الهادي على فراش المرض ويدير بالعين

ويمّه الوديعه فاطمه والحسن وحسين

وحيدر تهل مدامعه ويصعّد انفاس

واحنى عليه يخاطبه عمّه العبّاس

ويقول وص بنا يبو ابراهيم هالنّاس

قلّه يعمّي انتو عقب عيني ضعيفين

واحنت عليه ام الحسن والدّمع همّال

تنادي يبويه راح عزنا و الدّهر مال

تدوّر علينا بعدك الفرصه هالانذال

تثور بطلب ثارات بدر وأحد وحنين

قلها وفتح عينه و ون ونّه خفيّه

الله عوينج يالوديعه اعلَى الرزيّه

وصّيت يازهرا ولا تفيد الوصيّه

ملزوم بين الباب و الحايط تطيحين

و وصّيت حيدر لايسل سيفه ولا يثور

لازم يقودونه بحبل هالقوم مأسور

وانتي تلحقيني بْعَجل و الضّلع مكسور

من بعد عيني يالوديعه ما تعيشين

السّبطين خلّيهم عن شمالي و يميني

ريحان قلبي و أرد اشمهم حان حيني

قصدي اودّعهم واريد يودّعوني

الله يساعدهم على جور المعادين

يقاسي من الدّنيا الحسن كثرة محنها

يتمرمر و بيه العدا تشفي ضغنها

سموم الذي جبده تصير شطور منها

وبالطّشت منهم دسايس يوم صفّين

و من الدّفن عندي يمنعونه الظلّام

ويرمون عندي جنازته العدوان بسهام

ويوم الشّهيد حسين من أعظم الايّام

فوق التّرب عريان يبقى بغير تجفين

يبقى ثلثتيّام من حوله رجاله

و تدوس صدره الخيل و تبدِّد اوصاله

و تتذبّح اطفاله و تتسلّب عياله

وتجدّد الشّيعه احزانه طول السنين

صفوة الباري ويل قلبي بروحه يجود

وام الحسن تنحب ومنها القلب ممرود

تتصوّر فراقه و تهل الدّمع منثور

تدري عقب عينه تقاسي الظّلم والجور

وتدري بوصيّه المرتضى بالصّبر مأمور

وتغلي عليه قلوب كثره وشاحنه حقود

تقلّه يبويه الونتك ذايب افّادي

ياصفوة الباري علَي موحش الوادي

يا ياب من يحمل على اجتافه اولادي

مظلم عليّه البيت ياحجّة المعبود

فقدك يبويه يسبّب الويلات كلها

وبدر وأحد خوفي يبويه من أهلها

دموم الكفر باجر علي يتحزّم الها

كلها عقب عينج علينا ترجع ردود

و انتَ اخبرتني بالذي بعدك ألاجيه

ودومك يَبويه بالصّبر حيدر توصّيه

جور العدا وفقدان شخصك من يصاليه

يدَورون بينا الفرص هاللي حولك قعود

لكن يعين الله على مقاسى المصايب

جنّي أعاينها تخلّي الطّفل شايب

مابين متولّي معادي وبين غاصب

ثقلك يبو ابراهيم راح يصير فرهود

بس ماسمع خَف الونين وفتّح العين

و قلها يَفاطم عقب عيني ماتعيشين

أوّل أهل بيتي يَزهرا بي تلحقين

بالضّيم والذّل تنقضي أيامج السّود

وصّيت حيدر بالصّبر وانتي بَوصّيج

منّج النّحله تنّهب وتثور أعاديج

بعدي وتنمنعين حتّى من بواجيج

ولازم تشوفين الوصي بالحبل مقيود

من عقب عيني يابتوله مصابج مصاب

تبقين مجفيّه بلا ناصر و لا ذاب

يتسقّط جنينج يبنتي بصاير الباب

تقضين ومتونج من سياط العدا سود

تقاسين يم حسين هزّاتٍ عنيفه

أيّام بعدي تصير ميشومه و مخيفه

وغمّض عيونه وفاضت الرّوح الشّريفه

و خرّ ت بجنبه ويل قلبي بروحها تجود

شمس النبوّه مكوّره وبدر الهدى غاب

ماصار في العالم مثل فقد النّبي مصاب

أدّى الرّساله وكابد الأمّه وجهَلها

و بْدَعوته وضّح مناهجها وسبلها

جانت عن الحق عادله و سيفه عدلها

عَزها وهبَّط راس كل جاحد ومرتاب

كمَّل الدّين وشيَّده خير البريّه

ومن جهل قومه شلون قاساها أذيّه

ويوم انقضى عمره ودنت منّه المنيّه

أوصى احفظوني بعترتي بعدي والكتاب

ياويح قلبي من دنى المحتوم منّه

تهلّل جبينه بالعرق واخفت الونّه

السّبطين يمّه وكل ضلع منهم تحنّى

وتنحب البضعه والقلب من شوفته ذاب

تقلّه يبو ابراهيم فقدك فتّت احشاي

ياهو يسلّيهم عقب فقدك يتاماي

زادي وشربي ياحماي بجاي ونعاي

بياعين اشوفنّه عقب شخصك المحراب

فتَّح عيونه و قرَّب السّبطين يمّه

شمّ الحسن وحسين عند الصّدر ضمّه

و صّبت مدامعهم وحيدر هاج غمّه

وسمعوا بذاك الحال طارق يطرق الباب

قلّه يبوالحسنين اجا مرسول مولاك

خلّه يجي يمّي يحيدر والله وياك

سلَّم عليه واستَلَم روحه وهزّ الافلاك

وشبحت عليه ام الحسن والدّمع سجّاب

تنادي يَربّ الشّرع قلّي شلون حالي

لو عاينت من شخصك المحراب خالي

وياهو على الجتفين يحملهم اطفالي

بعدك حياتي تكدّرت والعيش ماطاب

غمّض عيونه وشيل لوساده يبوحسين

بطّل ونينه المصطفى خير النّبيّين

غرّبت عينه يَبن عمّي دسبل ايديه

شوفه يدير العين لينا و مدّ رجليه

وجبريل ينعى والفلك متعطّل عليه

والمصطفى ينادي يفاطم لا تنوحين

بطلي البواجي انشعب قلبي ياحزينه

لازم يبنتي اليوم عزّج تفقدينه

وثوب المصايب عقب عيني تلبسينه

و منّج يكسرون العدى بالباب ضلعين

خرّت على بوها تصيح بدمع سجَّاب

انجان ضلعي يكسرونه بصاير الباب

وصّ الوصي الكرّار بيَّه ووص لصحاب

لحّد عليه يجتري ياقرّة العين

هذا الحسن مكسور قلبه من يجبره

وهذا العزيز حسين ياهو يشمّ نحره

وياهو عقب عينك يحطّه فوق صدره

ذلَّت يبو ابراهيم من بعدك السّبطين

قلها يَفاطم لو اجرَعِت كاس المنيّه

جيبج يزهرا لا تشقّينه عليّه

وصد للحسن ومدامعه بْخدّه جريَّه

وشاف الحزن نحّل عظامه وقرّح العين

قلّه يعقلي ذوّبت قلبي من بجاك

ونادى يبو الحسنين بالله سكّت ابناك

ودّعتك الله ياعلي و الملتقى هناك

وشبكت الزّهرا على رسول الله باليدين

ولن واحد عْلَى الباب يتخفَّى بكلامه

اينادي يَهَل بيت النبّوة و الإمامه

بالله ادخلوني عْلَى المظلّل بالغمامه

أطلب الرّخصه من النّبي نور المسلمين

صاح النّبي قومي يَزَهرا وافتحي الباب

هذا الذي ميهاب من حاجب وبوّاب

يم الحسن هذا المفرِّق بين الاحباب

وبس الله الله عقب عيني بحسن وحسين

أوحش الدّنيا و شال سلطان النبيّين

غسّل المختار بوسط داره يبوحسين

شمّر ردانه المرتضى ودمعه يتجارى

و صفوة الباري مدّده و غسّله بداره

وكلما يحرّك له عضو تسطع انواره

وام الحسن بالباب تهمل دمعة العين

تقلّه هضيمه البيت يخلا من جماله

تمنّيت جان الموت ياخذني بداله

بعيد البلا عْلَى المغتسل كنز الرّساله

بالله دشقّوا بقبر ابو ابراهيم لحدين

شقّوا لحد ليّه مع الوالي ادفنوني

من شوفته امّدد ترا عميت عيوني

وشلّي بحياتي و عقب عينه يهضموني

مثلك يبو ابراهيم راحم ينوجد وين

واعدتني مَتطول من بعدك حياتي

ياليت حضرتني ابهالسّاعه وفاتي

ولا عيش بعدك بين متعنّد و عاتي

دهري سطى عْليه وخلّى القلب شطرين

لا تحجب انواره يهاللّي اتفصل اجفان

بهداي بالله نزّله بقبره يدفّان

وخلّوا اطفالي تودّعه صفوة الرّحمن

قلب الحسن ذايب وذابت مهجة حسين

فارقت عزّي و القلب فارق سروره

الله يحيدر بالجفن ضمّيت نوره

قلها يَزهرا بالقبر تالي نزوره

آنا اجذب الونّه عليه وانتي تونّين

أيست منّه واصفقت راح الأيادي

وصاحت بْلَهفه وداعة الباري يَهادي

قبل الدّفن ودعوا حماكم ياولادي

راح النّبي وافجْعَة الأملاك والدّين

اسم الله على طولك ياجمال الهاشميّه

عْلَى المغتسل ممدود ياخير البريَّه

يامرتضى اكشف لي عن الوالي وجماله

و شيل الجفن عن غرّته تودعه اشباله

هذا الحسن مشعوب قلبه انظر الحاله

وهذا الشّهيد حسين عبراته جريّه

ياللي تغسِّل والدي وين العمامه

فوق المنابر ماحلا حلو الجهامه

قبلٍ تشيله خلّه توَدعه اليتامى

منّه بعد ما نرتجي للبيت جيَّه

بهداي قلّب جسم ابو ابراهيم بهداي

وانت يبن عبّاس بالهون اسجب الماي

طوله على المغسل شعبني وفتّت حشاي

ممرود قلبي وموحشه الدّنيا عليّه

ياللي تحفرون القبر وسعوا مكانه

وبهداي نزلوا جنازته وسفروا اجفانه

ويلا يعزٍ شال عنّا ولا لفانا

هيهات بعده تصير عيشتنا هنيَّه

ياللي تهيلون الثّرى دفنوني ويّاه

مقدر أشوف البيت خالي من محيّاه

قشره تراهي تصير عيشتنا بليّاه

بعد النّبي ماريد هالدّنيا الدنيّه

دفنوا الرّسول وغابت انوار النبوّه

وثار المعادي يريد يتشفّى بعدوّه

نار الحقد و جّوا ونار الجزل بالباب

ومن قبل جان الرّوح من جملة الحجّاب

بيها الوصي و ابناه و الزّهرا و الكتاب

وصاحوا يحيدر قوم لو تنوخذ قوّه

ووقفت البضعه داخل الحجره بلا خمار

تنده اشْجُرمتنا شعلتوا بابنا بنار

ميناسب احجي ويالغرب دنهض يَكرّار

عجّل ترا يهجمون مابيهم مروّه

ماجاوب الكرّار بس تجري ادموعه

وفتحوا الباب ومن ورا الباب الوديعه

و العبد بالباب اتجى و جلّت اجموعه

وحس وعصرها وغدت من خلفه اتِّلوّى

خرّت و خر المحسن و صاحت يَفضّه

بالعجل دركيني ترى مقدر النّهضه

انكسرت ترا ضلوعي وجسمي المرض مضّه

وما بقت لي من ضربة المسمار قوّه

خذيني يَفضّه وحيدر الكرّار شوفيه

خبريه عن حالي وعن ضيم الطحت فيه

صاحت يبنت المصطفى حيدر مشوا بيه

وقلبه على جمر الغضا لجلك تطوّى

والله لو شفتي حال حلّال المشاكل

ليث الحروب برقبته حطّوا حمايل

يمشي بطاعتهم ودمع العين سايل

صاحت دتجّي لي القلب فارق سلوَّه

انجان طلعوا بالوصي قومي اطلعيني

نسيت العصر بالباب وتسقّط جنيني

قوموا نروح القبر جدكم يَبنيني

وارد اخبره بينا الدّهر بعده اشْسَوّى

صبّت على الزّهرا مصايب يامسلمين

بعد الرّسول تزلزل السّبع الأراضين

لو هي على الأيّام تنصب صارن اليال

عمرٍقصير وشوف بيه اشقاست اهوال

فقد النّبي وغصب الوصي فكّر ابهالحال

انصبت سحايبها عليها من الصّوبين

فتحوا سقيفتهم قبل تجهيز ابوها

و بدر وأحد وحنين كلها تذكّروها

غيض وغصص ياغيرة الله جّرعوها

شحجي وشعدّد من هضم ست النّساوين

مابين ماهي في عزاها داخل الدّار

يمها الحسن وحسين تبجي على المختار

وبالدّار جالس منزوي حيدر الكرّار

سيفه معلّق والدّمع يجري من العين

ولن الجمع يهرع بلا عقول وبلا افكار

خالد وشكله مسلّحين وكل غدّار

هاجت ضغاينهم ووجَوا بالجزل والنار

فرّت بْدَهشتها وفرّوا الحسن وحسين

صاحت يحيدر قوم وجّوا النّار بالباب

معلوم عندك من صرت ماخاطب اجناب

مارد عليها جواب بس الدّمع سجّاب

وسيف الصّبر قطّع مهجته مشيّد الدّين

ردّت تخاطبهم و لن الباب جاها

و تستّرت بالباب و الحايط وراها

اهنا يالمحب عدّد مصايبها و بلاها

العصر والمسمار واللطمه على العين

لا تلومها لو قالت انصبّت مصايب

تعالج سقوط الحمل لو هجوم الأجانب

و الضّرب ورّم متنها و القلب ذايب

لو وكزة الطّاغي الذي كسّر الضّلعين

كل الذي جاري وحيدر عينه تشوف

يسمع نواخيها وخذوه بحبل مكتوف

قود البعير و وقّفوه والرّاس مكشوف

ينظر يمين يسار لا ناصر ولا معين

أم الحسن طلعت تدافع عن ابوحسين

ملبّب يقودونه وبس يدير بالعين

عنّه تدافع والعدو ورّم متنها

بيه تلتجي ولا قال كف السّوط عنها

هذي وصايا الانبيا و هذي محنها

لو تنشده ايقلّك عليّه حاكم الدّين

و صّل المنبر و الحبل ملوي بجيده

ذاك الأسد وانعاج هالأمّه تقوده

وهو الذي لو راد بس يحرّك ايده

