شبكة الإمامين الحسنين عليهما السلام الثقافية

الدموع الناطقة الجزء الثاني

في رثاء النبي (صلّى الله عليه وآله وسلّم(وآله (عليهم السلام)

الشاعر جابر الكاظمي

مقدمة

- قلّما يظفر المتأمل في سجل التاريخ بحادثة كحادثة الطف وقضية كقضية أبي الأحرار الإمام الحسين بن علي بن أبي طالب (عليهم السلام(في إثارتها للوجدان الجماهيري وتحريمها للعاطفة الإنسانية بصورة مستمرة وبنفس الزخم الذي زلزلت به ساحة الأحداث في المقطع الذي وقعت فيه تلك الملحمة الخالدة التي تراءت للناس أسطورة في ما عرضته من مشاهد وسطّرته من معاني وخلّفته من آثار.

ولئن كان للسماء دورها الرئيس في التخطيط لهذه القضية والتبليغ لها والعمل على إبقائها حية وهّاجة مهما تقدم بها السن، فإنها لقاعدتها التي تبنتها وتعهدت بالنضال في سبيلها هدفاً وفكراً ومنهجاً ورصيداً وعملاً، ودوراً لا يغفل في إدامتها وترسيخها في الألباب والقلوب، إنها ظاهرة تناغم أخّاذ بين هذه القضية التي توقد بحرارتها النفوس فتطفق تعبّر عما يجول فيها من رؤى ومشاعر وبين هذه النفوس التي جنّدت لأداء وظيفتها إزاء هذه القضية كالزيت يحترق بالنار فيموّنها لتبقى شعلتها ملتهبة وملهبة ما دام له وجود.

ويبرز الشعر من بين فعاليات هذه القاعدة بما له من قوة في صياغة الفكر وقدرة في التعبير عنها وفعل في التحريك لها ليحتل مساحة مرموقة ويملأ فراغاً لا يُملأ بغيره من ألوان التصوير والتعبير.

وهكذا كان للقضية منذ البداية وعلى طول الخط جيش من الشعراء رفعوا راية الدم وعلقوا أوسمة الطف وبرزوا بعد ما تشبعت بأبعاد كربلاء أذهانهم وجاشت بالمأساة نفوسهم ليصوروا في قصائدهم ما نهلوه من معين قضيةٍ كان العطش معلماً من معالم المظلومية والمأساة فيها، فكان لتلك القصائد الأثر الكبير في الدفاع عن قضية كربلاء وفي إحيائها وفي تعظيمها.

ومن هنا كان تأكيد الأئمة (صلوات الله عليهم(على هذا الحقل ودعمهم للدور الرسالي الذي يمكن أن يقوم به، فهذا ـ على سبيل المثال ـ أبو هارون المكفوف يقول: قال لي أبو عبد الله (عليه السلام): (يا أبا هارون أنشدني في الحسين (عليه السلام(فأنشدته فقال: أنشدني كما تنشدون ـ يعني بالرّقة ـ قال فأنشدته:

أمرر على جدث الحسين فقــــل لأعــظمه الزكيّة

قال: فبكى ثم قال زدني فنشدته القصيدة الأخرى قال: فبكى، فسمعت بكاءً من خلف الستر فلما فرغت قال: يا أبا هارون من أنشد في الحسين شعراً فبكى وأبكى عشرة كتبت لهم الجنة، ومن أنشد في الحسين شعراً فبكى وأبكى خمسة كتبت لهم الجنة، ومن أنشد في الحسين شعراً فبكى وأبكى واحداً كتبت لهما الجنة، ومن ذكر الحسين عنده فخرج من عينه من الدمع مقدار جناح ذبابة كان ثوابه على الله ولم يرض له بدون الجنة).

ويروي الكميت بن زيد فيقول: دخلت على أبي جعفر (عليه السلام(فقال: والله يا كميت لو كان عندنا مال لأعطيناك منه ولكن لك ما قال رسول الله (صلّى الله عليه وآله(لحسان: (لا يزال معك روح القدس ما ذببت عنا).

ويطالعنا الإمام الرضا (صلوات الله وسلامه عليه(فيما ورد عنه في مقام تجليل شعراء أهل البيت (عليهم السلام(بقوله: (ما قال مؤمن فينا شعراً يمدحنا به إلا بنى الله تعالى له مدينة في الجنة أوسع من الدنيا سبع مرات يزوره فيها كل ملك مقرّب وكل نبيّ مرسل).

نعم إنها رسالة الشعر حين ينطق ليحرّك الناس في خط الحق وليساهم في دحر الباطل وليؤدي دوره في مسيرة خلافة الله تعالى في أرضه.

و(الدموع الناطقة(حلقة من هذه الحلقات المتواصلة ذرفها شاعر موهوب من شعراء أهل البيت (عليهم السلام(وأنجبته الكاظمية المقدسة وهو الشاعر جابر الكاظمي، ويمثل الدموع الناطقة ديوانه الشعري الذي يتميز به من إبداع في التصوير وجمال في التعبير وإخلاص في العمل ورسالية في الطرح وجلال في المادة قد ملأ فراغاً كان لابدّ أن يسد تراثنا الأدبي الشعبي، الأمر الذي يبعث على أن نشدّ على يديه ونحيي جهوده ونكرم أعماله وندعو الله تعالى له بالقبول والتسديد.

