود ابسلامه

ساعه لن رد أبو اليمه منفرد گاصد خيامه

وضجت العيله اتصيح يا والينه

شنهو السبب رديت وحدك لينه

يحسين چا بدر الهواشم وينه

گلها طاح اعله الشريعه وكسر ظهري وخطف لوني

* * *

طهران / ١٩٨٢ م

ثورة الحسين (عليه السلام)

ابموقفك يحسين تشهد كربله

حاشاك ترضه الظلم حاشاك

والهادي وصاك

* * *

فجرت يحسين ثوره ابكربلا والهدف واضح

للظلم هزيت عرشه واكشفت اهل المصالح

ابوجه خصمك صحت صيحه لا اساوم لا اصالح

والهدف يحسين الهدف واضح وللناس انكشف

ضحيت دمك للشرف ناجح ابهالهدف ناجح

صوتك يمظلوم بالطف اعتله

للظلم ما صافحت يمناك

والهادي وصاك

* * *

اليدرس اهدافك يشاهد كل هدف من عنده آيه

صار فكرك بالشهاده تفتح دروب الهدايه

قائد وكل مفاهيمك عن بصيره وعن درايه

قدمت للعالم درس الحر يلتزم عز النفس

واغرست من دمك غرس مثمر او نجحت الغايه

والغايه يحسين تحرير المله

وما نكست هامتك لعداك

والهادي وصاك

* * *

الهادي وصاك أبوصيه للظلم ما تمد ايدك

ولو دعاك الدين تمضي وللشرف تعرض وريدك

نَفَّذِت كل الوصايه واضمنت بالطف رصيدك

شفناك انته الواقعي اتضحي گبل ما تدعي

ضحيت دمك عن وعي وللظلم ملويت جيدك

فكرتك يحسين فكره عادله

بالشدد ما غيرت مسراك

والهادي وصاك

* * *

ابكربلا گوم آل اميه أبد ما گدرت تخدعك

اتقدَمِت واعلنِت ثوره بالابه والابه طبعك

قدمَت كل مغريات الدنيه ما گدرت تمنعك

شافتك بالعز والفخر امصمم على گطع النحر

صرختك ظلت بالدهر تدوي والواعي يسمعك

تاج الكرامات لوجودك حله

واعله الشهاده افتحت عيناك

والهادي وصاك

* * *

كل مفاهيم الشهاده ابدمك الطاهر تشرعت

والذي رادت تخدعك تالي بالناتج انخدعت

جيش سبعين الف طاغي عليك بالميدان طلعت

وانشهرت سيوف الظلم رادتك بالطف تنرغم

سبعين الف باغي وخصم ابكربلا اگبالك توزعت

واصعدت يحسين ظهر ام العله

جابهت كل ظالم تحداك

والهادي وصاك

* * *

بالعزم سلّيت سيفك وادخلت سوح الحرايب

صارمك لمن ترفعه ترفع اصفوفه الكتايب

من ثباتك من صمودك شافت الگوم العجايب

من خذت وجه الملحمه بيك اسعرت نار الضمه

غسلك دهرك بالدمه وچفنك من الترايب

والاشد يحسين سبي العايله

اتجيب العيال لكربله وياك

والهادي وصاك

* * *

گبل لا تطلع سبيه اتعنتك زينب تحشمك

نادتك تعذرني خويه لو عفت عالترب جسمك

هالامر لو چان بيدي اگضي طول العمر يمك

يا مظلوم جسمك اشلون انعوفه

وامشي اليوم ويه الحرم للكوفه

وويه الگوم متروعه ومچتوفه

گوم باصرني يخويه اشلون للشامات اطلع

* * *

طهران / ١٩٨٥ م

وداع القاسم بن الحسن (عليه السلام)

من جمر الظلوع من نار الدموع

يبني يجاسم بالخيم اعلگلك شموع

من نار الدموع

* * *

سالت دموع العواطف من شفت رمله الغريبه

ابوسط صيوان النوايب حانيه ظلوع المصيبه

تنظر لحوفة ولدها والچبد يسعر لهيبه

صاحت ومدمعها همل گلبي يجسام انوجل

ابغيبتك لو ضاع الأمل هالامل يا هو اليجيبه

عگبك يجاسم تغدرني الأيام

ورمش الجفن ما ينزرع لو شفته مگطوع

من نار الدموع

* * *

يبني يا غصن المحبه اللي سگيته ابفيض دمعي

اسهرت برباك الليالي او عالمهد شديت ظلعي

چنت مامونه بوجودك، كربله غيرت وضعي

گلبي ابوداعك ملتهب وعگلي يجاسم منسلب

واتعلمت فن النحب وصار طبع النوح طبعي

واحترگت الروح من شهگة النوح

والگلب ظل ابحوفتك هايم ومفزوع

من نار الدموع

* * *

لا تضن احزن يجاسم للحرب لو ردت تطلع

مثل ما درعك لبسته بالصبر گلبي تدرّع

وچبدي تتضمد جروحه لو شفت جسمك امگطع

عهدك تضحي يا شهم والوفي ابعهده يلتزم

ارضعتك وفه وطيب وعزم گوم وفيلي المرضع

والحسن وصاك تتحنه بدماك

ومنهج وصية والدك بعيوني مطبوع

من نار الدموع

* * *

انشهرت سيوف الاعادي وشبچت رماح المنيه

والحسن وصاك يبني وبالك اتعوف الوصيه

وهذا سيف الموت بيدك لاهب ابجمر الحميه

والشهم لو طب للحرب يگلبها للحومه گلب

گوم ازرع ابسيفك رعب واحصد رگاب آل اميه

بيك العزم لاح گوم اقبض ارواح

وگلبي يظل ابفرگتك هايم ومفجوع

من نار الدموع

* * *

كل شمايل بني هاشم بيك يا جسام تظهر

الهيبه من هيبة محمد والعزم من عزم حيدر

وارث من الحسن علمه والحسن للعلم مصدر

مثلت جعفر بالشيم وارث من الحمزه الهمم

ومن أبو السجاد الكرم وسطوتك سطوة الأكبر

بالعزم والباس تشبه العباس

تنبع وفه وهمه وامل وعيوني ينبوع

من نار الدموع

* * *

من سمع رمله تشجعه هاجت ابگلبه الشجاعه

اخذ سيف الموت بيده مدرع ابدرع الاطاعه

صاح هذا اليوم اريد اوفيلچ حگوگ الرضاعه

لوّح على متون المهر وسيفه نضح سم وجمر

شد على الكون ابن الطهر ابزود وابهمه وبراعه

لن يسمع الصوت ليهمك الموت

وصوتي يظل بكل زمن عالظلم مرفوع

من نار الدموع

* * *

روع الحومه وزلمها وصار امر الحرب بيده

وسمع اصوات الشهاده اتحشمه لگطعت وريده

عرض جسمه للهنادي وضحه من اجل العقيده

جاسم توسد مصرعه

ورمله ابولدها امصدعه

شاهدت جثته امگطعه

صاحت مبارك زفافك يالنويت اعله الشهاده

* * *

طهران / ١٩٨٤ م

نكبة السبي

رجعنه من اليسر للطف رجعنه وعلى گبرك يبو اليمه انجمعنه

جيت وجبت الايتام من الكوفه والشام

رجعنه من اليسر للطف رجعنه

* * *

رجع ظعنك يبو اليمه گوم واتلگه الظعينه

وراسك اويه الظعن عوّد واعله گبرك يدلينه

والحرم ناشدت راسك وين گبر حسين وينه

والراس صاح هناك گبر المظلوم

وبالهالمناشد ذاب چبدي المالوم

گوم او تلگه الظعن يبن امي گوم

اجينه ولا چن بيا حال اجينه يساره وجارت الدنيه علينه

نشرنه سود العلام من الكوفه والشام

رجعنه من اليسر للطف رجعنه

* * *

ريت سهم الگطع چبدك گطع چبدي گبل چبدك

وريت چف الحفر لحدك حفر لحدي گبل لحدك

أمنت عيلتك عندي وأمنت دلالي عندك

هذا الظعن سالم الك رجعته

رجعلي گلبي العالترب امنته

يمك يبو السجاد گلبي افرشته

اشجرالي ابكربله تدري شجرالي تضعضع وانهدم بيتي العالي

لا چن اصعب آلام من الكوفه والشام

رجعنه من اليسر للطف رجعنه

* * *

ابكربله خليت گلبي وخيمت عالظعن روحي

اجمعت ايتامك ابچبدي ونيمتهم على جروحي

وصحت يا روحي الحزينه نوحي عالمظلوم نوحي

يحسين خانت باليسر ايامي

وراسك على راس الرمح جدامي

وبالدرب طفله انفگدت من ايتامي

مشينه وعالترايب نسيناها وراسك ثگل للطفله تناها

وعالطفله الگلب هام من الكوفه والشام

رجعنه من اليسر للطف رجعنه

* * *

هاذي طفله وبعد طفله نامت ابحجر المنيه

شافتك بالطيف يمها اتضمها بچفوف الابيه

فزت من النوم شافت دارها وحشه وخليه

فزت من النوم ودمعها مدمي

صاحت يبويه اساع شفتك يمي

لا وين عني رحت واشتد همي

يا زينب يعمه ساعديني ابويه شفته واتصوبت عيني

اشلون الجرح يلتام من الكوفه والشام

رجعنه من اليسر للطف رجعنه

* * *

يزيد لمن سمع صوت الطفله ناده سكتوها

جاوبوه الطفله شافت بالحلم يمها ابوها

صاح اخذوا الراس يمها ابهالوضع لا تخلوها

واحضروا راسك بالطشت يا مذبوح

شبگته الطفله وظلت عليه اتنوح

من گلبناها غايبه منها الروح

مصايب شفنه يبن امي مصايب وفگد الطفله راواني العجايب

وگلبي ابفگدك انظام من الكوفه والشام

رجعنه من اليسر للطف رجعنه

* * *

هاذي طفله وبعد طفله وگفت ابمجلس اميه

الشامي من شاهدها ناده لو يصح هذا بديه

چان هالطفله خذتها وخادمه تصبح إليه

والطفله ظلت بالمصاب تنادي

يردوني اخدم وآنه بنت الهادي

وآنه رسول الله وعلي أجدادي

يهلنه والله ما تقبل شيمكم اصيرن خادمه يهلي عگبكم

حگها عيوني متنام من الكوفه والشام

رجعنه من اليسر للطف رجعنه

* * *

هذا حال الظعن هذا من رحت يحسين عنك

اتعوفني وحدي غريبه هالامل ما چان منك

خويه لتخيب ضنوني يللي ما خيبت ضنك

هاليوم يجري اعله الگبر مدمعنه

واشلون ضيعه عگب عينك ضعنه

والگبر جدك انهض ورجعنه

اعتنينه لكربله وياك اعتنينه يخويه ومن يردنه للمدينه

شفنه سود الأيام من الكوفه والشام

رجعنه من اليسر للطف رجعنه

* * *

طهران / ١٩٨٦ م

لسان حال الشاعر

ثورتنه لجل الاصلاح ثورتنه

وهالصرخه بالحگ تعله هيهات منه الذله

ثورتنه لجل الاصلاح ثورتنه

* * *

يا حسين ابكل زمان اتخاطبك اهل الضماير

وهاذي صرختنه العظيمه اعتلت من جوف الحناجر

انبايعك بالروح بالدم بالنفوس وبالمناحر

يحسين احنه امتك ننهج ابمنهج سيرتك

بالدم نضحي لنصرتك ونرفض الظالم الجاير

صرختنه بسمك يحسين صرختنه

بيها النصر يتجله هيهات منه الذله

ثورته لجل الاصلاح ثورتنه

* * *

يا حسين الامه تهتف انته قائدنه وحمانه

ولون ما دمك الطاهر ما ثبت ركن الديانه

ياللذي ضحيت دمك مثلك انضحي ابدمانه

يا شبل حماي الحمه نفديلك ارواح ودمه

ونرفض الطغمه الحاكمه وبسمك يرفرف لوانه

رايتنه راية توحيد رايتنه

واللي نشدنه انگله هيهات منه الذله

ثورته لجل الاصلاح ثورتنه

* * *

ثورتك يحسين صارت درس لصحاب الهدايه

وهالدرس بالطف تسجل من دمه نحور الضحايه

انريد نتفهم الواقع عن بصيره وعن درايه

من گابلت طاغي الدهر كل ضنه بالحرب انتصر

ما يدري هوه اللي خسر وانته ناجح بالنهايه

علمتنه هالثوره دروس علمتنه

والموت بالعز يحله هيهات منه الذله

ثورته لجل الاصلاح ثورتنه

* * *

نهضتك يحسين نهضة شرف للامه المجيده

والذي ايسير اعله نهجك مثلك ايقدم وريده

انته قائد للمسيره وانته نبراس العقيده

يحسين يا تاج المجد عن سيرتك ما نبتعد

دمنه ويه دمك يتحد وهاذي غايتنه الوحيده

غايتنه نشر الاحكام غايتنه

وهذا الشعار انسجله هيهات منه الذله

ثورته لجل الاصلاح ثورتنه

* * *

ابموقفك حزت الخلود وما إلك واحد منافس

گابلت سبعين الف ما بين مغرور ومعاكس

وانته اصحابك عددهم سبعه وثمانين فارس

ويوم الدخلت الحومتك سبعين الف ما همتك

وارفعت بالطف صرختك وصحت بوجوه الاشاوس

حومتنه تشهد هاليوم حومتنه

چف الطغاه انشله هيهات منه الذله

ثورته لجل الاصلاح ثورتنه

* * *

هدمت عرش آل اميه ابعزمك وزودك وصبرك

للشرف ضحيت دمك بالحرب، واضمنت نصرك

طحت عالتربان مرمي وجالت الخيل اعله صدرك

عالترب جسمك من وگع ما ظهر من عندك جزع

وصوتك يبو اليمه ارتفع وترجمان الصوت نحرك

غدرتنه گوم الطغيان غدرتنه

الموت ابشرف منمله هيهات منه الذله

ثورتنه لجل الاصلاح ثورتنه

* * *

من طحت يحسين مرمي وعالوطيه يسيل دمك

اطلعت زينب لن تشوف سيوف ورماح اعله جسمك

جرت عبرات المصيبه، وظلت تنادي وتحشمك

وينك يبن عقد الوله

ظلت غريبه العايله

وجارت عليها كربله

گوم يا مظلوم وانظر حالة العيله الغريبه

* * *

طهران / ١٩٨٦ م

الحقايق

دنياك دنياك ما تنعرف دنياك

اخذ الحذر من عدها وبالك لا تعاهدها

ما تنعرف دنياك

* * *

يا اصيل الفكر اسمع واخذ من عندي النصايح

ابتعد عن ساحل الدنيه اتعيش طول العمر ناجح

والدهر لو يمد چفه بالك لچفه تصافح

اخذ الحذر من الدهر چم وچم من گبلك غدر

والكوفه تعرضلك صور اشلون ركضت عالمصالح

اشراك اشراك للحگ نصبو اشراك

الوادم لا تامنها واخذ التجربه منها

ما تنعرف دنياك

* * *

ايعيش صافي الفكر كلمن يكشف ابفكره الحقيقه

وينعرف يا هو عدوّه وبالشدد يا هو صديقه

ويبدي بفكاره يقرر سيرته ومسلك طريقه

اليسلك طريق المعتقد يبتعد عن درب الحسد

ولمسلم ايوفي العهد ودمه صار النه وثيقه

ناداك ناداك صوت الشرف ناداك

الكوفه اشما نوصفها محد گدر يكشفها

ما تنعرف دنياك

* * *

من صميم الروح نرفع صرخه من جوف الضماير

ابذلت يا مسلم حياتك ما ردت بالدم تتاجر

ردت تثبت للزمان التضحيه مو بالمضاهر

ولا بالرياء وبالدجل ولا عن غرور وعن جهل

المؤمن اليصدگ بالعمل ابمنهج الحگ يبگه ساير

وياك وياك كلنه نسير وياك

انته الاصل والغايه وغيرك فاشل ابرايه

ما تنعرف دنياك

* * *

شيدت مجدك يمسلم والدمه الثبت اساسه

وشفنه غيرك ناس كثره هايمه ابفن السياسه

بالطمع بذلت جهدها للمناصب والرئاسه

وانته يمسلم جاهدت ما خنت لملن عاهدت

بدمك لمجدك شيدت عن بصيره وعن دراسه

بدماك بدماك حزت النصر بدماك

وغيرك انته تدريها حب الكرسي عاميها

ما تنعرف دنياك

* * *

الدنيه مثل البحر صارت وبالبحر صرنه سفينه

بيها ملاحين كثره والرياح اتدور بينه

نوبه شرجى ونوبه غربي والهوه يلعب علينه

وموج البحر بينه انحدر وقائد سفينتنه انغدر

وانصيح من هذا البحر وينه الينجينه وينه

ننخاك ننخاك ابصوت الحزن ننخاك

عرش الحكم شتتنه وانحدرت سفينتنه

ما تنعرف دنياك

* * *

وبعد يا مسلم اضربلك هالمثل من گلب ذايب

صرنه مثل الاسد لمن يوگع ابين الثعالب

احنه نفدي للعقيده وهيّه تركض عالمناصب

وصار المثل بينه يصح مثل الحمامه التنذبح

اشما نرفس ايزيد الجرح وشفنه بالدنيه عجايب

بحماك بحماك صرنه اليوم بحماك

هاي الامه مجروحه وكلمن حاير ابروحه

ما تنعرف دنياك

* * *

الگلب لمصابك يمسلم تنطفي وتستعر ناره

وعالارض من رموا جسمك من سطح قصر الاماره

طاح طود الشرف والعز والشرع هدّموا داره

ما تطفه نيران الچبد

وابطيحتك طاح المجد

وابفگدك العز منفگد

وتظل نيران المصايب تسعر ابضامر الامه

* * *

طهران / ١٩٨٤ م

فخر الشباب علي الأكبر (عليه السلام)