ويدعي السّماوات العلا تحت الاراضين

رادت تبرهن للخلق بضعة الهادي

ومدّت اليمنىعلى القناع بقلب صادي

والثّانيه على الباب وتزلزل الوادي

والكل يصيح ادخيل ياست النّساوين

بشبلينها ردّت وليث الغاب معها

ورجعت مثل ماترجع اللبوه بسبعها

وإيدٍ على اللطمه وإيد على ضلعها

والمرتضى ينشّف ادموع الحسن وحسين

ومصيبة النّحله وفدك ويّا العوالي

خلّوا الأمّه الكل يصيح المال مالي

وخطبت وقالت نحلتي وبلغة اشبالي

عندي عليها كتاب من خير النيّين

وقفت على راس المجتّف بالوصيّه

معصّبه العين و تون ونّه خفيّه

وابدت عتبها وهيّجت منّه الحميّه

وقلها يبنت المصطفى يحق لج تعتبين

لكن يبنت الطّهر عندج علم بالحال

مأمور انا بالصّبر حتى تحصل رجال

وهذا الجمع يم الحسن عنّا انزوى ومال

أصبر يَزَهرا عْلَى الهضم وانتي تصبرين

قالت يحيدر حسبي الواحد الديّان

حتى البجا منّه يمنعوني العدوان

بين القبور اريد تبني دار الاحزان

أهل البغي قطعوا الأراكه ألتجي وين

لا تلومني لو هاجت احزاني يسلمان

جنّك متدري بالذي فعلت العدوان

منّي خذوا حقّي ولا راعوا الوصيّه

وهجموا علي داري وساتر ماعليّه

و المرتضى قاعد و عبراته جريّه

و ينظر بعينه اببّابنا وجّوا النّيران

لا تلومني ضلعي انكسر بالباب قوّه

ماقصّروا فينا عديمين المروّه

جنّك متدري هالعبد بيّه اشْسَوّى

سقّطني المحسن و خلَّى الجسد نحلان

جسمي انتحل من ضربة المسمار صدري

وانلطمت عيوني وداحي الباب يدري

وكلما جرت نكبه عليّه ازداد صَبري

وكظمت غيظي والقلب فايض بالاحزان

و بس عايَنِت حيدر ملبّب قايدينه

وسمعت شبلي الحسن يندب راح ابونا

غصبٍ عليّه طْلَعت خوفي يذبحونه

و تتيتّم أولادي عقب فارس الفرسان

ضلّيت أدافعهم وظْنتي يرحَموني

و مالوا عليْ بالسّوط ظلّوا يضربوني

والله يَسلمان الضّرب ورَّم متوني

قصدي أبث شكواي للواحد الديّان

قلّها يَزهرا يقلّج الكرّار روحي

ردّي على بوج النّبي بالدّار نوحي

قالت عقب حيدر تراني تروح روحي

خلني أزلزلهم ترى مابيهم احسان

خلني يسلمان اشتكي ذايب افّادي

يطلع علي الكرّار لو زَلْزِل الوادي

والله يَسلمان الرّجس روّع اولادي

هذا جزا المختار من عدهم يَسلمان

ماقصّروا أجر الرّساله اليوم أدّوه

سقطوا جنيني و الوصي بالحبل قادوه

ماقصّروا حتى الضّلع بالباب كسروه

جان القصد حيدر علي شْجرمة النّسوان

والله يَسلمان العبد دمّي برقبته

وحق والدي جنين الحشا مات وطرحته

قصده هلاكي من هجم والله عرفته

ومن طلعوا بحيدر علي كل الأمر هان

وصلت المسجد والدّمع يجري من العين

لزمت الباب وصدّت تدوّر ابوحسين

صاحت تعرفوني انا مهجة المختار

عملة ثمود اليوم انزّلها ابهلديار

خسف وزلازل لو تخلّو لي الكرّار

كسَّرتوا ضلوعي و روّعتوا السّبطين

ومدّت على الهامه اليمين ورجَّت الكون

و ونّت وشعبت كل قلب ونَّة المحزون

ورفرف عذاب الله وغدو كلهم يموجون

محّد بقى غير الوصي وسلمان واثنين

وحيدر يقلّه روح للزّهرا يَسلمان

قلها يبنت المصطفى خيرة النسوان

تدرين ابو ابراهيم رحمه من الرّحمن

لازم يَزهرا على الهضم كلّه تصبرين

قلها اصبري وردّت عليه بدمع منثور

لولا الصّبر خلّيت كل العالم يمور

تسَقَّط جنيني من الحشا والضّلع مكسور

بسوطه يَسلمان العبد ورّم المتنين

تدري عليّه اشْصار يوم الهجموا الدّار

من شدّة العصره نبت بالصّدر مسمار

و هوّن عليّه اللّي جرى طلعة الكرّار

يمشي مهبّط و الدّمع يجري من العين

أحلف بقبر المصطفى وعزّة المعبود

هلباب ما خلّيه حتى حيدر يعود

يمسح ادموع اولاده التجري بلخدود

قلبي انشعب مَتشوف حال الحسن وحسين

جاها علي يقلها يشمّامة الهادي

ومدّت إيديها وجذبته والقلب صادي

بعدك تقلّه شحالتي و حالة أولادي

وقصدت ضريح المصطفى خير النبيّين

وقفت على قبر النّبي والقلب مشعوب

تشكي هضمها ودمعها على القبر مصبوب

صاحت يبوابراهيم قوم من القبر شوف

خانت الأمّه عهودنا ونسيت المعروف

بالسّوط ضربوني وعلي قادوه مكتوف

مغدور حقّه والورث يابوي مغصوب

دقعد وعاين ساعدي ولطمة عيوني

وسوط العبد ورّم يبو القاسم متوني

هجموا علي داري ومحّد وقف دوني

بعدك يبوابراهيم قلبي شلون ميذوب

شاحتمل بويه من مصابي وكثر بلواي

فقدك وغصب المرتضى وحنّة يتاماي

وكسْر الضلع وتسقّط جنيني من حشاي

نهبوا نحلتي وصابره والصّبركم دوب

جم دوب أنا اتصبّر وقلبي كلّه جروح

الثّاكل بياملّه يمنعوها من النّوح

ياياب كل يوم آخذ السّبطين ونروح

بين القبور أبجي و نرجع وكت الغروب

يَظلالي الضّافي العدا قطعوا ظلالي

أقعد بْحَر الشّمس من حولي أطفالي

وارجع واعاين منبرك يابوي خالي

و ماشوف ليل انهارغير اهموم وكروب

فقدك يبو ابراهيم ورّث جسمي نحول

و ريحانتيك ابناي بعدك صابها ذبول

نال العدا بهضمي وذلهم كل مأمول

ولاظلّت النا من البجا ياوالدي قلوب

وعندي كفيل تدير هالعالم يمينه

و بالصّبر وصّيته يَسلطان المدينه

و قومك عليه اقلوبها تغلي بضغينه

وبدر وأحد وحنين بيهن صبح مطلوب

يابوي ثارات الكفر منّا يطلبون

كل ساع ياهادي علَيْ غاره يشنّون

و انا شْيطلبوني على بيتي يهجمون

غير الضّغاين من علي بنصرك يمهيوب

قلّت شيمكم لو جفيتونا يالانصار

بضعة نبيكم وانتخي ولا شوف نغّار

جم دوب أنخّي و انتحب ما تنصروني

تشوفون عدواني وسط بيتي لفوني

تتروّع أولادي وكلكم تنظروني

شمسوِّيه تجيني العدا بالحطب و النّار

يَنصار أبويه وين غيرتكم علينه

ما تنغرون الحالنا يهل المدينه

شْجاري من الكرّار حتى يلبّبونه

مبتدع بدعه لو هجر سنَّة المختار

و اهل البدع مابينكم بالمسجد قعود

إلهم على منبر أبويه نزول و صعود

وصاحب البيعه والعهد بالحبل مقيود

ملبّب وهُو لولا يمينه الفلك مادار

يَنصار أبويه ماشفت نغَّار منكم

باللي جرى راضين لو قلَّت شيمكم

لوماسمعتوا الصّوت لو راحت هممكم

ماظن خفت ضجَّة اولادي داخل الدّار

بالأمس أبويه عْلَى المنيّه تبايعونه

كل ساع بالعتره يوصّي وتسمعونه

و هذا الوصي بالدّار حاير تتركونه

ومن شوفته قلبي يذوب ويلتهب نار

و منّي فدك منهوب قوّه و العوالي

ماخافوا من الله ولا رحموا اطفالي

ثكلى وحزينه و ضامني جور الليالي

شحجي وشعدّد من هضم ياجمع لنصار

و من الضّرب قنفذ ترى ورَّم متوني

لابيه علَيْ رحمه ولا انتو ترحموني

و من لطمة الغادر ترى راحت عيوني

ضلعي انكسر والصّدر بيه انبت المسمار

يم القبر قعدت تجر ونّه كئيبه

ست النّسا وتنشد المنبر عن خطيبه

تقلّه يمنبر صفوة العلّام وينه

وين الانوار اللّي تلوح النا بجبينه

نوره تغيّب و اوحش الدّنيا علينه

أيّامنا سوده ومصايبنا عجيبه

خلف السّتر جلست وجانون القلب ثار

جذبت الونّه وكل قلب منها اشتعل نار

حمدت الباري وذكرت الهادي المختار

وكلمن سمعها تزفّر وهاج بنحيبه

حكم الشّريعه بيّنت للخلق معناه

واوضحت دين المصطفى بيا سيف مبناه

وياهو الكشف كرب الرّسول اعلاه وادناه

تحجي و تبجي والقلب يسعر لهيبه

مكسورة الخاطر ومن يجبر كسرها

توعظ وتوعد تشبه الهادي بنثرها

تلزم ضلعها ونوب جرح اللّي بصدرها

ونوب تلوذ بقبر أبوها وتنتخي به

ردّت و ليث الغاب يترقّب مجيها

يسمع كلام المصطفى بطيّب حجيها

و ينظر بعينه مشية الهادي بمشيها

جت بغبنها و اوقفت منّه قريبه

انتحبت وصاحت يبن أبي طالب تراني

عندك وديعه والهضم والذّل عراني

هذا العدو حقّي زواه ولا رعاني

وانتَ الحمى ياكعبة الباري وحبيبه

قلها يَزهرا اليوم لازم تعذريني

أوّل وتالي يابتوله تعرفيني

ماملت عن دربي ولا فارقت ديني

منّك يبنت الطّهر هالّلفظه غريبه

عجّل يَقنبر سيفي البتّار جيبه

ترضى الوديعه لو أشب نار الحريبه

و الله يَزهرا جان شلت السّيف زعلان

لفني الأمّه الخاطرج و اهز لكوان

هسّا لزلزل هالارض بالإنس والجان

لجلج واخلّي عْلَى الملا ساعه عصيبه

بضعة الهادي جان أسل السّيف واقوم

ما تسمعين عْلَى المنابر عقب هاليوم

باسم النّبي المختار عندك يصح معلوم

وظل يرتعد والغيض يتوقّد لهيبه

هاج العزم بيه ولزم بتّاره وثار

قلها يعرفوني أنا حيدر الكرّار

لا جبن صايبني ولا اشكي قلّة أنصار

حقّج بحد السّيف يم حسين أجيبه

صاحت رضيت وصابره عْلَى الصّار بيّه

و اسمع بْذكر المصطفى صبح و مسيّه

وادري حياتي ياعلي متطول ليّه

بعد النّبي واطلع من الدّنيا كئيبه

ماسكن غيظه وانثنت ست النّساوين

لزمت بديها ويل قلبي الحسن وحسين

قالت يحيدر دسكن الخاطر السّبطين

ولنها على الخدّين عبراته سجيبه

وتحيّرت بالحال مكسورة الأضلاع

وردّت لعد زينب تقلها بقلب مرتاع

قومي لبوج المرتضى روحي بلا قناع

قامت تجر ذيل الحزن ذيج النّجيبه

بس مالحظها سكن غيظه وذبّ الفقار

ضمها الصدره والدّمع بالخد نثّار

وقلها يَبنتي مقدر أنظر لج بلا خمار

جنّي أشوفج بين عدوانج سليبه

لو تلحظ بعينك ثبير تزلزل وذاب

وقبال عينك يعصروني بصاير الباب

متعجّبه العالم من افعالك يَكرّار

بالدّار جالس والعدو يهجم على الدّار

و مدامعك تجري وبيدك سيف الفقار

وانا انتخي بفضّه وجنيني خر بالاعتاب

و تعفّرت بالباب منّي الضّلع مكسور

وايدي على ضلعي يحيدر والدّم يفور

والجزل يابوحسين بالنّيران مسعور

ناديتهم ردّوا ولا ردّوا لي جواب

ومن طحت خلف الباب ياراعي الحميّه

ناديت يافضّه تعالي بْعَجل ليَّه

وخرّيت ياحامي الحمى مغشى عليّه

رد لي الطّاغي ولااختشى منّك ولاهاب

و انتَ تشوفه ياعلي وتسمع ونيني

وقّف على راسي ولطم خدّي وعيني

وانا انتحب واصيح يافضّه ادركيني

احمرّت عيوني وخر جنيني وصدري انصاب

ردّوا لك وقادوك ياليث الحرايب

وانت الذي من باسك تموج الكتايب

والله افعالك ياعلي تراوي العجايب

جيف بحبل تنقاد وانت الليث بالغاب

قلها ودموعه اتحدّرت يم حسن وحسين

تدرين انا الموصوف فارس بدر وحنين

أسلب نفوس الشّوس بس بلحظة العين

غصبٍ عليّه اليوم يتخرّق لج كتاب

صبري مثل صبري يبت خير البريّه

تدرين انا محّد كفوا يجسر عليّه

لكن اشبيدي قيّدت زندي الوصيّه

سيفي بيميني واسمع ونينك ورا الباب

صبري مثل صبري يَشمّامة المختار

صبري يَزهرا عْلَى الهضيمه وعصر لجدار

لولا الوصيّه ماتركت اليوم ديَّار

لاتهيِّجيني بالعتب قلبي ترى ذاب

اشزايد عليج اليوم يازهرا تلوجين

بطلي ونينج ذاب قلبي لا تونين

يم الحسن بطلي الونين وجاوبيني

شوفي اولادج بالبواجي مذوّبيني

قالت يحيدر فرّقوا بينك و بيني

بوداعة الله مسافره عنّك يبوحسين

من هالمرض ماشوف ياحيدر سلامه

تزوّج عقب عيني يَبو حسين بأمامه

بس الله الله بعد موتي ابهاليتامى

سكِّن خواطرهم و نشِّف دمعة العين

واجمع أصحابك عقب موتي وجهّزوني