في قصائد الگعدة

قم يا أبي

زينب يا علي اتصوّب گلبها

گوم استمع ونّتها وعتبها

خل تشكيلك آلام خانت بيها الايام

گوم استمع ونّتها وعتبها

* * *

يا علي زينب گبالك وگفت واحنت ظلعها

والدمع من جمر يجري وغاب الينشّف دمعها

وانت يا أبا الحسن تدري مصابك لزينب فجعها

هاللّيله ظلت حايره دمك ومدمعها جره

هاي العقيله الصابره اشلون يتغيّر وضعها

شوف الدهر لو خانت ايامه

يعيّن بالگلب رمية سهامه

صوّب زينب سهام خانت بيها الايام

گوم استمع ونّتها وعتبها

* * *

يا علي گلب العقيله اتگطّع بهمها وصبرها

خانت الايام بيها وغدر وياها دهرها

ومثل طبرة ابن ملجم هالدهر عگبك طبرها

سيف ابن ملجم من طبر هامتك يا فارس مضر

صاب العقيله بالاثر ومثل أمرك صار امرها

انت اتوسّدت فوگ الترايب

وهيّه موسّده بارض المصايب

من عگبك يضرغام خانت بيها الايام

گوم استمع ونّتها وعتبها

* * *

يا علي ابعين العقيله اتفايضن دمك ودمها

فوگ لوعة فگد جدها وفوگ محنة فگد امها

النوب فاجئها دهرها ابفگدك وزيّد المها

والاشد من هاي المحن من شافتك يا ابا الحسن

منحجب بثياب الچفن هذا الفجعها وهظمها

شيصبر الگلب يا داحي الباب

لو من صخر چان اتفسّر وذاب

حگّه الجفن مينام خانت بيها الايام

گوم استمع ونّتها وعتبها

* * *

يا علي زينب تحوم وحايمه عليها المصيبه

وصاحت بصوت المعاتب لا تخليني غريبه

الدار لو فگدت الغالي بعد هالغالي شيجيبه

والوالي منهو يعوّضه لو فارگ الدار ومضه

فراگك صعب يالمرتضه وليلة مصابك رهيبه

خابن يا علي ضنك وضنها

واستافه الدهر منّك ومنها

اشلون الجرح يلتام خانت بيها الايام

گوم استمع ونّتها وعتبها

* * *

يا علي بهاي المصيبه يعجز لساني يوصّف

زينب بدارك وسمعت صوت جبرائيل يهتف

انهدمت اركان الديانه والدمع بالعين يذرف

وزينب تحن بالفاجعه وبهالخطب متصدعه

اتعنّت لشخصك مسرعه شافتك عالموت مشرف

لمّن سمعت الهاتف ينادي

ذكرت لوعة الزهره والهادي

وحاطت بيها الأحلام خانت بيها الايام

گوم استمع ونّتها وعتبها

* * *

والاشد من هالمصايب يا علي مرّت عليها

بكربلا ويا ريت حاضر شخصك وينظر شبيها

لا اهل لا والي عدها وانچتل بالطف وليها

ما تدري يا عقد الوله

زينب غريبه بكربله

ومتحيره بهالعايله

* * *

بكربلا زينب غريبه والخيم بالنار تسعر

وابو اليمه اعلى الترايب جسمه متوذّر يحيدر

وعالخيم گوم آل اميه هجمت وسلبت الخدّر

يا حيدر وهذا الجره

بحال الحرم المخدّره

وبالغربه ظلت حايره

وفوگ هاي المحن كلها مشت للكوفه يسيره

* * *

طهران / ١٩٨٢

طريق الشهادة

ظعن الاحرار بالمجد سار

من المدينه لكربلا

يسطع انوار بالمجد سار

* * *

طلع من ارض المدينه لكربلا ظعن أبو اليمه

وياه انصاره وبنينه واهل بيته فروع عصمه

والظعن يمشي بجلاله وبالمجد عيّن القمه

راي أبو السجاد انطوه بالظعن يمشي لنينوه

وسلّمه لعباس اللوه قائد وموصوف عزمه

صاحب الجود مركز الزود

واتكفّل بنات النبي

من الديار بالمجد سار

* * *

عالظعن فوگ المحامل حايمه گلوب الهواشم

وراية العباس بيها ضربت استار الفواطم

وزينب ابهودج النور مطوّگه ابّيض الصوارم

شموس الكفاله ساطعه وزينب ابعفّه مبرگعه

ليله ويه الأكبر طالعه ورمله متكفّلها جاسم

وتزهي الخدور بهودج النور

وحسين ظل اعلى الظعن

شابح انظار بالمجد سار

* * *

حسين شاهد هالظعينه وياها روح القدس تسري

وسمع اصوات الشهاده بجنّة الفردوس تغري

جمع انصاره وبنينه وصاح الكم أكشف امري

صوت أبو اليمه مرتفع وللخطبه هاشم تسمتع

صاح ادري جسمي ينصرع وتسحگ الخياله صدري

وگوم الانذال تسبي العيال

وظعن اليتامه باليسر

بين الاشرار بالمجد سار

* * *

حسين من تمّم خطبته وبالورع وضّح الفكره

لنّه يسمع صوت عالي يمثّل انصاره والعتره

صاحوا احنه وياك نمضي وحتماً نتمّم الثوره

انصاره صاحوا يا شهم إمضي بمسيرك لا تهم

انصارك بحرب وسلم وبالدمه لدينك ننصره

احنه ماشين لنصرة الدين

اوجّهنه للطف بالظعن

نحيي الافكار بالمجد سار

* * *

حسين من شاهد صحبته وياه للتضحية اتعاهد

وشاف اهل بيت النبوه عازمين براي واحد

صاح هذا اليوم يوم البيه اظهار العقايد

هاليوم يوم التضحيه هاليوم نيل الامنيه

ندحر جيوش الطاغيه ونهدِم عروش المفاسد

بالوفه نسير وندري شيصير

دمنه يسجّل هالنصر

بحكم الاقدار بالمجد سار

* * *

وصلت ظعون الرساله ودخلت ارض الغاضريه

والگمر نصّب خيامه ووگف بحدود الثنيه

صفّت انصار أبو اليمه وگابلت گوم آل اميه

حالة العسكر تنوصف سبعين ضد سبعين الف

وآل الرسول بهالوصف شاهره سيوف المنيه

بالابه تروح تفتدي الروح

قائدها سبط المصطفه

بجيش الابرار بالمجد سار

* * *

دخلوا بوسط المعاره وضحّوا الارواح بيها

شاف أبو اليمه انصاره بالرمال مچفنيها

وشاف اهل بيت النبوه بفيض دمها مغسليها

واعلى النهر راعي العلم

والنار تسعر بالخيم

وانصاب أبو اليمه بسهم

سهم المثلث بگلب حسين وگلوب الفواطم

* * *

طهران / ١٩٨١ م

المواعظ

الدهر معروفه صفاته والبشر كلمن وذاته

هالقواعد بالشرع موجوده واليخالفهن عليه مردوده

والبشر كلمن وذاته

* * *

كل بشر تنكشف ذاته وضامره بساعة الشده

هاي مدروسه المعاني كل شخص من عُبَر حدّه

يصير رد الفعل تالي وينگلب هالامر ضدّه

شاهد الناس بكل عهد كلمن بفاكرته اجتهد

واليتّبع درب الرشد دومه متفوّق برشده

اتّبع هاي النصيحه بالك لسرّك تبيحه

والنصايح جوهره ومعقوده واليخالفهن عليه مردوده

والبشر كلمن وذاته

* * *

صوغ من العزّه حليه وبجواهرها تحلّه

گبل لا دهرك يطوّگ جيدك بطوگ المذلّه

وانصحك جدّام شامت للدمع بالك تهلّه

يفرح من تهل الدمع وما يصلح وياك ابوضع

لو تعلگ العشره شمع ما يرد سيفه اليِسلّه

تقلّد بجوهر صفاتك تنجح بسيرة حياتك

والصفات الساميه محموده واليخالفهن عليه مردوده

والبشرك كلمن وذاته

* * *

لو ردت تبگه بحياتك مطمئن بلا مشاكل

اجتنب شخص اليخون ولا تعاشر شخص جاهل

والجهل مثل السراب واليتبعه يعود فاشل

عاشر حليم وتعرُفه صاحب شهامه ومعرفه

وميميل عن درب الوفه لذروة الايمان واصل

هالشخص لو ما تحصله اتّخذ سيرة العزله

الجهل بافكارك تفصّم قيوده واليخالفهن عليه مردوده

والبشر كلمن وذاته

* * *

الدهر من يرفع كيانك بالك بهالرفعه تغتر

كل شخص لو صعد ربّوه اشما صعد بالعين يزغر

ولمن اعلى الگاع تهوّه يصير حالك مثل جعفر

بالدهر هارون امتثل غدّار مبني اعلى الجهل

واليصعد متونه فشل من على متنه أيتكوّر

اقسط بميزان فكرك گبل لا دهرك يغدرك

البشر بافكاره يقدّم شهوده واليخالفهن عليه مردوده

والبشر كلمن وذاته

* * *

لو شفت غرگان حال ورادك تعينه لنجاته

وانت تتمكن تنقذه وتگدر تردله حياته

ساعده ولا تطغه بامرك الطاغي فرعون بصفاته

من هالاوصاف اخذ الحذر لو گابلك موسى وظهر

ويغرگك بموج البحر بحكمته وآية عصاته

اجتنب فرعون ودروسه گبل ميجابهك موسى

هالمعاني بمصحفك معدوده واليخالفهن عليه مردوده

والبشر كلمن وذاته

* * *

لو شفت نمرود عصرك بالحقد تلتهب ناره

صبرك اخذه من الخليل وبالصبر مثّل ادواره

تشوفه برد وسلم يصبح هاللهب باول اشاره

إبراهيم بالباري ابتهل وگباله نمروده انخذل

بهالمرسل اضربلك مثل ادرس اهدافه وشعاره

هالنبي ما خلف عهده وسلم من ساعة الشدّه

واليعاهد لا يخون عهوده واليخالفهن عليه مردوده

والبشر كلمن وذاته

* * *

الدهر لو صافح يمينك لا تصافحها ليمينه

ملطّخه بدم التفايض من أبو اليمه وبنينه

اذكر مصاب الجواد الغدرته اعداء دينه

من اجل دينه وسنته واحياء منهج شيعته

اتخذّمت بالسم چبدته وروه الدين بماي عينه

چبدته البالسم گطيعه لاجل احياء الشريعه

بذل لإحياء السنن مجهوده واليخالفهن عليه مردوده

والبشر كلمن وذاته

* * *

گلبي ذايب بالنوايب والصدر مشحون بالهم

على مصيبة أبو الهادي هِل يدمع العين من دم

طاحت اركان العقيده وسورها العالي تهدّم

تاسع اليمه بهالوضع بالشمس جسمه منصرع

حسين الاصل هوّه الفرع وهالفرع معدور بالسم

بالغدر گطّعوا چبده مثل ما غدروا بجده

هالمواقف واضحه ومشهوده واليخالفهن عليه مردوده

والبشر كلمن وذاته

* * *

يا اهل بيت النبوه عليكم الايام جارت

بحكمة الباري لاجلكم بالسمه الافلاك دارت

لچن يا وسفه المصايب عالجواد بچفها شارت

بالاحقاد چتلوا شباب اليّمه

بذاك الحال يا ريت هاشم يمّه

وايشيعوه وبسرعه تدفن جسمه

ظل ثلث تيام جسمه فوگ سطح الدار مرمي

* * *

دمشق ١٩٨٠ م

يوم الكفاح

الحرب فرصه وما نخليها تفوت

وما نعوفك لو الف موته نموت

إحنه انصار العقيده وللمجد نضمن رصيده

وما نعوفك لو الف موته نموت

* * *

يا حسين انت الضمير الحطت بالمحور الاوسع

وهذا صوت التضحيات اليدوي بالعالم الارفع

نضحّي للدين ابدمانه وگبلك انقبّل المصرع

منهجك بينه منغرس ومنّك تعلّمنه الدرس

للمبدأ نضحّي النفس وللظلم هيهات نخضع

بالتصدّي وبالصمود وبالكفاح

نشتري المعتقَد ونبيع الارواح

ولفتح مكه نعيده وللمجد نضمن رصيده

وما نعوفك لو الف موته نموت

* * *

لا تنازل لا خنوع ولا تهاون بالمسيره

وفلسفة ثورتنه تظهر من نتايجها الاخيره

واليعز هاليوم دمّه باچر يأنبه ضميره

وفكرة الشخص الواقعي كل ثوره تحتاج لوعي

القائد الحر اللّوذعي هوّه ليقرّر مصيره

هاذي ثوره اتفجّرت ضد الطغاة

وشرّعت للبشر قدسية الحياة

نوضّح الفكره السديده والمجد نضمن رصيده

وما نعوفك لو الف موته نموت

* * *

يا حسين انصارك احنه وموقف الثوره تحتّم

گبلك انخوض المنايه ونكتب الاعراف بالدم

واليريد أيعيش خالد لو رخص دمّه ميهتم

بالحومه گبلك ننذبح والجرح لمن ينفتح

نترفّع انسمّيه جرح اسمه ثغر الحگ تبسّم

جروحنه شفايف وضحكت للخلود

والدمه الينهدر ميثاق وعهود

يوعّي هالناس البليده وللمجد نضمن رصيده

وما نعوفك لو الف موته نموت

* * *

يا حسين انت الكيان البيك هالعالم تحرر

كيمياء البشر انت ومعدنك بالثوره يظهر

والفلزّات اجمعتها وعنصرك عنصر الجوهر

معدن كرامات وشرف أيميّز الدر من الصدف

وعسكر ابن زياد انكشف انذلّله اشما راد يحذر

احنه انصارك ومنبايع يزيد

نضحّي بالدم وابد ميموت الشهيد

وللكفر منصافح أيده وللمجد نضمن رصيده

وما نعوفك لو الف موته نموت

* * *

انفتحت ابواب المعارك والسيوف علينه شارت

وهذا صيوان النبوه البي فلول الكفر دارت

زحفت علينه الكتايب بالطمع والجهل سارت

واحنه العلينه نفتدي وبمنهج الحگ نقتدي

ندحر الطاغي المعتدي اشما علينه الدنيه جارت

دنيه من غير الكرامه ما نريد

وللظلم هيهات نصبحله عبيد

العمر بالذل ما نريده وللمجد نضمن رصيده

وما نعوفك لو الف موته نموت

* * *

يا حسين امنحنه فرصه نريد ندخل للمعارك

بالحرب گوم آل اميه اشما تعدّد بالمسالك

هالنصر مضمون النه وهيّه توگع بالمهالك

امنحنه رخصه للحرب خل نگلب الحومه گلب

ومن تظل وحدك بالغرب يبتدي الموقف الحالك

نبيع دمنه يبو اليمه ونشتريك

ريت عدنه الف روح ونفتديك

وندرك الغايه البعيده وللمجد نضمن رصيده

وما نعوفك لو الف موته نموت

* * *

دخلوا انصار الإمامه لساحة الطف بهممهم

وشالوا الكوفه وزلمها وخيلها بصارم شيمهم

حاموا حدود المخيّم بالوفه وغيرة عزمهم

لسيوف أذنت للحرب وكبّروا بايمان الگلب

وسجدوا على وجه الترب والوضوء بفيض دمهم

جسومهم سجدت بساحات الكفاح

وروسهم ركعت على روس الرماح

وصوتهم ردّد نشيده وللمجد نضمن رصيده

وما نعوفك لو الف موته نموت

* * *