سهم فگدك رماني وغدر بيه زماني

يالاكبر بالجفن ما ظلت دموع

غدر بيه زماني

* * *

يبني يا زهرة وجودي الچانت ابآمالي تكبر

يا نسيم اليمر بيه ومنّه دلالي تعطّر

يالحن اوتار گلبي المن صميم الگلب يظهر

يا برعم الروح الندي ابدمعي سگيتك يولدي

موعدك حان وموعدي وخابت آمالي يالاكبر

حياتي من حياتك ومماتي من مماتك

يغصن اللي زرعته بين الظلوع

غدر بيه زماني

* * *

فراگك ايغيب الروح وردت يالاكبر اخبرك

ابهالمصاب انگطع نحري گبل لا ينگطع نحرك

ما چنت ادري المنايه ابدمك الطاهر تعفرك

روحي ابمصابك ذايبه ذوبها جمر النايبه

والگلب عازم عالابه وإحتزم بحزام صبرك

وجودك من وجودي اكسبت بسمك خلودي

ينبراس العلى الهامات مرفوع

غدر بيه زماني

* * *

يا هلال اللي تخضب بالدمه وجسمه تگطع

يا نمير النشف موحه وصار عالوجنات مدمع

ثبت ركن الصبر بيّه وركن آمالي تضعضع

يا شغف روحي الهايمه يا چبدتي المتخذمه

اشغسلك من فيض الدمه اشچفنك من ثره المصرع

غفت روحي ابهيامي ونفذ سهم المرامي

ودليلي طلع من ظلوعي مفزوع

غدر بيه زماني

* * *

من شفت جسمك اموذر حزّت ابگلبي المصيبه

وسهم فگدك فجع روحي وصرت برض الطف غريبه

ليش جثتك على الغبره اموسده وبالدم خضيبه

يا موح البعيني يصب لا تبگه مرمي اعله الترب

گوم وتوسد بالگلب بلچن اتخمد لهيبه

احملت بالطف مصايب شفت بيها العجايب

اهيم ويه الصبر والگلب مفجوع

غدر بيه زماني

* * *

ابفرگتك يا ريع چبدي منهو اليخمد غليلي

فوگ نار العطش نار مصيبتك حرگت دليلي

والهدم حيلك يالاكبر گبل حيلك هدم حيلي

وطبرة العبدي الصابتك صوبت گلبي ابفرگتك

يا بدر عمري ابغيبتك صار موحش وجه ليلي

طفوا شمعة حياتي ودنت ساعة مماتي

يالاكبر من شفت منحرك مگطوع

غدر بيه زماني

* * *

كربله هدمت بيتي والنوايب صوبنّي

وبالهظم جمرات حزني بالهالمصايب ذوبنّي

فرگتك تسهل عليه فگد ابوك الاشد يبني

صابتني رميات الدهر

لاچن اشد واصعب وامر

نايبة محزوز النحر

مصاب ابوك حسين خله الدمع ويه دموم يجري

* * *

يبني مو هيّن مصابك يا شيبه النبي الهادي

لاچن الهوّن مصابك والدك بين الاعادي

صار مكوّر للعوالي وشابچه عليه الهنادي

يوم الوگع طود الابه

خلاني انسه النايبه

ومن شف جثته مخضبه

انهدم حيلي وخاب ضني وذاب گلبي وخلص صبري

* * *

طهران / ١٩٨٢ م

ليلة الحادي عشر

يبن امي هاك عتابي شيطفي نار مصابي

وشيداوي گلبي المجروح وابعيني شفتك مذبوح

شيطفي نار مصابي

* * *

چني حاضر بالطفوف واستمع صوت المصايب

صوت من گلب العقيله وهالگلب بالحزن ذايب

اتصيح يا مظلوم المن اشتكي والمن اعاتب

نار الخيم متوجره وجسوم اهلنه اموذره

مو جثث چنها اعله الثره بدور چنها اعله الترايب

جار الدهر يبن امي شيطفي جمرة همي

لا مهجه عندي ولا روح وابعيني شفتك مذبوح

شيطفي نار مصابي

* * *

يا حسين انهدم حيلي وحايره بيا عين انظرك

وطاحت بيوت المعالي من طحت من ظهر مهرك

وينگطع يا ريت نحري، گبل لا ينگطع نحرك

گلبي لمصابك منجرح ناديتك ودمعي يسح

يا ريت گبلك انذبح وافدي عمري گبل عمرك

يبن امي غابت روحي اگعد واسمع نوحي

حگه الگلب من ينوح وابعيني شفتك مذبوح

شيطفي نار مصابي

* * *

من وگع بدر الهواشم وگع بيتي الچان عالي

ومن وگع شبلك الاكبر ضيعت عزي ودلالي

ومن طفوا شمعات جاسم رخص دمعي الچان غالي

ناديتك ابفيض الدمع اگعد ومن عندي استمع

يحسين اصعب كل وضع حين رد المهر خالي

مهرك رجع لخيامك واتلگته ايتامك

والنظر يمك مشبوح وابعيني شفتك مذبوح

شيطفي نار مصابي

* * *

من رجع مهرك يخويه وگاصد لصوب المخيم

يصهل ينادي الظليمه والحزن عالعيله خيّم

اتلگته الايتام تصرخ بالدمع والحزن والهم

وناديته بدموع الصبر خبرني بالله يالمهر

وين اتركت ابن الطهر گال عفته ايموج بالدم

يم جثتك وداني واعله الجسد دلاني

جيتك ودمعي مسفوح وابعيني شفتك مذبوح

شيطفي نار مصابي

* * *

لمصرعك يبن أمي جيت وشفت عالتربان جسمك

شلت من عالترب نحرك وايدي متخضبه بدمك

صحت يالباري تقبّل مني قربان ارد اسلمك

يا خويه والمدمع همل متحيره وخاب الأمل

ما ادري ارجع للاهل لو اظل يحسين يمك

متحيره يالوالي منهو اليلم عيالي

واشلون اعوفك مطروح وابعيني شفتك مذبوح

شيطفي نار مصابي

* * *

غصب عفتك على الغبره ورحت اتفگد ايتامي

شفت يا مظلوم خيل ونار بموسط خيامي

حرت اشگف عن عليلك لو عن الخدّر احامي

ناديت ودموعي تصب متگلي شيصير الگلب

يجمع أرامل بالغرب لو يصد سهم المرامي

باليسر لو مشوني منهو اليشد ضعوني

ما تقبل الروح اتروح وابعيني شفتك مذبوح

شيطفي نار مصابي

* * *

ابگلبي نيران المصايب تطفه جمره وتشب جمره

واللي خلاني انوحن وانحب واسچب العبره

اشلون راح امشي وعوفك دامي وموسد الغبره

اشلون امشي واطلع بالظعن

وانته على تراب المحن

طايح رميه ابلا چفن

يا شهم ودعتك الله وراح اعوف الروح يمك

* * *

طهران / ١٩٨٦ م

سيد الساجدين (عليه السلام)

يا قلم سجل سجل محتوانه

والحبر يظهر يظهر من دمانه

اكتب ابدم الوريد ما نمد للذله ايد

يا قلم سجل سجل محتوانه

* * *

من گلب زين العباد ارتفعت اصوات الامامه

احنه اهل البيت احنه انضحي من اجل الكرامه

ابكل زمن عدنه ضحايه اعله الثره وعدنه يتامه

قاومنه احكام الظلم وارفضنه كل طاغي وخصم

ضحينه مو لجل الحكم لا ولا لجل الزعامه

احنه قدمنه قدمنه المناحر

ردنه تتوعه تتوعه الضماير

هذا مبدئنه الوحيد ما نمد للذله ايد

يا قلم سجل سجل محتوانه

* * *

آنه شبل حسين آنه گبال كال مغرور ثاير

دونت اشرف صحيفه لأجل تحريك الضماير

مو صحيفه اتگول ثوره اتفجرت عالعدو الجاير

بيها الخطب والادعيه تحمل معاني ساميه

اتفسر دروس التضحيه وحشمت أهل البصاير

هذا ضاهرها ضاهرها عبادي

شوف باطنها باطنها جهادي

وهذا مغزاها البعيد ما نمد للذله ايد

يا قلم سجل سجل محتوانه

* * *

آنه من دوحة محمد للمجد ضامن رصيده

اليطلب العز والكرامه للذبح يعرض وريده

لا كيان بلا ضمير ولا ضمير بلا عقيده

ولا تضحيات بلا شيم ولا شيم من غير الهمم

اكتب وسجل يا قلم دروس للأمه المجيده

بالدهر واضح واضح معتقدنه

أبد ما نخلف ما نخلف عهدنه

بهالعهد احنه نريد ما نمد للذله ايد

يا قلم سجل سجل محتوانه

* * *

آنه من موقف حسين اكتبت دستور الشهاده

لا شجاعه بلا ثبات ولا ثبات بلا اراده

ولا اراده بلا ديانه ولا ديانه بلا عباده

ايماني من المصطفه ومن حيدر اكسبت الوفه

وبالحسن احساني اكتفه ومن أبو اليمه اعتقاده

حسين اخبرني اخبرني ابمصيري

رفع هالصرخه هالصرخه ابضميري

اسمع شصاح الشهيد ما نمد للذله ايد

يا قلم سجل سجل محتوانه

* * *

صار طبع الصبر طبعي وبالصبر تشهد ايامي

گبالي ضحوا كل اخوتي ووالدي واهلي وعمامي

ابكربله بس حرم ظلت والعده حرگوا خيامي

والجسم ذايب بالمرض والعلل تمشي ويه النبض

والجفن لحظه ما غمض ساهر ويحرس ايتامي

گبالي ايتامي ايتامي اسلبوها

وحتي لخيامي لخيامي احرگوها

وصحنه خل يسمع يزيد ما نمد للذله ايد

يا قلم سجل سجل محتوانه

* * *

ابفگد أبو اليمه وعمامي واخوتي مزداد همي

الگوم ما چان اغدروني لون چانوا اهلي يمي

چبدي من سمهم تگطع مثل چبل الحسن عمي

يالباقر انظر حالتي

يبني ويزهرة مهجتي

هاك استمع لوصيّتي

* * *

طهران / ١٩٨٦ م

فاطمة العليلة

من طلع ظعن الهواشم طفله عافوا بالمدينه

تصرخ ابصوت النوايب وين ابويه حسين وينه

* * *

رفرف جناح المنيه وعرّجت عيلة الهادي

سارت ابظعن الشهاده وبالظعن طوّح الحادي

عافوا الطفله العليله وعالظعن ظلت تنادي

وين رايد بالمحامل وين يا حدي الظعينه

* * *

فاطمه الطفله العليله بالمرض ذايب جسمها

وطلع ظعن الاهل عنها لكربله وازداد همها

ظلت الطفله وحيده لا ولي ولا اخوه يمها

والگلب تستعر ناره وذايب ابجمرة ونينه

* * *

حين سار الظعن عنها فگدت الطفله املها

تنظر ديار النبوه خاليه وهاجت عللها

اتحوم باطراف المدينه وما تلمها ديار اهلها

غابت ابدور السعاده وظلت الطفله حزينه

* * *

اشلون صيحه الطفله صاحت وين ابويه اليجلي همي

وين الاكبر وين جاسم وين صار الگمر عمي

ليش عافوني وحيده ليش ما ظل والي يمي

خيمت سود الليالي والدهر جارت سنينه

* * *

حايره ابوليه زماني والگلب بالهم تفطر

وين ابويه الگال عمچ واخوتچ بالشده تحظر

لا گمر هاشم لفاني ولا وصلني علي الأكبر

واللذي موعود تبگه اعله الدرب مشبوحه عينه

* * *

انگطعت آمالي ابسفركم يا هلي وانفجع گلبي

طال موعدكم وعيني ظلت اعله الدرب تربي

ولو ردت انشد واعاتب من يجاوبني اعله عتبي

بالمدينه عفتوا جسمي وروحي وياكم رهينه

* * *

يا هلي ابمسره الهوادج روحي ويه الظعن سارت

وعلى فراش المرض جسمي والمنيه عليه شارت

والمصيبه استوحدتني والمحن والدنيه جارت

والچبد باللوعه ذايب من اثره جمره حنينه

* * *

حگها ما تدري ابوها اتوذر وذبحوا انصاره

ولا درت جثه الاكبر عاترب دمها ايتجاره

ولا درت جسام طفّوا شمعته ابوسط المعاره

ولا درت بدر الهواشم گطعوا ايساره ويمينه

* * *

الامل كل الامل عدها بالظعينه حسين يرجع

تدري حي واليها لاچن طود همتها تضعضع

اشلون لو تسمع شملها ابديرة الغربه توزع

اشلون لو شافت ابوها بالسيوف امگطعينه

* * *

طهران / ١٩٨٥ م

حبيب بن مظاهر

ابساحة الطف نفتح ابواب الشهاده

بالصمود وبالثبات وبالاراده

احنه انصارك حسبنه حسابنه

نمد گبلك يبو اليمه رگابنه

بالصمود وبالثبات وبالاراده

* * *

من ضمير التضحيات اعتلت اصوات الكرامه

صاحوا انصار الخلود انضحي من اجل الامامه

مو لجل حفظ المناصب لا ولا لجل الزعامه

هالصوت يدوي ابكل عصر مرتفع من برج النصر

وابكل زمن ظل مستمر وكشف للعالم ظلامه

هذا صوت التضحيه وصوت العقيده

واليضحي للشرف يضمن رصيده

واحنه وقّعنه ابدمانه كتابنه

نمد گبلك يبو اليمه ارگابنه

بالصمود وبالثبات وبالاراده

* * *

بالمناحر والنفوس انضحي مثلك يبو اليمه

وصحنه بوجوه آل اميه احنه امه وانتوا امه

وهذا دستور الرسول وصار بالاعناق ذمه

وحسين هذا ضنوته يا سبب خنتوا بيعته

خانت الهادي امته وتبعت الظالم وحكمه

هذا يوم التضحيه ويوم الكرامه

وتضحيتنه للنبوه وللامامه

وحبك البالگلب للطف جابنه

نمد گبلك يبو اليمه ارگابنه

بالصمود وبالثبات وبالاراده

* * *

بالجهاد وبالتفادي انخوض ساحات المنايه

واحنه گبلك يبو اليمه نريد نتقدم ضحايه

بالصدور او بالمناحر نكشف سهام الرمايه

وحسين ينظر صحبته متفازعين النخوته

لن ظهر من بين اخوته گمر وابچفه الرايه

صاح يالانصار يخوتنه الغياره

احنه خل ندخل گبلكم للمعاره

صعبه هاي اصواتكم يصحابنه

نمد گبلك يبو اليمه ارگابنه

بالصمود وبالثبات وبالاراده

* * *

لن ابن ظاهر تعنه گبال أبو فاضل وناده

احنه ما نرضه الهواشم يسبقونه اعله الشهاده

تالي هاي الناس تحچي للحرب قدموا الساده

شنجاوب اليبدي العتب من تعتب علينه العرب

احنه النطب يهل الرتب وندخل الحومه باراده

لن گمر هاشم لبن ظاهر يگله

كل حمل لو طاح تتعناله اهله

ولو نشدنه حسين هذا جوابنه

نمد گبلك يبو اليمه ارگابنه

بالصمود وبالثبات وبالاراده

* * *

للحرب ناده حبيب وظهر للعباس حرصه

جاوبه العباس ارشد واخذ من حسين رخصه

وراح للمظلوم مسرع گصده ميضيع الفرصه

صاح وابو اليمه صغه ارخصنه نبرز للوغه

وابچفه يرفل بيرغه ولحبيب حسين وصه

گله اطلع للحرايب يبن ظاهر

بيهم اخطب بلچن اتحس الضماير

جاوبه الصوّب مهجتك صابنه

نمد گبلك يبو اليمه ارگابنه

بالصمود وبالثبات وبالاراده

* * *

برزوا انصار البو اليمه بكربلا وظهروا هممهم

ضحوا لاجل العقيده والغسل من فيض دمهم

وراح أبو السجاد مسرع للمعاره ووگف يمهم

ناده يأخوان الصفه حياكم

ناصرتوا دين المصطفه بدماكم

بصوت الابه وصوت الوفه انخاكم

اشلون حالة أبو اليمه من وگف وسط المعاره

دموعه من العين تجري وينظر لحالة انصاره

يشوف بس اجساد يمه وعالترب دمها ايتجاره

شافه الصحابه اعله الثره مصيوبه

بالطف جثثها اموذره ومسلوبه

ابدم الكرامه امعفره ومخضوبه

هاذي حالة أبو اليمه من وگف يم الصحابه

* * *

طهران / ١٩٨٢ م

الوداع مع الحسين (عليه السلام)

زينب والحسين والهاشميين

ابحال الوداع اتصوبن هاليله گلبين

زينب والحسين

* * *

ابعين يتفايض دمعها شاهدت حاله عجيبه

حسين بخيام النبوه ايودع العيله الغريبه

والعقيله ابگلب صامد وگفت ابوجه المصيبه

صار الموادع بالخيم ما بين وليان وحرم

واتوجرت نار الالم وحلت الليله الرهيبه

وإتغيّر الحال بوداع العيال

وبهالوداع اللي سدر مفجوعه روحين

زينب والحسين

* * *

وگفت ام الحزن زينب يم أبو اليمه وتحشمه

نوبه من نحره تقبله ونوبه من صدره تشمه

والبدور الهاشمية كشفت الليله المظلمه

واكتمل من هاشم بدر ابمطلع جماله مزدهر

بالرايه مصيون الخدر حي گمر هاشم وعزمه

ابجوهر المكنون هالخدر مصيون

وابنور وجهه اتواصلن هاليله نورين

زينب والحسين

* * *

گمر هاشم للعقيله سجل عهود الكفاله

هوه يتكفل الحومه وهيه تتكفل عياله

رايته ابيمناه زمها وهزها بچفوف البساله

ليث وفرع من حيدره صاحب جداره ومقدره

البيرغ ابچفه ناشره وركزه ابارض العداله

مصدر الايمان من گمر عدنان

يتخطه بحدود الخيم واتصدله عينين

زينب والحسين

* * *

اخذت الحره عهدها من الكفلها گمر هاشم

التفتت وشاهدت رمله اتودع العريس جاسم

شاب وابمطلع شبابه ودايره بيه الهواشم

گلب امه رمله منبجح ابعرسه صدرها منشرح

ما تدري بالطف ينذبح والشمع بيض الصوارم

شوف الدهر شوف بالغدر موصوف

هالعرس يصبح فاجعه وايصوب اثنين

زينب والحسين

* * *

ودعت رمله ولدها والجمر بالچبد يسعر

حالة التوديع صعبه والصخر منها ايتفطر

وثالث اموادع الوالم بين ليله وعلي الأكبر

ابلهفه وحنان وعاطفه اتودع شبيه المصطفه

هالوضع من انوصفه انشوفه اصعب حال واخطر

يا ليل الوداع بيك الامل ضاع

وهلال الاكبر لو سفر تنصاب چبدين

زينب والحسين

* * *

زينب اتشوف الفواطم كلمن اتودع املها

ضنت التوديع تم وبگت تتفگد اهلها

لنها تنظر للرباب المعوله اتودع طفلها

اتشم الطفل واتكلمه باچر تذوب من الضمه

والسهم يرويك ابدمه وامك اتصافح اجلها

وابجمره النوح تتلاهب الروح

ومن ينگطع نحر الطفل تنگطع نحرين

زينب والحسين

* * *

طهران / ١٩٨٥ م

استنهاض الإمام علي (عليه السلام)