وطلعوا الجنازه بليل خفيه و ادفنوني

واللّي اكسروا ضلعي وبالباب عصروني

لا يحضرون جنازتي يمشيّد الدّين

ماقصّروا يامرتضى رضَّوا ضلوعي

لليوم من ضرب الرّجس ماسكن روعي

و بعدي على المختار ما نشفت ادموعي

وطب لي ولطمني فوق خدّي ومحجر العين

قلها الوصي الممدوح بالسّبع المثاني

انتي يَزهرا و النّبي جنتوا أركاني

وهسّا انهدم يم الحسن ركني الثّاني

تجدّد علَيّ الحزن ياست النّساوين

خبري أبوج المصطفى بلّي جرى وصار

من كسر ضلعك والضّرب والجزل والنّار

خبريه عن حالي وخبري بْهَجمة الدّار

وبلغي سلامي المصطفى خير النبيّين

دخلوا عليها اثنين يبدون النّدامه

و الكل منهم يبدي التّوبه بكلامه

ينادون يابنت المظلّل بالغمامه

عنّا اصفحي يعزيزة المختار ياسين

حوَّلت للحايط وجهها كوكب النّور

وصاحت مَبَقّيتوا من التّلويع والجور

هيهات مَيطيب القلب والضّلع مكسور

هذا جرح صدري وهذي حمرة العين

يحليلة الهادي دنت منّي المنيّه

و باجي حنوط المصطفى حضريه ليّه

هاج الحزن بيها و هلّت دمعة العين

يمها دنت وتصيح يم الحسن وحسين

هاليوم حالج زين ياستّ النّساوين

فالِج عسى فال السّلامه يازجيّه

قالت لها حان الوعد لبّي جوابي

وجيبي يَأَسما بالعجل طيّب ثيابي

وسلّي الحسن وحسين من فجعة مصابي

بتصير ميشومه عليهم هالعشيّه

من فراشها نهضت ومنها الدّمع نثّار

تعجن وتتلوّى وطب حيدر الكرّار

قلها عجب منّك يبنت احمد المختار

شغلين للدّنيا اشتغلتي هالمسيّه

قالت أريد اغسِل بناتي ياضيا الكون

و الخبز باجر خايفه اولادي يجوعون

أولادي يحيدر عقب عيني لايضيعون

من بعد ابويه عايفه الدّنيا الدنيّه

تقاسي بعدنا من العذاب أشكال والوان

تلقى البغي والجور من عصبة الشّيطان

تغلي عليك اقلوبها بأحقاد و اضغان

دقعد سويعه واستمع منّي الوصيّه

بيدك تغسّلني أريدك ياحما الجار

وتشوف ضرب امتوني وضربة المسمار

أولادي و بناتي عينك عليهم يكرّار

يشوفون منّي الدّار ياحيدر خليّه

خفيه اطلعوها جنازتي ودفنوني بليل

وماريد احد من هالأعادي نعشي يشيل

و ملزوم بالتّزويج يامخدوم جبريل

بوصيك لاتدخل مكاني أجنبيّه

بعدي حسن وحسين ماينوصف همهم

ينفقد جدهم بالامس و اليوم أمهم

راح الذي يضمهم لعد صدره ويشمهم

ومن بعدنا متصير عيشتهم هنيّه

والله يَزهرا من هضم ضلعك المكسور

بدموم تجري ادموعنا و اقلوبنا اتفور

واللي تشب نار المصاب ايّام عاشور

يطلب من حسين الرّضا و منّج عطيّه

قومي يأسما بالعجَل عدلي وسادي

وبالباب قعدي وارقبي جيّة اولادي

اغتسلت البضعه ودَنّت الكافور منها

وانضجعت ويم راسها خلّت جفنها

واسما اقعدت بالباب مشغوله بحزنها

وردّت تناديها يَبنت احمد الهادي

قعدي يبنت الحَمَل ركن البيت برداه

وصلّى بملايكت السّما وجبريل يبراه

هسّا يجي حيدر علي من خلفه ابناه

و يبجي الحسن وحسين منّه القلب صادي

دشّت عليها وبالمدامع هلّت العين

ميته لقتها وسابله اليسرى واليمين

خرّت تصيح اشْجارتي ويالحسن وحسين

عنّك ينشدوني وانا مفتّت افّادي

للباب ردّت والقلب يسعر وقيده

تنتظر داحي الباب والزّاكي وعضيده

و لن الحسن لازم يمين حسين بيده

يسأل عن البضعه وشاف الحزن بادي

يقلها عن أمنا خبّرينا حالها شلون

نامت تقلّه قال هسّا ما ينامون

قالت عمل بينا الدّهر يانور لعيون

قلها وجذب حسره على الزّهرا شْسادي

دشّوا اليتامى للوديعه بدمع همّال

بس عاينوها خرّوا السّبطين بالحال

وتعفّروا واحد يمين واحد شمال

وامّا الشّهيد حسين يندهها و ينادي

من نومتِك قعدي يمكسورة الضّلعين

مسحي دمع عيني تراني اعزيزج حسين

ما جانت العاده عن اولادج تصدّين

خان الدّهر وتشمّتت بينا الأعادي

ماصار بالعالم مثل بضعة الهادي

علة وجود الكون من أوّل وبادي

هيهات مايوجد مثلها في البرايا

نوَّر العالم نورها وهاي النّهايه

لكن بمقدار الشّرف قاست رزايا

انصبّت شبيه السّيل نازل على الوادي

فقد الحما ومنع البواجي وقطع الظلال

ونار الجزل بالمنزل وترويع الاطفال

وشوفة علي المرتضى مقيود بحبال

واللي دهشها وراعها صوت المنادي

قولي لعلي يطلع وخلي هالاباطيل

خلّى مدامعها على وجناتها تسيل

نكباتها ماتنحصي ورفسة الضلِّيل

بالمسجد وخرّت ومنها القلب صادي

ولزمت فراش المرض تالي ليل ونهار

تنحَّل جسمها من الهضم والضّيم وانهار

وبآخر الايّام اجا حيدر الكرّار

تعجن لقاها وطين يمها ابنة الهادي

قلها عجب منّك يبت خير النبيّين

بيدك اعمال اثنين للدّنيا تعملين

قالت من الواجب عليّه العجن والطّين

حال البنات أعدِّله وحالة اولادي

خلصت مهمّتها وهي ماتقدر تقوم

خبزت وغسلت راس زينب وام كلثوم

اغتسلت ونامت والوكِت ماهو وكِت نوم

وقصدت المسجد فضّه بحيدر تنادي

عجِّل ترى الزّهرا مَندري اشصار بيها

الحق عليها ولا أظن تلحق عليها

إجاها ولنها مغمّضه وسبلت إيديها

دنّق يخاطبها يَبنت احمد الهادي

جذبت الونّه وفتحت العين الزّجيّه

وقالت يحيدر عايفه الدّنيا الدنيّه

ودّعتك الله وهاللي عد راسي الوصيّه

ادفني بليل ولا يحضروني الاعادي

حقد القديم الله الكافي من اهواله

عاين شْسوّى بالنّبي المختار واله

تغلي عليه قلوب قومه من وجوده

ومن غمّض اعيونه وسكن طيّب الحوده

ثاروا وكل صاحب ضغن ظهرن احقوده

و بغض ومحبّه قاعده ورث السّلاله

جم دمّر الكرّار من عبّاد الاوثان

وانشد جليب اللّي انشحن هامات وابدان

ولو سايلت وين اسعرت نيران لضغان

قِتْلك اببّاب الدار شعلتها النّذاله

سهم النّبي وسهم الوصي من حقد لصحاب

كلّه نصيب اللّي اعصروها بصاير الباب

مسمارها ابلب القلب لليوم لهّاب

وكسر الضّلع للحشر يزداد اشتعاله

ويلاه يالطمة العين اشصار منها

ويلاه والسّوط الذي ورّم متنها

ومنع البجا ذاك الذي طوّر حزنها

و العصر و اسقوط الجنين اجر الرّساله

ويلاه ياحزن الوصي ساعة التّغسيل

صبّت عليه اهموم مايمكن التّفصيل

ماي الغسل وادموع عينه بالسوى يسيل

فوق الجنازه و شوفها غيّر احواله

و استند للحايط و اخذ يبدي نحيبه

وسلمان قلّه ياولي الله وحبيبه

الله يركن الصّبر هدّتك المصيبه

قلّه بلوعه والدّمع صب انهماله

لا تلومني تدري الزّمان اشصب عليّه

ما حمّلتني هالهضم غير الوصيّه

كسر الضّلع شفته وضَرُبْ متن الزجيّه

شفت الأسد بالغاب مايحمي اشباله

ماتثبت ابوجهي انا يوم الوغى اجموع

و سيفي لفقار الما تردّه طوس و ادروع

شبيدي و انا من سلّة البتّار ممنوع

ماضي علَي تقرير من رب الجلاله

ماتت ابغصّتها نحيله ابنة المختار

وبالليل جهّزها مع الخلّص الكرّار

بالليل جهّزها و يجيب الماي سلمان

عْلَى المغتسل مدها وهاجت بيه لحزان

وحلّت عليه امن المصاب الوان و الوان

عاين متنها وضلعها وكل الذي صار

ياساعة التّوديع من خرّوا السّبطين

اعلى اليمين الحسن وعْلَى اشمالها حسين

مدّت ايديها وللصّدر ضمّت الاثنين

وناداه المنادي يحيدر نح الاطهار

لَملاك بالعالم العلوي ضجّت ابنوح

من نحبة المسموم و اتحسِّر المذبوح

نحّى اليتامى المرتضى والقلب مقروح

وبليل وارى أم الأيمّه حامي الجار

بالليل واراها واخذ ينحب عليها

و الارض خاطبها و دموعه اتسيل بيها

يالرّوضه هذي بضعة الهادي احفظيها

ورد اليتاماها يلمهم داخل الدّار

وجتّه الجماعه امْن الصبّح تطلب دفنها

قال ادفنتها البارحه و الأمر منها

منكم غصصها وجور دنياها ومحنها

قالوا له ننبشها ومد إيده للفقار

قلهم وحق المصطفى كلكم تسمعون

و تدرون انا حيدر علي هزّاز لحصون

لقبور هالخمسه إذا واحد تدانون

منكم فلا يضل وانا بوالحسنين ديّار

الله يفارس كونها ومرْدي عَمرها

سيفك تسلّه جان أحد يدنى قبرها

وتنخاك يابوحسين والباب بصدرها

ماجاوبتها وبالثّدي ناشب المسمار

أنظم يَزهرا وانثر المدمع واسيله

و الغيركم ما قدِّم امرادي و اسيله

طالب من الباري و أريدنج وسيله

قوّه ومدد واتخلّص الخادم من النّار

حيدر على قبر النّبي ينادي يمختار

هذي الوديعه مادريت بحالها اشصار

وصّيتني وانا اصبرت واستهضموني

و الزمت بيتي يارسول الله و لفوني

و ذيج الوديعه روّعوها و لبّبوني

وانا وحيد ولاشفت لي منهم انصار

يا سيّد الكون الوصيّه مارعوها

وهجموا الدّار اعلى البتوله و روّعوها

طلعت تدافعهم و بالباب اعْصروها

وانكسرت الأضلاع منها وصار ماصار

عاشت عقب فرقاك مهضومه وذليله

و من كثر تلويع الرّجس صارت عليله

شَحجي شَعدّد من مصايبها الجليله

وكلما شفت هالحال قلبي يلتهب نار

كل الذي جاري عليها وعيني تشوف

لاجلَّت ازنودي ولا بقلبي دخل خوف

شْبيدي وانا بقيد الوصيّه صرت مجتوف

هبّطت راسي طوع لك واغْمدت لفقار

واعظم عليّه يوم بالحجره لفتني

تقول إننّهب منّي فدك واسود متني

ظلّت تنوح ومن بجاها ذوّبتني

لولا الوصيّه والقضا صارت لها اخبار

لولا الوصيّه والقضا صارت لها علوم

وخلّيت ببيوت المدينه ينعب البوم

وخلّيت طير الموت مابين الملا يحوم

لكن أنا اشبيدي الأمر لله الجبار

سلّمت لله وكسروا ضلوع الوديعه

وضعنا عقب عينك يبو ابراهيم ضيعه

جاروا علينا وضيّقوا بينا الوسيعه

بس غبت عنّا الكل علينا اتجسّر وجار

والله عجايب خارجيّه وضنوة اشرار

لكن مهرها ماجرى مثله ولا صار

بس مانظر يمها و صد الها ابعينه

و اقبل عليه ابن اللعين وباع دينه

قلها اخبريني ابمهرج اللّي تطلبينه

لازم مرامج تبلغينه وين ماصار

لبست حليها والحلل وارخت شعرها

واتبخترت يمّه وضمّته الصدرها

اتقلّه طلبتي بالخلق محّد قدرها

انجان تقدر من علي تاخذ لي الثار

قلها دطلبي غير حيدر قالت امحال

لازم أجاهد في هلاكه وابذل المال

قصدي أشتت هَلَولاد ايمين و اشمال

أفنى هلي وخلّى بقلبي تشعل النّار

اتحيّر و قلها ما سمعنا ابكل لدهور

يقطام مهرج ماجرى مثله بلمهور

لكن لخلّي بيرق الاسلام مكسور

ليلة تسعتَعْشَر أعفّر حامي الجار

ليلة القشره من لفت حيدر بقى يدور

و يعاين انجوم السّما و الدّمع منثور

ويقلّب الطرفه وبناته تنوح بالدّور

مستوحش العالم على حيدر الكرّار

ام كلثوم طلعت تسحب اذيال المصيبه

و تصيح ياناصر الهادي ياحبيبه

الليله يبويه حالتك والله عجيبه

ماغمّضت عينك واشوفك عندك افكار

قلها يبنتي العمر قوَّض والأجل حان

محّد يفر امن المقدّر و الذي جان

يحفظكم الله امن التّشتت يال عدنان

صاحت يَبويه ذوّبت قلبي ابهلَخبار

يابوي ما نقدر على هضم وفجايع

اتروح وين و تترك الإسلام ضايع

اقعد ابّيتك والحسن يطلع الجامع

مكفي البلا يَمزيل حيرة كل محتار

خوفي يبو الحسنين يتنكّس لوانا

وخوفي يْتهدّم سورنا ويهتك حمانا

خوفي يغيلونك و تتشمّت عدانا

لاقاله الله من جمالك تختلي الدار

ردها وطلع والدّمع يجري فوق خدّه