اشلون صفوة فخر ضحوا للنبوه وللإمامه

جروحهم صارت شفايف تبتسم لاهل الكرامه

بعد ام الدهر ما تنجب مثلهم بالشهامه

هالصفوه للمحشر يظل موقفهم

ورب الجلاله بهالفخر شرّفهم

والقلم عاللوح بكرم وصّفهم

يشهد التاريخ بيهم وبمواقفهم الحرّه

* * *

طهران / ١٩٨١ م

هتاف الأحرار

احرار نتحدى الظلم ونعيش احرار

ما نخلف بالعهود دم التضحيه شهود

نتحدى الظلم ونعيش احرار

* * *

احنه احرار العقيده وبالعزم نرفع لواها

يرفرف بأسم الجلاله وغايته يكسب رضاها

وصرخه من جوف الضمير ارتفعت ونسمع صداها

من دمنه نروي المعتقد هيهات نخلف بالعهد

وانفصّم قيود الشدد وللقيم نحمي حماها

ثوار ارتفعت بالمجد صرخة الثوار

بالموقف المشهود دم التضحيه شهود

نتحدى الظلم ونعيش احرار

* * *

قمة التاريخ احنه وللظلم نكشف اساسه

نقتدي ابنهج الشهاده عن بصيره وعن دراسه

بالحروب وبالثبات وبالشريعه وبالسياسه

والچان منهاجه الظلم عالذلّه حتماً ينرغم

تربّع على عرش الحكم وبالمظالم والشراسه

اضرار طاغي العصر تالي يشوف الاضرار

والشاهد الموجود دم التضحيه شهود

نتحدى الظلم ونعيش احرار

* * *

نصمد وندحر الطاغي وبالثبات نزيل حكمه

اشما يريد يجور لاچن لا تضن يدوم ظلمه

اشمحله لو صارت الوحده والتآلف بين الامه

اهل المجد من تأتلف كل انتهازي ينكشف

والواقعي ما ينحرف ابفيض دمه يسجل اسمه

ابرار لمن تتّحد هالامه الابرار

مجد اللي مضه يعود دم التضحيه شهود

نتحدى الظلم ونعيش احرار

* * *

نفتدي الدين ابدمانه ومستمر ركب الشهاده

وبوجهنه هالحرايب فتحت ابواب السعاده

تشوف كل مؤمن يجاهد حسب مقدار اعتقاده

والشخص من يملك شيم بالدم يدافع عالقيم

يدخل بساحات الهمم بكل ثبات وكل اراده

انوار من دمّه اليفيض اتشع الانوار

عنّ المبدأ يذود دم التضحيه شهود

نتحدى الظلم ونعيش احرار

* * *

واضح الشخص السياسي من طريقه ومن فكرته

ينظر بعين الصواب وأبد ميغيّر نظرته

ومن يحلّل وضع ثابت أبد ما يخطي ابخبرته

والواعي منهاجه الوفه للدين ابد ميخالفه

يسلك طريق المصطفه وعالوفه تهزّه فطرته

اسرار من نهج الرساله ظهرت اسرار

وسبطه البذل مجهود دم التضحيه شهود

نتحدى الظلم ونعيش احرار

* * *

حسين رمز الاعتقاد ومثل صبر الهادي صبره

ابچتله مفجوعه الأصول وعالثره جثّته موذره

وزينب بايد الاخوه وسِدّت عالترب نحره

صاحت صوت يحسين اجتنه العسكر

والاطفال مذعوره هامت بالبر

وانت اليوم جسمك يخويه موذّر

* * *

بين اشرار آل اميه عيلتك ظلت غريبه

ومن طحت عالغبره مرمي رفرف جناح المصيبه

راح صيوان النبوه والخدر شاجر لهيبه

يا مظلوم ريتك تشاهد حالي

بين الگوم متحيّره باطفالي

وبهاليوم منهدم سور العالي

غابت بدور السعاده والحزن بيّن علينه

* * *

طهران ١٩٨١ م

يا شبيه المصطفى

علي الأكبر طاح ما بين الخيول

والگطع نحره گطع نحر الرسول

بالنبي ينوصف عنّه ما يختلف

والگطع نحره گطع نحر الرسول

* * *

بكربلا موقف الأكبر ظهرت الاسرار منّه

يشبه المختار جدّه وأبد ما يختلف عنّه

كل صفات النبي الهادي انجمعت بملفظه وحسنه

يحمل صفات الساميه واضع نهج للتضحيه

بساحة الحرب الداميه بالنصر ما خاب ضنّه

بزوده الاكبر بالحرب لمن يجول

عسكر ابن زياد ينصاب بذهول

من دخل حومته اتوضحت غايته

والگطع نحره گطع نحر الرسول

* * *

أروع اوصاف المجاهد قدّم بساحة جهاده

وضع للاجيال منهج من صموده واعتقاده

مغرم بحب العقيده وللحرب يظهر وداده

من اصل حيدر هالفرع حافظ على حدود الشرع

بدم الوريد المنگطع سجل حروف الشهاده

للشهاده من الازل رايد ينول

هالموارد خافيه وتطلب حلول

من وگع عالثره وجثته موذره

والگطع نحره گطع نحر الرسول

* * *

الاكبر بساحة جهاده ضحّه من اجل العقيده

وبسْم أبو السجاد صوته ارتفع ويردّد نشيده

وانحسم موقفه الدامي وبالابه ضامن رصيده

شاب ودخل للمعركه وصوت الشهاده يباركه

لدرب العقيده سالكه وضامنه بگطعت وريده

حارت الافكار عن وصفه شتگول

والشرح عن سيرة الاكبر يطول

للشرح نختصر بالدمه منتصر

والگطع نحره گطع نحر الرسول

* * *

روّع صفوف آل اميه بصارمه وساعد يقينه

اومه عالموت بيساره وشار عالجنه بيمينه

استشهد لأجل العقيده وضحّه دمّه لأجل دينه

لمن صعد فوگ المهر للعطش يطويه بصبر

ضامي ورجع لبن الطهر يصيح وين حسين وينه

يصيح چبدي ملتهب يبن البتول

وادري بيني وبينك العسكر يحول

صبّره والده واتّجه للعده

والگطع نحره گطع نحر الرسول

* * *

والده ناداه يبني ابذل اعلى الموت جهدك

چاس من منبع الكوثر بالحشر يرويك جدك

ساعه وتنول الشهاده، خل يصيب العطش چبدك

ارشد لجدنه المصطفه يسگيك چاسات الوفه

ادري العهد ما تخلفه بالدمه توفيلي عهدك

دمع أبو السجاد عالاكبر هطول

يعلم بنور الولد بالطف يزول

للحرب من نزل بالسيوف انچتل

والگطع نحره گطع نحر الرسول

* * *

طاح الاكبر بالمعاره وداست الخيل اعلى جسمه

عالبعد من المخيّم ينظر عليه أبو اليمه

حسين لمّن شاف الاكبر عالثره مخضّب بدمه

عالوالد الموقف صعب من شاف الاكبر عالترب

والجسم بالدم منخضب حنه ظلوع الحزن يمّه

دموعه صبها اعلى الولد مثل السيول

وفوگ الاكبر شابچه رماح ونصول

طايح ابمصرعه وجثته مگطعه

والگطع نحره گطع نحر الرسول

* * *

حسين من شاهده لابنه من دمه الهامه تعفّر

صاح يا هاشم اسرعوا وبدليله النار تسعر

ساعدوني اعلى المصيبه وشيلوا جثة علي الاكبر

وامّه اطلعت من الخيم مرعوبه وتنادي بألم

دلاّلي باللوعه علَم ومثل جسم ابني توذّر

تنادي حالك يا شهم اصبح مهول

ابطيحتك يا فرع مفجوعه الأصول

الوالده حايره والولد عالثره

والگطع نحره گطع نحر الرسول

* * *

ليله صاحت صوت يبني من شفت جسمك رميّه

اهجس بيوت الكرامه بكربلا انهدمت عليّه

لليسر أمشي واعوفك نايم بحجر المنيّه

ليله الغريبه بكربلا مرعوبه

واصرخت صرخه ويه الدمع مصحوبه

جثة الاكبر يا سبب مخضوبه

والگطع نحره گطع نحر الرسول بهالمصيبه

* * *

طهران ١٩٨٢ م

لمن الشموع

المن هالعرس منصوب جاسم منذبح والجسم مسلوب

المن هالعرس منصوب

* * *

انحنت بالصيوان رمله والحزن احنه ظلعها

تصيح يا جسّام يبني چبدتي مصابك گطعها

يولدي ومن دم وريدك عيني يتفايض دمعها

رمله لولدها تحشمه بصوت المصيبه تكلمه

حنتك صارت بالدمه وحوفتك طفّوا شمعها

أقبل باللذي مكتوب

حكمه واقتضت انظرك مصيوب المن هالعرس منصوب

* * *

اقتضت يا عرّيس يبني حكمة الحق والاراده

امشي للكوفه يسيره وانت بحجور الشهاده

وشمعة الدين بوجودك تزهر بنور السعاده

وجثتك يا شبل الحسن متغسّله بدم المحن

والترب صارتلك چفن ومنها صارتلك وساده

جسمك بالدمه مخضوب

يبني وزفتك فرسان الحروب المن هالعرس منصوب

* * *

اشلون زفة عرس صارت الك يا فخر الهواشم

بدال شمعات الزفاف انرفعت رماح وصوارم

وحافر خيول آل اميه طبول صارتلك يجاسم

ونثّارك سهام الحرب وبفگدك يذوب الگلب

لمن طحت فوگ الترب گلبي ظل عليك حايم

گلبي من الفراگ يذوب

كل شي حسبت بس فگدك ممحسوب المن هالعرس منصوب

* * *

يبني ما حسّبت اشوفك دامي وموسّد الغبره

بهامتك طبرة الازدي آه يبني اشلون طبره

وبدليلي جروح فگدك مو جروح تگول جمره

بدمّك لنصرك سجّلت وبهالشهاده حصّلت

للجنه ادري من دخلت تلگّتك امّك الزهره

مدمع فاطمه مسچوب

وامّك نادتك والگلب مرعوب المن هالعرس منصوب

* * *

فرح دلالي يجاسم من طحت فوگ الترايب

صبرت أنت اعلى المنيه وآنه أصبر عالمصايب

بعيني شفت هلال سعدك منحجب بالدمه غايب

بالحرب صارت غيبتك وبگلبي طفّوا شمعتك

ذابت الروح بفرگتك ومثل گلبك گلبي ذايب

گلبي بجمرتك منشوب

انادي والدمع بالصرخه مصحوب المن هالعرس منصوب

* * *

يا ثمر روضة حياتي يللّي ضحّيت بحياتك

حقّقت كل امنياتي يللّي حقَّقت امنياتك

وثبتت اركان الديانه بالطفوف بتضحياتك

دخلت الحروب الداميه وحقّقت اعظم امنيه

ونجحت الفكره الساميه من دنت ساعة وفاتك

بهاي الثوره يا مهيوب

حصلت الوسام الالك منسوب المن هالعرس منصوب

* * *

رمله من شافت ولدها عالثره مغسّل بدمّه

فاض دمع العين منها مثل فيض جروح جسمه

مثل ما شافت ولدها منذبح شافته لعمّه

جسم أبو اليمه اعلى الثره

متخضّب بدم منحره

وخيامه ظلّت مسعره

اشلون حالة حزن مرت عالحرم بالغاضريه

حايره بفرگة وليها وجارت عليها اميه

وزينب بصوت المصيبه صاحت بونّه شجيه

وين التكفّل عيلتي

وين الينشّف دمعتي

وين اليطفّي خيمتي

وين اخويه اللي كفلني وين الاكبر وين جاسم

* * *

طهران - ١٩٨٢ م

نداء الكفيل

هاي رايه ارتفعت بوادي الطفوف

اشتريها بدمّي وبگطع الچفوف

ولو عطش گلب اليتامه اگلب الكون ونظامه

اشتريها بدمي وبگطع الچفوف

* * *

گمر هاشم صاح صوت اليوم اظهر اعتقادي

عزم حيدر اصل عزمي وملتزم راية الهادي

لنّه يسمع صوت اخته من الخيم طلعت تنادي

واصرخت صرخه ويه الدمع يا عمد بيتي المرتفع

حد سيفك بطرف الظلع واحصد رگاب الاعادي

من سمع صوت اخته من بين الخيام

صاح هذا اليوم يوم الانتقام

وسمعت الحرّه كلامه اگلب الكون ونظامه

اشتريها بدمي وبگطع الچفوف

* * *

سمع صوت اخته تنادي يا سفينة نوح وينك

ترضه طوفان آل اميه يحول ما بيني وبينك

هاك اخذ سيف العقيده وركّزه بقبضهَ يمينك

ومن تبتعد عن الخيم آنه اكفل أيتام وحرم

ولو صوّب عيونك سهم اخذ عيني بدال عينك

گلها يا بت علي تشوفين الخيول

اليوم اصوغلها بدمه العسكر حجول

وبالدهر تبگه علامه اگلب الكون ونظامه

اشتريها بدمي وبگطع الچفوف

* * *

جاوب اخته بصوت عزمه ولاهبه بجسمه الحميّه

الباري خصّص ملك صالح يقبض ارواح البريه

وآنه خصّصني الإله بقبض ارواح آل اميه

لازال گلبچ منعطب لو اطفي جمرات الگلب

لو اگلب الحومه گلب واگطع العلگمي وميه

اليوم نهرين اخليهن جاريات

نهر من دم العدو ونهر الفرات

والگلب اطفي ظرامه اگلب الكون ونظامه

اشتريها بدمي وبگطع الچفوف

* * *

شال جود الماي بيده مثل ما شال الحرايب

للحرب لمن تعنّه الحومه راواها العجايب

بيده سيفه الموت ضيفه واخذ حيفه من الكتايب

ليث وحمل بيده الاجل لمن نزل كف الوجل

الجيش انذهل لمّن وصل والنجم من سيفه ثاقب

گمر هاشم لازم حدود الخيام

يا هو يگدر يوصل لحد الايتام

سيفي بالحگ التزامه اگلب الكون ونظامه

اشتريها بدمي وبگطع الچفوف

* * *

السيفه سلّه الجمع ذلّه وحمل حمله الجيش شلّه

بذل جهده وعبر حده وگف وحده يحامي اهله

الرمحه شاله الجيش هاله النصر ناله وبي تجلّه

شوف الگمر يم النهر نال الظفر من انحدر

بيده شهر موت الحمر ابچفّه ضرب السيف يحله

صاح صوت وزلزل العالم صداه

والاملاك البالسمه صاحت وياه

تضحيه لاجل الإمامه اگلب الكون ونظامه

اشتريها بدمي وبگطع الچفوف

* * *

بيده حامل سيف فاصل غضب نازل عالمنازل

الحرب داره وشعل ناره واخذ ثاره بلا تنازل

الحومه شبها حين طبها العالي ذبها على السافل

بزوده الشهم صد الزلم بيده الحتم من يغتنم

اصل الحلم روح العزم للعقيده بعزمه كافل

ملك ماي المشرعه بهمّه وصمود

ونفذ سهم الفاجعه وصوّب الجود

ورفع صرخة انتقامه اگلب الكون ونظامه

اشتريها بدمي وبگطع الچفوف

* * *

ما گدر للخيم يرجع وضحّه روحه لاجل دينه

وانشهر سيف المنيّه وگطع يسراه ويمينه

عالنهر سهم ابن كاهل صاب للعباس عينه

والگمر طاح بمصرعه

وزينب لگت عالمشرعه

چفوف الكفاله مگطعه

وراح أبو السجاد مسرع حنه ظلع الحزن يمه

* * *

طهران - ١٩٨٣ م

ابناء علي (عليه السلام )