وين يا داحي الباب يا علي وينك

وحدي بديار الغرب

لا اهل لا أصحاب يا علي وينك

* * *

يا علي انهض يبويه وشوف هالعيله الغريبه

من عگب ولياها ظلت تشگف سهام المصيبه

وصدت لوادي السلام وصاحت ابصيحه عجيبه

گوم يا ريف اليتامه گوم يا ليث الكتيبه

وينك يحماي الحمه غابت ليوث الموزمه

وظلت ودايع فاطمه ابمحنة الليله الرهيبه

بس حرم يا كرار غاب واليها

طاحت ارباب الشيم

واحنه بين الاجناب يا علي وينك

* * *

يا علي انهض واسمع صوت ام الحزن زينب

صاحت أرد احسب مصايب من جرح گلبي المصوّب

ابكربله أول مصيبه البيها نار الچبد تلهب

من شفت طيحت الأكبر عالثره وجسمه تسلّب

من طاح الاكبر عالثره والگوم گطعوا منحره

وليله الولدها تنظره من دمه المنحر تخضب

يا شبيه المختار نادته ليله

لا تخليني ابغرب

گوم واسمع العتاب يا علي وينك

* * *

يا علي انهض يبويه وانظر لحال الفواطم

جايره الدنيه عليها وطاحت ابولية الظالم

حرگوا خيام النبوه وطفوا شمعة عرس جاسم

بويه وابدال الشموع انرفعت رماح وصوارم

ورمله الولدها شافته من دمه عجنوا حنته

يبني يجاسم نادته ليش عالتربان نايم

عالحرب والميدان زفته صارت

رمله صاحت بالحزن

ابكربله افگدنه شاب يا علي وينك

* * *

يا علي وافجع مصيبه الذوبت گلبي ابونينه

من شفت عين الطليعه گطعوا ايساره ويمينه

بالعمود انصاب راسه والسهم صوّبه ابعينه

ولون ما طيحت كفيلي الگوم ما جاروا علينه

عالنهر من طاح العلم هجمت الگوم اعله الحرم

وبالگلب نيران الخيم شبّت ابطيحت ولينه

عگب عين العباس حرگوا خيامي

وصاحت گلوب الحرم

گوم واطفي الاطناب يا علي وينك

* * *

يا علي وافجع مصيبه الزيدت بالگلب همي

من رجع مهر أبو اليمه يصهل ودمعاته تهمي

والسرج مگلوب منه او وجهه متخضب ومدمي

ايحشم وما اظن يدري بس يتامه وحرم يمي

ناديته بدموع الالم ليش ارجعت صوب الخيم

وين اتركت والي الحرم گال عالتربان مرمي

وين يا مهر حسين وين خيّالك

گال عفته اعله الترب

هذا حال الاطياب يا علي وينك

* * *

الليله يا ابا الحسن ليله ما مثلها اتصير ليله

هموم وآلام ومصايب والدمع فجّر مسيله

گوم شوف اعله اليتامه العسر اتوجه ابخيله

العيله من تفگد وليها اشتظن هم يحصل بديله

يا بويه هاذي حالتي محد يلبّي نخوتي

تحرسني چانت اخوتي تالي صرت احرس العيله

لا خيم لا وليان ابغربه ظلينه

انشد ابصوت الحزن

وانتظر رد جواب يا علي وينك

* * *

بويه هاي الليله آخر ليله برض الغاضريه

باچر ظعون الفواطم تمشي للكوفه سبيه

اشلون راح امشي واخلي جسوم ولياني رميه

اشلون عگب اهل الشهامه بالظعن تحدي اميه

وينك يبويه يا علي

لا خيمه عندي ولا ولي

يا هو اليعدل محملي

ترضه يا ابا الحسن ترضه لليسر تطلع بناتك

* * *

طهران / ١٩٨٦ م

ام البنين (عليها السلام)

صوب عيوني الدهر وضيعت رايه وگمر

گطع دلالي زماني وافگدت اربع بنين

لا تلوموني تراني امصوبه وگلبي حزين

صوب عيوني الدهر

* * *

اربع ابدور اذخرتهم مشوا لرض الغاضريه

والله لو رجعوا زرعت الطرق ياس ونرجسيه

روحة الاولاد روحه روحه ما ظن بيها جيه

راحوا وحادي الموت راح وياهم

وچف المنيه ابكربله يتناهم

اشلون اربعه وهرش الگلب غذاهم

من رجع ظعن الاهل دمعي عالوجنه همل

جيت وابلهفة دليلي صحت وين اولادي وين

لا تلوموني تراني امصوبه وگلبي حزين

صوب عيوني الدهر

* * *

هامت وعالمتن شالت طفل حماي الظعينه

واسمَعِت (بشر ابن حذلم) ينعى بطراف المدينه

نادته يا بشر بالله اخبرني ابني حسين وينه

ناده بشر والدمع منه اتفجر

عظم الله الأجر ببنچ جعفر

وعثمان ابنچ بالطفوف اتوذر

واخذي من عندي الخبر چبد عبد الله انفطر

يا بشر گطعت گلبي اخبرني عن حالة حسين

لا تلوموني تراني امصوبه وگلبي حزين

صوب عيوني الدهر

* * *

عظم المعبود اجرچ واصبري بهاي الفجيعه

ابكربلا بدر الهواشم طايح ابكتر الشريعه

بالعمود انفضخ راسه وظلت چفوفه گطيعه

عظم الله الأجر ببنچ عباس

يم النهر عافوه جثه بلا راس

وعياله تاهت بين اشرار الناس

يا بشر حيلي انهدم ما يهم راعي العلم

يا بشر عن أبو اليمه اخبرني خل اخفي الونين

لا تلوموني تراني امصوبه وگلبي حزين

صوب عيوني الدهر

* * *

من بشر گلبي تنطّر خبر عن حال أبو اليمه

دمعتي فاضت ابعيني والگلب ذايب إبهمه

لن بشر ناده يحره دنيتچ صارت مظلمه

عظم الله اجرچ ابفگد المظلوم

وذرت جسمه ابكربله سيوف الگوم

مصرعه ابعين الحرم اصبح مرسوم

اخذي من عندي الخبر حسين مگطوع النحر

يا بشر هدمت حيلي وانطفت شمعة العين

لا تلوموني تراني امصوبه وگلبي حزين

صوب عيوني الدهر

* * *

خابت آمال البگلبي وانگطع يا بشر ضني

انهدم بنياني عليه والمصايب صوبني

دموعي ليل نهار تجري ومثل ون الدوح وني

گوس الحزن نفذ ابگلبي صوابه

والدهر صفه ويايه كل حسابه

وحسين ابني ايعز عليه غيابه

ما تهمني الفاجعه ابفگد ولدي الاربعه

ابفگد أبو السجاد ضايع تعب كل ذيچ السنين

لا تلوموني تراني امصوبه وگلبي حزين

صوب عيوني الدهر

* * *

اربع شموع اعلگتها وچانت اتنورلي دربي

راحوا وما صوبوني لاچن اللي صاب گلبي

فگد أبو اليمه وعگبه خل اشن غارات عتبي

اعتب وادري ما يفيد عتابي

ذبل هروش الگلب جمر صوابي

ما تنخمد للحشر نار مصابي

امر هذا وانكتب بعد شيفيد العتب

طاحت بيوت المعالي وغابت ليوث العرين

لا تلوموني تراني امصوبه وگلبي حزين

صوب عيوني الدهر

* * *

راحوا اولادي وبنيني ودهري عفرهم ابدمهم

بالله يا جاره اخبرچ لا تسميني باسمهم

لجل أبو اليمه اذخرتهم بالعهد وفوا ذممهم

راحوا بنيني الاربعه

وصوبني سهم الفاجعه

وهروش گلبي امگطعه

* * *

روي يا روحي الحزينه روحي لرض الغاضريه

روحي يم جسم أبو اليمه الطايح ابين آل اميه

وروحي يم شاطي الفرات وعاتبي العلگلمي وميه

واحني الظهر يم النهر

وخلي الگلب يم الگمر

مصيوبه بسهام الگدر

لا تلوموني تراني افگدت ولدي الاربعه

* * *

مشهد المقدسة / ١٩٨٥ م

من قصائد الغفران (الهجري)

لو خفگ جنح المنيه وصافحك چف الاجل

ما ينفعك يبن آدم بالحشر غير العمل

* * *

أرد انشدك يبن آدم لون گربت ساعتك

اشتظن بالمحتوم يرجع لون حل ابساحتك

ولو طفح بحر المنايه والمنايه وافتك

اشلون ترجع للحياة بيا وسيله ويا امل

* * *

اتصور امنازع الروح من البدن لمن تغيب

اتمر عليك اشلون حاله الطفل من عدها يشيب

اتشوف نفسك ما ينفعك لا بعيد ولا قريب

ولا وساطه هناك تنفع لا صحابه ولا اهل

* * *

من تمر سكرة الموت اعليك وايحل الحتم

يبدي سيف الموت يفصل بين روحك والجسم

عزمك ابمطلاع روحك لو جبل هم ينهدم

يا بشر يحمل مرار الموت يا طود وجبل

* * *

وبعد حاله اتمر عليك وانته بحجور الممات

إتگوم تتمنه رجوعك ولو ساعة بالحياة

تگول بلچن خير اعمل أضمن هناك النجاة

وانته تدري هالتمني ما يفيد ابهالمحل

* * *

تنحمل فوگ الأعواد وينگطع حبل المضن

من العمر آيس وتبگه تحوم روحك عالبدن

نازع ثياب الممات ولابس ثياب الچفن

گاصد لبيت التراب وطالع من المغتسل

* * *

روحك اعله النعش تبگه اترفرف وتنظر الحال

لچن ما تمتلك قدره اويه اليشيعوك اتصال

ايصير للدنيه رجوعك امر اعجاز ومحال

حيث لن حبل اتصالك عن الأصحاب انفصل

* * *

للدفن تسرع احبابك يا تره ابغير انتظار

تروح من دار الحياة الفانيه لدار القرار

انته مو اول امحنّط فارگ اهله والديار

لا ولا اول فقيد ابسكرة الموت انذهل

* * *

عگب ما بالدنيه چنت ابيت عالي ومعتمر

بين الگبور الكئيبه تالي بيتك ينحفر

ومن عگب رفعة المسكن تسكن أبو حشة گبر

وجسمك من العامرات العالم الحفره انتقل

* * *

عالم البرزخ ضجيعك باللحد يستقبلك

اتشوف بي احوال كثره اتأيسك واتأملك

لو ردت تتغابه عن الامر منكر يسألك

چم وچم انسان گبلك فوگ الاعواد انحمل

* * *

منكر اينشدك يگلك ما چنت حي وتشوف

ما شفت انسان گبلك فوگ ألواح الحتوف

ليش ما تاخذ مواعظ من موازين الصروف

وناتج الانسان يهلك من يصر اعله الجهل

* * *

يا الاهي ابدمع عيني أرفع ايدي للسمه

إغفر ذنوب العليّه ابجاه دمعة فاطمه

واغفر لأمي اللذي رضعتني حب حامي الحمه

ماتت ابديرة الغربه من النوايب والعلل

* * *

عليك يا رب البريه بالحشر متوكلين

اشلون يوم البيه ما تنفع اموال ولا بنين

أمل ما عدنه يرب الكون بس خدمة حسين

واللي يخدم أبو اليمه حاشه ينصاب ابفشل

* * *

الدنيه تگضي يا الاهي وهاي دنيه فانيه

لاچن اشيگضي القيامه من تشب الحاميه

كلها بالخسران بس فرقة حسين الناجيه

اجعلنه منهم يا الاهي وعبدك عليك اتكل

* * *

حب أبو السجاد بالمحشر أمان من العذاب

حاشه لن نار القيامه اتمس گلب بالحزن ذاب

وحاشه تحرگ جسد زاير گبر ابن داحي الباب

وحاشه تلمس عين منها الدمع عالوجنه همل

* * *

طهران / ١٩٨٧ م

في قصائد اللطم

نافع بن هلال (بحر الطويل)

هذا نافع بن هلال طب لحومته ابهمه

شاب ولجل أبو السجاد ضحّه ابمهجته ودمه

* * *

من دارت رحه الحومه وصارت تبرز الابطال

ارتجز وبصوته گام ايصيح آنه نافع ابن هلال

يوم الهمم هذا اليوم والحومه تريد رجال

العزم من گوسه يتناثر

ويرمي النبل عالعسكر يحامي دون ابن حيدر

يمطر حجر من سجيل گوسه وما يرد سهمه

* * *

عگب ما للنبل كثّر رميها ونفذت العدّه

سل سيفه ابيمينه ايريد يبذل بالحرب جهده

من خلفه الشمر صابه ابيمنيه وانكسر عضده

من خلفه الشمر يا حيف

صابه او وگع منه السيف وظل يتلوّه صل الصيف

كسر الساعد اثر بيه وصوابات البجسمه

* * *

لمن وگع نافع صار ونّه بأثر ونّه ايجر

بالنوجه وگع يا حيف وسط الشبچ طاح الحر

مچتوف ويسير اخذوه وعيونه جمر تنثر

عگب ما جندل الفرسان

طاح ابخطة الميدان نافع هذا عهده چان

لو ميت الف موته ايموت يرضه دون أبو اليمه

* * *

لون ما ينكسر عضده مچان اتيسر الجيدوم

لاچن حكمة الباري اقتضت واتنفذ المحتوم

لبن سعد الرجس ودّوا نافع والگلب مالوم

ولمن شاهده ابهالحال

ناداه الزنيم وگال نيتك شنهي يبن هلال

تجيب التهلكه لنفسك وتدفع دونها النقمه

* * *

نافع جاوبه وناداه الله يعلم ابگصدي

اثنعش فارس خذت منكم ابرمحي وصارمي وجهدي

وچان ابگيت احاربكم لون ما ينكسر عضدي

لچن هذا الامر مكتوب

* * *

اگطع للمنايه دروب والموت ابشرف مطلوب

هيهات اخضع وهيات منكم اطلب الرحمه

* * *

ابن سعد الرجس صاغي وظل يستمع لبن هلال

ونافع كشف ما عنده والرايد يگوله گال

لن شمر الخنه ايناديه يا نافع لسانك طال

هاذ آنه الشمر يمّك

اجيت اگصد هدر دمك وامحي من الارض اسمك

والمثلك عنيد اشلون يبگه اعله الارض اسمه

* * *

ونافع جاوبه وناداه الموت اعله الكرامه ايهون

وباچر بالحشر وياك اوگف عد إله الكون

لو مسلم چنت ما چان تطلب چتلي يا ملعون

وسل الشمر سيف الجور

لن نافع صبح منحور ودمه اعله الأرض مهدور

واليملك هدف وايمان گطع النحر ميهمه

* * *

طهران / ١٩٨٦ م

صبر الحوراء زينب (عليها السلام) (بحر الطويل)

زينب بالمعاره اتصيح ما ظل من ولي عندي

غريبهودمعة عيوني تسيل وتحفر ابخدي

* * *

وگفت على التل اتصيح يبن امي الگلب مالوم

روحي اتحوم يا مظلوم ودموعي تسيل دموم

هاي الگوم اجتنه الگوم ما واحد يرد الگوم

يسبع الخيل رد الخيل هالخيل اوصلت حدي

* * *

الخيل اوصلت لخيامك وگلبي يا شهم ناداك

اجيت انخاك واترجاك لتخليني بين عداك

الموت الموت اريد الموت ولا احمل هظم فرگاك

الدنيه وكربله والگوم هاليوم اصبحوا ضدي

* * *

ضدي صاروا ويا ريت خذوا عمري گبل عمرك

وريت اللي سحگ صدرك سحگ صدري گبل صدرك

وريت اللي گطع نحرك گطع نحري گبل نحرك

وسهم الصابك ابچبدك يريته صابني ابچبدي

* * *

يريته صابني ابچبدي سهم الصوبك يحسين

وين انته يبعد اهلي دليني اعله جسمك وين

سهم البين صاب العين ولا اندل طريجي منين

شوفي راح حيلي طاح وجروح الگلب تدي

* * *

تدي جروح دلالي ابفگدك فاجده الغالي

انسلب خدري وخلص صبري واظن تدري اشجره ابحالي

اخوتي اعله الترب صرعه ولا والي اعلى اعيالي

وعيالك واطفالك تنوح وتنحب ابسدي

* * *

تنوح وتنحب عيالك ودمعي سال عالاطفال

الحرم هاي الحرم صعبه الحرم من تبگه بين انذال

لا وليان لا صيوان حالي حال اصعب حال

ما بين السلب والنار ادافع وابذل ابجهدي

* * *

ابذلت جهدي اجر طفله اضيع طفله بين اشرار

فكري احتار مدري شصار صحت وين ابن حامي الجار

هاي النار وسط الدار گوم اخمد لهيب النار

الدار ابنار حرگوها واجتنه خيولهم تعدي

* * *

العسكر غارت وزينب اجت تشكي مصايبها

تصيح ابصوت هاي اختك تخاطب گوم خاطبها

اشما صاحت اشما ناحت بس الصده ايجاوبها

يگلها راح أبو السجاد ردي للحرم ردي

* * *

عگب ما ايست منه اعتنت للگطعوا چفوفه

صاحت صوت يا عباس هاي الحرم مچتوفه

ترضه شيمتك ترضه تروح ابيسر للوفه

انچان استصعبت شكواي اروح واشكي يم جدي

* * *

طهران / ١٩٨٦ م

الزهراء (عليها السلام) بعد الرسول (صلى الله عليه وآله)