ايقلها حبيبي المصطفى صادق ابوعده

وانحل يويلي ميزره واوقف يشدّه

ونادت على اخوتها ودمع العين نثّار

نادت حسن يحسين يابن الحنفيّه

عبّاس ياجعفر دقوموا بالسّويّه

دركوا أبوكم و الذي عشتوا ابفيّه

ليروح غيله ياحسن يانسل الاطهار

قام الحسن من مضجعه والدّمع مسفوح

ايقلّه يبويه الليله المسجد أنا روح

قلّه يَبويه هالامر مكتوب باللوح

درجع يَنور العين يامهجة المختار

رد الحسن للدّار يصفج راح ابراح

ويصيح ياوسفه على عزّ قضى وراح

صيوان عالي للهواشم قوّض وطاح

و الكافي الله امن الدّهر ياخلق لو جار

غاله الطّاغي بسجدته انشلّت يمينه

طرّت الهامه و وصْلت الجبهة الجبينه

بالفوز معلن صاح و اتغرّق امصلّاه

و حوله على ذيج الكريمه اتفايض ادماه

ومدّة حياته بو الحسن مالفظ بالآه

يحمد الباري ويشكره ماهو بونينه

مولود بالكعبه وهذا الخبر مشهور

وعقد الزّواج محقّق ابيته المعمور

والخاتمه بمسجد الكوفه الرّاس مطرور

ويلاه من طلعوا اولاده شايلينه

جبريل يعلن بالنّواعي ابذات لبروج

ومثل السّفينه الارض ترجف والسّما تموج

تعلّت الضجّه وبالخلايق ضاقت افجوج

وزينب تنادي يخوتي الكرّار وينه

عندي أبويه الليل كلّه يضرب افكار

صلّى صلاة الليل عندي وطلع محتار

ماتخبروني اشصاير بحيدر الكرّار

قالوا يحورا انصاب بالمحراب ابونا

ليث الحرايب وصّلوه الوسط داره

و من نزف دمّه اتغيّرت شعّة انواره

شدّوا الرّاس ابميزره و زاد اصفراره

وجابو الطّبيب وعاينه وهملت عيونه

عاين الضّربه وقال ياشمس المضيّه

حان الأجل قدِّم يبوحسين الوصيّه

وصلت دماغك ضربته نسل الدعيّه

مثلك يليث الغاب من يدنى العرينه

ويلاه من بيّن فجر ليلة العشرين

وبطّل عمت عيني ونينه وفتّح العين

وقال اطلعت يافجر يوم ونام ابوحسين

و انتحبت اولاده عن اشماله و يمينه

وليلة القدر الثّانيه غابت انواره

أوصى بليله يدفنونه وخلت داره

اتلقّاه ابو ابراهيم و الباري اختاره

وقاموا بجهازه بالبجا وضجّت بنينه

هالضّربة القشره يبويه امنين حلّت

بعدك يداحي الباب شوكتنا افتلّت

هالضّربة اللّي هدّت اركان لمسلمين

هلّي فعلها راح ياباب العلم وين

من جسر يالاهوتها الأعظم يبوحسين

بطّل ونينك يالولي قلبي تفتّت

بطّل ونينه و الدّمع هل او تحدّر

صابغ ابدم الرّاس و ينادي يَشّبر

هذا الذي مكتوب لي من عالم الذّر

من عالم التّكوين هالطّبره انكتبت

آنا الذي ماهاب من خيل ولا رجال

ولاهاب من خوض المنايا وخوض لهوال

لو حوربت بالكون بيه يحل زلزال

قلبي فلا تروّع ولا الزّندين جلَّت

إسمي أنا معروف بالشدّات لصعاب

و ابوك تدري ما يهمّه ابراسه اصواب

واشوف يبني طحت من ضربة المحراب

مقدر أحاجيكم ترى ادمومي انّزفت

صلّيت أنا بصفّين في حومة الميدان

وشقّيت لجّه من النّبل والبيض والزّان

و لاسطى ابهالجسد بتّار و لا سنان

وطبرة الطّاغي شقّت الهامه ونزلت

اصفرّت الوانه وسال دمعه وضل ينادي

لا تهيّجوني بالصّوايح ياولادي

سكتوا ترى نزف الدّما فتّت افّادي

شالوه فوق الرّاس والضجّه ارتفعت

و زينب اتنادي هالذي محمول من وين

بالله اخبروني ياخواني حسن وحسين

قالوا لها يمخدّره سيّد الكونين

صرخت وصفقت بيدها وبالحال خرّت

حنّت ودمع العين فوق الخد همّال

إطلعت سالم و ارجعت ليّه ابهَالحال

محمول يا بوحسين فوق اجتاف لرجال

معلوم من بعدك بني عدنان ذلّت

ظلّت بنات المرتضى كلهم ينوحون

يقولون ابونا ياحسن متغيّر اللون

اتحرّك يَويلي المرتضى وبطّل ونينه

اتحسّر على اولاده و صد الهم بعينه

قلهم كلامي يا ولادي تسمعونه

لازم حسن وحسين من بعدي تطيعون

جنّي بشبلي الحسن فوق التّرب نايم

بالسّم جبده مقطّعه وحوله الهواشم

والكل ذابت مهجته والدّمع ساجم

والحسن يتقلّب واخوه حسين محزون

وامّا المصيبه اللّي اتزلزل هالوطيّه

امصيبة عزيزي حسين برض الغاضريّه

جنّي أشوفه عْلى الثّرى نايم رميّه

من حوله الشبّان بالغبره يونّون

و زينب انفجعت حين سمعت هالوصيّه

وصاحت أجل يا بوي من وصّيت بيّه

بانت يحيدر أوّل الذّله عليّه

ياليت بعدك هالحراير لا يضيعون

اتحسّر يويلي صاحب النّفس العطوفه

وصد ونده زينب وعبراته ذروفه

جنّي أشوفج حايره ابوسطة الكوفه

ويّا يتامى عْلى الهزل كلهم ينوحون

هلّت دمعها ونادته والقلب ذايب

بيّه توصي لو اتبشّرني ابمصايب=

بعدك يبويه يساعد الله عْلَى النّوايب

ياليت مَتقَضّت ايّامك يا ضِيا الكون

أوصيج يازينب ونفذي هالوصيّه

كفلي يتامى حسين برض الغاضريّه

قالت يبويه هالمصيبه اللّي تجينا

من عقب عينك ياحمانا و ياولينا

قلّي يبويه ياعلي اشيجري علينا

قلها مصايب تفجع العالم سويّه

الله يما اجسادٍ على الرّمضا طريحه

وياما دمومٍ من بني هاشم سفوحه

وياما شباب عْلَى الثّرى يعالج بروحه

وفي كربلا تبقى مضاربهم خليّه=

و اعظم عليّه مصيبةٍ تحني الأضلاع

ادخولج يَزينب مجلس الطّاغي بلاقناع

مقدر أخبّركم و هذي ساعة انزاع

صاحت يبويه امن الذي وصّيت بيّه

قلها من اخوانج و تختارين لاباس

كلها صناديد و شفايه ترفع الرّاس

هذا الحسن وحسين ومحمّد وعبّاس

و جعفر و كلهم مايهابون المنيّه

قالت اريد امن اخوتي اللّي يخدموني

أما الحسن و حسين تخدمهم اعيوني

اخواني كلها ابطال جان اتخيّروني

كافل أختار البطل عبّاس الشفيّه

نادى عليه ودم دمع عينه يذيعه

عبّاس هذي اختك ترى عندك وديعه

قلّه أنا أعظم من احصون المنيعه

مادام راسي سالم و سيفي بديّه

مادام راسي سالم و سالم لج حسين

أضمن يَزينب بالمعزّه ماتذلّين

ولو طاح جسمي عْلى الثّرى لازم تعذرين

من عقب حز الرّاس لا لومٍ عليّه

نزلة الكوفه ياعلي قشره علينه

نطلب من الله تطيب وتردنا المدينه

قشره علينه نزلة الكوفه يبو حسين

فالك عسى فال السّلامه ياضيا العين

قلها الحسن يختي السّلامه للأبو منين

ما تنظرين السّيف شق غرّة جبينه

ماظنّتي من طبرته حامي الحمى يقوم

هذا الطّبيب يقول سيف الرّجس مسموم

مقزِّر أبونا حسبته يومٍ بعد يوم

لونه تغيّر وانتحل ما تنظرينه=

قالت يَعقلي نطلب امن الله السّلامه

و يقوم ابو الحسنين و يتمّم اصيامه=

ونعيّد ابزينه و لا انعيّد يتامى

قلها يَثكلى العيد لا تتذكّرينه

يختي يَزينب جان عيد اتعيّد الشّام

جان الخبر وصّل يصير أبرك الأيام

و احنا بعد ليله و يوم ونصبح ايتام

عند الفجر كهف الأرامل تفقدينه

صاحت عسى بعيد البلا يا قرة العين

بالموت لا تفاول على عز المسلمين

اسم الله علىكهف الأرامل والمساكين

لا قاله الله يا حسن نفقد ولينه

فتح عيونه المرتضى والدّمع يجري

وقلها يزينب بالنّجف محفور قبري

قالت يبو الحسنين بعدك جيف صبري

يا بوي جيف ارجع بليّاك المدينه

مات الوصي ونهضوا اولاده يجهزّونه

موصي عليهم وسط بيته يغسّلونه

اختصّوا بتغسيل المطهّر حسن وحسين

وضافوا على امياه الثلاثه امدامع العين

يتقلّب اعلَى المغتسل مابين لثنين

و بخمسة الاثواب أوصى يجفّنونه

امنجّي سفينة نوح حطّوه ابسريره

وشالوه حسن وحسين بدموعٍ غزيره

تتخضّع الجدران لَنواره المنيره

مرفوع لمقدّم و ساروا يتبعونه

طلعت الحورا تنتحب والقلب مرتاع

بوداعة الله اتصيح ياحصني يَمنّاع

سلَّم على الهادي ومكسورة الاضلاع

ريضوا اشويّه بالنّعش ياشايلينه=

وَسْفَه و ألف ياحيف ياهزّاز لحصون

يمذلل الشّجعان من يتعمّر الكون

ساجد الربّك غالك الغادر الملعون

أحزن عليك المصطفى وامّي الحزينه

جيف البصر يا والد الغر الاماجيد

لو هيأوا المنبر يَبويه الخطبة العيد=

من يبتسم ثغره وياهو يلبس جديد

مَتشوف غير اليصفج اشماله بيمينه

ياياب طلاب العلم واهل الفضايل

لو قصدوا الباب العلم والكل يسايل

يَولاد حيدر وين حلّال المشاكل

حاوي علوم المصطفى باب المدينه

ينشعب قلبي و مهجتي تتواقد ابنار

لو اسمعت لاجي يصيح ياحيدر الكرّار

لو لاحظت عيني يبويه بعدك الدّار

ومنها يسور المنع نورك فاقدينه

باجر يبويه ايصير بَرض الشّام عيدين

واحنا صباح العيد عدنا يصير حزنين

منّك نشوفه خالي المسجد يبو حسين

هاي المنابر والخطيب اليوم وينه

شافت ابوها وبالدموع انفجرت العين

صاحت عسى بعيد البلا مسجّى يبوحسين

ياحسن شيل اعمامته و هَلجرح شدّوه

وبهداي فوق المغتسل يحسين مدّوه

وهذا يَبعد اهلي القطن للجرح خلّوه

بِلهون قلّب والدي وشدّ الجرح زين

لايفيض دمّه على الوجه يابن الشفيّه

خوفي يخويه تخضّب الشّيبه البهيّه

لو ترخصوني جان أقلبنّه بديّه

واغسل يخويه طبرته بمدامع العين

كهفٍ منيع وحصن عالي وحيف مادام

امظلّل علينا و انهدم من جور الايّام

ضاعت عقب عينه حريم وضاعت ايتام

مثله يخويه ينوجد في العالم امنين

شقّت الجيب و لطمت الهامه و لخدود

تندب يداحي الباب يا صفوة المعبود

ذوّبتني عْلى المغتسل يا بوي ممدود

معلوم من بعدك يبويه اتيتّم الدّين

ريضوا بنعش المرتضى ركن العرش مال

من شال ابو الحسنين ويّاه المجد شال

ردّوا نعش حيدر إلى المنزل اشويّه

بتودّعه زينب و كلثوم الزجيّه

فراقك يبويه أعظم الفرقه عليّه

خلّى الدّمع يجري دما وبالقلب ولوال

قلها المشكّر بو الفضل عبّاس يختي

لا ينسمع صوتج ترى قلبي شعبتي

آنا كفيلج من بعد حيدر دسكتي

ما دام انا موجود ما ينضام لج حال

لكن يزينب لو نزلنا الغاضريّه

عذري كفيلج من تشوفينه رميّه

صاحت تهيجني رزيّه عْلَى رزيّه

قلبي امفتّت لا تذكّرني ابهَلحوال

والله اشعبت قلبي ابذكرك ذاك لمصاب

و اشغلت بالي عن مصيبة داحي الباب

اسم الله على زنودك وراسك يبن لطياب

ريّض يخويه ابنعش ابونا سور لعيال

ردّوا النّعش ليّه وخلوني أنظره

أسفر عن اجفانه و احبنّه ابصدره

قلها وعبراته على الخدّين تجرى

هيهات يازينب يرد عنّج علي انشال

لَملاك شالوا امقدّمه و شلنا المؤخّر

ردّي الخدرج وايّسي ميعود حيدر

نادت ابعالي صوتها الله واكبر

والله فجيعه ماجرت في أوّل وتال

قلها الحسن ردّي الخدرج يامصونه

من طلعتج يختي نسينا امصاب ابونا

لا ترفعي صوتج ترى يصعب علينا

و احنا فلا نرضى تعاين شخصج ارجال

جيف البصر مظلم علينا البيت يحسين

صاير اوحش من عقب عز الهاشميّين

وين التّلاوه و وين ذاك النّور لَزهر

يستَر قلبي لو سَمعت آبوي كبّر

واعظم عليّه صرخة الحورا يحيدر

يابوي ضيّعت الارامل والمساكين

يحسين راح اللّي يزيل الضّيم عنّا

يزيح الهضم عنا يخويه لو انهضمنا

أقفى الدّهر من فات داحي الباب عنّا

وراح السّرور وشِمتت اعلينا الملاعين

باجر شماته اتصير بَرض الشّام و سرور

وياما علم في بيت ابو سفيان منشور

واحنا علمنا ياعزيزي صبح مكسور

بس ماسمع منّه انتحب واتزفّر حسين

قلّه يخويه البيت مستوحش علينا