نقارنهم بالأفكار النبوه وحامي الجار

يا هو الوفه بميعاده ومثله ضحّت اولاده

خل نكشف هالاسرار النبوه وحامي الجار

* * *

يا علي كونّك ربك حليه من جوهر بهاءه

ونوّرك من نور ذاته ونورك يشع بضيائه

ومنحك أعلى المراتب فوگ رسله وأنبيائه

نبدي من آدم بالشرح موقف أولاده متضح

قابيل ابد ما منصلح غدر هابيل بغبائه

اريد انشد يقابيل

ليش غدرت هابيل

شوف بكربلا الاخوه تتفازع على لنخوه

وضحّت لجل الاطهار النبوّه وحامي الجار

* * *

يا علي انت المعالي وينه ليضاهيك وينه

خل نقارن ويّه نوح نشوفه من سوّاه السفينه

راده لابنه وياه يصعد وابنه متزعزع يقينه

كنعان ابن نوح ابتعد عن السفينه وما صعد

وبوالده خان الولد بفعله خالف امر دينه

اريد انشد ابن نوح

يگدر يفتدي الروح

ريته بكربلا يحضر وينظر موقف الاكبر

افتدى بروحه للاخيار النبوّه وحامي الجار

* * *

يا علي زمام العوالم بيدك وحكمك يديره

موقف سليمان خل نشاهده بعلم وبصيره

الباري بالحكمه هداله عرش بلقيس الأميره

سليمان حصّل عالحكم وبلقيس لامره تنرغم

ما شاف ذرّه من الظلم ولا عبر فتره خطيره

خل ينظر سليمان

جاسم على التربان

ذبيح بليلة الحنه وبهالعرس متهنّه

ونظل نعدّد ادوار النبوّه وحامي الجار

* * *

يا علي بسيرة حياتك يعجز لساني يوصّف

ويّه يعگوب ارد اقارن واليحكِّم كون ينصف

للعّب ارسل اولاده وبالحقد خانوا بيوسف

هالموقف اصبح متضح يحتاج ابعاد وشرح

يوسف عدل ما منذبح ليش ابوه دموعه تذرف

على يوسف العبرات

بعده عدل ما مات

تعال وشوف أبو اليمه جسمه تغسّل بدمه

وگبله افتدت الانصار النبوّه وحامي الجار

* * *

يا علي صبر البگلبك ظهر من صبر الجلاله

نقارنك ويّه الخليل ونحكم بحكم العداله

انشاهد اسماعيل ابنه للذبح مندهش حاله

اشما راد يظهر طاعته ما وصل سيف لرگبته

راحم الباري بحالته وكبش عن ذبحه فداله

من محكم التنزيل

خل ينظر اسماعيل

لگمر عدنان ويشوفه ذبيح مگطعه چفوفه

وضّح درس الاحرار النبوّه وحامي الجار

* * *

يا علي صبر الاله ابگلبك انخزنت اسراره

وموقف إبراهيم خل انواصله ونعرض ادواره

انشوف نمرود اللّعين اشلون لمّن شعل ناره

والنار لاهبها اعتله ودور الخليل انواصله

برد وسلم صارت اله وانطفت باول اشاره

نيرانك ينمرود

بالطف ردّت ردود

حسين التهب صيوانه وبكل گلب نيرانه

وتألموا بهالنار النبوّه وحامي الجار

* * *

يا علي كل نبي ومرسل الك سايل دمع عينه

يا هو مثلك ضحّه روحه وأهله وأمواله وبنينه

ويا هو من الرسل ابنه للنجاة اصبح سفينه

انت الشرع والسنن يا داحي الباب

من مثلك استشهد ابوسط المحراب

يا من لكل غالب ابسيفك غلاّب

انت كنز الخافيات وانت سر الاسم الاعظم

ريتك اتشاهد اولادك لمّن اتغسّلت بالدم

وزينب تنادي يخوتي سورنه العالي تهدّم

والحرم ضاعت من عگب واليها

والخيم نار الگوم تسعر بيها

وايتامكم يا حيدر مسلبيها

هاذي حالة آل هاشم والعده جاروا عليها

* * *

طهران ١٩٨٢ م

النبراس

بالشهادة يهتف لساني وضميري

وبمصير الأمه يتقرر مصيري

والدمه توضّح الفكره والنحر مشعل الثوره

بالشهاده

* * *

ندرس اهداف الشهاده ونشرح الوضع المعاصر

نشوف ناس لأجل حگها تدافع بگطع المناحر

وناس بالغش والخيانه تريد بالأمّه تتاجر

والفاهم يخوض الوضع وبفكر واعي يطّلع

بأهل الخدع ما ينخدع ويقتدي بأهل الضماير

من ضميري انتظر وحدة الأمّه

والشعب من يتّحد يوصل القمّه

وما يموت اليفدي عمره والنحر مشعل الثوره

بالشهاده

* * *

كل شعب بالاتّحاد وبالفكر يضمن رصيده

وندري درب الانشقاق يشتّت الأمّه المجيده

والنصر للدين اصبح أصل غايتنه البعيده

والشعب لمّن يتّحد يتوصّل لأفق المجد

نريد الكوادر تستعد وتفتدي لنصر العقيده

بالتفادي وبالصمود وبالإخوّه

نحقّق الاهداف من نهج النبوّه

والشعوب تعيش حرّه والنحر مشعل الثوره

بالشهاده

* * *

كل شعب يملك قياده وبالقياده اتّصاله

وينجح القائد المخلص واليضحّي للرساله

وسبب افشال الشعوب القائد اليهوي العماله

والقائد اليفدي العمر هوّه اليحصّل عالنصر

وابحبّه شعبه ينغمر ويقتدي بسيرة نظاله

للعقيده نضحّي ونحصّل الشهاده

وما نميل وننحرف عنّ القياده

ونسرع لتنفيذه امره والنحر مشعل الثوره

بالشهاده

* * *

كل بشر يحمل عقيده ولجل هالفكره يناظل

منها دركتها الحقيقه ومنها سارت على الباطل

واحنه فكرتنه الاسلام ومن اجل شرعه نقاتل

نسلك طريق التضحيه وندخل الحرب بتوعيه

ونيل الشهاده الامنيه والرفض هالفكره فاشل

بالضماير ندخل الحومه ونجاهد

ونضمن استقلالنه بسيرة القائد

ونصبر بمقياس صبره والنحر مشعل الثوره

بالشهاده

* * *

احنه عاهدنه نضحّي وهالعهد نبدي التزامه

ندحر الطاغية وعرشه وللظلم نكشف ظلامه

تنتظرنه هالشباب البالسجون وهاليتامه

نطالب بتحرير الوطن وما بيننه تدور الفتن

والشعب اصبح مرتهن بيد هالطاغي ونظامه

عالمناصب نسعى وتفرق شملنه

وننتظر من غيرنه يحرّر وطننه

يمته للمبدأ ننصره والنحر مشعل الثوره

بالشهاده

* * *

دارت الدنيه بوطننه واصبح بحاله خطيره

يريدنه نضحّيله دمنه والبشر هوّه وضميره

ولو صدگ احنه نجاهد خل نواصل بالمسيره

من الفتن خل نحترس وللمبدأ نضحّي النفس

ونلقّن الظالم درس وهاذي أيامه الاخيره

من دمانه ترتوي روضة بلدنه

ولو صدگ احرار ما ننقض عهدنه

وطوگ هالظالم نكسره والنحر مشعل الثوره

بالشهاده

* * *

بالدهر مثل أبو اليمه ما حصل واحد مجاهد

باع دمّه للشريعه واسمه ظل بالدهر خالد

ومثل وگفت گمر هاشم بالوفه ما وگف ماجد

والاكبر بدم الفخر عنوان سجّل بالدهر

وجاسم يتبعه بالاثر بالحرب قدّم الشاهد

بفيض دمّه سجل حروف الكرامه

ضحّه روحه للنبوّه وللامامه

وجسمه متوسّد الغبره والنحر مشعل الثوره

بالشهاده

* * *

نطوا دمهم للعقيده مو لجل حفظ المناصب

تغسّلوا بالدمه اليجري والچفن ذاري الترايب

سبعه وثمانين ثائر غابوا ابّرج المصايب

وظلت حرمهم بالغرب مرعوبه

وخيامهم متسلّبه ومنهوبه

وايتامهم متچتّفه ومسلوبه

طلعت منّ الغاضريه ميّسره لديرة الكوفه

* * *

قم المقدسة / ١٩٨٣ م

لماذا قتلوه

غريب أيودّع العيله الغريبه

وزينب صاحت ابصوت المصيبه

هاك اخذ الطفل هاك خل ينذبح وياك

وزينب صاحت ابصوت المصيبه

* * *

هايم ابعالم شعوري وانظر ابعين المصيبه

والمشاعر جسّدتلي صور عن الطف عجيبه

شفت أبو السجاد واگف يم العيال الغريبه

والحرم مگطوعة امل والدمع عالوجنه همل

واشلون توديع الحصل بين محبوب وحبيبه

دمع وفراگ واحزان ونوايب

لن يستمع صوت امّ المصايب

تصيح الطفل بحماك خل ينذبح وياك

وزينب صاحت ابصوت المصيبه

* * *

هالرضيع من ايد زينب سلمته لايد أبو اليمه

او والده ابصدر العواطف والحنان لصدره ضمّه

يقبّله ابرگبته التزهي ويلثم اجبينه ويشمّه

ودموع أبو اليمه تسح موقف رضيعه متضح

مثل الحمامه التنذبح ومن رگبته يسيل دمّه

وهاي امّه الرباب احنت ظلعها

وتخاطب أبو اليمه بدمعها

هذا الطفل يهواك خل ينذبح وياك

وزينب صاحب ابصوت المصيبه

* * *

بوسط صيوان النبوّه حاله تمتاز بحزنها

والرباب أيشب گلبها لمّن تشاهد ابنها

گبل رميات المصيبه سهام فگده صوّبنها

معوله وماخذها الحزن ابلوعتها باللوعه تحن

تفسر الصخر لمن تون وصار فن النوح فنها

وزينب شاهدت امّه الحزينه

يم مهده تصيح الطفل وينه

يبو السجاد ارجاك خل ينذبح وياك

وزينب صاحت ابصوت المصيبه

* * *

آنه ام الطفل آنه وتدري خانتني الليالي

عگب عبد الله الرضيع ايصير حال الكدر حالي

تدري اصعب كل مصيبه من تشوف المهد خالي

هاي الرباب المعوله تصيح ابمدامع هامله

ما چنت ادري بكربلا يصير شرب الماي غالي

هذا الماي ملك امّك الزهره

وابنك بالعطش ملتهب صدره

اخذ الطفل لعداك خل ينذبح وياك

وزينب صاحت ابصوت المصيبه

* * *

حسين من شاهد الموقف سالت دموعه اعلى خدّه

اخذ عبد الله الرضيع لآل اميه وزاد وجده

صاح هذا الطفل ذاب وبالعطش ملتهب چبده

هالطفل چبده ملتهب لا تمنعونه من الشرب

وانچان الي وياكم ذنب هالطفل يا ذنب عنده

يناشد لچن يا وسفه جوابه

تعنّه حرمله وللطفل صابه

صاحه ارتوي من دماك خل ينذبح وياك

وزينب صاحت ابصوت المصيبه

* * *

حسين من نحر البرائه اخذ دم الطفل بيده

للسمه أرما وصاح بيا ذنب گطعوا وريده

ما نزل للارض دمّه بهاذي اسرار البعيده

لن سمع صوت من الخيم يحسين دلاّلي علم

عبد الله بالنبله انفطم والسهم طوّگه لجيده

آنه ام الحزن فاجده الغالي

اصد اعلى المهد والمهد خالي

بطفلك گلبي وصّاك خل ينذبح وياك

وزينب صاحت ابصوت المصيبه

* * *

رد أبو اليمه لخيامه وبيده طفله افغرت روحه

للطفل ضمّه اعلى صدره خاف عين امه تلوحه

مادره ابگلب الرباب اعلى السبي انفتحت جروحه

من شاهدت عبد الله بيد المظلوم

جسمه الشريف امغسّل بفيض دموم

وگبل الفطامه ابسهم ظالم مفطوم

لبو اليمه بالمخيم والطفل سلّمه لزينب

عگب ما ودّع العيله لگطعت المنحر تأهّب

مثل گطعت نحر عبد الله انگطع نحره وتخضّب

وحسين لمّن وگع فوگ الغبره

شاهدنه دم طبره يكت ابطبره

والخيل داست بالحوافر صدره

بالسهام وبالسيوف انذبحوا حسين ورضيعه

* * *

طهران / ١٩٨٣ م

الحوار المؤلم

يالغسّلوك ابدمك راسك يودّع جسمك

واسمعنه شكوات الحال بس حرم ظلت واطفال

يالغسّلوك بدمك

* * *

اتصورت حالت موادع راس الحسين ويه جسمه

واحد امعفّر بذاري وواحد مغسّل بدمّه

وبدت شكوات الحنان الجسم يشكي لراسه همه

يا راس شفت اللي جره خلوني مرمي اعلى الثره

من چفّي گطعوا خنصره وطحت بين اشرار الامه

يا راس اعرض امري

متغسّل ابدم نحري

ومچفّن بذاري رمال بس حرم ظلّت واطفال

يالغسّلوك بدمك

* * *

عرض جسم حسين حاله وابتدى الراس بجوابه

آنه خدري ابثره المصرع تعفّر بذاري ترابه

للحجر يا جسم حگك ما شفت لوعة صوابه

يا جسم تنظر حالتي متخضّب ابدم هامتي

وبالحجر صابو جبهتي وجهي من الدمه خضابه

لو ما يصوّب هامي

ما تنسلب ايتامي

ولا چان شافت اهوال بس حرم ظلّت واطفال

يالغسّلوك بدمك

* * *

والجسم حضّر جوابه لاچن من الدمه اليجري

انت بس الحجر صابك وشاركتني ابگطع نحري

لاچن آنه اعلى الوطيه جالت الخيل اعلى صدري

يا راس حالي اتشاهده عالغبره جثّه موسّده

جالت علَي خيل العده وفوّضت للباري امري

يا راس شاهد حالي

متوسّد اعلى رمالي

وبالغرب خلّيت عيال بس حرم ظلّت واطفال

يالغسلوك بدمك

* * *

يا جسم لا تشكي حالك لو تشاهد حالي اصعب

بالبواتر طبّروني وشيبي من دمّي تخضّب

وانشدك هم شفت راس اعلى الرمح مثلي تنصّب

يا جسم فاجد ناظري ريتك تشاهد منظري

مرفوع فوگ السمهري وتاجي من عندي تسلّب

يا جسم ما رحموني

فوگ الرمح شالوني

وشاهدت من عالعسّال بس حرم ظلّت واطفال

يالغسّلوك بدمك

* * *

لا يراس حسين چنّك ما شفت سهم البچبدي

بسهم المثلّث رموني والجرح لسّاعه يدّي

ومن الم سهم المثلث بعد ما ظل حيل عندي

بالسهم صابوا چبدتي والگوم سلبوا چثتي

لليسر تمشي بعيلتي وراح اظل عالغبره وحدي

بدم النحر غسلوني

بذاري الترب چفنوني

والگوم گطعوني وصال بس حرم ظلّت واطفال

يالغسّلوك بدمك

* * *

الراس جاوب لا يجسمي حالي منك أشد واخطر

انته ما عندك مسامع تستمع صرخة الخدّر

وما شفت نار المخيّم آنه شفت النار تسعر

آنه اسمعت صوت الحرم وشاهدت نيران الخيم

والاشد واصعب كل الم من شفت غارت العسكر

شاهدت حرگ خيامي

واسمعت صوت ايتامي

وتعلم السجّاد شگال بس حرم ظلّت واطفال

يالغسّلوك بدمك

* * *

هنا يراس حسين يلّي عندك عيون وتشاهد

لليسر امّنت عندك عيلتي وتگدر تعاهد

ترد يوم الاربعين وما تنقِّص منها واحد

بالحرم يا راس اطلعت عندك اطفالي ودّعت

فوگ الرمح انته ركعت وآنه فوگ الغبره ساجد

يللي اطلعت باطفالي

سالم ترد بعيالي

والظعن لو عني شال بس حرم ظلّت واطفال

يالغسّلوك بدمك

* * *

يا جسم لا تشكي أمرك من تظل وحدك رميّه

اتحملت آلام لاچن بس مرامي الغاضريه

آنه راح اكفل عيالي اللي مشت عنك سبيّه

بالحرم راح امشي بيسر واتحمّل آلام وصبر

والاشد من هذا الأمر لو شفت گوم آل اميه

متشمّته بحالتنه

ومستبشره بطلعتنه

ونحمل سياط الجمّال بس حرم ظلّت واطفال

يالغسّلوك بدمك

* * *

هاذي حالت أبو اليّمه گبالنه موقف تجسّم

عرض راس حسين حاله وحالت الجسم المخذّم

نريد ننشد عالمصايب يا مصيبه الاشد واعظم

حال التغسّل بالنحر

لو حال النصاب بحجر

يا هو الاشد واصعب وامر

جاوبوا يا حال اصعب حال التوسّد رماله

لو الراح ويه اليتامه باليسر كافل عياله

عالجسم هالمحنه فضّت بالطفوف إشما جراله