يا گلب تصبر چم دوب لو صخر هم چان يذوب

من هالمحن والالام لو صخر هم چان يذوب

* * *

يا گلب آنه ام الحسن واشكي هموم

داهمني فگد المصطفه بهذا اليوم

وعليك اريد اعتب يگلبي المالوم

چم دوب تصبر ما نفع بيك اللوم

عن كثر صبرك شنگول لو جبل هم چان يزول

ومن كثر جور الايام لو صخر هم چان يذوب

* * *

يا گلب اعلم بيك دامي ومجروح

يا سبب ما تترك الوادم وتروح

اسكن البيده وانجب هناك ونوح

واشلون عايش وانته ما تملك روح

چم لوعه بيك وچم نار عگب الرسول المختار

صوبك دهرك بسهام لو صخر هم چان يذوب

* * *

يا گلب بعدك صابر وما مهتم

لو حجر چان انفطر من كثر الهم

ولو چان صبرك طود چان اتهدم

يا عجب وانته ما نشف بيك الدم

يا گلب منك مليت ما چنت اعرفك يا ريت

لفراگ سيد الاكرام لو صخر هم چان يذوب

* * *

يا گلب خانت بيك سود ايامك

وفگد النبي خيّب اليوم احلامك

راح اليخفف همك وآلامك

بيمن بعد تگدر تصد سهامك

راح اليشد عزمك راح والدمع ما تدري شصاح

اليحمل مرار الظلام لو صخر هم چان يذوب

* * *

گبالي شفت مطروح نعش المختار

ومن شفته اهجس شبت بروحي النار

وابغيبته من عيني غابت الانظار

وانفنت روحي وطاح عامود الدار

من عگب نور الاكوان حرگتني نار الاحزان

صابر شهور واعوام لو صخر هم چان يذوب

* * *

نار المصايب گربت ميعادي

وصوبني سهم الدهر عگب الهادي

صوت المصايب بسمي صار ينادي

عالصبر والهم واضح استعدادي

مصاب النبي اشلون مصاب والبدر عن عيني غاب

ومن الحزن گلبي هام لو صخر هم چان يذوب

* * *

طهران / ١٩٨٥ م

الانصار طلاب الغانمة

بالحومه بالحومه للدين نفدي العمر

وتنادي هالانصار يا كعبة الاحرار

للدين نفدي العمر

* * *

صفوا انصار حسين واشلون انصار

صاحوا فرد صيحه يبن حامي الجار

ارخصنه للميدان والموعد صار

ما نقبل اعله الذله واحنه الاحرار

انصارك انصارك يحسين الكم ذخر

موعد نصرنه حان خل ندخل الميدان

للدين نفدي العمر

* * *

امنحنه رخصه وللعواسل نرفع

وانضحي من اجلك يشبل الانزع

گبل اهل بيتك للحرب خل نطلع

وانريد نتچفن ابذاري المصرع

ناداها ناداها يا صفوه شنهو الامر

ما اقبل اتضحون احنه النطب للكون

للدين نفدي العمر

* * *

ضهضب حبيب الرايه واشتد عزمه

وناده زهير اشلون يابو اليمه

انتوا الذي تبدون اول هجمه

هاذي على الأنصار كلفه وزحمه

مرفوعه مرفوعه بالحومه بيض وسمر

وگفت جيوش يزيد يحسين واحنه نريد

للدين نفدي العمر

* * *

لن گمر هاشم لفه وبيده الرايه

صاح آنه اتقدم وانتوا ويايه

گالوله انته التبدي؟ هاي حچايه

انته العليك اليوم حرس الثايه

مجموعه مجموعه بالحومه گوم الكفر

احرس خيام حسين واحنه الذي ماشين

للدين نفدي العمر

* * *

وارتفع من گلوبهم هذا الصوت

صاحوا الدنيه فرصه وانخاف اتفوت

ميموت ليضحي ابوجوده ميموت

خالد يظل اشما جزه حدود الفوت

نفديها نفديها للنفس يبن الطهر

متهمنه هاي الگوم خلينه يا مظلوم

للدين نفدي العمر

* * *

هجموا فرد هجمه اعله گوم الطاغين

شالوا الحومه وفرحوا گلب حسين

طاحوا على التربان منهم خمسين

اشتركوا بهالتضحيه اثنين وسبعين

ظل وحده ظل وحده ما بين اهل الغدر

وصاحت بني عدنان متهمنه هالعدوان

للدين نفدي العمر

* * *

ابساحة الطف من گضت كل الصفوه

واتوسدت الانصار يم الاخوه

وحسين يمهم وگف يبدي النخوه

يهل الشهامه الحيل بيكم يگوه

ضحيتوا ضحيتوا وبالگلب ما تم صبر

واضطربت الاجساد صاحت يبو السجاد

للدين نفدي العمر

* * *

والگوم من شافوا عجيد الميدان

ظل منفرد لا ناصر ولا عوان

هجموا عليه ابنبل وسيوف وزان

ومن بعد چتله اسعرت نار الصيوان

وعياله وعياله راحت ابدرب اليسر

والحرم والايتام صاحت ابدرب الشام

للدين نفدي العمر

* * *

طهران / ١٩٨٦ م

عبد الله الرضيع

يبني عبد الله شاهده لحالي

بيا ذنب مذبوح والمهد خالي

* * *

عبد الله يبني گوم واسمع عتبي

مظلمه الدنيه وما اوچّد دربي

من شفت مهدك خالي صوب گلبي

ظهري انحنه وعيني اعله مهدك تربي

گلبي صاح بصوت فاجده الغالي

بيا ذنب مذبوح والمهد خالي

* * *

ابليل المصيبه امدوهنه وسهرانه

والگلب ما يخمد جمر نيرانه

ضنيت ترجع للمدينه ويانه

ما ادري ابگه ابكربله حيرانه

يبني يا مصيوب خابت آمالي

بيا ذنب مذبوح والمهد خالي

* * *

يا غصن عمري ويا ربيع المهموم

ويا طير سعدي البلأمل چان يحوم

چاوبني ليش امغسَّل ابفيض دموم

ومن گبل ميعاد الفطامه مفطوم

مهجتي اتناغيك والدمع هالي

بيا ذنب مذبوح والمهد خالي

* * *

يا شغف گلبي ويا ملاحة عمري

ويا نسمة الريح اللي تشرح صدري

تنذبح يا عبد الله ما چنت ادري

من گبل نحرك ريت گطعوا نحري

ولا اشوف اليوم جسمك گبالي

بيا ذنب مذبوح والمهد خالي

* * *

يا دمعة المحبوسة بعيون امك

وسدت گلبي اعله الترايب يمك

والروح صارت مهد يبني لجسمك

چبدي يهزك والدليل ايشمك

يا امل روحي وثمر دلالي

بيا ذنب مذبوح والمهد خالي

* * *

آنه الرباب وعالمهد محنيه

ونار الحزن تنطفي وتسعر بيه

ومن شفت جثتك يا طفل مرميه

اهجس تهدَّم ركن بيتي عليه

يبني يا عامود بيتي العالي

بيا ذنب مذبوح والمهد خالي

* * *

يا كاسر الصيف اللذي ايفييلي

عگبك مرار الدهر هدّم حيلي

متحيره وچف الأجل يوميلي

وما ميّز انهاري بعد من ليلي

ابغيبتك يبني غايب هلالي

بيا ذنب مذبوح والمهد خالي

* * *

طهران / ١٩٨٥ م

الله، أي دمِ في كربلا سفكا

لم يجر في الأرض حتى اوقف الفلكا

الله يا دم بالطفوف انسفك ما جره اله او وگف مجره الفلك

* * *

يا دم سفح نهره اعله سفح الثره وعطّل مدار الفلك لمن جره

ويا خيل هجمت عالخيم غايره ويا خدر من آل الرسول انهتك

* * *

عفّة الخدّر للخدر عوضت وعالعهد ربّات الخدر حافظت

ابحامية دين الله الحميه انهضت من شافت الإسلام نهجه انترك

* * *

انفجرت الامه وصفت مضرب مثل والجاهليه رجعت اعله الجهل

تسجد وتركع لعد عزه وهبل ويحكمها ظالم بالرذيله انهمك

* * *

اشلون الرجال الهم عيون اتغمض ويزيد يحكمهم ابهتك العرض

وانچان للتوحيد گاله ابلفظ سيفه ابسوى التوحيد ابد ما فتك

* * *

ودين النبي سهام العلل صابته لغير أبو اليمه ما شكه حالته

شايف عليل وما برت علته اله إذا شاف المداوي هلك

* * *

حسين المداوي وبذل بالطف جهد مرهم صبح للدين دمه وضمد

قدّم الغالي وضحه للمعتقد ابنفسه واصحابه واخوته وما ملك

* * *

گبل الشهاده الحال نتصوره ادعه الملازم والزلم حايره

شب ابذبال السيف هالنايره واللي وردها ورد اسفل درك

* * *

من بدت صولة شبل فارس بدر ابعين العده ابدت نجوم الظهر

عالجيش ظل يحوم شبه الصگر ما تلم عزمه لا شبچ لا شرك

* * *

اشما ينرفع للگوم سيف ونصل ابوجهه الطلاقه تكثر ويبتهل

موقف أبو السجاد بالطف مثل موقف الزهره بيوم غصب الفدك

* * *

اترجل وحيد گبال جيش العده ابوحدته الوحدانيه متجسده

جوهر العصمه گبال فحم الرده يا وسفه ينجمعون بالمعترك

* * *

ابفن الفروسيه حليف الضمه ما شبهه فارس حصل بالملحمه

وتشهد ابمحرابه نجوم السمه ما عبد مثله عابد ولا نسك

* * *

ابگطب الرمح دارت رحه المعركه وطاحت الكوفه وجيشها ابتهلكه

عيون النهار ابصارمه حالكه وابنور وجهه انزال ذاك الحلك

* * *

وجه ابظلام الحرب شمس الضحه ودارت عليه الجيش دور الرحه

ابكل بيت بالكوفه ترك نايحه لاچن ثلث تيام جسمه انترك

* * *

طهران / ١٩٨٥ م

بطلة كربلاء

يا هلي اتغير الحال من توسدتوا الرمال

حيرت فكري المصيبه هذا واقع لو خيال

من توسدتوا الرمال

* * *

سجدت اجسوم الضحايه ابكربلا وحل المصاب

ومثل اصاويب الهواشم گلب بت حيدر انصاب

واعتلت صرخة عواطف لا ملامه ولا عتاب

يا هلي عن الثنيه اشلون تم الانفصال

من توسدتوا الرمال

* * *

يا هلي بين الخيال وبين واقع انظره

روسكم فوگ السماهر والجسوم اعله الثره

وانظر خيام النبوه ابنار اميه اموجره

عالخيم شنوا الغاره ابگطع حبل الاتصال

من توسدتوا الرمال

* * *

انعرضت ابالواح فكري هالمصايب والمحن

وصور لجسوم الضحايا گبال عيني اتوضحن

هذا واقع مو خيال وصدري بالهم انشحن

هالرزايه الواقعيه انرسمت ابعين الاطفال

من توسدتوا الرمال

* * *

يا هلي ابعث حنان ودمع لجواف النحور

وارد اخبركم يهاشم بالحرم حل الثبور

لا كفيل ولا خيام ولا حماة ولا خدور

وعيلتي الچانت عزيزه فگدت العز والدلال

من توسدتوا الرمال

* * *

ليش يرباب الكرامه اموسدين اعله الترب

گوموا واتوسدوا ابگلبي اعله الثره افرشت الگلب

لا تضنوني غريبه آنه ميهمني الغرب

ذيچ انه زينب الكبره الگالت اتكفل عيال

من توسدتوا الرمال

* * *

يا هلي زينب تراني وما يغيرني الزمان

الگوم ضنتني عگبكم ارضه بالذل والهوان

اقسم ابراس أبو اليمه المرتفع فوگ السنان

لون ما سهم المثلث ما يسلبونه الانذال

من توسدتوا الرمال

* * *

يا هلي لو شفتوا جفني دموعه تتفايض دمه

هاذي حاله استارثتها من رزية فاطمه

وشوفت ظلوع أبو اليمه البالخيول امهشمه

اتذكرت ظلع البتول وهالظلع رايد سؤال

من توسدتوا الرمال

* * *

يا هلي لو ردت أناشد حرت ما ادري شأگول

يا ظلع بالغاضريه جالت اعليه الخيول

ظلع اخويه حسين بالطف مثل ظلع امي البتول

واحد ابدفعة الباب اوواحد ابخيل الضلال

من توسدتوا الرمال

* * *

دمشق / ١٩٨٠ م

مسلم في الكوفة (موشح)

احلفت غالب ما ترد لديارها انچان ما تاخذ وتوفي ابثارها

* * *

اطلعت غالب واعزمت تگطع البر وتمشي ويه الوحش لو لاح السفر

اهتفوا مسلم عيب لو ثاره اندثر واحنه لسيوف الملاحم نارها

* * *

اتحوم عالحومه شبه حوم الگطه لو عليها الصگر بالظلمه سطه

لچن هاشم عالحرب متسلطه والمنايه ما تهاب اخطارها

* * *

صاحوا النه گلوب امضه من الصخر ورمح عزنه ثابت ابگلب الدهر

الثار ما يحتاجله عام وشهر الثار اهله تاخذه بنهارها

* * *

وعگب مسلم عيب نتسمه زلم انچان ما ناخذ الميدان ابعزم

الجسم عگب الروح شيفيد الجسم ولا تفيد العين عگب انظارها

* * *

عيون احنه ومسلم انظار العيون واهوه روح جسومنه انفارگه اشلون

الروح صعبه ويه الجسد يتفارگون ومسلم لروح الغلب اعمارها

* * *

بين ما يتباصرون اعله الأمر طلع من بين الزلم ليث ايهدر

صاح أنه العباس ولهاشم بدر وسيفي يبني للملاحم دارها

* * *

عگب مسلم عيب تاخذنه الدهور انچان ما ناخذ مهجها من الصدور

سيوف همتنه اتخطف شبه النسور وفوگ هامات الخصم اوكارها

* * *

بين ما يتخطه لن مبدر طلع صاح يا عم ارجع وعمّه رجع

آنه الأكبر صوتي للموت اندلع اشلون بالذله الحياة اختارها

* * *

وابو اليمه شاخص عيونه ويشوف چفوف اخوته لزمت رگاب السيوف

الصبر صاح الصبر يرباب الحتوف الصبر اهوه للزلم معيارها

* * *

لچن يهلي الصبر عالذل ما يهون والمنون اليوم يا محله المنون

عگب مسلمنه فلا تغفه العيون الثار يهل الثار من فجّارها

* * *

حسين حشمهم وللموت اسرعوا واصلوا بالسير بالبر اگطعوا

بالعزم والزود والعز اگبعوا اشهروا سمر القنه وبيض اشفارها

* * *

اوصلت غالب كربله وزمّت لوه وهرش چبد الموت بيديها التوه

اطلعت ويه الزود للحومه سوه ورفعت ابروس السمر شنيارها

* * *

طهران / ١٩٨٦ م

مسير السبايا (موشح)

ظعونكم سارت بمر غزايها اشلون عيس الفاجده حدايها

* * *

طوّح الجمّال بجمال الهزل والنحايف سيرهن ما يعتدل

ابغير حادي گوطرت هاي الابل ابغير حادي الابل تبگه تايها

* * *

عگب عين الگمر تاهت هالظعون حرمله والشمر بظعونه ايحدون

من عگب حمّايها تطلع اشلون اشلون تطلع من عگب حمّايها

* * *

ما هگوتي سجوا بذاك الرحيل غير حرّات ومداليل وعليل

اطلعت لاچن يا تره أبو حشة الليل ابليل والحرات فگدت رايها

* * *

ما اموطيات ابحدج ذيچ الجمال ولا مغطيات ابيزر روس الاطفال

اطلعت لاچن يا تراها باشد حال حال لجبال الارض حنّايها

* * *

اشلون حاله التحني ظهور الجبال وخلت عيون الحرم تسهر ليال

وسفه هاشم غايبه عن العيال اعيال تعدي والحزن عدّايها

* * *

وين عنها غابت ليوث الوغه وين عنها الچان يرفل بيرغه

صاحت ولا شهم للصيحه صغه ويلفي للعيله ويسچن دايّها

* * *

چالفواخت بگت ما بين الصگور والصگر من يولي عالصيده يجور

لو شبه ريم وتحومها النسور نسور تولي والشمر غوايها

* * *

گوموا للعيله يغالب يالاكرام من الشماته شاجفوا عنها السهام

عيالكم راحت من الكوفه للشام الشام آه الشام من غوّايها

* * *

اضحت من الشام السهام اتهدف واضحت الايتام بالشام اترجف

حالة الخدّر ابد ما تنوصف عيونها شبه الطيور الشايها

* * *

اوگفت بالمجلس بيا حال اوگفت حاله عيّت كل وصف متوصفت

لچن عدكم حره بالزود اهتفت هذا گلبي للحرم فيّايها

* * *

عالعقيله اشما عليها ادته ادّت المطلوب منها وزادته

وظعن اخوها لگبر اخوها ردته حيث چفها للشيم عطّايها

* * *

نادته والدمع من عدها انسجم جيتك وبالگلب جمرات الالم

من الشماته انصاب گلبي چم سهم وسهم چبدك چبدتي فرّايها

* * *

مشهد المقدسة / ١٩٨٦ م

إبراهيم بن مالك الأشتر (موشح)

مالك الاشتر مثال المعتقد وعلى الوالد يطلع ابسره الولد

* * *

مالك الاشتر حمه حدود الشرع والورع لو خلف ايخلف ورع

واصبح ابراهيم من مالك فرع وانوصف هالشبل من ذاك الاسد

* * *

هاي چلمة فخر ناداها علي هموم گلبي بأبن الاشتر تنجلي

سند مالك چان بالدنيه الي مثل ما چنت آنه للهادي سند

* * *

بعد ام الفخر ما تولد فخر مثل مالك لا ولا ام الظفر

ركن بيت المجد بايمانه اعتمر وابنواظر شيمته البيت انرصد

* * *

مالك الاشتر بايمانه انوصف وضنوته ابراهيم عنه ما اختلف

بالشهامه وفن الحروب انعرف چان ويه الحق مثل روح ابجسد

* * *

چان مالك طود يحرس حيدره وابنه للمعتقد مثله ناصره

من سمع جثة حسين اعله الثره صاح يا للثار وابزوده استعد

* * *

سمع جسم حسين دامي اعله الصعيد ابعزمه ناده يا لثارات الشهيد

يريد اخذ الثار من زمرة يزيد هزته انخوه وعلى الغوج ارتعد

* * *

جمع صفوه وساروا ابدرب الرشاد اعتنوا للكوفه على ظهور الجياد

ابليل دامس لچن بدر الاعتقاد بزغ الهم والظلام اصبح بدد

* * *

موقف ابراهيم نبراس الاباة اخذ ثار حسين من گوم الطغاة

ناول ابن زياد چاسات المماة وساند المختار عليه اعتمد

* * *

بثار أبو السجاد عزمه منفتن وانقذ المختار من ذاك السجن

وزال عن گلب الهواشم كل حزن وخله عين الخدر اتنام ابرغد

* * *

بكربلا ابراهيم وسفه ما حظر چان شاف اشعملت افعال الدهر

انجمعت اعله حسين كل حرب وصخر جيش مثل الحصه ما الهم عدد

* * *

للجريمه وللغدر صفوا صفوف وجردوا بيض الضبه وسمر الحتوف

غير السهام ابسماها ما تشوف وما سلم حتى الرضيع البلمهد

* * *

گوم ما تمتلك ذره من الشيم اشچان ذنب الطفل يرموه ابسهم

بيد ابوه حسين بالنبله انفطم ضامي لاچن من دمه المنحر ورد

* * *

وهجموا اعله حسين بسيوف ورماح وشجرت جسمه السماهر والصفاح

ابطيحته عامود بيت الحرم طاح واشيظل بالبيت لو طاح العمد

* * *

وبعد لبراهيم ارد اشرح الحال من وگع جسم أبو اليمه اعله الرمال

اتوزمت ام الحزن بمر العيال اتفگدت لن طفل من عدها انفگد

* * *

فگدت الحره يتيمه من الايتام طلعت اتدورها بجناح الظلام

لن تشاهدها على جسم الامام حانيه ظلوع المصيبه عالجسد

* * *

گلبتها الحره بچفوف الامل لن تشوف الطفله ضيفها الاجل

گلب زينب چم وچم لوعه حمل لاچن اصبح درع لسهام لشدد

* * *

صورت هالمحن ابراهيم ليك وانته بالثارات اديت العليك

نفذت كل التيسر بين اديك ابثار أبو السجاد وفيت العهد

* * *

طهران / ١٩٨٥ م

دفن الحسين (عليه السلام) (البحر الطويل)