لنّه بحيدر نوبةٍ وحده اندهينه

ومحّد فقد مثل الذي احنا فاقدينه

والا النّشيج ارتفع عند الباب بونين

شال الحسن راسه ولن زينب تنادي

والدّمع منها فوق صحن الخد بادي

قلبي تفتّت والحشا يحسين صادي

من عاينت بيتي خلي من مظهر الدّين

بالأمس ابونا لو طلع قاصد المسجد

يسطع النّور ابغرته و ظل ايتهجّد

يبتهل ويعفّر وسط محرابه الخد

و اتجاوبه الحيطان لو أذّن ابو حسين

واليوم من شخصه منازلنا خليّه

بيها الحزن و النّوح و امظلمه عليّه

من عقب عينه انهدم سور الهاشميّه

و احنا ابمصيبتنا و اعادينا امعيدين

ضيعتني وخلّيت قلبي اموجّر ابنار

مستوحشه الكوفه عقب عينك يَكرّار

والحسن من بعدك يبويه ظل محتار

و حسين متحيّر و بس ايدير بالعين

ودّيت يَبن المصطفى باب العِلم وين

و ردّيت لينا بالكسيره ياضيا العين

والله عجب صفوة الباري وسر لوجود

والجوهر السّامي وحبل الله الممدود

بحر الكرم و الجود جيف اتضّمه الحود

كهف الارامل واليتامى والمساكين

يَولاد حيدر وين ابوكم نور لكوان

يحسين خويه ياحسن يَولاد عدنان

هالرّوس نكسوها ترى بينا الدّهر خان

وظلّت خليّه ابيوتنا من نور ابوحسين

قلها الحسن والدّمع بالخد منثور

مَيفيدنا كثر البواجي و لطم لصدور

ولا النّواعي ترجع النّايم بلقبور

هذا الذي مكتوب من عالم التّكوين

يختي دصبري و الصّبر من شان لكرام

مادام انا سالم وبو فاضل الضّرغام

تركي البجا والنّوح يختي الحزن قدّام

بعدي وبعد حسين يازينب تضيعين

داروا يعزّوها عْلى بوها وسكّتوها

و نشّفت دمعتها و إجت يم دار ابوها

وصاحت ابهم يحسين هالدّار اغلقوها

مقدر أعاينها خليّه يامسلمين

مقدر أعاين ياضيا العينين هالدّار

كلما نظرت الها يشب الحزن بي نار

جانت امزهره و تشع من حيدر بلنوار

و اليوم ظلمه شلون اشوفنها ابْياعين

ياياب محلى مشيتك ما بين لولاد

دوبي امريبه و خايفه امراوغ الحسّاد

اشبيدي على عزٍ رحل عنّي ولا عاد

ياخلق يرجع غايب الأموات من وين

من شفت حالك ياعلي تجذب الحسرات

تطلع و تدخل و الدّموع اتفيض عبرات

هملت اعيوني وبالقلب صارت الحسبات

ظنّيت ما اتتمّم اصيامك ياحمى الدّين

زينب تصب الدّمع من عظم الرزيّه

امْن اتشوف دار المرتضى منّه خليّه

توقف ابّباب الدّار و اتهل عينها ادموع

اتنادي يبويه الهالمنازل مالك ارجوع

من حنّة ايتامك عليك القلب مفجوع

ما يمكن الثّكلى تعزّيها شجيّه

و اللي يفت قلبي و يخلي حزني ايزيد

يابه عقب أيّام لو قالوا لفى العيد

لازم العاده تلبس الأطفال لجديد

و اولادك ابيوم الفرح تنصب عزيّه

يابوي ضاعت من عقب عينك هلولاد

ومن بعد موتك ياعلي مانعرف اعياد

جيف الفرح و احنا بقينا مالنا اسناد

راح المحامي و الذي عشنا ابفيّه

خطبة العيد اضحت تنادي واخطيبي

و المنبر ينادي انقطع منّه نصيبي

وانا أحن ولا أبطّل من نحيبي

و اولادج اتنوح و مدامعهم جريّه

ونادت على السّبطين حلوين المعاني

نوحوا على حامي حماكم ياخواني

من بعد حيدر وينّا و وين الّتهاني

و الله شماته و حصّلوها بني اميّه

فرحت بني سفيان و الطّاغي ابشامه

لمّن لفى ليه الخبر نشّر اعلامه

قر واستقر واستحمد الله عْلَى السّلامه

يقول استرحنا من علي وضاق المنيّه

العيد مجبل والحزن زايد عليّه

وعاينت دار المرتضى منّه خليّه

فقد الأبو نغّص علينا ابهالسّنه العيد

و امن الصّبح باجر عليّه احزاني اتزيد

نبجي ونلطم والبجا واللطم مَيفيد

نشبت مخالبها ابحشاشتنا المنيّه

محلى الأبو في العيد لو جمّع اولاده

ولبّسهم الزّينه على جاري العاده

ورفرف عليهم بالهنا طير السّعاده

ايطيب القلب واتصير عيشتهم هنيّه

و احنا أبونا قبل عيده ابتسعة ايّام

سافر وخلّانا وصرنا بعده ايتام

وافراحنا راحت وصار العيد في الشّام

باجر النّاس امعيّده و احنا ابعزيّه

باجر يخوتي هالمنازل غلّقوها

خلّوا اثياب العيد أبد لا تطلّعوها

و اعلام سود اعْلَى المنازل نشّروها

ولا ريد احد من هالبلد يدخل عليّه

و الله لقضّي العيد كلّه ابنوح و اصياح

ولحّد يجيني من هل الكوفه بالافراح

عندي مصيبه ياخلق عنّي الفرح راح

زادي البجا والنّوح عبراتي الجريّه

والله لقضّي العيد باجر وسط لبرور

وامشي واسايل وين داحي الباب مقبور

أقعد على قبره واهلّ الدّمع منثور

وانعى على عزنا الذي عشنا ابفيّه

و اتهيّج احزاني عليّه خطبة العيد

باجر تمرّ الخلق كلها المسجد تريد

ولاشوف ويّاهم علي و احزاني اتزيد

ويذوب جسمي ولا تظل بيّه بقيّه

كنّا بالاوَّل من يمر عيد علينا

نلبس اثياب الفرح وانبكّر لبونا

وهالعيد جانا وطود عزنا فاقدينا

وبعده تنكّس علم عزّ الهاشميّه

صاح الحسن يحسين يا راعي الحميّه

ياخويه كل القوم خانت و الرعيّه

جيف البصر خانت علينا القوم يحسين

ضاقت علينا الواسعه يَبن الميامين

صرنا بليّا انصار مدري نلتجي وين

كل لجنود اتفرّقت شوروا عليّه

لحّد تولتنا عقب حيدر العدوان

وبعد الأبو ضعنا يخويه بين كوفان

مدري نسالم لو نحاربهم يفرسان

ثارت اشبال المرتضى كلهم سويّه

جدّامهم شيخ العشيره رافع الصّوت

آمر يبو محمَّد حلى لي دونك الموت

مَنريد يَبن امّي حلايلنا والبيوت

تدري بنا العدوان منهاب المنيّه

و عبّاس جاهم شاهر السّيف ابيمينه

وظل ينتخي ولاح الغضب مابين عينه

اينادي يبو محمَّد يَسلطان المدينه

خل البجا و اسمع كلامي يا شفيّه

يَبن النّبي و حق و الدي زرّاق لرخام

لو يجتمع عسكر من الكوفه إلى الشام

يا مهجة الزّهرا فلا انخليك تنضام

وجرّد الصّارم وانتخى ابن الحنفيّه

قلهم صوارمكم يفرسان اغمدوها

و اصواتكم للغاضريّه اتدخّروها

بذلوا النّفس دون ابنة الهادي واخوها

منّه يشيب الرّاس يوم الغاضريّه

جارت على سبط النّبي قوم الخيانه

وقاسى المحن ياويح قلبي من زمانه

خانت ارجاله و للطّمع مالوا يركضون

و رشوات ابن هند ابلغت مليون مليون

حتّى ابن عمّه الجان يحسن بيه لظنون

وصلت إله الرّشوه وصَبح خالي مكانه

يفتّ القلب يوم المداين من مصابه

نهبوا المصلّى و قطعوا اعليه الخطابه

والجيش كلّه انقلب بس خلّص اصحابه

مخطور صار و حفّت ابشخصه اخوانه

أهل الفتن نهبوا رحاله و سلبوا ارداه

و حفّت به اخوانه عن اشماله و يمناه

وابن البغي الجرّاح بالخنجر تحدّاه

و قلّط المركوبه و لزم بيده اعنانه

و اللّي جرى يوم النّخيله ايفتّ لقلوب

قلّت اعوانه وسكت عن حقّه المغصوب

عاهد على اشروطه وعاد الامر مقلوب

ألغى الشروط ابن الخنا والعهد خانه

خان العهود وشبل حيدر لزم حدّه

سبط الرّسول و ملتزم يوفي ابعهده

وكل فرد منهم ماتعدّى فعل جدّه

ذكوان هذي ذمّته وهذا أمانه

هاي النّتيجه من اليهودي الرّجس ذكوان

ورّثهم اطباعه الاراذل آل سفيان

و الموفي ابعهده شبل هاشم و عدنان

ذاك الحسن سبط النّبي وركن الديّانه

وسلّط على الكوفه زياد وعاث بيها

و شيعة علي الكرّار صب جوره عليها

سمّل الطّاغي اعيونها و قطّع ايديها

وحجر وصحبته هاجت اعليهم اضغانه

صفحة التّاريخ ابفعلهم سوّدوها

و امخدّرات ابيوت يسلام اسْجنوها

والرّوس من وادي الوادي شهّروها

وتاليها بحجور النّسا يهل الدّيانه

لَشعث الكافر يحمل اسباب المنيّه

المهجة الزّهرا من نغل هند الدعيّه

ما يستحق انقول لَشعث باع دينه

زنديق ماعنده ديانه ابن اللعينه

قاصد من ارض الشّام بالسّم للمدينه

البنته تقطّع مهجة الزّهرا الزجيّه

العسل مزجت باللبن والسّم ويّاه

صايم ودنّت له الفطور اوقعدت احذاه

منّه شرب ياويح قلبي و قطّع امعاه

حالاً تقيّا و انغشى اعليه الشفيّه

جاه الشّهيد حسين يتفقّد احواله

شافه وصاح ودمع عينه بانهماله

يا هو الذي اتجّرا على ابن امّي و غاله

معلوم هذي من دسايس آل اميّه

قلّي ابصاحب هالفعل يا بحر لعلوم

لحّد يبومحمَّد لثور الكون هاليوم

قال الطّشت جيبه يبو سكنه يمظلوم

الله أشد نقمه يبو نفس الأبيّه

دنّى الطّشت يمّه وتقيّا وتاح جبده

قطعه بعد قطعه وابو السّجاد عنده

ولن زينب اتنادي الحسن يحسين سنده

ابوجهه ترى لاحت علامات المنيّه

ون وفتح عينه السّبط واجذب الحسره

وقلّه يخويه حسين جت مهجة الزّهرا

بالعجل شيل الطّشت يبن امي وستره

و نشّف امدامعها وسنّد لي ابتجيّه

دشّت على اخوتها الوديعه اتدير بالعين

ولنّه يلوج الحسن ومتكّي له حسين

قلّي بقلبها اشصار من شوفة هَلثنين

واحد يلوج اُواحد ادموعه جريّه

صدّت و حانت للطّشت منها التفاته

و خرّت على الزّاكي امأيسه من حياته

اتقلّه يعين الله عْلَى فقدك و الشّماته

خويه قلت لك لا تواصل هالدعيّه

جبد الحسن متقطّعه بسم المنيّه

أصبح يعالج واصبحت زينب شجيّه

دخلت عليه و عاينت له يلوج وحده

عنده اخوه حسين دمعه فوق خدّه

آمر أخيّه يشيل طشت البيه جبده

شيله يخويه لا تشوفه الهاشميّه

شيل الطّشت خوفي الوديعه تشوف جبدي

خوفي تحن و من بجاها ايزيد وجدي

هذي وديعة والدي حيدر وجدّي

مقدر أشوف ادموعها ابخدها جريّه

اوصيك يَبن امّي عقب عيني اكفلها

و ابكل وكت يحسين دايم عينك الها

تبقى تراهي بالهضم من عقب اهلها

توقف على اجثثهم براضي الغاضريّه

سمعت ونينه و اقبلت زينب اتنادي

تلطم على خدها ودمع العين بادي

وتصيح اخويه حالتك فتّت افّادي

من شافها ظل يجذب الونّه خفيّه

صدّت و لن اتشوف طشتٍ ممتلي دم

شافت قطع جبد الحسن متقطّعه بسم

قالت وهي فوق الصّدر والخدّ تلطم

جبدك يخويه امقطّعه و تخفي عليّه

من غالك ابسَمّه يخوي و قرّة العين

يحسين خويه استخلف الله مالك امعين

هذي مهي جبد الحسن بالطّشت يحسين

قلها نعم يختي ولكن وشبديّه

قوم بعجل سنّد لخوك ابعجل يحسين

والله قطع قلبي هَلمسجّى بلونين

يحسين لا تغفل ترى مسافر عضيدك

جنّي أشوفه ابهالمرض رايح من ايدك

كثر البجا و النّوح بعده ما يفيدك

بطّل الونّه وظل علينا يدير بالعين

خويه على افراق العضيد الله يعينك

هذا يوالينا اشمالك مع يمينك

قوم الأعادي فرّقوا بينه و بينك

نالوا مطالبهم وصاروا مطمئنّين

يحسين أشوفه امغمّض و بطّل ونينه

اصفرّت الوانه و بالعرق يرشح جبينه

اتقرّب يخويه ودّعه و غمّض اعيونه

غيره وغيرك بالخلق ما شوف سبطين

من هَالمرض يا بو علي ما ظنتي يقوم

جبده تراهي اتفطرت من حر لسموم

جرّب يخويه وشوف اخوك مفارق اليوم

ما ظنّتي ايتمّم نهاره ابن الميامين

قام الشّهيد و عبرته ابخدّه جريّه

و عاين عضيده ايطوّح الونّه خفيّه

قلّه يبو محمَّد يخويه اقطعت بيّه

فتّح اعيونه وسال دمعه على الخدّين

قلّه يبو السجّاد لا تبجي و لا تنوح

آنا على معزّه أعالج طلعة الرّوح

و انتَ تظل ابكربلا عريان مطروح

مرضوض صدرك بالثّرى ومقطوع ليدين

اوصيك يَبن امّي عقب عيني ابهَلعيال