اشحال اليروح ويه الحرم

للكوفه والشام بالم

يظلّل يعوّض عالخيم

عالرمح مرفوع راد يعوّض الرايه اللي طاحت

* * *

طهران ١٩٨١ م

كيف ترضى

ما اظن يحسين تقبل شيمكم

للكوفه والشام تطلع حرمكم

يا خويه هالحكمه اقتضت نطلع يساره

عنكم مشينه بهاي الظعينه

* * *

هايم بعالم شعوري وگلبي بالاحزان يلهب

وادخلت باعماق فكري وچنّي انظر حال زينب

وگفت اتعاتب أهلها وتذكر الخدر المسلّب

صاحت بصوت النايبه زينب انه المتحجّبه

تالي صرت متغربه والخدر مني تسلّب

عگبك يمظلوم سلبوا ايتامي

وبنار المصاب حرگوا خيامي

وصيواني بگلوب الحرم تلتهب ناره

وعنكم مشينه بهاي الظعينه

* * *

خويه شحچيلك بيوم اللّي طحت من فوگ مهرك

ريت سيف الگطع نحرك گطع نحري گبل نحرك

وينسحگ يا ريت صدري ولا تدوس الخيل صدرك

عالغبره جسمك من وگع وگبالي شاهدته انصرع

سبّاح دلالي انگطع وخلص عمري گبل عمرك

من هجمت الخيل لو چنت يمنه

ما چان الاشرار حرگوا خيمنه

ولو وگع عامود الخيم ينهدم داره

وعنكم مشينه بهاي الظعينه

* * *

اشلون مر نهار بالطف والخدر تلتهب ناره

ومن لفانه الليل شفنه الليل افجع من نهاره

حرت اجمع هاليتامه لو ألم خدّر حياره

محتاره اختك بالأمر وتنتظر مطلاع الفجر

متهيّئه لهظم اليسر وجمعت العيله اليساره

وابهدوة الليل اسمع منادي

لليسر يردون عيلة الهادي

واسمع العيله تنادي وينه اليحمي جاره

وعنكم مشينه بهاي الظعينه

* * *

للسبي الجمّال صاح ابغيبة ارباب المچارم

من عگب ذاك الدلال وعگب راية گمر هاشم

شفنه شمر ابن ذي الجوشن يحدي بظعون الفواطم

اشما ردنه توديع الجثث يا خويه يمنعنه شبث

للكوفه مشونه ابعبث وباليسر شفنه المظالم

بس حرم وايتام ما عدنه والي

وانظر السجاد مچتف گبالي

ومن السلاسل رگبته دمها ايتجاره

وعنكم مشينه بهاي الظعينه

* * *

خويه طول الدرب نمشي والگلب عالحرم خوفه

خدّر انصانت بعفّه خيالها محّد يشوفه

عگب ذيچ الهيبه تالي باليسر تمشي للكوفه

ما تدري يحسين اشجره ابحال الحرم المخدّره

بالكوفه ظلّت حايره والدهر شرّع سيوفه

ما تعلم شصار ابهاي الفواطم

دخلوها الاشرار لمجلس الظالم

بيا وضع اختك طبّت لقصر الاماره

وعنكم مشينه بهاي الظعينه

* * *

عيالك ابقصر الاماره يبو اليمه دخّلوها

ابمجلس ابن زياد رغما هالأرامل وگفوها

الناس بيها مستخفّه وبالشماته صوّبوها

والطاغي صدّر هالامر للشام نطلع باليسر

واخذونه گوم اهل الغدر ولليتامه چتّفوها

واطلعنه للشام بهاي المصايب

واتباري الظعون روس الغوالب

وراسك يخويه اعلى الرمح تسطع انواره

وعنكم مشينه بهاي الظعينه

* * *

من وصلنه الشام شفنه الشام فرحانه بوضعنه

وتعلم ابمجلس الطاغي چم وچم محنه جرعنه

وطفله من هاي اليتامه انفگدت وبيها انفجعنه

من الشام كابدنه المحن وبدمع عيني اتوضحن

اگعد استقبل هالظعن اليوم يم گبرك رجعنه

ردّينه هاليوم للغاضريّه

نرويلك اعمال گوم آل اميه

واليسر من دمع الحرم تآخذ اخباره

وعنكم مشينه بهاي الظعينه

* * *

آه من ساعة البيها بكربلا انفگدت اهلنه

بگينه بالغربه حياره وما حصل نغّار النه

راحت اهل العزم راحت وانفگد بالطف املنه

ودلالي مل من الصبر

وگلب الحرم يلهب جمر

هذا الحصل گبل اليسر

واليسر اصعب سهامه من مرامي الغاضريه

* * *

طهران / ١٩٨٣ م

راية الحمد

يا علي ابزودك حملت الرايه آيه وبيمناك رفّت آيه

اتجاهد ابروح الوفه لجل دين المصطفه

آيه وبيمناك رفّت آيه

* * *

يا علي ابروح العقيده انصرت دين الله ورسوله

عن يقين وعن درايه الزودك انعدّد فصوله

بالعباده وبالسياسه وبالعلوم وبالبطوله

والاسلام ابتضحياتك ثبتت افروعه واصوله

وضّحت منهاج الشرع من تضحياتك يا ورع

والدين باسمك مرتفع يا رمز معنى الرجوله

يا شهم مثلك بذل مجهوده والمواقف من بدر مشهوده

والشرع بيها اكتفه لجل دين المصطفه

آيه وبيمناك رفّت آيه

* * *

يا علي ابصفحة العصمه امسجّل احروف الأطاعه

مهد صارتلك الكعبه ومن ثدي العفّه الرضاعه

وشخصك من أوصاف أخوك المصطفى ظهرت أطباعه

ومن بدر تاريخ زاهر الك يشهد بالشجاعه

تاريخ من وقعة بدر للدين ضامنله النصر

ودمّك يبو الحمله حبر سجّلت بيه البراعه

بسمك احروف المجد مكتوبه منك گلوب الزلم مرعوبه

العزمك احنه انوصّفه لجل دين المصطفه

آيه وبيمناك رفّت آيه

* * *

يا علي ويوم المباهل كل موحّد بيه شاهد

الله خصك من محمّد روح وحده ابجسد واحد

والذي ينكر الآيه ذاك من أصله معاند

وابجهادك للعقيده ما حصل مثلك مجاهد

يا علي وهاي المعرفه تتكرّس ابروح الوفه

ابشخصك الاسلام اكتفه لدينه من أصبحت قائد

قائد الدين الحنيف ابزودك اتضحي لجل المعتقد بوجودك

عن بصيره ومعرفه لجل دين المصطفه

آيه وبيمناك رفّت آيه

* * *

يا علي راية محمد رافله ابقبضة يمينك

ثلاثه وثمانين غزوه شاركت وانصرت دينك

حارس احدود الرساله وما غفت عالذلّه عينك

ولمن تطلع للمعاره ليث طالع من عرينك

ابسيفك الأمّه اتوحّدت ومعركة خيبر من بدت

بيك الشجاعه اتجسّدت وعالنصر ثابت يقينك

ابسيفك انصار النبي منصوره ورايتك بالمعركه منشوره

للعقيده امرفرفه لجل دين المصطفه

آيه وبيمناك رفّت آيه

* * *

يا علي صارمك هلهل وابضمير الكفر ينصب

ورايتك لمن تهزها العالي عالسافل تگلّب

ترجف الحومه وزلمها اعليها وجهك حين يغضب

ثبتت أركان الديانه بيك يا چتّال مرحب

لو رسخ جدمك بالوغه وچفك تملك بيرغه

أيزعزع الطاغي اللي طغه وللنصر عزمك تأهب

هذا مرحب خل نذكره ابيومه ظربه وابوجه الدهر مرسومه

اشلون ضربه خاطفه لجل دين المصطفه

آيه وبيمناك رفّت آيه

* * *

يا علي دمك شعاع وزهى بآفاق الشهاده

ابدمك اتروت الجنه ونمت دوحات السعاده

ورايتك من عگب چفك حست ابيتم القياده

والحسن من سال دمك سالت دموع اعتقاده

بمصابك الكون اختلف ودمع العقيده ما نشف

وجبريل بالعيله هتف انهدمت اركان العباده

ابطيحتك طاع الشرع بنيانه والاسلام اتهدمت اركانه

والمدامع ذارفه لجل دين المصطفه

آيه وبيمناك رفّت آيه

* * *

يا علي انصابت الامه ابسيف ابن ملجم الصابك

وصارت ابگلب العقيده كل گلب لوعه اصوابك

وخضّبوا وجه الديانه يا علي من دمه اخضابك

وين عنك يبو الحمله ابساعة الضربه أصحابك

وين الاصحاب الطايعه ميثم وحجر وصعصعه

شمس الديانه امروعه وغايبه ابساعة اغيابك

الليله أملاك السمه مفجوعه ولجلك أصوات الحزن مرفوعه

وسال دمع العاطفه لجل دين المصطفه

آيه وبيمناك رفّت آيه

* * *

يا علي العالم العلوي يهمل دموع المصيبه

طاح جسمك يبو الحمله وشيبتك بالدم خضيبه

مثل دم السال من حسين والجثه سليبه

شبلك اعله الغبره مرمي وظلت اعياله غريبه

وجسم الكفيل اعلى النهر

ومخيمه ابنار استعر

راسك گبل راسه انطبر

انته بالمحراب طايح والكفيل اعله الشريعه

* * *

طهران ١٩٨٣ م

النبي ايوب (عليه السلام )

بين موسى وبين أيوب العليل

خل نقارن عن بصيره وعن دليل

ياهو أكثر صابر بأيامه

وما جزع من الدهر وآلام

واليحكّم لا يميل عن بصيره وعن دليل

* * *

بحث موضوعي نخوضه بفكر عالايمان ساير

ونشرح أبعاد المصيبه وتنعرض لاهل الضماير

نستدلّ ابمصحف الباري ونقارن بالبصاير

الكاظم وأيوب بورع ننظرهم من المرتفع

ونشوف يا هو اللي جزع ويا گلب عالمحنه صابر

هاي شكوه نستمعها بأنتباه

يا إلهي مسّني الضر يا الاه

وموسى شاهد چم خصم جدّامه

وما جزع من الدهر وآلامه

واليحكّم لا يميل عن بصيره وعن دليل

* * *

نصغي لايوب المسامع ونستمع من عنده چلمه

يا إلهي مسّني الضر وانته لاهل الصبر رحمه

والشخص لو چان صابر أبد ما يشتكي همّه

والكاظم بقعر السجن باللّوعه گلبه ممتحن

ما بيّن عليه الحزن وجابه الموقف بحلمه

گلبه صابر والصبر رايد اباة

أبد ما تشكي بنزول النايبات

الكاظم بهالمحن شد وسامه

وما جزع من الدهر وآلامه

واليحكم لا يميل عن بصيره وعن دليل

* * *

صبر أيوب بحياته وبالصبر اسمه تخلّد

لاچن گبال ابن جعفر صبر البگلبه تفنّد

بهالمواقف نستدل وحكمة القرآن تشهد

أيوب مل من العمر وهدد زوجته بهالامر

وگلبه جزع من الصبر مو مثل عترة محمد

شچان سوّه لو دخل سجن الرشيد

وشاهد گباله السلاسل والحديد

هالامر يا هو اللي قاد زمامه

وما جزع من الدهر وآلامه

واليحكم لا يميل عن بصيره وعن دليل

* * *

هالنبي خلّص حياته لعلّته يدوّر شفاها

وروحه من ذيچ الامراض اتشافت وحصلت مناها

لاچن جروح السلاسل وين يتحصل دواها

الكاظم بطامورة ظلم ما مثله واحد منظلم

وبصبره يتحدّى الخصم وللرتب حصّل علاها

بسجن مظلم والگلب يلتهب نار

وبيه ميميّز الليل من النهار

وحمل من ظلم الرشيد اجرامه

وما جزع من الدهر وآلامه

واليحكم لا يميل عن بصيره وعن دليل

* * *

خلّص الكاظم حياته بالطوامير المظلمه

وجابه الطاغي الرشيد بهمته وصبره وبعزمه

وسطرة السندي ابن شاهك للمجد رادت تهدمه

والمجد يعرف صاحبه واتشيّد بدم الابه

والكاظم بهالمرتبه صار للاجيال قمّه

بالعقيده وبالصبر أرغم انوف

خل يجي للسجن أيوب ويشوف

يا هو حقق بالصبر أحلامه

وما جزع من الدهر وآلامه

واليحكم لا يميل عن بصيره وعن دليل

* * *

عجّب العالم بصبره وبالسجن گطّعوا چبده

اشلون لو ردنه نفسّر للعوالم صبر جده

ضحّوا انصاره واخوته وظل أبو السجاد وحده

أعظم گلب بالصبر گلب المظلوم

من ظل وحيد بكربلا بين الگوم

ويشاهد اعلى الخيم عدوانه تحوم

كل گلب يملك صفات وبيها تتحقق أهدافه

* * *

طهران / ١٩٨٣ م

في قصائد اللطم

يا غيرة الله

(موشح(

يا خلف هاشم ويا نعم الخلف جزت حدها وليش صوتك ماهتف

* * *

غايب وگلنه الك موعد ظهور تجلى عن الواسعه الغي والفجور

جزت عن هالموعد سنين وشهور وكل نمير الگلب لغيابك نشف

* * *

تدري بغيابك علينه ما يهون وعلى الكعبه بگت تتربّه العيون

والعواذل عن معيبك ينشدون ليش غايبكم عن الموعد خلف

* * *

ارد اجاوب لچن ما يحصل جواب حيث عن الوعد طولت الغياب

آه يا من گلبك من الحزن ذاب اشلون ترضه عداك بينه تستخف

* * *

ما نشوفك لچن يالغايب تشوف الناس تتغير ابتغيير الصروف

يغش ظاهرها لچن فارغه الجوف وسر حقدها الضمته اليوم انكشف

* * *

ما بگت خافيه ونشرحها الك وبيدمن تدري صفه يدور الفلك

واللي ظلت صابره وتتاملك عرّجت ارواحها لبرج الحتف

* * *

جزنه من ارواحنه لاچن نريد تنادي يا ثارات محزوز الوريد

هوّه ذاك اليوم النسميه عيد من نشوف الرايه بيمينك ترف

* * *

اشلون رايه المابرح عنها النصر وجيشك اعداده مثل صفوة بدر

ثلث ميّه وياك وثلاثه وعشر العدد من ذاك العدد ما يختلف

* * *

اشمحله لو لوحت ظهر ام العله وتنوي بالمگصد لوادي كربله

وتوگف ابمصرع ابن سيد المله مثل جدك عالنهر لمن وگف

* * *

وتنحني ظلوعك على جسمه السليب وخدّك اتعفره مثل خده التريب

وتلگه بعده الشيب من نحره خضيب وحاله ما ينوصِف وابداً منوصَف

* * *

هاذي حالة جدك بيوم الطفوف وشابچه عليه العواسل والسيوف

وسجل ابدم النحر اشرف حروف حروف آيات المعالي والشرف

* * *

دمشق / ١٩٨٠ م

العليلة

)موشح(

طفله تتامل خبر غيّابها ليش ابوها لكربلا ما جابها

* * *

ظلت ابيثرب وحيده فاطمه طفله بصواب المرض متالمه

وعثر وياها الدهر عثرة عمه وشال عنها بليل ضعن احبابها

* * *

طوّح الحادي بضعن هاشم وسار بگت هاي الطفله مذهولة افكار

ليش عفتوني وحيده بهالديار تناشد ومحد يرد جوابها

* * *

سهرت ليالي على فراش المرض والجفن من عدها ليله ما غمض

جمر فگد الاهل يمشي ويه النبض والحزن زيّد عليها صوابها

* * *

الجسم متوسد على فراش العلل وروحها ترفرف على ظعون الاهل

بين ساعه وساعه يلفيها الاجل والچبد لاهب بنار عتابها

* * *

مثل حن الرهب هالطفله تحن ومثل ونات الورگ گامت تون

الدار خالي ولبست ثياب الحزن وبالگلب سهم النوايب صابها

* * *

تعتب اعلى حسين من جور الصروف ليش ما وداها ويّا للطفوف

ما درت والدها رايح للسيوف لو اجت تحرگها نار مصابها

* * *

تصيح المن بعد اشكي علتي چان يمي الاكبر يرد لهفتي

وگمر عدنان اليسچن لوعتي وعمّتي زينب فجعني غيابها

* * *

وين جاسم وين ابن عمي الغيور وين اخويه زين العباد الصبور

وين عني مشن ربات الخدور بلا وداع اطلعن شنهو اسبابها

* * *

وحدي خلوني وحنوا مني الظلع والجرح لو هاج شيفيده الدمع

ريت سباح البگلبي ينگطع ولا اشوف الدار ينعى غرابها

* * *

خفگ جنح الفاجعه وگلبي علم تالي ترجع للوطن بس الحرم

اظن سور العالي بالطف انهدم وهاشم اتعنت لگطع رگابها

* * *

طهران ١٩٨٣ م

القرآن الناطق

(موشح)