يا دفان جسم حسين راس حسين چا وينه

لو تندل مچانه وين گوم ويانه دلينه

* * *

يا دفان اريد اوصيك من تدفن أبو اليمه

ابهيده نزله ابگبره ولم اوصال كل جسمه

يا دفان لتغسله تراهو امغسل ابدمه

وسّع باللحد المچان

ورش الماي عالتربان تراهو منذبح عطشان

وگله زينب اتناديك بس الحرم ظلينه

* * *

يا دفان جسم حسين من اتنزله ابگبره

ابهيده بالدفن وياه وخل ايدك حدر ظهره

تراهوا امهشمه ظلوعه والخيل اسحگت صدره

وسعه للّحد وسعه

ولا تلچم كسر ظلعه وسهم البالچبد طلعه

خوفي تلچم صوابه والياذيه ياذينه

* * *

يا دفان اخذ گلبي واحفر بالگلب لحده

وخل افرش اله چبدي وابوسط الچبد وسده

ولو ما ينگطع راسه افرش مهجتي لخده

لاچن يا وسف ذبحوه

وراسه من الجسد فصلوه وبراس الرمح شالوه

وما ندري بعد لاوين رايد هالدهر بينه

* * *

يا دفان بالله عليك ريّض وخذ مني الروح

افرشها على الغبره وبيها وسد المذبوح

ادفن جسمه عوف الراس راسه ويانه راح ايروح

صاحت والدمع مسچوب

راسه اتعيّن بيا صوب ذاك اعله الرمح منصوب

اظن ويانه راح ايروح يحمينه ويبارينه

* * *

اتمنه الي روحين وانطيهن لبو اليمه

وحده اتظلل اعله الراس وحده اتظلل لجسمه

لاچن ما بگت عندي ولا روح التظل يمه

روحي ابفرگته غابت

ابسهم النايبه انصابت وعيني ويه الدمع ذابت

حاربني الدهر وسفه وعليّه جارت سنينه

* * *

يا دفان بعد اوصيك جسمه لمن اتواريه

ادفن طفله عبد الله يمه ابفد گبر خليه

تدري بالسهم مصيوب وصواب السهم ماذيه

عبد الله ابسهم مذبوح

وهاي امه الرباب تنوح ويانه يسيره تروح

وگله يا بعد بيتي تسلبنه يوالينه

* * *

يا دفان بالله عليك اريد وياه اتعاتب

واگله الخيم حرگوها وراحت باليسر زينب

ونيران الخيم لليوم ظلت بالگلب تلهب

واگله الحرم مصيوبه

والايتام مرعوبه وزينب مشت مغصوبه

واگله يسروا رمله ورباب وليله وسكينه

* * *

طهران / ١٩٨٦ م

زيد الشهيد (بحر الطويل)

تواريخ المجد كتبت عن زيد الشهيد اخبار

ثار وثورته اتصلت ابثورة كعبة الاحرار

* * *

ارويلك روايه وهاي مسنوده ودرسناها

الامين ابدورة (الاعيان) خطها واخذ فحواها

والمسعودي يرويها ابمروج الذهب،، تلگاها

شوف اهل الفكر شتگول

عن زيد ابدمع مهمول گالت نضهته متزول

وصارت كل مواقف زيد شعلة فخر للثوار

* * *

زيد ابنهضته الحره صبح لهل الفخر نبراس

چان ايراقب الامه ابضميره وذاته والاحساس

يشوف الحاكم الظالم امسلّط على رگاب الناس

وكتاب الله صبح مهجور

وهشام الظالم المغرور عالوادم يصب الجور

وزمام البشر اصبح بيد المجرم الغدار

* * *

من ذاته الشريفه زيد چان ايراقب الاوضاع

شاف الدين بين الناس اصبح ينشره وينباع

هتف يا للنصيب اشلون اسكت عالظلم وانصاع

ابدرايه وفاكره وحكمه

گصد للباقر ابهمه يخبره ابوضع هالامه

عگب ثوب الشرف والعز متقمصه ابثوب العار

* * *

يالباقر يخويه جيت اشرح مگصدي ومنواي

اريد انهض يروح الروح واعلن حرب ضد اعداي

ومن الكوفه يالباقر زلم عزمت تسير وياي

يخويه ويمك اتعنيت

گصدي استشيرك جيت وعالثوره اعزمت ونويت

شنهي فكرتك شتگول والكوفه صفوا انصار

* * *

الباقر جاوبه وناده يخويه اعرفت مضمونك

لا تعتمد عالكوفه تراهي اتخيب ضنونك

مثل ما غدروا بجدك يبعد اهلي يغدرونك

انهض للوداع انهض

وجفني لا تضن يغمض فرگتك بيش تتعوّض

عني لو رحت يا زيد احسب ركن حيلي انهار

* * *

اويه الباقر توادع زيد لاچن بالگلب جمره

اخذ صحبته وخيل الموت صارت تحث بالمسره

تعنّه للرصافه وراد بيها ايفجر الثوره

وگومه املوحه اعله الخيل

شدت للمنايه الحيل مسراها نهار وليل

والعنده هدف غالي يظل يمشيله ليل نهار

* * *

وصلوا للرصافه وزيد للمجلس تعنّه النوب

شاف الطاغيه ابگصره خليفه وعالعرش منصوب

يصد واحد على الثاني ابنظرة غالب ومغلوب

هشام اصبح يخاطب زيد

اسمعنه للخلافه تريد منوالك صعب وبعيد

امك جاريه وميصير انته تحكم الامصار

* * *

لن زيد الشهم ناداه ناخذ مصحف التنزيل

ابكتاب الباري ما قاري عن ام النبي إسماعيل

چانت جاريه وهذا كتاب الباري بالتفصيل

هشام اتغيرت الوانه

وصاح ابصوت طغيانه خليفه اعله البشر آنه

والمايخضع لأمري يخضع غصب للأشفار

* * *

طلع زيد الشهم غضبان من مجلس هاشم وراح

جهّز جيشه للثوره وبصوت الكرامه صاح

هيهات اركن اعله الضيم واخفض للمذله جناح

عالذل ما تنام العين

اريد افدي النفس للدين واطلب ثار جدي حسين

هذا اليوم يوم الثار حاشه لن يضيع الثار

* * *

من دارت رحه الحومه وتلاگن بالوغه الجيشين

جيش التزم نهج يزيد وجيش التزم نهج حسين

وردت كربله انعادت ورد يخفگ جناح البين

زيد ابهمته وزوده

وصل غايته ومگصوده بذل بالحرب مجهوده

وسافه لن سهم صابه ابجبهته وشائت الاقدار

* * *

فصل عنهم سواد الليل وزيد اخذوه اصحابه

يجود ابروحه وايعالج من السهم الذي صابه

وجابوله الزلم حجّام يضمد جرحه وصوابه

گبل لا يفحص جروحه

فاضت للأجل روحه وخذوا جثته المطروحه

دفنوها حدر جدول گصدهم تختفي الاثار

* * *

الحجّام اعتنه ابسرعه لهشام وبلّغ اخباره

يگله يا هشام اليوم زيد اندفن واتواره

توسد حدر جدول ماي رادت تخفي آثاره

هشام آمرهم وطلعوه

عاري اعله الجذع صلبوه من بعد الصلب حرگوه

واصبح اسمه بالتاريخ مصلوب وشهيد النار

* * *

طهران / ١٩٨٥ م

جابر الأنصاري

ردينه تدري بيا حال بس الحرم والاطفال

جابر يجابر هاليوم ردينه تدري بيا حال

* * *

آنه العليل وصوبتني الايام

يسرني للكوفه زماني وللشام

ويايه طلعت بس فواطم وايتام

واليوم اجيت وجبت روس الاكرام

شتنظر يجابر شتشوف شايف عليل ومچتوف

اصرخ وگلبي مالوم ردينه تدري بيا حال

* * *

اسمع يجابر واخذ مني الاخبار

ارويلك اشما جره علينه اشما صار

عگب الاهل ظليت وحدي ومحتار

لا اخوه عندي ولا عمام ولا دار

جسوم الاهل وذروها وحتى الخيم حرگوها

واليسر اصبح محتوم ردينه تدري بيا حال

* * *

اشما كثر صبري هموم گلبي تكثر

والخلّه دلالي يجابر يسعر

بعيني شفت ليله الغريبه بهالبر

تروح وترد يم جسم ابنها الاكبر

من شفت الاكبر مذبوح بالجسم ما ظلت روح

وابفگده يسرونه الگوم ردينه تدري بيا حال

* * *

ريتك يجابر چنت حاضر يمي

چان اخمدت بالدمع جمرة همي

ابعيني شفت جاسم ذبيح ومدمي

ابليلة زفافه اعله الترايب مرمي

ابدم الوريد اتحنه وبهالعرس متهنه

اتعنينه يم گبره نحوم ردينه تدري بيا حال

* * *

جابر يجابر بالغرب ظلينه

ويم النهر طايح جسم والينه

صوبوا جوده وسهم صوب عينه

وراسه انفضخ واتگطعت چفينه

يم النهر خليناه لليسر رحنه وعفناه

والحرم تصرخ وتلوم ردينه تدري بيا حال

* * *

يا جابر هنا سلبوا اطفالي

وهنا يجابر رخص دمعي الغالي

يوم الرجع مهر أبو اليمه خالي

ايصيح الظليمه وظل يدور گبالي

عالوالي من انشدناه راح وتعنينه وياه

ومن رحنه واشكينه هموم ردينه تدري بيا حال

* * *

يا جابر هنا عيلتي سلبوها

وهنا يجابر للجثث سحگوها

وهنا يجابر للخيم حرگوها

وابفگد أبو اليمه الحرم يسروها

ابدرب اليسر مشونه وفوگ الهزل رچبونه

واليوم يم المظلوم ردينه تدري بيا حال

* * *

مشهد المقدسة / ١٩٨٦ م

العباس بن علي بن أبي طالب (عليهما السلام)

عباس يا بحر الزود عباس هاك اخذ الجود

گوم انظر حالة ايتامك تنتظرك ظلت بخيامك

عباس يا بحر الزود عباس هاك اخذ الجود

* * *

يا عباس آنه اختك زينب أشكيلك واسمع شكواي

اتعنيتك يا شيمة اهلي جيت وجبت العيله وياي

أطفال وخدَّر عطشانه كلها اتصيح الماي الماي

ينخاك گلبي المجروح ينخاك لخيامك روح

رضعان اتشاهد جدامك تنتظرك ظلت بخيامك

عباس يا بحر الجود عباس هاك اخذ الجود

* * *

يا عباس انظر حالتنه عطشان ايلوذ ابعطشان

نفرض هاي الخدَّر تصبر لاچن شيصبر الرضعان

وانظر عبد الله بيا حاله يتلاهب گلبه ابنيران

اطفال لا وين تروح اطفال تنحب وتنوح

صرخات اتهيِّج آلامك تنتظرك ظلت بخيامك

عباس يا بحر الزود عباس هاك اخذ الجود

* * *

عباس اسمع صوت اطفالك چم طفله اتنوح وتنخاك

ما تدري اسكينه بيا حاله تنتظرك بالخيمه هناك

وابصوت الاحزان تنادي يا عمي اتعنيت وياك

بحماك يا عمي جيت بحماك يا سور البيت

خابن احلامي واحلامك تنتظرك ظلت بخيامك

عباس يا بحر الزود عباس هاك اخذ الجود

* * *

يا عباس واصعب موقف موقف مثله ما شفناه

اطفالك واحد للثاني ايگله الشاطي ذاك وياه

ساعه وعمنه يروح ابجوده وايجيب الماي ابيمناه

للماي مشبوحه عيون للماي منك يردون

اطفالك زهرة ايامك تنتظرك ظلت بخيامك

عباس يا بحر الزود عباس هاك اخذ الجود

* * *

عباس اعيالك عطشانه وهذا الحال اصعب كل حال

يا خويه وشتشوف عيوني رضعان وخدر واطفال

لو اگدر اعصر دلالي واسگيها ابماي الدلال

انخاك ما تعرف ليش انخاك حاطتنه الجيش

گوم احمي اعيالي ابصمصامك تنتظرك ظلت بخيامك

عباس يا بحر الزود عباس هاك اخذ الجود

* * *

شال الجود وشال الرايه والسيف ايلوح ابيمناه

صنديد وهاج اعله الحومه شيصبره وزينب تنخاه

سيطر عالشاطي وفرسانه وفرَّت من بين ايده عداه

نادوه گوم العدوان نادوه رد الصيوان

خل اختك تنطيك اوسامك تنتظرك ظلت بخيامك

عباس يا بحر الزود عباس هاك اخذ الجود

* * *

ذل الحومه وأدّه الواجب ضحّه ابروحه لأجل الدين

صابوا سهمين ابو جدانه سهم الجود وسهم العين

وبالعامود اتصوب هامه وانگطعت منه الچفين

نادوه سيفه والجود نادوه لخيامك عود

عيالك يالمتصوب هامك تنتظرك ظلت بخيامك

عباس يا بحر الزود عباس هاك اخذ الجود

* * *

طهران / ١٩٨٥ م

في وفاة الرسول الأكرم (صلى الله عليه وآله)

عترة الهادي جاروا اعليها

وجمرة الظلعين من يطفيها

* * *

اصرخ واصيح اليوم افجع كل يوم

يالهادي اشرحلك مصايب وهموم

من عترتك ظلعين كسروا هالگوم

ظلع البتول وظلع ابنها المظلوم

علة الكسرين من يداويها

وجمرة الظلعين من يطفيها

* * *

يالهادي خانت امتك بالعتره

اول ظلع كسروه من الزهره

وثاني ظلع برض الطفوف اتنظره

يضوم الوگع شبلك وداسوا صدره

جارت الدنيه وكل اهاليها

وجمرة الظلعين من يطفيها

* * *

اشرح الك حاله حزن يالمختار

طفلين منكم راحوا وتدري شصار

اول طفل محسن هوه ابباب الدار

والثاني عبد الله الرموه الاشرار

لوعة الطفلين ابروحي اخفيها

وجمرة الظلعين من يطفيها

* * *

والفجع روحي وفجّر دموع العين

بگلوب اهل بيتك التهبت نارين

نار اعله باب الدار وجّرها البين

والثانيه اتلاهبت بخيام حسين

وفاطمه النارين تستعر بيها

وجمرة الظلعين من يطفيها

* * *

والچتفوا حيدر ابذيچ الانجاد

وانغصب للبيعه وبالاغلال انگاد

نفس الاغلال اتحولت للسجاد

من چتفوه بيسر گوم ابن زياد

گلوب اهل بيتك تعلم اشبيها

وجمرة الظلعين من يطفيها

* * *

وچبدين كل واحد تصوب بصواب

اول چبد من الحسن بالسم ذاب

وثاني چبد اصعب واشد كل مصاب

ابسهم المثلث چبد أبو اليمه انصاب

رمية الچبدين ابگلبي راميها

وجمرة الظلعين من يطفيها

* * *

راسين منكم صابوا اشرار الناس

ابسيف ابن ملجم صوبوا أول راس

والثاني يم النهر راس العباس

صابوه بالعامود گوم الارجاس

والحرم طاحت كل مبانيها

وجمرة الظلعين من يطفيها

* * *

طهران / ١٩٨٦ م

مع جنود الحسين (عليه السلام) (عگيلي)

انصار ونعرف واجبنه وابدمنه الدين امطالبنه

* * *

احنه الانصار المعروفه غايتنه اعله الحق مكشوفه

قائدنه حسين ومنعوفه ابساعات الشده ايجربنه

* * *

ملتزمين ابنهج القائد متّحدين ابمسلك واحد

من اجل الاسلام انجاهد والفاهم يعرف مطلبنه

* * *

للاسلام انريد اننصره واتوضحت اهداف الثوره

هيهات انغير هالفكره واهل الباطل ما ترهبنه

* * *

نمتاز بإيمان وعفه وفكرتنه ابحق ما مختلفه

للظالم منصافح چفه وندحر كل طاغي ايحاربنه

* * *

صرخات وبالدم نحچيها لتعادي حسين انعاديها

لجله الارواح انضحيها وصوت الدم يشهدله ابحبنه

* * *

صف واحد ندخل للحومه انحارب ابن زياد وگومه

كل ظالم موعود ابيومه وهيهات ابجيشه ايريبنه

* * *

جيش ابن زياد ابآلافه صفت رمّاحه وسيّافه

هالموقف هيهات انخافه بالاستشهاد ايرغبنه

* * *

لو حلّت ساعات الشده انوگّف كل مغرور ابحده

ويزيد اشما كثّر جنده عن القائد ما يحجبنه

* * *

لو شنت غارات العسكر گبل حسين انمد المنحر

والموقف بالدم يتقرر ورنّات الصارم تطربنه

* * *

انرحب بالموت وما انبالي ونرفع راس الدين العالي

وانضحيله ابدمنه الغالي ويصير الفوز الجانبنه

* * *

طهران / ١٩٨٥ م

التوحيد

ادرس المصحف واخذ العبر من السور

(لَيْسَ لِوَقعَتِهَا كاذِبَه)

* * *

نبتدي (ابقلْ هُوَ الله أحد) ابحق انعبد

واعترف حق (إن اللهَ الصَمَد) ابحق انعبد

(ولم يكنْ له كفواً أحد) ابحق انعبد

حكمة الخالق اتوضح الك سر الفلك

بالعلم تكتسب هالمرتبه

* * *

(هَلْ أتاكَ حَدِيثُ الغاشِيَة) بالهاويه

(سوفَ تُسقى من عينٍ آنيه بالهاويه

(ثم، سَتُصلى ناراً حامِيَه) بالهاويه

بالعمل تخلص بيوم الحشر من الجمر

نار القيامه هالمتلاهبه

* * *

(إن بَطْشَ رَبكَ لشَديد) وهو الحميد

(إنهُ هو يُبدي ويُعيد) وهو الحميد

(رَبُكَ فعّالٌ لما يُريد) وهو الحميد

بعاد وثمود انضرب هالمثل شوف الجهل

باغايه وللاله اتحاربه

* * *

(كَيفَ فَعَلَ ربُّكَ بِعاد) ذات العماد

(هُمُ اللذينَ طَغوا في البلاد) ذات العماد

ثم (فأكثروا فِيها الفساد) ذات العماد

شوف النهايه سكنها لسقر وبيها استقر

ندعوا الاله ابحسن العاقبه

* * *

(قُتِلَ الإنسانُ ما أكفَرَه) بالآخره

(ثُمَ أماتَهُ فأقبره) بالآخره

(كلاّ لما يَقضي ما أمره) بالآخره

وگلب الموالي بالمحشر ضمن جنة عدن

ويدخل الجنه بالعز والابه

* * *

(لِمَنْ خافَ رَبه جنتان شوف البيان

(فيهما عينان نضّاختان شوف البيان

(وفيهِنَ خيِّراتٌ حِسان شوف البيان

جنة عدن بس لليهوه على نعم الولي

وتسكن جهنم گوم الناصبه

* * *

حيدر الحاكم ابيوم الحشر بيده الامر

ابملكه الجنان ومسيل الخمر بيده الأمر

ونوره اليخمد لهيب الجمر بيده الأمر

حيدر تعالى ابمعالي العله شانه اعتله

واسمه عاللوح القلم كاتبه

* * *

طهران / ١٩٨٥ م

هذا حسينك في العراء محزوز الوريد من القفا (موشح)