لَيكون تتشتّت يبو سكنه هلَطفال

يحفظكم الله من صروف الدّهر لومال

واصبر عقب عيني على جور الملاعين

اوصيك بولادي وحريمي هالأرامل

يحسين صير الهم بعد فرقاي كافل

اتعزّا بعزاء الله تراني اليوم شايل

ودعتك الله ياقطيع الرّاس يحسين

قلب الحسن من سم جعده ملتهب نار

في وين راح اليوم عنّا حامي الجار

يامن قتل مرحب و لزنوده براها

يالكعبة العظمى و يالعالي ذراها

دنهض ترى بيك العدى نالت مناها

سمّوا عزيزك والشهيد حسين محتار

جالس و دمعاته ابخدّينه هتونه

ينظر عضيده و يصفج اشماله بْيمينه

بعدك يخويه تظلم الدّنيا علينا

ظهري انكسر لجلك يشمّامة المختار

سمٍ قطع جبدك يخويه قطع قلبي

ومن بعد عينك لاهنا زادي وشربي

وعقبك ينور العين جيف أندل دربي

الدّنيا لطلّقها بعد موتك يمغوار

نادى أبو محمّد او ونّاته خفيّه

هذا ينور العين لمقدّر عليّه

بوداعة الله يا غريب الغاضريّه

بس الله الله من بعد عيني ابهلصغار

يوصي عزيزه و القلب منّه ابلهفه

و يخاطبه و لازم على جبده ابجفّه

الجاسم عقب عيني على سكينه تزفّه

نفّذ يخويه هالوصيّه ياحما الجار

زوّج الجاسم واكفل ايتامي يمذخور

وعينك على زينب احفظها وسط لخدور

عقبك تراهي ياعزيزي تركب الكور

واتشوفك امجدّل يخويه فوق لوعار

جنّي أعاينها ذليله بين عدوان

فوق الجمل راسك يباريها على اسنان

وابنك علي مغلول بقيوده و وجعان

ينخى بني هاشم و دمع العين نثّار

نادى المنادي في السّماوات العليّه

جبد الحسن متقطّعه بسم المنيّه

وحسين يمّه ينتحب و الدّمع هامي

يقلّه ونينك يالأخو نحّل اعظامي

وشعلّتك ياباقي أهلي وكل عمامي

قلّه يخويه علّتي سم الدعيّه

بالله يخويه حسين دن الطّشت عندي

سم اللعينه ياعضيدي فت جبدي

هذا يخويه اللّي وعدني بيه جدّي

دنّى الطّشت يمّه وجبده ملتظيّه

جبده قذفها و عبرته ابخدّه هتونه

وقلّه دشيل الطّشت لاتشوفه المصونه

ولَتجي الحراير يا عزيزي و ينظرونه

خوفي تذوب اقلوبها يَبن الشفيّه

دشّت الحورا تلتفت لشمال ويمين

شافت طشت مملي وهلّت دمعة العين

مملي دما وصاحت ينور العين يحسين

جبد الحسن متقطّعه وتخفي عليّه

نادى ودمع العين فوق الخد غدران

قوموا تعالوا اتودّعوا منّه ينسوان

اعزيزج يَبنت المرتضى منّه الأجل حان

فرّن ابهمه و فاضت النّفس الزّكيّه

و احنى عليه ايقبّله ابغرّة جبينه

ايقلّه ابفقدك موحشه الدّنيا علينا

وارتفعت الضجّات من أهل المدينه

و الكل ينادي و دمعته بخدّه جريّه

صرخت الحورا تنتحب والدّمع بدّاد

اتقلّه ينور العين ياضنوة الأمجاد

لاوين بعدك تلتجي لو لفت وفّاد

و انت حمانا و الذي عشنا ابفيّه

شالوا الجنازه و الوديعه اتصيح يحسين

بجنازة المسموم ريّض يا ضيا العين

ريّض يبو سكنه بنعش حلو الجهامه

و نشروا عْلى تابوته لمشكّر هلعمامه

سفروا الجفن عن وجهه اتشوفه ايتامه

ودّعتك الله يا حسن هالسّفر لاوين

ريّض يبو سكنه ابجنازة حلو لَطباع

وعرّج ابتابوته عْلى مكسورة الاضلاع

وخلّه على الرّوضه وخلنا انجدّد اوداع

وقّف يخويه ذابت اقلوب النّساوين

عرّج على قبر البتوله بنعش ابنها

و قبره يخويه لا تحفره ابعيد عنها

دفنه ابكترها بلكت ايهوّن حزنها

لا وين ماشي بكعبة الوفّاد يحسين

ريّض يخويه ابهالنّعش قلبي ترا ذاب

جسمي انتحل يابوعلي من فراق لحباب

مقصد الوافد حيف نوره بالثّرا غاب

عنّا مشى ملفى الأرامل والمساكين

وظل الشّهيد حسين عبراته يهلها

ايشوف العزيزه و قلبه اتْصدّع لجلها

صاح اطرحوا اجنازة عزيزي عند اهلها

حطّوا النّعش و اتصارخت ذيج الخواتين

دارت على نعشه الحريم و قام لصياح

وامن اخوته ابكثر البواجي غابت ارواح

كلمن طلع من منزله فوق النّعش طاح

و حسين يتلهّف و يصفج راح ليدين

ابنعش الحسن طلعوا ابضجّه الهاشمّيين

جدّامهم شايل سريره وينحب حسين

ايقلّه يبو محمَّد ابفرقاك اشعبتني

و انت الذي طول العمر ما فارقتني

ياحسن يا ثاني الكسا وحدي اتركتني

و اليوم خويه فارقت يسراي ليمين

طلعوا بنعشه وبالمدينه علت ضجّات

وفرّن بدهشه والعويل الهاشميّات

و ابن الخنا مروان راح ايشن غارات

يتذكّر ايّام الجمل وايّام صفّين

وقدّم البغله وهيّج اضغان العدوّه

و اقرود اميّه و هاجموا بيت النبوّه

ونشرت شعرها اتصيح وين اهل المروّه

هيهات ما يتنفّذ امر الهاشميّين

يا شايلين النّعش ردّوا ابهلجنازه

البيت بيتي و تدفنونه بغير اجازه

طلعوا و الّا هالشّعر لازم جزازه

أضغان القديمه امخزّنه بالقلب تخزين

ظلّت تحشّم و انفجر بركان لَضغان

أرموا الجنازه بالنّبل عجّل يمروان

و سبعين نبله نشبت ابنعشه و لَجفان

و حسين يطلعها و يصبّ امدامع العين

ونشّف دمع عينه الشّهيد وقال ردّي

قصدي أجدّد عهد اخويه ابقبر جدّي

لولا الوصيّه اسباع من عدنان عندي

اندفنه ابجنب المصطفى و ليكون ترضين

وعبّاس يسمع وانتخى وجرّد البتّار

وقلّه يَبو السّجاد كلها ملكك الدّار

ننطرد من مروان عن حجرة المختار

و هاي السهام امركّزه بالنّعش يحسين

ياضنوة الكرّار رخّصني العزم هاج

خلني أروّي امهنّدي من دم لَوداج

قلّه اغمد السيفك يبو فاضل مَيحتاج

شيلوا الجنازه يم قبر ست النّساوين

تدري الكل منّا بيوم الضّيق مشهور

أنت يبو فاضل الغير اليوم مذخور

قلّه بعد يايوم قلّه يوم عاشور

نصبح ابذاك اليوم كلنا مستميتين

رخصه تسل السّيف هذا اليوم مالك

يومك مدوّن يالذي طابت افعالك

تقطع بذاك اليوم يمناك و شمالك

ونبقى بوادي كربلا كلنا مطاعين

اتبغّل جملها امن لَضغان الاوليه

وثارت الطّرد المجتبى بجنود اميّه

ركبت البغله واليسوق الرّجس مروان

و حفّت يمين اشمال بيها اقرود ذكوان

خلّوا ابو محمَّد هدف للنّبل والزّان

ياغيرة الله يم قبر خير البريّه

دقعد يَنايم بالقبر شوف الهضايم

وعاين ابعاصمتك طريدك صبح حاكم

ونعش الحسن قبّة نبل يا للعظايم

ريحانتك مطرود معظمها رزيّه

وحسين صابر صبر ابوه ابوقّعة الدّار

يشوف السّهام امركّزه والدّمع نثّار

وعبَّاس مد ايده على بتّاره وثار

ويصيح لحّد يالسّلاله الهاشميّه

سلّوا مواضيكم يفرسان الهزاهز

عمروا الكون وبالعجل لزموا المراكز

ياهو السمع بالنّبل يرمون الجنايز

ثوروا ابغيرتكم يَفرسان الحميّه

يحسين يامهجة الزّهرا و سر لوجود

من هالذي فوق النّعش يحسين ممدود

وهذا النّبل ينثر عليه وكلكم اقعود

لاحت علايمها يفرسان المنيّه

اتلقّاه ابو السجّاد و ادموعه يهلها

عبّاس خويه ثورتك ماهي محلها

لولا الوصيّه اعلوم لازم تسمع الها

لا تسل سيفك جاي يوم الغاضريّه

والأم تنادي وينها ارجالك يَمروان

لَيكون قوّه تدفن ابّبيتي العدوان

شيلوا الجنازه بالعجل يَولاد عدنان

والّا ترى اتهيج الاضغان الاوليّه

شالوا الجنازه و الشّهيد ايصيح ردّي

اشبيدي وانا هذا الخبر معلوم عندي

الدّار للزّهرا وهالمدفون جدّي

لكن اشبيدي امقيّد بقيد الوصيّه

شالوا النّعش وحسين هدّأهم اخوانه

وسل النّبل ياويح قلبي من اجفانه

ساعة عظم ماجان لاقاها ابزمانه

بيها رجع من سفرته ابن الحنفيّه

محمَّد من الطّايف رجع لرض المدينه

ونعش الحسن ساعة وصوله شايلينه

طب للمنازل شافها وحشه وخليّه

وعرّج على المسجد وشاف اوغاد اميّه

بسلاحها ومتجمّعه حول الزجيّه

و راح البقيع وشاف خيّه يدفنونه

أقبل على اخوانه و هل امدامع العين

وقلهم جنازه ومعركه والنّاس حزبين

و هلّي تدفنونه يخويه بو علي امنين

قال الحسن و اوغاد اميّه طاردينه

مطرود عن جدّه الهادي و عن جواره

و مروان جانا عد قبر جدنا ابغاره

ونفثت علينا اسمومها بنت الاماره

و احنا ابمصيبتنا وهم هجموا علينا

ونعش أبو محمَّد يا محمّد صار نيشان

عِد قبر جدنا المصطفى للنّبل والزّان

اتكنّى و نده قلّت شيمكم يال عدنان

أجلاف اميّه عن الهادي يطردونا

بالعجل يليوث الحرب سلّوا المواضي

مروان يحكمنا وحكم السّيف ماضي

لحّد يبن حيدر بهذا الحال راضي

يرمي النّعش مروان خويه وتتركونه

قلّه عدانا اللوم يابن الحنفيّه

تدري بخوك حسين مَيهاب المنيّه

لكن عضيدي الحسن قيّدني ابوصيّه

و قلّي الدّم لَيكون لجلي تسفكونه

لولا الوصيّه جان شفت اشنفعل اليوم

ولازم ابجنب المصطفى ندفن المسموم

قلّه اشعبتني ابهلخبر ياكنز لعلوم

ثاري الحسن يانور عيني سامِّينه

مسموم ريحانة الهادي وما تثورون

عن هالذي سمّه وفجعنا ماتفتشون

ايروح الحسن غيله ولا يتعّمر الكون

هذي دسايس شجرة الخبث اللعينه

شالوا الجنازه و وصّل ابن الحنفيّه

و شاف المصيبه اقبال عينه و الرزيّه

فاض البقيع و فاضت ابرور المدينه

و اشبال حيدر بالوقار و بالسّكينه

طلعوا من المسجد بخوهم شايلينه

و فرّت ابضجتها الحريم الهاشميّه

من شاف هالحاله ترجّل عن نجيبه

ومن شافهم كلهم هواشم شق جيبه

و شاف الشّهيد حسين و اتعلّى نحيبه

و ناداه خبّرني ابعجل يَبن الزّجيّه

يحسين خبّرني عَلَي دنياي وحشه

كلكم حريم و زلم فرّيتوا ابدهشه

و وين الحسن لَيكون هذا النّعش نعشه

وصارت الضجّه وغابت الشّمس المضيّه

قلّه نعم هذا الحسن عزنا و ضمدنا

و هالدّار ورث امنا و بيها قبر جدنا

وبيها الاجانب تندفن واحنا انطردنا

وانا يخويه مقيّد بقيد الوصيّه

حن وجذب حسره وصب الدّمع سجّام

ويلاه من شمتة عدونا اُوجور لَيّام

باجر بشاير ياعضيدي توصل الشّام

وتفرح هند والحزن سهم الفاطميّه

حطّوا النّعش ويلاه ياساعة القشره

من نزّلوا مهجة الزّهرا وسط قبره

وحسين دنّق وانتحب والعين عبرى

يقلّه يخويه وداعة الله هاي هيّه

وهالوا تراب القبر وانهدّت اركانه

و روّوا اتراب القبر بالمجمع اخوانه

و شمّامة الهادي الذي وجّر احزانه

رجعة البيت وشوفته داره خليّه

و شوفة اجعيده جالسه شبه الحزينه

تترقّب الانعام من نسل اللعينه

و زينب اتنادي وين اخيّك ياولينا

مظلم البيت و موحشه الدّنيا عليّه

اتخوصر على قبر الحسن مهجة المختار

يجذب الونّه والدّمع بالخد نثّار

اينادي يخويه موحشه ابيوتك عليّه

والدّهر بعدك يا عضيدي خان بيّه

مقدر على طبّة المنزل هالعشيّه

وانظر ايتامك بالكسيره ياحما الجار

شاقول لو قالوا يعمّي وين ابونا

وشالبصر لو زينب تلقّتني حزينه

تلطم على الهامه وتقول الحسن وينه

اتضيّج عليّ الواسعه و اتزيد لَفكار

اتزفّر و صاح و عبرته تجري بلخدود

ودّعتك الله يالذي باللحد ممدود

من هالسّفر ماظن يبومحمَّد لنا اتعود

خلّيت قلبي الفرقتك متوجّر ابنار

حطّ اللبن فوق اللحد والدّمع سافح

و التّرب هاله و اخوته ضجّوا بصوايح

هذا يجود وذاك فوق القبر طايح

وحسين من كثر البواجي وقف محتار

وارى عضيده في التّرب والقلب مكسور

و امن المصيبه حول قبر المجتبى ايدور

واشبال هاشم حول قبره ولالها شعور