حسين للمصحف رسم منهاجه بالدماء السالت من أوداجه

* * *

حسين لمن شاف دين الله الحنيف موقفه ابين الكفر أصبح ضعيف

للسيوف اتقدم ابنحره الشريف ويدري دمه للفكر وهاجه

* * *

ابدمه للمعتقد وهج شعلته ودرس للاجيال صارت سيرته

وكعبة الاحرار صارت ثورته والها ثوّار المجد حجاجه

* * *

حسين كعبة كل وفي وحر وشهيد وكل غيور الما يمد للذله ايد

ولو دعاه الدين يعرضله الوريد ويخط بالدم صفحته البهّاجه

* * *

الدين نور المؤمن وحفظ العرض الباري جاعل نهجه عالعالم فرض

الدين ثابت حكمه مو مسرح عرض ولا وجه تتحكم ابمكياجه

* * *

الدين لو ما حسين أمره يختفي والمجد خل يسد بابه ويكتفي

بعد مثل حسين ما يلگه وفي اشما يمحّص أهله باستخراجه

* * *

حسين صفحه وضمت أسماء الاباة الما تعيش ابذله واتساوم طغاة

ولو اجاها الضيم تختار المماة وللظلم ما تركن لاحراجه

* * *

حسين شاف الظلم خيّم عالبلاد وحكم ابن مرجانه دستوره الفساد

كسر طوگ الذله عن درب الرشاد وصافن الهجره انصّب أحداجه

* * *

من مدينة جده شد الراحله وضعنه واصل بالمسير لكربله

بهالأرض مصرع الباري اختار اله وبالشهاده النصر صوّغ تاجه

* * *

بالشهاده حسين عالطاغي انتصر واسمه ظل ايدوّي باسماع الدهر

وجسمه بعده امغسل ابدم النحر والچفن ذاري الترب نسّاجه

* * *

اشما يظل دمه يصب من منحره تظل آيات الكتاب امنوّره

حسين بي نلتزم دنيه وآخره بحر طامي وما تجف امواجه

* * *

جسم أبو اليمه سجد لمن وگع وعالرمح راسه قره الآيه وركع

انرفع دين الله لمن راسه انرفع وبعده دم أوداجه فوگ أثباجه

* * *

دمشق ١٩٨٠ م

الأماجد

)موشح(

لاح فجر التضحيه الموعوده وللقتال حسين صف جنوده

* * *

لاح فجر المعركه والنصر لاح والشهاده اتهيّأت والسيف صاح

حسين اعلن ثورته لدعوة اصلاح والمجد لاهل المجد مردوده

* * *

لاح فجر الملحمه وخوض الاهوال والسماهر لوّحت بيد الرجال

بني هاشم رصدت ابراج القتال للظلم رادت تفصْم قيوده

* * *

لاح فجر البيه هاشم محربه وگفت لنصر العقيده مضهضبه

تريد تروي بذرته ابدم الأبه والشهاده محتّمه ومريوده

* * *

تأهّبت للموت هاشم والانصار شرّعت سمر القنه وبيض الاشفار

تطلب من حسين تقسيم الادوار وتدخل الحرب وتومض رعوده

* * *

جيش أبو السجاد بالطف اجتمع وقسّم الادوار أبو اليمه ابورع

كلمن ابموقعه المطلوب انوضع وكلمن أيجاهد حسب مجهوده

* * *

الميسره ابراية حبيب امعنونة ولزهير امنحه زمام الميمنه

وگمر هاشم عالقياده عيّنه وسلّمه رايته وسيفه وجوده

* * *

گبل ما للحومه انصاره تسير لآل اميه وجّه الخطبه زهير

وبعده خاطبهم برير ابنَ خضير والمسامع بالطمع مسدوده

* * *

الحمله الاولى هوت خمسين الاطياب من نسب طيّب وسادات الاعراب

اتغسلت بالدمه وچفنها التراب هالشهاده من الازل موعوده

الحارث ومالك تعنوا للاجل وعمر بن خالد الصيداوي حمل

وجابر السلماني من بعده انچتل كلمن امتاز ابصموده وزوده

* * *

سعد ابن الحارث وأبو الحتوف ضد أبو السجاد چانوا بالطفوف

حين سمعوا خطبته شهروا سيوف ضحّوا لأجله ورضوا معبوده

* * *

ومسلم من استشهد وخدّه تريب لمصرعه ابلهفه تعنّاله حبيب

گلّه ما أوصيك بهلي بالغريب من تحيطه الگوم احمي حدوده

* * *

ام وهب من سمعت اصواب الايتام تناولت عامود من بين الخيام

حملت اعلى الگوم حملة انتقام مثل هاي الحرّه ما موجوده

* * *

وابن ربعي چان كاره للقتال وابن سعد يحفّزه لخوض الاهوال

اشما يأمره وإله يبعثله رجال ما ينفّذ هالامر وبنوده

* * *

وابو الشعثاء استمع صوت الحسين ينادي ما من ناصر وما من معين

عِدَل عن الموقف وناصر الدين وحمل حمله اعلى الكفر مشهوده

* * *

والتفت أبو الثمامه الصائدي صاح يا مظلوم لجلك افتدي

وبخوتي الانصار رايد اقتدي والشهم هاليوم يفني وجوده

* * *

بالوفه اتعنّه حبيب لمصرعه وبالأبه الحر الرياحي تابعه

ونافع المذحجي جثته مگطّعه وحصّل بهالتضحيه مگصوده

* * *

وعابس الشاكري اتقدم للحرب صاح حب حسين مشغوف الگلب

ابغير سيف اگلبها للحومه گلب بهالشهاده وفّه كل عهوده

* * *

جون مولى أبو ذر حر وفطن ناده وجهي اسود وريحي نتن

ردت دمّي ويّه دمكم ينعجن هاذي آمالي الذي معقوده

* * *

والانصاري شاب وابن اهدعش عام امّه شدّت همّته لنصر الإمام

هالكوادر يفتخر بيها الاسلام بيدها لسيفه تشد بنوده

* * *

ضحّوا الانصار بالعز والوفه ومن بعدهم ضحّه شبه المصطفه

وصاح أبو السجاد عالدنيا العفه طاح من بيت المجد عاموده

* * *

مثل الاكبر ضحّه جاسم بالنفس بالمخيّم طفّوا شموع العرس

وگمر هاشم عالنهر قدّم درس من هوت چفّينه من زنوده

* * *

وصاب عبد الله السهم من حرمله وظل أبو السجاد وحده بكربله

من بعد چتله انسبت هالعايله ومشت للشام بيسر مگيوده

* * *

دمشق / ١٩٨٠ م

الفراق

)موشح(

گلب ليله أيخاطبك يا موحه ومثل دمك فاض دم اجروحه

* * *

گبل ما يطلع الاكبر للحرب للموادع راد يم امه يطب

لنه يسمع صوت من جرح الگلب لا تصدع امك بهالروحه

* * *

اسهرت برباك وذخرتك للشدد عاهدت توفيني لا تنسه العهد

وگفتك للدين يالاكبر ضمد اتداوي بيها چبدتي المجروحه

* * *

يولدي وللدين مطلوب ابعهود اطلع لميدانه واضمنله الخلود

وگلبي لو شافك ابساحات الصمود يلتزم صبره ويبطّل نوحه

* * *

خل أشد ابنود سيفك بالدمع لا تهاب الموت دلالي درع

گبالي جسمك أرد أشوفه منصرع وأرد أغسله ابدمعتي المسفوحه

* * *

أرد أغسّل جسمك ابدمع الفرح وأفتخر واهتف الي شاب انذبح

نصر دينه ابموقفه السامي ونجح وهاذي جنات الخلد مفتوحه

* * *

فرصه هذي ولا تخليها تفوت وانته أول هاشمي اتصافح الموت

أرد اسمعك بالحرب تهتف بصوت الدنيه فرصه وللنصر مسنوحه

* * *

من سمع امه تذكره بالعهد احترگت ابجسمه الحماسه وارتعد

صاح هذا الحرب يا ليله اشبعد والشهم بالحرب سره ايبوحه

* * *

هذا عهدي وهذا يوم الملحمه واليعاهد شاهد اعليه صارمه

اليوم خيل اعداي احجلّها ابدمه وكون أقدّم بالطعن اطروحه

* * *

خلها تشهد عينچ وعين الحرب اشما يصير الموقف اگبالي صعب

ابسيفي أكتب سنن دستور الضرب والمناهج من بدر مشروحه

* * *

ودّع امه ومضه لساحات القتال وبالمهند گلّب اصفوف الرجال

ليله شافت الاكبر ايخوض الاهوال وعينها لبرج الحتف مشبوحه

* * *

وانخفض للاكبر اجناح النصر حان المگدر وطاح من المهر

ولمن غابت روحه بالبيض وسمر چم جسم بالخيم غابت روحه

* * *

طاح من عالغوج متخضب ابدم والهواشم حملته الصوب الخيم

ليله شمّت نحره واتنفس الهم ودوحة الايمان أعطر دوحه

* * *

دمشق / ١٩٨٠ م

يا ابا الفضل

)موضح(

نصبت العيلتك صيوانها مثل ما خانك زمانك خانها

* * *

گوم يا عباس من مصرعك گوم هالحرم يمك على الشاطي تحوم

تشوف جثتك صدگ غسلتها الدموم ونسج الها الترب ثوب اكفانها

* * *

وبعد رادت يا گمر هاشم تشوف صدگ من زنودك مگطعه الچفوف

اتگلك اگعد شوف غارات الصفوف واجت تشكيلك ظلم عدوانها

* * *

وبعد صاحت صوت يا منبع الزود لون ما ينصاب راسك بالعمود

ما تجي الخياله وتدوس الحدود ولا تشب خيامك بنيرانها

* * *

وعسكر ابن زياد عالثايه هجم وبيده جتالك شعل نار الخيم

لون ما تنصاب عينك بالسهم ما تفر عيالك بوديانها

* * *

فوگ جسمك هون ربات الخدر انهض لنخوتهن ولا تعتذر

چم شمر جاير عليها وچم زجر والشماته ما خطت نيشانها

* * *

صاحن ابمصرعك انهض يعباس انچان عذرك بالعمد صوّب الراس

ظلع اخوك حسين بالحافر انداس ونهض لاخته من سمع اشجانها

* * *

واحنه يا عباس اجينه انحشمك وردنه باصوات الحنان انكلمك

انگلك الخيل اوصلت لمخيمك ومن يرد عن الخيم فرسانها

* * *

تضن عگبك هاشمي ما منچتل لا ولا واحد سلم حتى الطفل

بالسهم نحره انگطع يا ابا الفضل والارواح انسلبت من ابدانها

* * *

ما بگه نغّار يحرس عيلتك وسورها اتهدّم ابطيحت رايتك

عالوطيه اتوسدت كل اخوتك والنبوه انفجعت ابشبانها

* * *

عيلتك صابره وداست عالجمر وابد ما ينقبل منك كل عذر

گوم باصرنه لون صار اليسر من يرد عيالك لاوطانها

* * *

دمشق ١٩٨٠ م

فجعت قلبي

)موشح(

يا أمل عمري وربيع أيامي جروح جسمك هيّجت آلامي

* * *

يا ربيع أيامي يا ريع الچبد اشلون ضمّه الجسمك تراب اللحد

نعش كل عريس ينحطله ورد وما يظل جسمه رهين ودامي

* * *

ليش ظل جسمك رميه اعله الترب لون اتمكن اوسدك بالگلب

امك آنه اشلون ما أحمل غرب وشفت جسمك منصرع جدّامي

* * *

ابعيني شاهدتك يجاسم منصرع واعلگت شمعتك من نار الدمع

واصبرت من شفت نحرك منگطع ردت من دمك أشد وسامي

* * *

چنت اتامل ابساعات العرس وأفرح ابزفتك واتطيب النفس

ما چنت أدري بالحاله تنعكس وأنظرك منچتل بالطف ضامي

* * *

اعلگت شمعة عرسك ابنار الضمه واللي خلاني أظل متألمه

ما شفت عريس يتحنه ابدمه وحوفته اموجره ابنار خيامي

* * *

ويه نار الخيم راحت حوفتك وابوسط دلالي علگوا شمعتك

چنت أتحلم أشاهد زفتك وساحة الطف خيبت أحلامي

* * *

خابت أحلامي يجاسم بالطفوف شفت حنه عرسك خضاب الچفوف

والشموع ابدالها رماح وسيوف وعگبك سهام المصيبه اترامي

* * *

مضّت سهام الشماته بالدليل عگب چتلك يبني ما ظل بيه حيل

وعالخيم من أگبلت غارة الخيل ما حصل نغّار عنها ايحامي

* * *

يبني لو ما نحرك اتفايض ابدم الخيل ما چان اوصلت حد الخيم

وگوم اميه ما تروع هالحرم ولا تسلب عيلتي وأيتامي

* * *

يا من اتوذرت بالبيض وسمر عگب عينك بعد ما يسوه العمر

اعرفت من بعدك يمشوني بيسر من فضخ هامتك سيف الشامي

* * *

دمشق / ١٩٨٠ م

يوسف الصديق

)موشح(

هالامامه انفجعت بشبانها حزن يعگوب اشد لو احزانها

* * *

انظرنه نظره اويه الفكر متواصله وخذنه موقف حزن من طف كربلا

وابحزن يعگوب ردنه نباهله والذي تحكّم سوّر قرآنها

* * *

الحگ مثل قرص الشمس ما ينحجب ابمصحف الباري بالسوره منكتب

يوسف واخوته راحوا للّعب للحرب متوسّطوا ميدانها

* * *

رجعوا ويعگوب ناداهم بصوت وين يوسف جاوبوه ساوره الموت