حسين لمن طاح مرمي اعله الثره الخيل هجمت عالثنيه امسدره

* * *

حسين للتوديع من طب للخيم اتلگته زينب وللملگه ابتسم

صاحت آنه الاكفل ايتام وحرم وانبجح گلبه وتطيّب خاطره

* * *

ودع العيله وطلع من الخيام بالشهاده روحه ماخذها الهيام

نظر آخر نظره لوجوه الايتام يدري من بعده تظل متحيره

* * *

ودع اطفاله ابگلب ينبع صبر يدري من بعد العسر يصبح يسر

منتظر يوحي إله الباري ابأمر منحره لأسم الجلاله ايكبره

* * *

صدر امره ودخل ميدان القتال ابصارمه ايگلب غده صفوف الرجال

بالابه ايصد البواتر والنبال وثگل عالعدوان ويد الزمجره

* * *

حمل عالميمنه وذبها اعله الگلب وصاح بالميسره وتيّهها الدرب

الحومه صارت رحه وعساله الگطب وغده ايذكرها ابمواقف حيدره

* * *

حمل حمله ضيغم امودع الحياه وحاطته العدوان من ست الجهاده

اجهده حر الضمه ورام المماه ومن جبينه لشيبته دمه جره

* * *

اول صواب الحجر صاب الجبين ونفذ سهم البين من گوس اللعين

طاح من عالمهر للمصرح حسين بگه اعله الصيوان شابح ناظره

* * *

شاهد العسكر عالمخيم فزع نهضته النخوه وعلى وجهه وگع

حيث سهم البين من ظهره طلع وجثته بسيوف اميه اموذره

* * *

فوگ اصاويبه وگطع چبده وضماه ايشوف جيش الكوفه متوسط حماه

صاح صوت وزلزل العالم صداه لا تروعون الحرم المخدره

* * *

شبث صاح اعله الشمر رجّع الخيل حسين بعده بالحياه وعنده حيل

اسمعنه صوته وصار برهان ودليل والسلب بعد الممات انقرره

* * *

رجعوا وما وصلوا لحد الخدر والجريمه انرسمت ابعين الشمر

للذبح ناوي وشهر سيف الغدر للغريب ايريد يگطع منحره

* * *

بيده سيفه واعتنه لذبح الإمام وگف فوگ الجسد وگفه انتقام

وجهه منبوذ وكشف عنه اللثام اكفهر لو ردت او صف منظره

* * *

فوگ صدر ابن النبي ثنّه اللعين ابسيف طغيانه ابتده ابگطع الوتين

بالسمه الاملاك صاحت يا حسين ايعز علينه لگطع نحرك ننظره

* * *

الراس من انفصل عن جسم الغريب الحرم بالصيوان ضجن بالنحيب

حيث شافن جسم أبو اليمه خضيب وصدره ميدان الخيول الغادره

* * *

اطلعت من الخيم زينب حايمه بين نار وخوف وآلام وضمه

على التل وگفت لخوها اتحشمه لمن اتعنت العسكر غايره

* * *

من على التل صاحت ابمدمع هطول انچان ميّت امري لله وللرسول

انچان حي انهض ورجع هالخيول واطفي نار خيامك المتوجره

* * *

عگب ما ايست رجعت من التل للخيام اللاهبه اتلم الاهل

مثل دم حسين دمع العين هل وليسر زينب غدت تتصوره

* * *

الكاظمية المقدسة / ١٩٧٧ م

يا آل نزار (موشح)

يا نزار وآل عدنان ولؤي شدوا خيل الثار واطووا الكون طي

* * *

يا نزار حسينكم بالطف ذبيح ولا نزاري منكم ابثاره يصيح

اتغسل ابدمه وهو دامي وجريح يا عجيبه والفرات ايفيض مي

* * *

صار جسمه مرتع لمخلب يزيد وراسه يتناگل على ذروه الميد

ماهي مرضيه الحرم تگطع البيد وراس اخوهن كسر عالايتام في

* * *

حسينكم راسه على روس الرماح وشيعت جسمه السماهر والصفاح

والهوادج سايره ابهم ونواح وبالظلام الراس الهم صار ضي

* * *

بالفيافي اتغالب ابحر الفله يالتروم اوصف الك هالعايله

بس هياچل والارواح ابكربله اميسره واخذوها من حي لحي

* * *

سارت وراس الولي وياها سره ايباري حرّات البگت متحيره

لچن ظل الجسد ثاوي اعله الثره ميت لاچن لعد رب الكون حي

* * *

بالبوادي چم وچم طفله وطفل اهون اعله الارض من ظهر الابل

الراس يثگل عالرمح ما ينحمل يعرفون اهناك منهم طاح شي

* * *

وزينب ابعبرات وهموم وحنين من المحمل صدت لراس الحسين

شافته بالحجر مرضوض الجبين نادته يا هو الفضخ راسك يخي

* * *

ابغرة المحمل لغرتها اضربت ومثل الصواب البراسه اتصوبت

وهي فوگ الناگه صاحت واندبت يا هلي اسهام الغضه اترامت علي

* * *

يالعلي والله لون يميي هلي الحرم ما چان اگطعت فج الخلي

يا قصي دمعة الايتام اتهلي اتهلي دمعات اليتامه يا قصي

* * *

غيركم هاي اليتامه مالهه او دونكم هاي الظعاين تايهه

والحرم يا هيه فگدت رايهه اتحيرت مضا بين تيماها وعدي

* * *

يا هلي صبر الگلب للگلب فت والشماته اگطعت من دلالي بت

من وصلت الشام دمع العين كت كت يويلي واشمتت زمرة الغي

* * *

حرت مدري الكوفه اصعب لو الشام والمهج بالنوح ماخذها الهيام

يا هلي رديت بظعون الايتام ردت شوفتكم لچن ما طح بدي

* * *

مشهد المقدسة / ١٩٨٥ م

الإمام الكاظم (عليه السلام) (موشح)

روحي غابت والاجل يبراها ويه نعشك عالجسر خلاها

* * *

روحي غابت والامل وياها غاب والدهر داهمها بافجع كل مصاب

ابلوعة مصابك يبن داحي الباب وشعل جمر الغضه ابلب حشاها

* * *

اتصورت حالتك وانته بالسجن امگيد ابثگل الحديد او ممتحن

ابضميرك تلتهب نار الحزن وروحك طيور الاجل تنعاها

* * *

آه يالكاظم ولا ينفع الاه الجرح لمن ينفتح يصعب دواه

اشلون چف الفاجعه لچفك لواه وبالمنيه الجثتك واراها

* * *

سلهمت جفني وسمعت الناعي صاح راح ابن جعفر ابسم الغدر راح

للجسر روحي تعنت بالنياح وجمر نار الحزن راح وياها

* * *

رفرفت روحي اعله نعشك يا غريب شاهدت حاله الطفل منها يشيب

ما لفت يمك حموله او لا صحيب بالدفن لجنازه تتبناها

* * *

ارد انشدك يا فرع عمر العله رگبتك ليش ابحديد امكبله

الطاغي ما تكفيه ذيچ السلسله ابرگبة السجاد من خلاها

* * *

ليش چبدك سيدي اتگطع ابسم ما كفاهم كربلا وذاك الالم

حين صابوا چبد الحسين بسهم وغسلوا جثته ابفيض ادماها

* * *

وبعد نعشك عالجسر ليش انرهن ما كفاهم جسم أبو اليمه لمن

ظل ثلث تيام مرمي بلا چفن وجثته تراب الارض غطاها

* * *

ليش يبن الطهر فجعوا عيلتك ما كفاهم هظم زينب عمتك

فرع لمصاب الطفوف مصيبتك وظلت لهذا العصر مجراها

* * *

بالظلم والجور هارون الرشيد ابد ما يختلف عن جده يزيد

هالطغاة اصبحوا للدنيه عبيد ابكل زمان اهل الظلم تلگاها

* * *

طهران / ١٩٨٦ م

متى تظهر (موشح)

يا بقية غالب من ابدورها يمته لفلاك المنايه اتدورها

* * *

ابحثنه عن طلعتك وافنينه المهج وغصنه بالاسرار واخذتنه اللجج

اعرفنه بس الصبر مفتاح الفرج شمس هجرك ما عرفنه ظهورها

* * *

اختفت مدة غيبتك يبن الرسول وحارت الافكار وارباب العقول

بعد ما تدري اشتصرح واشتگول اتحيرت بسنينها وبشهورها

* * *

يا سنه يا شهر يا يوم الظلام ينگشع ديجوره عن وجه الاسلام

يمته شمسك للمله اتميط اللثام وتجلي عن وجه السنن ديجورها

* * *

سر مغيبك عجّز الياخذ الفال وصفّن اهل النجم والتضرب رمال

ما يجي ابخاطر ولا ايمر ابخيال شفره ما واحد كشف مستورها

* * *

لا نبي ولا وصي ولا عالم گدر يحصي مدة غيبتك عن البشر

چم قرن مدتها چم عام وشهر حكمه والباري ايعرف مضمورها

* * *

ما عرفنه المده بحساب وعدد لچن رب الكون واعدنه ابوعد

الارض لمن تمتلي ابجور ونكد هناك يظهر للطلايع نورها

* * *

ايبدل الجور وظلم قسط وعدل ويگطع بنود الشرك فرع واصل

من بحر غيها الشرع ينجه مثل ما نجه ذنون من ابحورها

* * *

بكل زمان اتواجدت وبكل عصر زمره بين المجتمع تزرع جذر

تبذر الاحقاد والغش والغدر والفساد انتشر من بذورها

* * *

الطبيب ايداوي وايجس النبض والطبيب اشلون لو صابه المرض

والتجبر الكسر وتشافي الرض لو انكسرت من يداوي كسورها

* * *

مجتمع معلوم ما بي كل رجه من المرض والكسر واحد ما نجه

الطير من ينذعر بالعش التجه اشلون لو بالعش تحط صگورها

* * *

هالشكل صرنه يبن خير العمل بين خوف وجور وآلام وعلل

امتك يالمهدي صح بيها المثل ميته وتنتظر نفخة صورها

* * *

ما حصل بيها شهم وانحشمه كلها صارت للخصم مستسلمه

صفت مثل العيش چاتلها الضمه والعذب محمول فوگ ظهورها

* * *

بهالوصف امتك صارت تنوصف والرجال من النسه ما تنعرف

انتهازيه وتساير كل ظرف وعالرذيله جمهرت جمهورها

* * *

يدعون اسلام لاچن بس اسم من تغيب الروح شيفيد الجسم

من سور الاحكام حفضت بس رسم وكفرت بآياتها ودستورها

انچان يالمحجوب برض الطف شمر عدنه بالالاف مثله بهالعصر

هالاسم يفجعني لمن ينذكر اذكر الصفوه اللي حز نحورها

* * *

ابيا لسان اوصف يبن فارس مظر ابساحة الطف طاحت اركان الفخر

ابطيحت السبعين والسبعه وعشر ابيوم عاشر من شهر عاشورها

* * *

فوگ همك ما ردت ينضاف هم واذكر مصاب الذي ايفسر الصم

حين جدك طاح متغسل ابدم وجثته تراب الارض كافورها

* * *

طاح لاچن طاحت وياه الشيم فرصه صارت بيد عباد الصنم

هجمت السلابه لحدود الخيم والارامل سلبوها خدورها

* * *

اطلعت يالمحجوب عمتك والهه من المخيم على التل متوجهه

حالها ما اظن حال ايشابهه حال زينب للجبال ايمورها

* * *

على التل وگفت وعلنت بالمصاب انچان حي بعدك يبن داحي الباب

انهض ورجع الخيل من الاطناب عيلتك حرگوا عليها ستورها

* * *

انچان ميت يا شبل حامي الجار آنه ارجع للحرم واحرس الدار

بالاجدام الثابته اسحگ النار وانطر عيالك عگب ناطورها

* * *

واليسر خليني آنه واليسر واليروم العزه يسحگ عالجمر

فصلت للگلب جلباب الصبر وما تهمني گوم اميه وجورها

* * *

طهران / ١٩٨٦ م

حميده بنت مسلم (البحر الطويل)