و كلمن الوجده يصفج اليمنه بليسار

ردّ السّبط تجري ادموعه فوق خدّه

اينادي عضيدي استوحشت دنياي بعده

و الله الأخو يكسر ظهر خيّه ابفقده

دهره يضكّه و يمتزج عيشه بلكدار

هذا الحسن مدفون يابن الحنفيّه

غايب يَوَسفه ولا حضرت الهالرزيّه

اتخوصر على قبره يهل امدامع العين

يجذب الحسره وينتحب ويصيح يحسين

هلّي سطى وسم الحسن يليوث من وين

وخلّى البتوله بالقبر تنصب عزيّه

ونادى يبو محمَّد أسف ماجنت يمّك

و انت طريح افراش تتلظّى ابسمّك

ياليت ضمني قبرك أُولاجان ضمّك

معلوم سمّك من دسايس آل اميّه

امن النّوم دقعد يالذي حلوه اطباعك

انت الذي لو تامر اعلى الموت طاعك

ياحيف خويه ماحضرت ساعة اوداعك

و افديك يا مهجة الزّهرا امن المنيّه

خويه يبو محمَّد شعاين عقب فرقاك

ابيوتك يخويه موحشه و ظلمه بليّاك

وسفه يبو محمَّد علينا شمتت اعداك

واحنا تهيج احزاننا صبح ومسيّه

ماطالت ايّامك يبحر الكرم والجود

لا تفرح العدوان عدنا امن الفخر طود

ماينثلم عزنا وابو السجّاد موجود

يتشيّد العز بالسّلاله الفاطميّه

وعاين أخوته وصاح لا يزداد همكم

أشبال حيدر والعدا ترهب هممكم

بس يالهواشم لا تفوت العدا ابدمكم

بالعجل دركوا الثّار يليوث الحميّه

و هالوا على سبط الرّسول اتراب قبره

و امّا الشّهيد حسين يتنحّب ابعبره

ومحّد سمع منّه يقول انكسر ظهره

وحوله اليوث امن السّلاله الهاشميّه

لكن وقفته عْلَى البطَل مقطوع لزنود

وشاف العلم مرمي و يمه امّزق الجود

صاح انكسرظهري وبقيت وحيد مفرود

دنهض يعبّاس العدا دارت عليّه

عاشور هلّ وبالضّماير شب نيران

راح الفرح عنّا وغشانا بظلمة أحزان

صارت مآتم في السّماوت العليه

و بنت النّبي اويا الحور نصبت له عزيّه

والكل ينادي ياغريب الغاضريّه

وهذا ينادي واشهيدٍ مات عطشان

لبست الشّيعه ابكل وادي اثياب لسواد

عافت المكسب والحزن بالقلب وقّاد

نصبت مآتمها على بو زين لعباد

تبذل على ابن المصطفى غالي الأثمان

و اتشوفها لو طبّت الماتم ابزفره

هذا يهل دمعه وهذا يجر حسره

هذا يدق راسه ويلطم فوق صدره

والكل عليه امن الحزن واللطم عنوان

محّد تولّع بالبكى ابكل البريّه

مثل الحزين الواله ابن الحنفيّه

هل الهلال و هلّت ادموعه جريّه

بس ينتحب ويصيح ياوحشة هلوطان

سافر أبو السجّاد يقطع بيد لبرور

قاصد للعراق وتركها موحشه الدّور

خايف على اخواني أنا مْن أيام عاشور

الله يعوده الهالمنازل قمر عدنان

وحق راسك المقطوع ياشمس المضيّه

للحشر ماننسى مصابك و الرزيّه

ننسى و سهم الصاب قلبك ياذرانا

ذلنا و فت اقلوبنا و نكّس لوانا

وتقطيع جسمك بالثّرى قطَّع أمعانا

وخيلٍ وطت صدرك على حر الوطيّه

داست يَبن حيدر على اصدور لمحبّين

و بقلوبنا اتخلّيك عاري ابغير تجفين

و ذبح الطّفل ننساه هذا امحال يحسين

ولا ينّسى اركوب الوديعه عْلى مطيّه

يحسين كلنا نعتني لك كربلا انزور

بس ما نوصّلكم و ننظر ذيج لقبور

ندخل الحاير بالحنين و لطم لصدور

و انحوم مثل الجلَب لوفارق حميّه

ونشوف عد رجلك علي يحسين مدفون

و اتهيج زفرتنا و يقرّح ماي لعيون

و نتذكّر اوقوفك عليه ابقلب محزون

محني الظّهر و اتصيح يَبني قطعت بيّه

و ابكل فريضة اتروح للحاير الشّيعه

و من مشهدك تطلع وتقصد للشّريعه

اتزور لقمر لَزهر أبو جفوف القطيعه

شيّال رايتكم و سور الهاشميّه

و بعد الزّيارة للمخيّم بالبجا انعود

بس ما نطبها اتسيل دمعتنا بلخدود

نذكر امنادى بن سعد ياقوم فرهود

حرقوا الخيم سلبوا الحريم الخارجيّه

نذكر اوقوف مخدّرتكم شابحه العين

للمعركه والخيل حاطت بالصّواوين

اتنادي يعدوان الله الله ابهالنّساوين

لا تروّعوها راقبوا رب البريّه

يامهجة الزّهرا وشمّامة المختار

عفت لَوطان و جيت من جملة الزوّار

يحسين مالبّاك جسمي يوم لطفوف

عند استغاثاتك وحولك حايطه صفوف

حظّي قعد بي عن امصافح ذيج لسيوف

فازوا بْنصرتك ياشفيّه صفوة انصار

و انجان مالبّى لك الساني يصنديد

يوم اوقفِت محتار مابين العدى اوحيد

و اتعاين الشبّان صرعى ابغير توسيد

لبّاك قلبي يا بقية بيت لَطهار

قلبي أجابك و انفطر و اتفجّر ادموم

وسمعي بسماع مصيبتك والنّوح كل يوم

وعيني أجابت واهمَلت منها الدّمع دوم

قلبي و هواي اوياك و المهجه اشعَلت نار

كعبة الشّيعه امصيبته اتفت الجلاميد

ذاك العزيز اشلون يبقى بحرّة البيد

من حول جسمه مصرَّعه ذيج الأماجيد

دمهم غسل و اجفانهم سافي مْن لغبار

يا شيعة الكرّار مافيكم حميّه

ما جان أخذتوا اجفان رحتوا الغاضريّه

شلتوا حماكم لا تدوسه الاعوجيّه

و جبتوا حريمه لا تروح ابيسر كفّار

قوموا نروح الغاضريّه وناخذ انعوش

ونواري أجساد بقت طعمه للوحوش

زين لعباد إمامكم بالمرض مدهوش

انعزّيه باهله ومن خيمهم نخمد النّار

قوموا نروح الكربلا انغسّل الشبّان

ونشيل جسم حسين ونفصّل له اجفان

و راسه يشيعه اننزّله عن راس لسنان

والحرم نرجعها و لزينب ناخذ خمار

ظلّت تراهي امسلّبه وحسين مطروح

وعدها عليل ومن ونينه يذوّب الرّوح

حرمه بلا والي تنادي وين أنا روح

و حسين باليني ابيتامى ازغار وكبار

حرمه وغريبه ودمعها بالخدّ همّال

واصيح وين اهلي وعمامي اتعاين الحال

عندي جنازه امعطّله ولا عندي ارجال

اسمعتوا يشيعه هالمصايب مثلها صار

و انجان قلتوا ابن النّبي مَيْجفنونه

هذا شهيد و من دماه ما يغسّلونه

ذاك الشّهيد اللّي يظل ما يسلّبونه

وامّا المسلّب ما يوارونه بلَستار

و انجان قلتوا حسين متغسّل ابدمّه

هذا صدق لكن اموزّع صار جسمه

و اعضاه كلها امفرّقه قوموا نلمّه

و ابقلوبنا اندفنه ولا يبقى بلوعار

من هالذي مقطوع راسه ياضيا العين

بس مانظرته انفطر قلبي وصار نصّين

من هالذي شوفة احواله تشعب الرّوح

جسمه امبضّع ياعزيزي وكلّه اجروح

بس عاينت له سال يابني الدّمع مسفوح

اخبرني هَلمقطّع يَنور العين من وين

صاح الحسن و اتفجّرت عينه بلدموع

و اتحسّر و طوّح الونّه ابقلب موجوع

هذا عضيدي حسين منّه الرّاس مقطوع

ابنج يَزهرا جاي لا راسٍ ولا يدين

هذا الذي ذبحوا على صدره فطيمه

وذبحوا اولاده واخوته وسلبوا حريمه

وشالوا على الخطّي عقب ذبحه كريمه

هذا الذي خلّوه عاري ابغير تجفين

هذا الذي داس الشّمر صدره بلنعال

و انذبح ضامي ما ارتوا من ماي لزلال

هذا الذي شالن حريمه فوق لجمال

من غير والي وقّفوهن بالدّواوين

و اتجدّد الماتم و دمعتها جريّه

و اتصيح يَبني هيّجت حزني عليّه=

هذا الغريب اللي انذبح بالغاضريّه

ايقلها نعم هذا يَزهرا اعزيزج حسين

اتناديه يَبني من قطع راسك و لجفوف

من كسّر اضلوعك يَعقلي بأرض لطفوف

من قطّع أوصالك يعيني ابضرب لسيوف

يا مهجتي مذبوح لا مطلب ولا دين

يحسين قلّي من قطع بالسّيف نحرك

يا نور عيني من وطى بالخيل صدرك

ومن سلَّب ايتامك وياهو حرق خدرك

وياهو الذي شتّت بناتي اشمال ويمين

اتزلزِل المحشر وقفة الزّهرا الحزينه

اتنادي يربّي القوم ضلعي كاسرينه

دخلوا علي البيت عدواني و ولوني

و قادوا علي ببنود سيفه و سقّطوني

و نحلة أبويه اتناهبوها و اطردوني

هجموا علينا ابدارنا ولا راقبونا

وعفت الدنيّه عقب ما فتّوا افّادي

وعمّم كريم المرتضى سيف المرادي

وردّوا عقب عينه و عيني على اولادي

واحد قضى مسموم عندي بالمدينه

وضل العزيز حسين بين اوغاد سفيان

وقاسى مصايب بعضها تشيّب الرّضعان

وسافر لراضي كربلا وانذبح عطشان

مرمي و اخوته عن اشماله وعن يمينه

إنتَ يَربّي العالم ابكل المصايب

ضلّت بناتي من عقب عيني غرايب

للشّام ودّوهم يسر بين الأجانب

و ابني علي بالقيد و الغل ماحنينه

تبدي الشّكايه والدّمع بالخد مذروف

بالحال ترفع طفل ابنها حسين ملفوف

و اتصيح شيبني يربّي يوم لطفوف

اشسوّى الطّفل من ذنب حتّى يذبحونه

مهجة عزيزي ياحكيم ابسهم مذبوح

و قلب الرّباب امن المصيبه صار مجروح

من شافته امغمّض ايعالج طلعة الرّوح

و فتّت اقلوب الهاشميّات ابونينه

و اتجر ونّه و الخلايق كلهم اوقوف

تندب و ترفع بيدها منديل ملفوف

ربّ انتقم لي مْن الذي قطّع هلجفوف

ياتي النّدا والنّاس كلهم يسمعونه

منّي يَبنت المصطفى طلبي الشّفاعه

لاخذ ابحقّج من الطّاغي و من اتباعه

و مْن الذي للدّار جاكم بالجماعه

و مْن الذي قاد الوصي و روّع بنينه

و مْن الذي بالباب منّج كسر ضلعين

و اللّي طبع جفّه على الخد وعلى العين

بشري يبنت المصطفى يم حسن وحسين

هَليوم وعد اقطام واجعيده اللعينه

هليوم يازهرا الوفا و اقبل الميعاد

آخذ ابحقّك من بني اميّه و بني زياد

ومن الذي في كربلا عفّر لك أولاد

و هذا العزيز انجان قصدك تنظرينه

وتنظر العرصه والدّمع يجري من العين

واتشوف ابنها حسين من حوله النبيّين

بين الخلق واقف بلا راس وبلا ايدين

و اتصيح وشهالفعل بابني فاعلينه

تصرخ ابصوت ايزلزل العالم و لَفلاك

و الحور ويّاها تضج و جْميع لَملاك

و تقول ياباقي البقيّه ما حضرناك

السّهم فات ولا حضرنا يوم جينه

واتعج جميع الرّسل حتّى آدم و نوح

و يخاطبون المصطفى والمصطفى ينوح

الله يعظّم أجرك ابسبطك المذبوح

وحيدر علي يبجي ويهل ادموع عينه

ياكربلا امصابج على المخلوق ماصار

مثله ولا يجري شبيهه بكل الادوار

أرد ابتدي و محتار و الله يامسلمين

واطلب أصلها منين جات مصيبة حسين

متنوّعه و متلملمه خبروني امنين

جف القلم بيدي وانا ظليت محتار

فكّرت واعرفت الاصل ناشي من بعيد

من بدر لكن بالسّقيفه زاد توكيد

و بانت طلايعها تلوح ابّيعة ايزيد

و شان العواصف من تثور اتقدّم اغبار

قدّم نتيجة هند ليزيد الوصيّه

نبّه شعوره وحذّره مْن ابن الزجيّه

وقلّه ابن هاشم ترى وانت ابن اميّه

وارض المدينه حاكمتها صبية النّار

وصلت رساله للوليد وبعث في الحال

و الكلّ تقهقر و السّبط لاقاه برجال

وقلّه الحجي بحقوق ماهو قول من قال

ياهو ابوه المرتضى وجدّه المختار

عنهم طلع مغضب وحفّت بيه شجعان

وظل بالقهر والذّل سليل الرّجس مروان

و بالليل راح القبر جدّه نور لَكوان

يقلّه ترى خانت الامّه والدّهر جار

اتردّد ثلاث اليال بالرّوضه المنيره

وتالي الليالي انبعث بدموعٍ غزيره

واعْلَى القبر من نام قصده يستشيره

وجاه الامر حتمي من الواحد القهّار

ضمّه الصدره وقال نور العين يحسين

بالاهل سافر بالعجل واتدارك الدّين

جنّي أعاينكم على الغبرا مطاعين

والحرم تمشي باليسر مابين كفّار

يحسين بجنان الخلد رتبه عليّه

بيها نجاة اهل الولايه الحيدريّه

مَينالها الّا الينذبح بالغاضريّه

واللي يظل جسمه رميّه بذيج لوعار

مَينالها الّا اليجتَل ابجفّه فطيمه

واللي على حرّ الظّما ينحزكريمه

و اللي تروح اعْلَى الهزل حسّر حريمه

عجّل احرزها وخلّص الشّيعه من النّار