ما تيقّن صدگ لو خدعه وتفوت سمع بس هالچلمه من لسانها

* * *

من سمع يوسف صبح حصة الذيب ما تمالك نفسه واشتد النحيب

بعده ما شاف الولد بالدم خضيب دموعه علنت بالجفن طوفانها

* * *

يظهر الوالد على يوسف حريص غمه عليه من شاهد الدم بالقميص

دمّه غالي ودم علي الاكبر رخيص وين التحكّم حسب وجدانها

* * *

بالبحث نستدل بآيات الكتاب واللي يسأل ينتظر رد الجواب

دم كذب چان ابقميصه لو خضاب الآيه صارت للبشر برهانها

* * *

دم كذب واخوته اعترفوا بالصحيح وصارحوا يعگوب بالقول الصريح

الولد حي ليش الابو دموعه تسيح وروحه ملتهبه ابجمر اشجانها

* * *

موقف الوالد ويوسف متّضح يدري بي حي لاچن دموعه تسح

اشلون لو شاهده گباله منذبح وجثّته ابذاري الترب اچفانها

* * *

خل يجي يعگوب للطف ويشوف علي الاكبر راودت جسمه السيوف

وجثّته انقدّت ابشفرات الحتوف من قُبُل مو من دُبُر قمصانها

* * *

انچان يوسف بالسجن فسّر احلام سيف الاكبر بالحرب شرّع احكام

ملك يوسف چان يحكم عالانام ورمح الاكبر يحكم بابدانها

* * *

واللي گص چفوفهن من الجمال خل يشوفن الاكبر شحاوي خصال

مو حواري گباله مصطفّه رجال ومن خياله اتكوّرت فرسانها

* * *

يوسف ابمملكته ما استقبل الاب انتهت من صلبه النبوه لهالسبب

ولجل ابوه الاكبر ابدمّه انخضب وهاي ضنّت أبو اليمه الضانها

* * *

هالنبي لو يلقي نظره خاطفه ويآخذ من الاكبر دروس الوفه

اشبه الوادم ابجدّه المصطفه للعقيده ابدمّه خط عنوانها

* * *

جمع من جده الرسول ثلث خصال ورث خَلقه وخُلقه والفاظ المقال

وحمل من جده علي فنون القتال واكتسب من فاطمه احسانها

* * *

مثل عمّه الحسن بالعز والكرم ومن أبو اليمه درس نهج الشيم

مثل عمه گمر هاشم بالهمم وكسب من زينب درس إيمانها

* * *

گلب زينب ما صبر مثله گلب بعينها شافت الاكبر عالترب

اتغسل ابدم الشهاده بالحرب والچفن منسوج من كثبانها

* * *

صبرت وما ظهرت دموع وحنين وبمصاب الاكبر تواسي الحسين

وعالخيم ام الحزن دارت العين تواسي ليله المعوله بصيوانها

* * *

اطلعت ليله وشاهدت ام الحزن مثل حن الدلم عالاكبر تحن

چم گلب لفراگ الاكبر ممتحن ويون مثل التون فوگ اغصانها

* * *

چني انظر لبو اليمه من وگف يم الاكبر والوجه منّه انخطف

اشلون وگفه والظهر منّه انعطف لچن روحه بصبر گلبه صانها

* * *

الاكبر اول هاشمي اتكور صريع وبعده جسام التحنه بالنجيع

وعمه العباس والطفل الرضيع وگضت من عدنان كل شجعانها

* * *

وظل أبو السجاد وحده بالطفوف اتهيا لسمر القنه وبيض السيوف

وجسمه طاح اعلى الثره وزينب تشوف حال اخوها الصاب انسها وجانها

* * *

طهران / ١٩٨٣ م

ماذا جرى

(موشح)

عيوني تجري وما تجف دموعها نبع من طبرة علي ينبوعها

* * *

عيوني تجري وانفگد منها النظر واسمعت ون الحمام اعلى الشجر

ونّت بألحان وانغام الوتر وبالنحب گامت تفسّر روعها

* * *

ترگص اعلى الغصن والمدمع يسح مثل رگص الطير لمّن ينذبح

وآنه يم الشجر گلبي منجرح وروحي آلام الزمان تلوعها

* * *

واگعدت متنومس ابفي الغصن استمع ونّ الحمامه من تون

عاشگ النوح ويسليني الحزن ودارس الونّه ونغمها ونوعها

* * *

اسمعت ونها وناشدت عن الاسباب جاوبت ما صاب گلبك هالمصاب

گلب ما ادري وردت منچ جواب گالت انشد هالبشر وجموعها

* * *

من عفتها صادفِت ام الفصيل ناشدِتها ليا سبب دمعچ يسيل

گالت اللّيله انفگد حامي الدخيل والجواب عرفته من فزوعها

* * *

روحي هامت ناحره جناح الظلام بالمصيبه الليله ماخذها الهيام

مهرعه وتنشد على حال الإمام لمسجد الكوفه اعتنت بهروعها

* * *

گبل لا اوصل وعيني اتهل دمه اسمعت جبرائيل يهتف بالسمه

طاح بالمحراب حماي الحمه والعقيده انصرعت ابصروعها

* * *

ابطحيته اتهدمت اركان الشرع ومنهج الدين ابمصابه منفجع

والعقيده امست اتهل الدمع عالاصول الثابته وفروعها

* * *

والصلاة تنحب على داحي الباب ونزلت الاملاك تعلن بالمصاب

بهالمصيبه انفجعت آيات الكتاب واحنت عليّه النبوه ظلوعها

* * *

مبدأ الاسلام يعلن بالثبور وانخمد نور الزهه بجانب الطور

دمعة التورات سالت عالزبور والكنايس خل تطفّي شموعها

* * *

راح سر اليعلم ابكل الاديان ولبست الكعبه عليه ثوب الاحزان

زمزم دموعه تسيل بلا هوان والحجر الاسود صبح مفجوعها

* * *

عالارض عين السمه نثّت دموم والفلك مفجوع وايعزّي النجوم

والگمر بغياب أبو الحمله يحوم والشمس غابت اببرج طلوعها

* * *

محنة اليوم اشد من كل المحن هالارض أشرف جسم بيها اندفن

خل يگوم حسين وايعزي الحسن والاعادي خل تذب دروعها

* * *

غاب عنها الچان يسگيها المماة رفرف اعلى الكوفه جنح النايبات

عگب حامي الجار ما تسوه الحياة خلها تبدي للفناء خضوعها

* * *

مظلمة الدنيه عگب حامي الجار الثار يهل الثار من ياخذ الثار

بعد ما نعرف الليل من النهار وجفّت رياض العمر وربوعها

* * *

طهران / ١٩٨٣ م

الإمام الصادق (عليه السلام )

(موشح)

طاح من غالب عمدها وسورها وانطفت نار الكليم ابطورها

* * *

بالمدينه طاح من غالب عمد والد الكاظم وشبل المعتقد

چان بالمبدأ مثل روح ابجسد وين متدور الكرامه يدورها

* * *

فرع من هاشم وعدنان ومظر ثمر طيب يانع ابدوحة فخر

بعلمه ركن الدين للعليه اعتمر وروحه صبت للعقيده بحورها

* * *

صادق اهل البيت سيفه باللسان بالعلم للدين رافع هالكيان

مثله ما تولد بعد ام الزمان اشما تعد بسنينها وبشهورها

* * *

بسيف علمه جاهد احكام الطغاة ورسم دستور ونهج للتضحيات

وبثباته الما حصل مثله ثبات للكفر هدّم عليها قصورها

* * *

وبصموده الينضرب بيه المثل ضمن للاسلام تحقيق الامل

بالمدينه اتصافح وياه الاجل والمنايه عليه تحوم طيورها

* * *

رفرف اعلى الصادق جناح الحتوف وشبت بكل گلب نيران اللهوف

وشمس هاشم لبست ثياب الكسوف وغايب اببرج المصايب نورها

* * *

وين هاشم يمته عالظالم تثور اندفنت الهم بالبقيع اربع بدور

يا وسافه منبنت الهم گبور اتساوه ويه الارض مبنه گبورها

* * *

هاذي غير الجالت عليهم الخيل بكربلا وانهدم من عدهم الحيل

وظلت عيال النبي ابوحشة الليل غابت ابدم الشهاده بدورها

* * *

وين هاشم وين الاكرام الاطياب يمته غايبها يعود من الغياب

ياخذ بثار أبو اليمه والاصحاب وثار اهله السلبوها خدورها

* * *

شمحله من نسمع ظهر ابن الحسن بالمهند يطفي نيران الفتن

بعد ما يبگه يزيد بكل زمن وينتهي شرها وظلمها وجورها

* * *

طهران / ١٩٨٢ م

فاطمة (عليها السلام )

بضعة الهادي سجان رب الخالق السوّاها

* * *

زهراء تزهر من معاني العصمه حلية شفاعه

مصيوغه من جوهر كنوز الحكمه ومعدن الطاعه

كل عالم يبيّن وصفها بعلمه حسب اطلاعه

بضعة الهادي رب الوصف صاغ الوصف وانطاها

* * *

زهراء وصف الخالق ملطفها كنز المعاني

شمّاء رسريس المجد والفها ونال الاماني

هالاقحوانه اشما ردت اوصفها يعجز لساني

بضعة الهادي آيه شرف وأهل الشرف تتلاها

* * *

حسناء يرتع من فضلها الاحسان برشف الولايه

ضوعاء تتبهلل كرامه وايمان شمس الهدايه

علياء ذروة مجد فوگ الاكوان للبشر آيه

بضعة الهادي معنى الكمال ازدهر من معناها

* * *

فاطمه ومن ضيها انتشر نور الكون حي هالكرامه

وبهالثريه ازدهر افق المسكون وكشفت ظلامه

كنز المعالي وبيها جوهر مكنون اصل الامامه

بضعة الهادي رب العلا بأوج العلا علاها

* * *

بوجودها الدين انبنت اركانه مصدره العفّه

وبالشرف والعزّه ثبت ميزانه ورجحت الكفّه

للهادي تحمل سيرته وعنوانه موصّفه بوصفه

بضعة الهادي مكشوف ذاك الظالم العاداها

* * *

بضعة الهادي بكل زمن نسمعها بالهم تناشد

والطاغيه اللي ضامها وروعها ظالم وحاقد

بكل يوم باب ام الحسن يدفعها والظلع واحد

بضعة الهادي يا ويله كلمن بالظلم آذاها

* * *

چم حره مثل الزهره صاحت هاليوم وينك يحيدر

وچم ظلع هذا اليوم اصبح مهشوم والچبد يسعر

بهاي البشر چم ظالم وچم مظلوم بفكرك تصوّر

بضعة الهادي چم گلب حن لنوحها وواساها

* * *

ام الحسن شافت مصايب وآلام وفگدك الغالي

وهاي المصايب لو تصب عالايام صارت ليالي

حملت محن كثره من گوم الظلام والدمع هالي

بضعة الهادي حكم الدهر جور وهظم راواها

* * *

خلصت عمرها فاطمه بهالاشجان ليوم المنيه

وزينب الحره استارثت هالاحزان من الزچيه

بهظم اليسر عافت جسوم الوليان فوگ الوطيه

بضعة الهادي بكل مأتم اللي ينّصب تلگاها

* * *

دمشق / ١٩٨٠ م

وا جداه

يا مسموم يا مسموم

جاهزه ثياب الچفن ونعشك اليوم اندفن

مو مثل الحسين

* * *

ما يجف دمع العين يشبه زمزم

ما ادري المن هالجفن فاض بدم

عالگضه نحبه وچبده ذايب بالسم

لو على الظلع البالخيول اتهشم

بهاي المصيبه اظن هيّن مصاب السجن

مو مثل الحسين

* * *

خيّمت يالكاظم علينه الاحزان

ومصابك بكل گلب وجّر نيران

هاليوم جسمك جهزوله الاچفان

مومثل جدّك چفنوه بالتربان

يمّك اجت شيعتك واتشيّعت جثتك

مو مثل الحسين

* * *

بسمّ الغدر گلبك يموسى تگطّع

ومجمع الشيعه بهالمصاب اتصدّع

يالكاظم ونعشك بهيبه تشيّع

وجدك ثلث تيام ظل بالمصرع

لمن لفاك الاجل نعشك بهيبه انحمل

مو مثل الحسين

* * *

يا موسى گلبك ندري ذاب ابسمّك

وندري السلاسل نشّفت كل دمّك

لاچنه راسك ما انفصل عن جسمك

ولا ذبحوا انصارك واهلك يمّك

راسك وياك اندفن ما طلع ويّه الظعن

مو مثل الحسين

* * *

يالكاظم ولو گلت بيدي الاصفاد

گبلك انشدّت بيها ايد السجاد

ارد انشدك شايف عليل وينگاد

وهم شفت رضّع تنذبح بالامهاد

يا موسى سجنك سهل ما انذبح بيدك طفل

مو مثل الحسين

* * *

يا موسى من غدروك گوم الاشرار

چانت عيالك آمنه بذاك الدار

وعيال جدك صاربيها الماصار

ارد انشدك شايف خيم تلهب نار

ما شفت حرگ الخيم ومسمعت صوت الحرم

مو مثل الحسين

* * *

يا موسى جسمك ما توسد الرمال

ولا الك راس انرفع فوگ العسّال

ولا الك عيله انسبت ويه الجمّال

ولا عفت بالغربه حراير واطفال

اشما صار حالك صعب ما عفت عيله بغرب

مو مثل الحسين

* * *

مشهد المقدس ١٩٨٢ م

الرباب (عليها السلام )