زينب وصّت العيله لا تدخل مره علينه

الّه فاجده وثكله لو بالهم تواسينه

* * *

من طوح الحادي وسار للكوفه وتعناها

ماخذ حرم مسبيه ويسيره ابفگد ولياها

تحن وتنتحب لاچن يفسر الصخر مبچاها

وطب الظعن للكوفه

ابحرم وايتام مچتوفه وعليل ادموعه مذروفه

وحبل اليسر متواصل بين العايله وبينه

* * *

الفواطم وصلن ولنهن ابدار الهظم مجموعات

وزينب وصّت الخدّر ابصوت الحزن والعبرات

لا تدخل مره علينه واحنه ابديرة الشمّات

صدّت والدمع خنياب

لن حرمه اوگفت عالباب نادتها ابدمع سچاب

هاذي ياهي هالوگفت على الباب وتصد لينه

* * *

نادتها المره ولاچن جفنها يهمل دموعه

يا زينب يبعد اهلي مثلچن آنه مفجوعه

آنه الضيّفت مسلم آنه او صيفتچ طوعه

اجيتچ والدمع مدرار

اذكرت مسلم وحيلي نهار اسمعت طفله اله ابهالدار

اجيت انظر هاليتيمه ودليلي ايخفف ونينه

* * *

وزينب جاوبت طوعه يطوعه طلبتچ سهله

لونّج يا بعد بيتي تنشديني اعله هالطفله

حميده هاذي وياها اجت للمدمع اتهمله

وحميده تنادي يا عمه

اشتريد اتعنت الحرمه لمسلم تلهج ابأسمه

انچان اتعرفه خل انشد واشوفن والدي وينه

* * *

حميده اوگفت يم طوعه شگول اشوگفت ابيا حال

حال الطفله من تفگد ابوها وتگطع الامال

تگلها احچيلي يا طوعه اعله ابويه والدمع همّال

اگطعت من والدي الضنّه

اجيت ارد انشدچ عنه خبر ما مش بعد منه

تضعضع وانهدم حيلي يطوعه ابفگد والينه

* * *

خبر عن مسلم احچيلچ واخبرچ من دمع عيناي

لفاني والدچ للبيت مني يريد شربة ماي

وظل واجف اباب الدار مذهول وشريد الراي

واجف بگه ابذاك الحين

يتلفت يسار يمين محتار ويدير العين

بطل حيلي عليه وچان يجري الدمع من عينه

* * *

ناديته شربت الماي شنهي وگفتك بالباب

تدير ابعينك وچنك غريب ابديرة الأجناب

ولمن سمع المناشد ندهني والدمع سچّاب

آنه من بني هاشم

عليه جارت الوادم جفتني وتبعت الظالم

خانت بيعتني ودهري على سدد نياشينه

* * *

گتله يا حليف الزود هالدار اصبحت دارك

انته صاحب لهالدار واحنه نصير خطّارك

چانت مظلمه وسّاع تزهي وتشع بنوارك

اريد اعتذر سامحني

لون چلمه اظهرت مني تراني الدهر دوهنّي

واليشحذ عليك السيف ريت انشلت ايمينه

* * *

الشهم آمن دخل للدار لاچن شافته الانظار

وعاجل لعد گوم زياد الهم وصلت الاخبار

واتعنت رجال وخيل تعدي ودارت اعله الدار

ومسلم ظل يصد ويشوف

جيش امجردين سيوف ما مسّه جزع لا خوف

صاحوا وين رايد وين وامرك صار بيدينه

* * *

طلع للجيش يا حيّاه طلعت حيدر الكرار

طواها وذل عجيدتها ونشبها الويل بالبتار

لاچن يا وسف تالي تولوه ابنبل واشفار

بسيوف ونبل حاطوه

اميسر للگصر ودّوه ومن اعلى الگصر ذبوه

تهشّم جسمه واعله الگاع من الگصر رامينه

* * *

هذا يا حميده الصار ابعودچ يا بعد عودي

هالنوبه يروح الروح جودي بالدمع جودي

اريد اتگابل وياچن وهل دمعي على خدودي

واصيحن صوت يا مسلم

عليك الحيل متهدم وهالعالم صبح مظلم

ندور الصبر من يا صوب ما واحد يدلينه

* * *

طهران / ١٩٨٦ م

صريع المحراب

طاحت اركان الديانه من طحت يا حامي الحمه

طاحت اركان الديانه

* * *

هامت ابروحي الفاجعه وگلبي ذاب

وجبريل يهتف بالسمه ابصوت مصاب

لمن طحت يا ابا الحسن بالمحراب

طاحت اركان الدين يا داحي الباب

يهتف ابگلبه ولسانه وينادي بعنان السمه

طاحت اركان الديانه

* * *

يا علي صوابك هدم ركن الإسلام

وانفجعت آيات الشرع والاحكام

ولبست ثياب الحزن طول الأيام

وابطيحتك يوم الطحت يا ضرغام

اتهدم الدين وكيانه من خضبك فيض الدمه

طاحت اركان الديانه

* * *

راسك الطاهر من تفايض دمه

ثوب المصيبه اتفصل اعله الأمه

وگلب السنن لاهب ابجمرة همّه

وروح القدس يا ابا الحسن متولمه

يا علي مصابك دهانه والدنيه امست مظلمه

طاحت اركان الديانه

* * *

بسيف ابن ملجم هامتك مصيوبه

وشيبتك من دم طبرتك مخضوبه

هالليله املاك السمه مرعوبه

وبكل گلب نار الحزن منشوبه

بالگلب يسعر لضانه ونار المصايب مضرمه

طاحت اركان الديانه

* * *

انشد ابصوت الفاجعه يا كرار

اشلون ابن ملجم سل عليك البتار

اتجسر ولا هابك يحماي الجار

من دخل محرابك وصار الماصار

صابك ابسيف الخيانه يا علي ابطبرة صارمه

طاحت اركان الديانه

* * *

يا علي ولمن طحت فوگ الغبره

والوجه متخضب ابدم الطبره

هاشم تعنت وابصدرها العبره

دخلت المسجد هايمه ومنذعره

صاحت اتصوب حمانه ابطيحت حليف المكرمه

طاحت اركان الديانه

* * *

ونعشك بني هاشم يحيدر شالوه

ولجسمك ابهيبة العصمه دفنوه

بس جسم أبو السجاد بالطف خلوه

عالغبره مرمي وبالترايب چفنوه

بالترب فصلوا اچفانه وزينب اجت اتحشمه

طاحت اركان الديانه

* * *

ريتك يحيدر حاضر ابذاك اليوم

وتشوف لمن طاح جسم المظلوم

عالخيم هجمت يا علي خيول الگوم

سلبوا بناتك واصرخت ام كلثوم

عالنهر طايح لوانه ومن طاح سور الغانمه

طاحت اركان الديانه

* * *

طهران / ١٩٨٤ م

الهاشميون أبطال الوغى

هاشم الاحرار اتعنت اعله الثار

سمعت ابمسلم گضه اتعنت اعله الثار

* * *

سار ظعن حسين لكربلا گاصد

والامل معقود ابراية القائد

هاشم اتعنت رايده اتجاهد

ساروا ابهمه ابظعن أبو اليمه

للمذله رافضه اتعنت اعله الثار

* * *

والهوادج هاي بالجلاله اتنور

وزينب اتشاهد للعلم منشور

وصارم الايمان بالعزم مشهور

أبو اليمه صار ينتظر اخبار

وهاشم ابجمر الغضه اتعنت اعله الثار

* * *

والفرزدق شاف هالشمل ملتم

خبر المظلوم عن چتل مسلم

الكوفه گله اليوم عالغدر تعزم

گلوبهم تهويك والسيوف عليك

گله هاشم معرضه اتعنت اعله الثار

* * *

حسين واخوانه وكل بني عمه

واتحزمت للثار وصاحت ابهمه

واقسموا ميضيع مسلم ودمه

ثاره عيب ايروح نفتدي بالروح

للمنايه خايضه اتعنت اعله الثار

* * *

حسين لمن شاف آل أبو طالب

ابثار ابن عمها رايده اتطالب

ناده حياكم يا بني غالب

راشده النيه للغاضريه

ابكربله ايضيگ الفضه اتعنت اعله الثار

* * *

لن گمر هاشم شهر بتاره

صاح يا مظلوم خل نشن غاره

تقبل لمسلم انضيعه لثاره

حسين گال اشلون مثل ما تردون

والظعن سار ومضه اتعنت اعله الثار

* * *

جعفر وعثمان ايدوا عباس

جاوبوه الموت لو حصل لا باس

ولا نظل انعيش امهبطين الراس

لبن عمنه اليوم ننطي غالي السوم

والشهاده اتعوضه اتعنت اعله الثار

* * *

وعون خاطبهم لجل ابن عمي

ارخص الغالي وافتدي ابدمي

الثار يهل الثار عالزلم حتمي

انبجح گلب حسين اباخوته الطيبين

لحال اخوته ايلاحظه اتعنت اعله الثار

* * *

لكربلا وصلوا وشافوا الحاله

جيش ابن زياد صفوا ارجاله

لن أبو السجاد صوته يتعاله

اهل بيتي وياي اليوم عند عداي

ما اضنها معرضه اتعنت اعله الثار

* * *

جاوبوه الگوم يا حسين نريد

تعلن البيعه للخليفه يزيد

حسين جاوبهم ما نمد الايد

وكل بني عمي امصوته يمي

لحكم اميه اتعارضه اتعنت اعله الثار

* * *

طهران / ١٩٨٥ م

وداعاً يا حسين

يحسين هاي الليله آخر ليله انعيش وياك

هاليوم اصعب كل يوم وانودعك يا مظلوم

يحسين هاي الليله آخر ليله انعيش وياك

* * *

الليله الاخيره من العمر وياكم

باچر يخويه اعله الترب نلگاكم

اسمع دليلي اشصاح واشوصاكم

بالشيم يرباب الشيم ننخاكم

يحسين هاي عيالك هاي اطفالك من بعداك

آنه أحرسها امن الگوم وانودعك يا مظلوم

يحسين هاي الليله آخر ليله انعيش وياك

* * *

آنه العقيله وشاهدت جدّامي

مو زلم چنها ابدور وسط خيامي

واشما تجور ابكربله ايامي

شوفتكم اتروّي دليلي الضامي

يحسين هاي رجالك كلها گبالك تتفداك

صاحوا عالحومه نحوم وانودعك يا مظلوم

يحسين هاي الليله آخر ليله انعيش وياك

* * *

يحسين لتهابون اشرار الناس

لازال وياكم اخويه العباس

هاليله ظل يبن امي مرفوع الراس

وجثتك باچر بالحوافر تنداس

يحسين عندك قائد بالحگ صامد بين اعداك

عهدك بالدم مرسوم وانودعك يا مظلوم

يحسين هاي الليله آخر ليله انعيش وياك

* * *

يحسين تدري بأختك اشتتمنه

كلمن يروح لمصرعه ويتعنه

حتى الضماير كلها تشهد النه

قدمنه شاب ابدم وريده اتحنه

يحسين شاهد جاسم بيده الصارم واتعناك

وينادي انضحي دموم وانودعك يا مظلوم

يحسين هاي الليله آخر ليله انعيش وياك

* * *

يبن امي ويه الگوم ابذل جهدك

بلچن تحس ناس اللي تطلع ضدك

تبرز گبال اشبه الناس ابجدك

شبلك الاكبر هذا مهجة چبدك

يحسين هذا الاكبر يم الخدّر ظل يتناك

گوم لصيوانك گوم وانودعك يا مظلوم

يحسين هاي الليله آخر ليله انعيش وياك

* * *

گام أبو اليمه للخيام وگصده

ايشاهد الوجه اللي يذكره ابجده

والتفت لن شاهد رضيعه ابمهده

ومن شاف عبد الله تفطر چبده

يحسين طفلك ضامي وسط خيامي ابمهده هناك

ايناغي ابگلبه المضروم وانودعك يا مظلوم

يحسين هاي الليله آخر ليله انعيش وياك

* * *

اتعنه لرضيعه حسين يجري العبره

وعالمهد مثل الگوس محني ظهره

بيا عين أبو اليمه لرضيعه اينظره

بالمهد يتلوه وتدارك امره

يحسين انظر طفلك ضامي مثلك نترجاك

گوم واسگي المحروم وانودعك يا مظلوم

يحسين هاي الليله آخر ليله انعيش وياك

* * *

طهران / ١٩٨٦ م

رمز الإباء

ثورتك يحسين ثورة معتقد

بيك اقتدينه والعالم شهد

* * *

يا صفوة الخالق وكنز الاسرار

ثورتك صارت درس لهل الافكار

وضحت دستور الشيم للاحرار

وبكل زمان اتعيد نفس الادوار

موقفك يحسين بالطف انرصد

ابدربك مشينه والعالم شهد

* * *

مشعل الثورة اتنور ابفيض دماك

والكون يا مظلوم يزهي ابمعناك

واحنه المشينه ابدربك وعاهدناك

آخره ودنيه يبو السجاد وياك

ثبتت يحسين للدين العمد

يشهد نبينه والعالم شهد

* * *

هذا الحديث الوارد ابنهج الدين

عن الرسول الهادي نور التكوين

لحسين مني گال وآنه امن حسين

واحنه اعله هاي السنن بالعز ماشين

حبك يمظلوم من أبٍ وجد

ينتقل بينه والعالم شهد

* * *

صاح الضمير اتحققت آمالي

نرخص لاجلك كل نفيس وغالي

وجمرة مصابك تسعر بدلالي

وشفرة احزانك يا شهم تبرالي

جسمك يمظلوم عالغبره سجد

وامگطعينه والعالم شهد

* * *

جسمك الطاهر من وگع عالتربان

سجلت من دمك سور للقرآن

وابطيحتك طاحت اركان الايمان

وابكل گلب تستعر نار الاحزان

وابحافر الخيل مسحوگ الجسد

وامسلبينه والعالم شهد

* * *

نهضتك برض الطف درس للأجيال

ابدم الوريد اكتبت توضيح الحال

واشتركت ابنهضتك حتى الاطفال

واشلون ثوره البيها مسبيه عيال

بالكوفه والشام ثبتت عالعهد

هاي الضعينه والعالم شهد

* * *

يحسين يالفجرت اعظم ثوره

ابدمك الغالي ارسمت هاي الفكره

من مثلك الخياله رضت صدره

وعياله راحت بالظعن متيسره

ابثورتك هزيت اركان الحسد

من المدينه والعالم شهد

* * *

من ارض المدينه لكربله يا مظلوم

راسم درس بالشرف والعز مرسوم

لا أشر طالع لا بطر ضد الگوم

غايتك تدفع للشرف غالي السوم

والباري لولاك ما چان انعبد

ناصرت دينه والعالم شهد

* * *

ابچف الشيم صافحت ذاري المصرع

وجسمك الطاهر بالسيوف اتگطع

لبيض الاشفار وللعواسل مرتع

يا جبل قاف الشامخ الما يخضع

جسمك للسيوف صار الهن غمد

واموذرينه والعالم شهد

* * *

بعلبك / ١٩٨٢ م

الإنسان والمسؤوليّة

موقف الأمة خطير وينهم اهل الضمير

بعده صوت حسين يهتف لا معين ولا نصير

وينهم اهل الضمير

* * *

نفتتح موضوع فكري غامض ويطلب بيان

نشوف كل إنسان يثبت مركزه باربع اركان

ذات واحساس وضمير وفكر يبحث عن ضمان

قسّم واطرح واجمع يطلع الحل الأخير

وينهم اهل الضمير

* * *

ليش خصصنه الضمير وغيره بالحل انترك

هوه الينجي ويوگع صاحبه ابوسط الشرك

وامتحان الناس يظهر بالشدد والمعترك

هذا يوم الامتحان وهذا تقرير المصير

وينهم اهل الضمير

* * *

انقدم اطروحة معارف بالفكر مو بالكلام

ليش كل انسان يجرم من يصيبه الانفصام

وليش هاي الحاله تدفع هالبشر للانتقام

نريد حل لهالمسائل وباناملنه نشير

وينهم اهل الضمير

* * *

نوجد الحل الوحيد ونقط نوضع عالحروف

يظهر السبعين ألف انجنوا بيوم الطفوف

وابو اليمه گباله ينظر جيش متحشد صفوف

جيش سبعين الف طاغي وكافر ومجرم اجير

وينهم اهل الضمير

* * *

شاهد جسوم الصحابه بين مخضوب وتريب

وشاف اهل بيت النبوه بين مذبوح وسليب

ظل أبو السجاد وحده بين هالوادم غريب

مثل هالموقف ميحصل لا مثيل ولا نضير

وينهم اهل الضمير

* * *

التفت لجسوم الصحابه وصاح يا نعم الاصحاب

وحدي ما بين آل اميه والامل عن عيني غاب

لن يشوف الجثث صارت تضطرب فوگ التراب

امغسله ابدم الشهاده امچفنه ابذاري الهجير

وينهم اهل الضمير

* * *

عگب ما أيس حسين وچفه صافح مصرعه

رجع لخيام النبوه وحنه ظلوع الفاجعه

وصاح يا زينب ابذمتچ هاليتامه امودعه

وزينب اتجاوب اخوها ليش بعيونك تدير

وينهم اهل الضمير

* * *

ودع العيله الغريبه وطلع من امخيمه

ظهره مثل الگوس محني وگصد صوب الملحمه

منفرد ما عنده ناصر غير رمحه وصارمه

ولا معين اللي يعينه ولا مغيث ولا مجير

وينهم اهل الضمير

* * *

طلع مثل الليث يمشي وطلعت وياه الهمم

هجم عالجيش ابثباته وهجمت وياه الشيم

وطاح عالتربان لاچن طاح من غالب علم

جالت الخيل اعله صدره وجسمه من دمه عفير

وينهم اهل الضمير

* * *

اشلون هاي الامه ترضه حسين مرمي اعله الرمال

وابن مرجانه عليها يحكم ابجور وضلال

ارد اناشد هالضماير باچر اشتلگه الاجيال

تلگه جسم حسين دامي وابن مرجانه امير؟

وينهم اهل الضمير

* * *

بعلبك / ١٩٨٢ م

إلى رهين السجون

يالكاظم يمسموم اريد اشكيلك هموم

من يوم الغبت عنك لهاليوم اريد اشكيلك هموم

* * *

يالكاظم انادي ابدمع مسفوح ودلالي تفطّر

اصبر والصبر علّة المجروح ما ظن گلبي يگدر

بس الجسم عندي ويمك الروح يا موسى بن جعفر

بالغربه واناديك وابهمك أواسيك

يالكاظم ومثلك گلبي مالوم اريد اشكيلك هموم

* * *

اعتب والعتب من جور الايام وسهام المحبه

وجرح البالگلب ما اظن يلتام من لوعة الغربه

شيصبر الغريب اليحمل آلام وتدري الغربه صعبه

دلالي مينساك گضيت العمر وياك

ما ادري يصير الغرب محتوم اريد اشكيلك هموم

* * *

بدموع الحنان ارسمت آمال وخابت هالاماني

خان الدهر بيّه والهجر طال وابسهمه رماني

هاي المحنه ما چانت على البال ويغدرني زماني

فارگتك يمحبوب وعنك رحت مغصوب

وروحي يم ضريحك ظلت تحوم اريد اشكيلك هموم

* * *

اشكيلك يبن كشّاف الكروب زاد الگلب همّه

اكشف همي يالحبك بالگلوب يا منمسح رسمه

أصدّگ للضريح ارجع يمحبوب ولگبرك اشمه

خل تعتب هالاحباب واسمع صوت العتاب

لتلوم المحب لو عتب لتلوم اريد اشكيلك هموم

* * *

گضيت الحياة ابسجن هارون وابأفعاله سمّك

واشچم شاب مثلك عدنه مسجون نشكي الحاله يمّك

مثلك رادوا ابدمهم يضحون وهمهم مثل همّك

واتنفذت هالاحكام جور وظلم واعدام

ولو دام الكفر هالظلم ميدوم اريد اشكيلك هموم

* * *

صوت الفاجعه من الگلب مرفوع واتصوّب گلبنه

وابدار الغرب محنيه الظلوع من لوعة غربنه

نعتب والجفن فايض بالدموع من يسمع عتبنه

يالكاظم واشد حال عدنه اتيتمت اطفال

مثال ايتامكم غدرتهم الگوم اريد اشكيلك هموم

* * *

چني ابكربله والمدمع يسيل وانظر لليتامه

من هجمت عليها غارة الخيل واتصيح ابملامه

يبدور السعاده خيّم الليل وين اهل الكرامه

وزينب ويه الايتام طلعت تشكي الالام

وصاحت صوت يم جثّة المظلوم اريد اشكيلك هموم

* * *

طهران / ١٩٨٦ م

تريب المحيّا تضنّ السماء

بأنَّ على الأرضِ كيوانَها

(موشح)

العليّه هلّت بالحزن مرجانها تضن طاح اعله الثره كيوانها

* * *

خطت ما صابت الراي ام العله ضنت الكيوان طاح ابكربله

ما درت طايح شبل سيد المله وبي شفت مروان كل اضغانها

* * *

لبست الدنيه اله ثياب السواد وبيه فرحت آل مروان وزياد

ابهدر دمه اغضبت رب العباد وارضت ابهذا الفعل شيطانها

* * *

للرذيله وللطمع صفت صفوف واشهرت سمر القنه بيض السيوف

الطاغي انهضها وتعنت للطفوف سارت ابذل واركبت طغيانها

* * *

اتعنت لسفك الدمه وهتك العرض چتل أبو السجاد چن عدهم فرض

غطّت ابجيمانها افجوج الارض وبالعواسل شيدت حيطانها

* * *

صاحوا بصوت الذي ايشيب الجنين يا حسين اختار وحده من الثنين

لو تبايعنه وتمد النه اليمين لو تسلّم نفسك لميدانها

* * *

اوصه نفسه خامس اصحاب العبه لا ترههبچ بالحرب بيض الضبه

احتزمي بالعز والمچارم والابه وانتي لنفوس البشر ميزانها

* * *

جاوبت راعيها بالعز والامان ناجحه نفسك ابهذا الامتحان

ولون ما تلگه سوى ثياب الهوان تنزع ابچف الحتف جثمانها

* * *

ويه نفسه اتحاور وصار القرار ايضحي بالغالي ولا يحمل العار

الموت بالعز للاكرام اصبح شعار فخر بالدارين يرفع شانها

* * *

جرّد الصارم شبل سر هل اته اسفر هلاله وتوسط حومته

روّع الجيش ابثباته وهمته والمنايا ابچفه زم اعنانها

* * *

وجهه يسطع والمعاره مظلمه وبالمهند شعل نار الملحمه

شب صليل السيف لعنان السمه وجمره لاح الطاير باعنانها

* * *

الارض ترجف غدت والكون انذهل ضنوا الزلزال حل بيها ونزل

اسد باسل فرع من ذاك الفحل يسلب الارواح من ابدانها

* * *

اتغيرت الوانها وجوه الغدر ضنت ابكربلا ميعاد الحشر

ابوجهه تزداد الطلاقه ويبتشر لمن ايغير الخوف الوانها

* * *

بالثبات وبالعزم والمرجله جيش سبعين الف فارس گابله

شهم وفّه ابهمته حگوگ العله وشيد الها ابصارمه بنيانها

* * *

حسين للميدان لمن افرغه للاجل وجّه الاسماع وصغه

نزل مترجل ابساحات الوغه والشهاده نشّرت ديگانها

* * *

والمنيه صافحت چفه الخضيب وفرشت الخدين عالخد التريب

والشهاده مسرعه لوصل الحبيب چالفتاة الواصلت خلصانها

* * *

والرماح السمر ركعت عالجسد وسيف شمر الخنه اعله المنحر سجد

للحوافر جسمه صار الهن مهد ونفسه فرشت عالترب ديوانها

* * *

طاح من بالحشر للمذنب شفيع وجثته اتعفرت من فيض النجيع

يا هو شايف جسد عالغبره صريع ميّت ويرهب گلب شجعانها

* * *

فوگ جسمه امشجر سهام الحتوف وصار مرتع للرماح وللسيوف

يا غريب اشهالغريبه بالطفوف خدك اموسد على كثبانها

* * *

ريت حيدر يبو اليمه ايشاهدك الجاهليه اعله الرمال اتوسدك

الگوم عدهم ثار ويه والدك كسر ابوقعة بدر اوثانها

* * *

اشلون چف الدهر من جسمك نهش اشلون خدك على التربان انفرش

اشلون چبدك ذاب من جمر العطش وصكّت عليك المنيه اسنانها

* * *

اشلون يغمض من بني هاشم جفن وجسم سيدها يظل ابلا دفن

اشلون ربات الخدر فوگ الهجن تطلع ابحيرة بني سفيانها

* * *

اشلون تصبر بني غالب هالفحول وفوگ صدرك عشر خياله تجول

ليش غالب ما ترجع هالخيول وتخلي عنتها وتگطع ارسانها

* * *

آه والجرح اللذي ما يندمل اطلعن ربات الخدر فوگ الهزل

عگب اهلها العده تحدي بالابل وين عنها هاشم وعدنانها

* * *

طهران / ١٩٨٦ م

لماذا الرجوع (موشح)

اشعدها زينب عودت لحسينها باليسر وفّت البينه وبينها

* * *

اشعدها زينب ويه الحسين شتريد ما كفاها مصابها وشوفه يزيد

نست هظم اليسر لو وحشة البيد لو برض كربله اشنظرت عينها

* * *

اشعدها زينب ردت لكربله ردود ما درت بخوتها متوسده اللحود

الراح منها راح لتضنه يعود وعالمصايب بس صبرها ايعينها

* * *

اشعدها زينب عودت لرض الطفوف ما درت لو وصلت الطف شتشوف

انچان ما تگطع املها وما تعوف خل تگضي اعله اگبور سنينها

* * *

اشعدها زينب عتب لو رايده تنوح واليسر ما خله الها بعد روح

خل تلم الحرم والطيبه تروح ويم گبر امها تكثر ونينها

* * *

اشعدها زينب تعدي ما بين الگبور وابمچان خيامها ظلت تدور

بالشكايه وبالمعاتب لا تجور حسين شاهد حرگة صواوينها

* * *

اشعدها زينب امل بعد اشتنتظر شاهدت مصرع اخوتها واليسر

والتحشم بيه منها يعتذر تدري لا رايته ولا چفينها

* * *

اشعدها زينت حايمه اعله المشرعه وغدت تتمثل اخوها ومصرعه

ما درت بچفوف اخوها امگطعه وجثته بفيض الدمه مغسلينها

* * *

اشعدها زينب تذكر ايام الدلال ما درت بخوتها متوسده الرمال

خل توزم روحها ابجمع العيال حيث بمر العايله اموصينها

* * *

اشعدها زينب والعليها ادته الراده منها حسين عگبه سوته

حفظت العايله ونصرت ثورته وسبت بالشام الذي سابينها

* * *

اشعدها زينب واليريده حسين صار وضع اميه منها صابه الانهيار

خل ترد عيال اخوها للديار العتب وين وروح زينب وينها

* * *

كربلاء المقدسة / ١٩٧٦ م

استنهاض المنتظر (عجل الله فرجه) (موشح)