مهجة الزّهرا فوق قبر المصطفى ينوح

ينادي من الدّنيا يَجدّي ملّت الرّوح

تعفّر على قبره وزفر زفرة المهضوم

غمّضت عينه و شاف جدّه ابعالم النّوم

ضمّه الصدره والدّمع بالخد مسجوم

و قلّه ابحريمك و لَولاد الكربلا روح

يحسين سافر و اترك اديارك و لَوطان

جنّي اعاين جثّتك للخيل ميدان

و الرّاس مثل البدر يزهر فوق لسنان

من تلتفت زينب تشوفه اقبالها يلوح

اتنجّي يعقلي ابذبحك الشّيعه من النّار

ابذبح شبّانك و ذيج اطفال لصغار

وتصير لجلك كربلا مقصد الزّوار

من عالم الذّر هالأمر مكتوب باللوح

يحسين سافر بالحراير و النّساوين

تنذبح يبني ونسوتك تدخل دواوين

خل تنصب الشّيعه النّياحه عليك يحسين

وانتَ التنجّيها ويصير الذّنب مصفوح

بالله ارد اناشدكم يشيعه ردّوا اجواب

لو تنفني جملة الشّيعه شيخٍ وشاب

يقابل اتْعفّر خدّ ابو سكنه بلتراب

لا والذي من قبل آدم علَّم الرّوح

أحلف ابحيدر لو انفنت جملة الشّيعه

مَتعادل اوقوف السّبط بيده رضيعه

يجذب الحسره وينظر اوداجه قطيعه

وطفله يفرفر مثل ذبح الطّير مذبوح

وحقّ الذي كسروا ضلعها امّ الأماجيد

نسوان شيعتهم طبق من غير تعديد

كلها مَتسوى ادخول زينب مجلس ايزيد

ويّا اليتامى وزندها بالحبل مجروح

ودّع قبر جدّه ورجع والقلب ممرود

يم روضة الزّهرا يون ونّة المجهود

اتمرّغ على الرّوضه وقلبه من الوجد ذاب

و عفّر اخدوده ويل قلبي ابذاك لتراب

ينادي عزيزج يابتوله امن الهضم شاب

متحيّر و بالوطن ما يحصل له اقعود

هلّت ادموعه ولصق فوق القبر صدره

يبجي وينادي في أمان الله يزهره

مكسور قلبي امن الهضم و الله يجبره

ورد القبر خيّه وقلبه بحزن موقود

اتخوصر على قبر العضيد و يعلم الله

بَحزان قلبه يوم صاح اوداعة الله

هذا يخويه اللّي علينا قدّر الله

سمّك و ذبحي من قبل تكوين لوجود

و انتَ قضيت اللّي عليك امن المنيّه

و عالجت غصّتها وظل اللّي عليّه

و قصدي ابهالسّفره يخويه الغاضريّه

عندي خبر من طلعتي للوطن ما عود

خويه يبومحمَّد عَلَيْ رحب الفضا ضاق

و قلبي تراهو ذاب من لوعات لفراق

بَرض المدينه قبرك و قبري بلعراق

و رد للمنازل و الدّمع يجري بلخدود

نادى يدور المجد ظلّيتي خليّه

وطوّح الونّه وجاوبه ابن الحنفيّه

وقلّه اشعبتني ياغريب الغاضريّه

من وطن جدّك ياعضيدي بليل مطرود

عندك خبر يحسين بس اتسوق لَضعان

و اتشوف عيني البيت خالي من الشبّان

جسمي يذوب وينتحل من كثر لحزان

جرحك ينور العين ساطي وسط لجبود

خلني أشق جيبي ترى ماظل لي اشعور

ياليت قبل تشيل تدفنّي بلقبور

ولاشوف من شخصك خليّه وموحشه الدّور

شايل يخويه و للوطن ما ظنّتي تعود

اتحسّر محمَّد و انتحب و ادموعه اتسيل

و نادى اتخلّيني يخويه وعنّي اتشيل

ويّاك خذني جان تدري توقع حروب

تدرون بيّه من قبل يحسين مهيوب

والله لخلّي اقرومهم تمشي بلا قلوب

ضنوة أبوالحملات ما هاب الرّجاجيل

اتشيلون عنّي و دوركم تبقى خليّه

ظلمه و بيها ينعب اغراب المنيّه

و ابقى حليف الحزن و ادموعي جريّه

مقدر على هالحال يانسل البهاليل

قلّه و دموع العين تجري و قلبه ايفور

كلنا يخويه مفصّله النا ابكربلا قبور

ولا لك ويانا ياعضيدي قبر محفور

الله يما ادمومٍ ابوادي كربلا تسيل

لازم ابطف الغاضريّه يصير زلزال

ولازم تخوض اخيولنا بدموم لبطال

و تالي النّهار انظل ضحايا فوق لرمال

كلنا عرايا اتدوس فوق اصدورنا الخيل

هذا الذي قدّر لي الباري وأراده

يبقى على التّربان خدّي بلا وساده

ولا شوف لك ويّاي يمحمّد شهاده

صب الدّمع واصفق جفوفه وصاح بالويل

شبّيت نار ابمهجتي و زيّدت همّي

اتفوزون بيها و الحزن يحسين سهمي

و الله لخلّي الدّمع طول الدّهر يهمي

ولا بطّل امن النّوح لا انهار ولا ليل

قلّه تسلّه قال عنّي السّلوه ابعيد

لنصب الماتم و اصفج ابإيد على إيد

خايف على زينب يدخلوها على ايزيد

بعد الخدر والصّون تبقى مالها كفيل

أدري أظل مطروح برض الغاضريّه

وهالصّدر هذا يصير تحت الأعوجيّه

وكنّي بجسمي على الثّرى مرمي رهينه

و عبّاس خيّي تقطع اشماله و يمينه

وراسي على راس الرّمح يبرى الظّعينه

و زينب تروح اميسّره وتركب مطيّه

أبقى امجدّل والدّما مْن اجروحي اتسيل

و انظر ابعيني اعلى حريمي حايطه الخيل

و زينب تخلّيني غصب بايتامها اتشيل

و عقب الجلاله ايصير اسمها خارجيّه

هذي مصارع فتيتي و موضع اخيامي

و بهالكتر تضرَب و تتروّع أيتامي

و اهنا يحز نحري الشّمر واموت ظامي

وهذا الضّريح اللّي انحفر من قبل ليّه

بيده رفع تربه ودمع العين مسجوم

وقال احفظيها وفرض نظريها بكل يوم

و بس ماتشوفي اتغيّرت وانقلبت ادموم

ذاك الوقت دمّي انسفك بالغاضريّه

و انا ارد اشيل ابهالعيال اصغار وكبار

غصبٍ عليّه عايف اوطاني و لديار

ولا شوف دين الله يتحكّم بيه غدَّار

شرع النّبي يخفى ويظهر دين أميّه

ملزوم أنا افدي شرع ابويه ودين جدّي

بَولاد عمّي و اخوتي و جْميع ولدي

حتّى رضيعي وانا اضل معفور خدّي

وانذبح ظامي وينوخذ راسي هديّه

يحليلة المختار لج عندي وديعه

سلميها تالي للولد مفزع الشّيعه

مْن اليسر يرجع بالارامل و الفجيعه

و احنا ابسفرنا ننذبح كلنا سويّه

قوّض ظعونه من المدينه وسافر حسين

خايف ومن خلفه محمَّد وام البنين

وحالة محمَّد ياخلق تشجي الأعادي

مشقوق جيبه ويلطم الهامه وينادي

يحسين لَتسوق الظّعن ذايب افّادي

وكلما تلومه النّاس يصفج راح اليدين

امْن الوجد نشفت دمعْته ولو نهض طاح

وكلما يسلّونه جذب ونّاته وصاح

لحّد يسلّيني ترى منّي الأخو راح

كلكم متدرون ابمصابي يامسلمين

هلّي يقودون الظّعاين هالنّشامه

قلبي مهو باني عليهم بالسّلامه

خايف يرد هالظّعن بس نسوه ويتامى

ريّض لخيك بالظّعن يا قرّة العين

يحسين سلطان البلد لو عزّم يشيل

تطلع النّاس اتشيّعه و تسرج على الخيل

وانتَ يسلطان المدينه تطلع بليل

يحسين ويّاكم اخذوني ياضيا العين

تتنومس ابنصرك يبو سكنه الأجانب

و آنه نصيبي الحزن وامقاسى المصايب

ليّه الفخر والصّيت بايّام الحرايب

قاسيت أنا اهوال الجمل وايّام صفّين

تدري بجسمي من المرض يحسين متعوب

و الجبد منّي امفطّره و القلب مشعوب

و انجان فارقني جمالك جسمي يذوب

مقدر أشوف ابيوتكم يَبن الميامين

فاطم تون وتسحب اذيال المصيبه

تنادي يبويه لا تخلّوني غريبه

اخذوني يبويه ولا تخلّوني بلديار

ينتحل جسمي وبالضّماير تشتعل نار

من شوفتي ابيوتك عليها سافي اغبار

جيف البصر لو نوّخ الوافد نجيبه

الوافد شقلّه لو لفى يا سر لوجود

خذني يبويه اوياك لو قلّي متى اتعود

ضمها الصدره والدّمع يجري بلخدود

وقلها يبنتي القلب زيّدتي لهيبه

ردّي المنازل يا عزيزه و اندبيني

وقطعي الرّجا منّي ولا تترقبيني

صاحت يبويه فرّقوا بينك وبيني

و صدّت لبو فاضل تنوح وتنتخي به

خرّت تحب إيده و راسه صعب المراس

اتقلّه يعمّي افراق ابويه ايشيّب الرّاس

اتوسّل ببويه حسين ياخذني يَعبّاس

روحي ترى راحت يَسردال الحريبه

متعجّبه منكم يفرسان الحميّه

كلكم غيورين و شيمكم هاشميّه

نشّف يعمّي دمعتي والتفت ليّه

وخاطب أبويه لا يخلّيني غريبه

قلّه يخويه هالبجا و النّوح فتني

و بنتك تراهي هالعليله ذوّبتني

قلّه شسوّي وكتبة الله قيّدتني

مقدر أشوف ادموعها ابخدها سجيبه

هذي مهي مكتوب تتودّى هديّه

ولا هي يخويه من سبايا الغاضريّه

ردّي يبويه وردّتك غصبٍ عليه

و طلبي من الله ايعودنا لديار طيبه

خرّت تحب رجله وتصيح بقلب مفتوت

خذني ترى ينتحل منّي الجسد واموت

مقدر على الوحده وعلى امعاين هلبيوت

ظل ينتحب والحرم ضجّت من نحيبه

ردّت ابحسرتها و ساق الظّعن عنها

نوبٍ تقوم ونوب توقع من حزنها

ومن رجعة اخوتها وأبوها انقطع ظنها

و تقول راح احجاب صوني منين أجيبه

عزّم يسافر مهجة الزّهرا الزجيّه

و قدّم وصيّة موت لبن الحنفيّه

ودّع اقبور احباب قلبه و عزّم ايشيل

غلقوا منازلهم وساقوا الظّعن بالليل

وخلّوا محمَّد يجذب الحسرات بالويل

وامّ البنين وفاطمه تنحب شجيّه

تالي الخمسه بو علي وركن الهدايه

سافر و خلّا ابيوتهم ظلما و خلايا

شال بعزوته وانغلق باب العطايا

اللّي تورده الوفّاد كل صبح ومسيّه

وافد من الوفّاد اجا الوعده الموعود

وصّل وشاف مضيف ابوالسجّاد مسدود

اتحسّر ونادى حيف يهل الكرم والجود

في وين رحتوا ودوركم ظلّت خليّه

ساعه و لن يسمع ونين ابقلب مقروح

و لنها حزينه ابدارها تنتحب و تنوح

وقّف ابّاب الدّار واجرى الدّمع مسفوح

وقلها يثاكل ردّي اجوابي عليّه

بالله اخبريني وين اهلها هالمنازل

وفي وين سبط المصطفى كنز الفضايل

وفتيان هاشم وين حلوين الشّمايل

بطلي البواجي و خبّريني اشهالقضيّه

قالت يوافد روح لاتوقف على الباب

كل هالمنازل خاليه والاهل غيّاب

ابكل العشيره شال ضنوة داحي الباب

قلها عسى متصير غيبتهم بطيّه

شهرين لو أكثر يمحزونه و يعودون

انعوِّد ابخيبتنا و نرجع من يرجعون

قالت يوافد لاتجيم و شد لظعون

خل المدينه وروح لرض الغاضريّه

ابحور العلم و الجود بالطّف روح ليهم

حث لظعون ولا أظن تلحق عليهم

عجّل قبل لايوصل الكوفه سبيهم

بلكت ابحور الجود ظل منهم بقيّه

شرّف ابن مكّه ومنى الكعبه بقدومه

شعشع الوادي كالبدر حوله نجومه

اهتزت الكعبه مرحِّبه بس ماوطاها

وامتلا الوادي من روايح طيب طه

حيدر أبوه الطَهَّر الكعبه وحماها

بسيفه وعزمه والشّرك فرّق غيومه

لازم الكعبه ابوعظه و لبّى الدّعايه

و وضّح من القرآن تثبيت الولايه

وبيّن شنايعها بني اميّه الدّعايه

وكل يوم للشّامات تتوصّل اعلومه

وامتلت بالحجّاج من مكّه الوديان

وحضرت الموسم من بني الاسلام لعيان

اُووصلت مكاتيب الخيانه من اهل كوفان

اُو وردت من الشّامات رايات المشومه

وصلت بشاير عصبة الطّاغي من الشّام

تظهر الحج و اسلاحها امغطّى بلحرام

و القصد منهم ياخذون ابثار لَصنام

و امحطّم اللات وهبل تسفك ادمومه

حافظ على حرمة الكعبه والصّبح شال

من يوم ثامن و اصبح العالم ابزلزال

و الخلق تحرم و السّبط مابين لجبال

يسعي الوادي كربلا ويحسب اليومه

عارضه محمَّد والدّمع يجري من العين

يقلّه يخويه اليوم ثامن والقصد وين

نازع احرامك و الخلق كلهم امحرمين

هلّت ادموعه بوعلي وهاجت اهمومه

يقلّه يبو جاسم مراد جنود اميّه

ايهِتكون بيت الله ابقتل عترة نبيّه

وحجّي بشهر عاشور برض الغاضريّه

اليوم القيامه شيعتي اتجدّد ارسومه

عاشر امحرّم عيدنا و احنا الضّحايا

و ترتفع ضجّات الحجيج من السّبايا

الله يذاك اليوم تتنكّس روايا

ويحوم طير البين ذاك اليوم حومه

ودعتك الله ياحمى الخايف يصنديد

قلّي يبو السّجاد وين اتعيّد العيد

لاوين قاصد يا عضيدي ابهالظّعينه