الدنيه تاهت والطمع عاميها يظهر ابن الحسن وايصفيها

* * *

يا گلب اترك دياجير الظلام ولا تضن الدنيه تمشي اعله المرام

بيها متساوي الحلال ويه الحرام وصار سافلها مثل عاليها

* * *

السافل اويه العالي صارن فد قياس والخيانه اتغرست من الاساس

هيّه هيّه الناس مختلفت الناس شفنه اولها وبعد تاليها

* * *

واللي چانت راضيه ابعاد وثمود ترضه بحكام النصاري واليهود

ابن ربعي وحرمله ردوا ردود ونفس ذيچ سيوفها ابايديها

* * *

بعده عرش يزيد ثابت عالحكم وهالظلم مفترع من ذاك الظلم

چم عزيز وعلى الذله منرغم هاي دنيه وبعد تدري شبيها

* * *

جزع صبري وما جزعت من الصبر بنتظار الغايب افنيت العمر

الصبر عالموعد احر من الجمر الجمره لو فاض الدمع يطفيها

* * *

واحنه جمرتنه متطفه بالنحيب اشما نكثر الدمع يزداد اللهيب

لا ولا علتنه تحتاج لطبيب بس ظهور الغايب ايداويها

* * *

گبل ميصيح اللسان الگلب صاح يا فرع عدنان يا سر الفلاح

تظن ويه جسومنه ظلت ارواح هالارواح اببرجك امغيبيها

* * *

بالمساجد تنظر الوادم حشود مسلمين الشكل بالباطن يهود

راح ماضينه وبعد ما ظن يعود والرعيه تيّهت راعيها

* * *

اشلون چان النه مجد يبن الحسن لچن يا وسفه تبدّل بالفتن

على الأمه انضربت استار المحن حيل ويه اللي جفت مهديها

* * *

آه لو بالناس يالغايب تريد تنادي يا ثارات محزود الوريد

تلگه بيها شچم شمر وشچم يزيد وچم عقيلة هاشم املوعيها

* * *

لو صدگ هالناس تتنه طلعتك چان سارت على منهج سيرتك

نفس هاي الگوم يسروا عمتك والسكينه ويه الظعن سابيها

* * *

طهران / ١٩٨٥ م

النعي، الأبوذية، الموال

النعي

انتقال الرسول (صلى الله عليه وآله) إلى الرفيق الأعلى

غرب هلال النبي المختار بغيابه صار الذي ما صار

مظلمه الدنيه عگب الانوار واتلاهبت وسط الگلب نار

امته تاهت منها الافكار وظلت تحن بالحان واطوار

ابچف المصيبه ادفنه الكرار وصب اعله جسمه دموع الانظار

ظل أبو الحمله عگبه محتار ينعه وينوح ودمعه فجّار

مغوار وينوح اعله مغوار حيدر فگد درّة الاطهار

جر النوايح ليل ونهار ما طالت وگصرت الاعمار

هچي تغيب بدور الاسحار

ام الحسن طلعت كظيمه ودموعها اعله الخدر سجيمه

تناديي يبويه اشهالهظيمه خليتني عگبك يتيمه

والنوح بغيابك لجيمه يالچنت فوگ الراس خيمه

فراگك فلا ينحمل ضيمه

* * *

في رثاء الأمير (عليه السلام)

جبريل بعنان السمه صاح ابمحرابه حماي الحمه طاح

ابطيحتك طاح العز والاصلاح واجب نجيم عليه النياح

ولثاره نتفاده بالارواح ابطبرة علي راح الفخر راح

وابغيبته روح القدس صاح راح اليلاعب بيض الصفاح

وگلبي عليه امخزن اجراح

* * *

في رثاء الأمير عن لسان زينب (عليها السلام)

جيتك يبويه وخلص صبري وعبراتي متكسره بصدري

يا ريت گبلك خلص عمري ولا شوف دم طبرتك يجري

من هالمصايب تاه فكري انته الچنت بالشدد ذخري

يلهب ابوسط الگلب جمري ونار الحزن بحشاي تسري

جيت ارد اقدم الك عذري تدري يبويه بحالي تدري

فوضت للمعبود امري

بويه على هيجت ناري وابفرگتك هدمت داري

جيتك ودمع العين جاري گبل الجدم دلالي ساري

* * *

في رثاء الحسن (عليه السلام)

هالفاجعه من جور الايام نعش الحسن ينضرب بسهام

هالجرح گلي اشلون يلتام وابعيني انظر هاي الايتام

عبد الله ومحمد وجسام تشكي وتبث هموم وآلام

وتصيح يا دوحه الاحكام طحنه يبويه بين ظلام

وابغيبتك خابت الاحلام ترضه عگب عيناك ننظام

نشرت عمامي سود الاعلام كل يوم صار عليهم ابعام

ابهاي المصيبه انصاب الاسلام دمع البيابي عليك همّام

وطير الحزن عالنعش حوّام

* * *

في رثاء العباس (عليه السلام)

يا موح گلب اختك يريعه سدّة اسكندر يا منيعه

يا ليث يا عين الطليعه لمن طحت فوگ الشريعه

طاحت بيوت اهلي الرفيعه ومن شفت چفينك گطيعه

ابگلبي اسعرت نار الفجيعه وضعنه يخويه اشلون ضيعه

شيمتك ترضه اعله الوسيعه بالغرب تنعاف الوديعه

* * *

في خروج ام كلثوم من المخيم مخاطبة اخيها العباس (عليه السلام)

عباس يا زود البواذخ بحر الابه بيمناك ناضخ

يا جبل قاف الچنت شامخ ويا طود بالميدان راسخ

يا تاج وبروس المشايخ سيفك لراس الكون راضخ

اسمرك نفخه صور نافخ بارواح اميه من البرازخ

بيرغك فوگ الگاع صارخ لراسك اشلون العمد فاضخ

ما هزتك هاي الصوارخ

* * *

عن لسان ليلى إلى ولدها علي الاكبر

يوليدي يالاكبر يفاعي يا صل ينازل من افاعلي

حومتك شات وانته راعي لمن طحت بيّن ضياعي

طيور الحزن حطت بگاعي برباك دمع امك يداعي

ما هزتك هاي النواعي

* * *

لسان رباب مخاطبة ولدها الرضيع (عليه السلام)

يبني يعبد الله يمحروم يا من ابسم البين مفطوم

عگبك تراني امفارجه النوم امساهره الليل واحسب نجوم

اشعندك ذنب يبني ويه هالگوم لنحرك تگطعه ابسهم مسموم

ابدال الشرب ترويك بدموم وصوبوا گلب امك المالوم

من يوم عني غبت لليوم دمع البيابي عليك مسجوم

جمر الحزن بالچبد مضروم وعليه طير الفاجعه يحوم

حگ ارضه واصبر على المقسوم

* * *

عن لسان رمله تخاطب ولدها القاسم

هاذ انته يا جاسم يصنديد صل انزلت من ظهر عربيد

ادريك عند الشدد رعديد هيّج ابرمحك هظله الويد

هزت چفوفك تكسر الميد يوم الحرب عندك شبه عيد

وابعينك سيوف الزلم غيد ايلاعبها عزمك مثل ميريد

اشما زادت العدوان ميفيد من حيث زودك اكثر يزيد

يا نسر يمحوّم على الصيد شرّد صگور الگوم تشريد

هيج اعله ام الحرب لتهيد ركز السيف ابراحة الايد

لتخلي امك تنحر البيد

* * *

خطاب فاطمة بنت الحسين (عليهما السلام) لبني هاشم

آنه العليله وفكري محتار عافوني اهلي بهاي الديار

خلوني وحدي والظعن سار وطير المنام من الجفن طار

والجسم من المرض منهار تنطفي وتسعر بالگلب نار

ما وصلت من الاهل اخبار عالدرب ظليت اشبح انظار

ما ادري بهلي اشصار ما صار

* * *

هالطفله ما تدري باهلها بيا باديه نزلت ابلها

ما وصلت الاخبار الها وفراگهم زيّد عللها

بغيابهم فگدت أملها ودمعتها ويه الدم تهلها

بهالنايبه اتگرب اجلها فوگ المرض لفراگ سلها

بالبيده طلعت من وجلها ابحر الشمس مفگود ظلها

لفاطمه خلها تنوح خلها والاهل راحت عنها كلها

وكل خبر منهم ما وصلها

* * *

ابوذيات

في مدح أمير المؤمنين علي بن أبي طالب (عليه السلام)

نفوس اهل الضغاين من فتاها

وفتوات الملاحم من فتاها

أنشدك عن الامه من فتاها

ويا هو الرفع رايتها العليه

* * *

في مصاب الطاهرة فاطمة الزهراء (عليها السلام)

مضرار الدهر للزهره ولاهي

وگلبها حگه لو يجزع ولاهي

لا هي الحظت بالهادي ولا هي

تخلصت من افعال الجاهليه

* * *

في مصاب الإمام الحسن بن علي (عليه السلام)

فرح ما شفت طول العمر بسهام

ومسيل الدمع ظل يسيل بسهام

الحسن نعشه وسافه انرمه بسهام

ومنعوا دفنه يم سيد البريه

* * *

في مصاب الامام الحسين بن علي (عليه السلام)

العله عاف العله شانه ورحلك

وزمانك ما صفه ساعه ورحلك

تگطَّع جسمك الطاهر ورحلك

توزع شمله ما بين آل اميه

* * *

ندبة للامام الحجة بن الحسن (عجل الله فرجه)

يبو صالح نجومك علن وفلان

احل وياك حبل العتب وفلان

دينك طاح بين فلان وفلان

انوله لاچن ولوه اشلون وليه

* * *

دليلي ابسهم يبن الحسن مرمي

وعليك الدمع دم ايسيل مرمي

دينك بين هذا وذاك مرمي

اجنازه ابلا أهل ظلت رميه

* * *

خطاب العقيله زينب لاخيها العباس (عليه السلام)

الگلب بالعزم صبرته ومنته

وفرشته اعله الترب يمك ومنته

منته الكافل ظعوني ومنته

الجبتني وياك ليش اگطعت بيه

* * *

اهمومي هموم فوگ الگلب منتل

وسبّاح الدليل إعليك منتل

گوم ارجعنه يا عباس منتل

جبتنه وياك لرض الغاضريه

* * *

الدهر شتت شملنه بالظعينه

ودليلي سيوف اميه بالظعينه

وسافه الشمر يحدي بالضعينه

وابو فاضل على الغبره رميه

* * *

يعباس استمع عتب ولا ماي

غريبه وزادت ابفگدك ولا ماي

مهجنه بالعطش تلهب ولا ماي

يخمد جمر لوعتنه السريه

* * *

عن لسان حال الصابره ام البنين (عليها السلام)

الليالي ما اصدلهن ولا عون

دعتني لا ضمد عندي ولا عون

لا عباس لا جعفر ولا عون

ولا عثمان كلها اگطعت بيه

* * *

خطاب زينب لأخيها الحسين (عليه السلام)

يبو السجاد گلي شصار وجره

أهيّس نار حدر الظلع وجره

يگلها الطفل دمه سال وجره

رضيع وفطمته سهام المنيه

* * *

عن لسان حال ام كلثوم في غربتها

رهيف العسر لظلوعي حدبها

وشبيه الگوس والحاجب حدبها

الظعاين عگب حاديها حدبها

الشمر وايشومر ابسوط الرزيه

* * *

لسان حال الامام زين العابدين (عليه السلام)

اون ونحب وانوحن وحن ويهاه

على الراح وچبدتي ابنار ويهاه

الي والد شبيه البدر ويهاه

البدر عجبه ايتوسد عالوطيه

* * *

في شجاعة مسلم بن عقيل (عليه السلام)

بنه بيت العزم سيفه وحيفاه

عجيد ويدوي بالكوفه وحيفاه

اخذ من الخصم حگه وحيفاه

وغفت عينه على سروج المنيه

* * *

خطاب سكينه بنت الحسين (عليه السلام) مع عمها العباس (عليه السلام)

لساني يلهج باسمك ورديت

وعساني مثلك اتوذر ورديت

اجيتك للنهر انحب ورديت

خفت لن النهر يشتمت بيه

* * *

خطاب الرباب لولدها عبد الله الرضيع

ضميري ابكعبة المحنه يطفلي

ومهجتي من تشب دمعي يطفلي

آنه امك واهز مهدك يطفلي

نسيت امصوب ابسهم المنيه

* * *

خطاب رمله لولدها القاسم بن الحسن (عليه السلام)

يجاسم يبني حيلي عليك دمعاي

ودليلي بالنحب والنوح دمعاي

اشلون اصبر وانشّف سيل دمعاي

وشفت دمك يسيل اعله الوطيه

* * *

خطاب ليلى لولدها علي الأكبر (عليه السلام)

راسي عليك يالاكبر يشبلاي

وجمر فگدك ابدلالي يشبلاي

لوين أبعدت عن امك يشبلاي

وعفتني بالغرب واگطعت بيه

* * *

خطاب الطفله العليله لدار الاهل والاحبه بعد الفراق

الفلك ما يعتدل بالعكس يا دار

ولا ينشف دمع عيناي يا دار

يدار الاهل اهلچ وين يا دار

گولي ولا تخليها خفيه

* * *

جواب الدار لها

يهالتنشد عن اهلي وين ماوين

تعنّوا كربله والظعن ماوين

اشتظن گلبي عليهم ابد ماوين

يون وينوح كل صبح ومسيه

* * *

خطاب الطفله حميده مع والدها مسلم بن عقيل (عليه السلام)

زماني عگب عينك سلمتني

او راحات النوايب سلمتني

رحت عدمن يبويه سلمتني

يتيمه ويا شهم وصيت بيه

* * *

الموال

يحسين طيب الوسن عن ام عيني بعد

وشاخص گبالي الحزن ما فرح گلبي بعد

شنتظر من الدهر شترجه منه بعد

فارگك عني وگطع شريان خلتنه

تدري ليالي الجفه بيا وضع خلتنه

كلما اتانيك اگولن بعد خلتنه

ما حسبت روحتك ما بيها جيه بعد

* * *

يا باني الدين يا سر الحجه والنها

وابعلمك وصارمك راح الشرك وانها

وظلت قريش ابحقد منك تجر ونّها

والراد بيك الغدر شاف الوكت لافته

تكفيك هالمكرمه ولكل نظر لافته

جبريل بيها هتف لا صارم ولافته

بس ذو الفقار وعلي واهل الشرك ونّها

* * *

لو خانت ايام دهرك بالصبر جاري

من حيث حكم الجلاله اعله البشر جاري

فرگاك كثر ونيني وجزّعت جاري

عاف النزل وابتعد من يمنه راح وشال

گبلك تراني البعد وهّن عضاي وشال

لو چنت تقره ابصحف يعگوب دمعه وشال

(اقره ابصحف مدمعي الطول العمر جاري)

* * *

گلوب التودك هوت من بحر شوگك ترد

شيعتك وانته اتعرف يا أمل منك ترد

من كثر ما تحملت ضنيت بيها ترد

وچبودهم سيدي هالغرب ما ردها

خانت الدنيه وبعد يالحسن ما ردها

آنه عبدكم وابد للنخوه ما ردها

(حاشاك وانته امام ولليحشمك ترد)

* * *

في حق القاسم بن الإمام موسى بن جعفر (عليه السلام)

يا شبل موسى النوايب جارت وعمتك

وضنت ليالي الهظم بسهامها عمتك

ما تدري انته البحر عيب المحن عمتك

يا كعبة اهل الصبر گلب المحب طفله

ملتهب بمصيبتك بس الدمع طفله

وانچان انته ابوفاتك يتمت طفله

(چم طفله متيتمه من يسروا عمتك)

* * *

في حق الإمام الرضا (عليه السلام)

ابروضة جنانك دليلي يالرضا مامون

خادمك محتار تدري لغيركم مامون

واتبجحت من گلت خادم الك مامون

من حيث انته الامان الهالبريه ورضا

گلبي ابودادك تمنه هالخدامه ورضا

مثلك ابهذا العصر چم رضا انسم ورضا

(ومأمون هذا العصر مختلف عن مامون)

* * *

في حق الزهراء (عليها السلام)

يا دهر دونك كتابي وبالحزن فضه

دلالي من فعلتك بحر الصبر فضه

يا يوم اسمع ضميرك للحزن فضه

ما ضگت منك ابد طعم الشهد بسمار

والطاغي عالدار وجر مهجتي بسمار

من هجمته فاطمه صاحت نبت بسمار

(ومن وگع منها الحمل صاحت علي فضه)

* * *

الفهرس

مقدمة ٢

في قصائد الگعدة ٤

علي بن أبي طالب (عليه السلام) ٥

ثورة الحسين (عليه السلام) ٩

وداع القاسم بن الحسن (عليه السلام) ١٢

نكبة السبي ١٥

لسان حال الشاعر ١٨

الحقايق ٢١

فخر الشباب علي الأكبر (عليه السلام) ٢٤

ليلة الحادي عشر ٢٧

سيد الساجدين (عليه السلام) ٣٠

فاطمة العليلة ٣٣

حبيب بن مظاهر ٣٥

الوداع مع الحسين (عليه السلام) ٣٨

استنهاض الإمام علي (عليه السلام) ٤١

ام البنين (عليها السلام) ٤٤

من قصائد الغفران (الهجري) ٤٨

في قصائد اللطم ٥١

نافع بن هلال (بحر الطويل) ٥٢

صبر الحوراء زينب (عليها السلام) (بحر الطويل) ٥٥

الزهراء (عليها السلام) بعد الرسول (صلى الله عليه وآله) ٥٧

الانصار طلاب الغانمة ٥٩

عبد الله الرضيع ٦٢

الله، أي دمِ في كربلا سفكا ٦٥

بطلة كربلاء ٦٧

مسلم في الكوفة (موشح) ٧٠

مسير السبايا (موشح) ٧٢

إبراهيم بن مالك الأشتر (موشح) ٧٤

دفن الحسين (عليه السلام) (البحر الطويل) ٧٧

زيد الشهيد (بحر الطويل) ٧٩

جابر الأنصاري ٨٣

العباس بن علي بن أبي طالب (عليهما السلام) ٨٦

في وفاة الرسول الأكرم (صلى الله عليه وآله) ٨٩

مع جنود الحسين (عليه السلام) (عگيلي) ٩٢

التوحيد ٩٤

هذا حسينك في العراء محزوز الوريد من القفا (موشح) ٩٦

يا آل نزار (موشح) ٩٩

الإمام الكاظم (عليه السلام) (موشح) ١٠١

متى تظهر (موشح) ١٠٣

حميده بنت مسلم (البحر الطويل) ١٠٦

صريع المحراب ١١٠

الهاشميون أبطال الوغى ١١٣

وداعاً يا حسين ١١٦

رمز الإباء ١١٩

الإنسان والمسؤوليّة ١٢٢

إلى رهين السجون ١٢٥

تريب المحيّا تضنّ السماء ١٢٧

لماذا الرجوع (موشح) ١٣٠

استنهاض المنتظر (عجل الله فرجه) (موشح) ١٣٢

النعي، الأبوذية، الموال ١٣٤

النعي ١٣٥

ابوذيات ١٣٩

الموال ١٤٤