آه يبني آه يبني

من شفت خالي المهد لليسر گلبي استعد

عبد الله يبني

* * *

آنه الرباب اللي عقدت آمالي

وربيت عبد الله بغرس آصالي

روحي تهزّه والمهد دلالي

وسهم اللي صوّب طفلي غيّر حالي

سهم اللي حز النحر بدلالي صار الاثر

عبد الله يبني

* * *

عبد الله لو ما ايسيل بالطف دمك

ما چان سال الدمع من جفن امك

يوليدي ظل بگلبي مكتوب اسمك

وارسمت فوگ الجفن منظر رسمك

نشّفلي جاري الدمع يالمنحر منگطع

عبد الله يبني

* * *

آنه امك الغذيتك بجاري دموع

وفوگ المهد يوليدي أحنيت ظلوع

ما حسّبت انظر وريدك مگطوع

بجالك ردت راس امك يظل مرفوع

صوّبك ذاك السهم وبگلبي صار الالم

عبد الله يبني

* * *

آه يبني يالربيتك بدمع العين

ذيچ الليالي الزاهيه صارت وين

حال الرباب أصبح مثل حال حسين

وسهم الگطع منحرك صارن سهمين

يوليدي گوس الگدر بسهامه گلبي انفطر

عبد الله يبني

* * *

ما شايفه عيوني رضيع وينصاب

گبل الفطامه ينفطم بالنشاب

صوابين صارن لا تظن فد صواب

برگبتك واحد واحد بگلبي الذاب

والروح متألمه بسهمك وسهم الضمه

عبد الله يبني

* * *

من شفت مهدك خالي يا لب حشاي

ظليت أحن والعايله تحن وياي

ولو ندري بيك تموت ما ردنه الماي

جيتك وجبت جروح گلبي ويّاي

فگدك يريع الگلب خلاني أحمل غرب

عبد الله يبني

* * *

ما شايفه عيوني رضيع ومذبوح

بس انته ياللي غابت وياك الروح

هاك اخذ من عيوني دمعي المسفوح

يخبرك بأمك لليسر تالي تروح

امك تروح بيسر وانته تظل بالگبر

عبد الله يبني

* * *

طهران / ١٩٨١ م

اشكو لمن

زينب اشعدها يم المشرعه تدري بچفوف أخوها امگطعه

واليتامه امصدعه زينب اشعدها يم المشرعه

* * *

حايره زينب يم گمر عدنان

والگلب لاهب ابجمرة الصيوان

شاهدت جسمه والمعاتب حان

نادته يا من لهاشم گمر مو وكت نومه يم شاطي النهر

وما نهض من مصرعه زينب اشعدها يم المشرعه

* * *

ليش يا عباس ما تحاچيني

والدهر من خان بينك وبيني

وسهم البعينك صابني ابعيني

ناظرك لو ما يصيبه السهم بالگلب ما تشب نار الخيم

يا مصاب الفاجعه زينب اشعدها يم المشرعه

* * *

هاك عبتي هاك عالحرم خوفي

وگطعت الچفين گطعت چفوفي

والكفيل أيكون بالعهد يوفي

يا شهم ادري توفي بالعهد لاچن الخانك صواب العمد

وعيلتك متروعه زينب اشعدها يم المشرعه

* * *

أدري ما تخلف يا حليف الزود

عاهدت توفي والعهد مريود

لاچن الخانت ضربة العامود

ابعيني شاهدتك يبن حيدره جثتك عالترب متوذره

والاوصال امگطعه زينب اشعدها يم المشرعه

* * *

لاح المگدر يا گمر هاشم

انظر الجسمك عالترب نايم

وطاحت الايتام ابولية الظالم

يا سبب منگطع حبل الوصل وانته تدري الغرب ما ينحمل

اتحشمه ومتروعه زينب اشعدها يم المشرعه

* * *

الشمر لو شمّر وزجر يزجرني

چنت أتأمل انته تحضرني

يا كفيل احماي گوم باصرني

عيلتك لو مشت متيسره ويه گوم الطغاة الجايره

والخدر شيرجعه زينب اشعدها يم المشرعه

* * *

والاشد كل حال طبت الكوفه

وعيلتك تمشي ابحاله مچتوفه

والاشد من هاي لجسمك انعوفه

اشلون جسمك يظل فوگ الترب عالهزل تقبل اسلك هالدرب

وعالأبه متطبعه زينب اشعدها يم المشرعه

* * *

طهران / ١٩٨١ م

الآمال

يالاكبر انظر حالي بيك اعقدت آمالي

غذيتك ابماي العين واذخرتك لاجل حسين

ردتك تضحي گبالي بيك اعقدت آمالي

* * *

يا سورة الفتح الهبط بيها الروح مجملها وصفك والكمال أبو صفك

منهج السوره ابسيف عزمك مشروح آيتها چفك والعداله ابچفك

وچلمة التكبير الزهت فوگ اللوح والكاف حرفك والكرامه ابحرفك

يالاسمك أشرف آيه نصر العقيده الغايه

يطلبك منهج مبداك تسجل حروفه من دماك

وبالنصر تتعنالي بيك اعقدت آمالي

* * *

يا شمعة اوجودي التشع بالايمان يا ضمد گلبي لو تصوّب گلبي

يا جوهرة روحي الزهت بالوجدان يا نور دربي البيه او چد دربي

يا زهرتي التنفح ابروض الشبان يا ثمر حبي الروه ابدمعة حبي

هاك اخذ صوت أشجاني وفيض الدمع برهاني

ابدمك توفّي المطلوب والنصر بسمك مكتوب

ودمك زكات أعمالي بيك اعقدت آمالي

* * *

مطلوب من دمك تشرّع مبداك والطلب غالي يالرخصت الغالي

وامك تطلبك يولدي حگ رباك وسهر الليالي احرمت عيني ليالي

توفي الربه من النحر لو سال دماك يبتشر حالي يا مسرة حالي

تاريخك اليشهد لك سيفك يشرّع عدلك

يالاكبر ليالي رباك اتصور لي غسلك بدماك

وهز المهد أوحالي بيك اعقدت آمالي

* * *

غذاك ثدي الزود يالبيك الزود قدم اشهودك والصدق بشهودك

وابنشأتك للمبدأ انطيت اعهود حانت عهودك يالتوفّي عهودك

أدريك حر عن سيرة الحق اتذود ضحي ابوجودك والامل بوجودك

هاك اخذ سيفك سيفك وگلّب الحومه ابكيفك

يالراضع ابثدي الزود مرضاعك ايصير اشهود

يالغذتك آصالي بيك اعقدت آمالي

* * *

هاك اخذ سيف المعتقد والايمان هالسيف آيه والنصر بالآيه

هاي المعارك وكت المبارز حان ادرك الغايه والشهاده الغايه

قاعدة كل فارس ابوسط الميدان يحكم ابرايه والنجاح ابرايه

رايك فرع وجدانك اكشف وجه ميدانك

ابوسط الحرب يحله الموت هالفرصه منك لتفوت

لجلك رخصت الغالي بيك اعقدت آمالي

* * *

جاوبها عونچ يالتحشميني اليوم ادخل الحومه كون ارجف الحومه

تاريخ إلي ابصفحات حيدر معلوم عندچ اعلومه ومتخفاچ اعلومه

خل يبشر گلبچ الضامي المالوم اكشف اهمومه ابسيفي كشف همومه

وابصولتي المعروفه أگلب أطراف الكوفه

خل عينچ اليوم اتشوف اشما صفت گبالي صفوف

عهدچ يظل ابالي بيك اعقدت آمالي

* * *

ودعها لامه ولاح ظهر الميمون أقسم ابحيدر مختلف عن حيدر

الله وأكبر صاح وارتج الكون كبّر الاكبر والنعم لو كبّر

كل ساعه وجه الفرس ايغير لون من لون الاصفر صار بالدم أحمر

يللي الحرايب عيدك طبرة العبدي اتريدك

تعناله من امه الصوت من شافته ابحجر الموت

يالصدگتلي ابفالي بيك اعقدت آمالي

* * *

دمشق / ١٩٨٠ م

في كل زمان

وين الضماير محّد يناصر

هاي الصرخه ناداها أبو اليمه واحنه اليوم مثله انطالب الامه

وين الضماير محّد يناصر

* * *

خل نتصفح التاريخ ونكشف ناتجه المكتوم

وانشاهد بهالوادم چم ظالم وچم مظلوم

من يوم اللذي ناده سبط النبي لهذا اليوم

انكشفت سيرة الوادم ومغزاها صبح معلوم

ما لبّت نداء حسين وظلت عالجريمه تحوم

وگوم التبعت ابن زياد ما تختلف عن هالگوم

معروفه ابجرايمها هتك اعراض سفك دموم

اهل الرذيله عاشت ذليله

حسين يريد للامه ينجّيها وهيّه اتعنّت لچتله بمواضيها

وين الضماير محّد يناصر

* * *

سبعين ألف مصطفّه وشهرت للجريمه سيوف

والمعروف منكرهم والمنكر صبح معروف

واليلعب على الحبلين هذا ابكل عصر مكشوف

انحرفت امة الهادي لهالموقف حسين يشوف

گامت تعبد الاشخاص ومدّت للرذيله چفوف

دخلت للحرب ضدّه واصطفت گباله صفوف

ظل صامد أبو اليمه ما يعرف الذل والخوف

خانت البيعه وحكم الشريعه

ظل وحده عگب اخوته وانصاره يستنصر ومن يسمع استنصاره

وين الضماير محّد يناصر

* * *

گبله ضحت انصاره وكل اخوته واولاده

وحده ظل أبو السجاد باصوات الشيم ناده

هل من ناصر الينصر ويطالب استنجاده

محّد لبّه للنخوه ومحّد للوفه داده

حسين امتحن هالوادم واتعنه لاستشهاده

يعلم بيزيد يريد يآخذ ثار اجداده

يطلب من بدر ثارات وهذا الامر ما فاده

انذلت الامه ابچتل أبو اليمه

بهالصيحه أبو السجاد ناداها لاچن المطامع خانت وياها

وين الضماير محّد يناصر

* * *

حسين بكربلا ضحّه واللي غدرته آلاف

وابدم النحر سجّل هاي السنن والاعراف

واحنه سلكنه منهاجه ومنّه حملنه هالاوصاف

ما نصبر على الذله ومن حكم الظلم منخاف

شفنه مجتمع ظالم مثل ما أبو اليمه شاف

لا ذمّه ولا وجدان لاچن تدّعي اشراف

واتحملنه هالآلام من هالوادم الاجلاف

عافت شرعها ولزمت بدعها

گاموا يتهمونه بتهمه رجعيه واحنه نصيح فكرتنه حسينيه

وين الضماير محّد يناصر

* * *

قائدنه أبو اليمه واحنه ابمنهجه ماشين

منعوفه ابد للموت دوم احنه الحسينيّين

حب حسين مبدئنه واحنه بيه متمسكين

خل اشما يسمونه خل نتسمّه رجعيين

يكفيهم تقدمهم لنار جهنم الطاغين

هالزمره التحاربنه ما نعرفها من يا دين

لاهمه مسيح انگول لا همّه مجوسيين

عافت سننها وتبعت فتنها

وبكل زمن هالطغمه تحاربنه وبثارات أبو سفيان تطلبنه

وين الضماير محّد يناصر

* * *

خل اشما يسمونه اهل الحسد والطغيان

احنه انشرّف التاريخ بالمعرفه وبالاحسان

منغيّر مسيرتنه ونمشي ابسيرة القرآن

نقدّم درس للعالم بالمكرمه وبالايمان

بالدم ننصر الاسلام وما نتبع هوى الشيطان

نثبت مثل أبو اليمه وندحر جيش أبو سفيان

باسم حسين رايتنه خفّاگه ابمدى الازمان

نبذل جهدنه ونتبع رشدنه

بيوم الشدد للناس امتحناها ويّه الظلم والاطماع شفناها

وين الضماير محّد يناصر

* * *

طهران / ١٩٨٢ م

يا باب الحوائج

يا كاظم الغيظ الگلب مل الصبر

هارون بعده بالحكم شنهو العذر

* * *

يا تاسع اهل العصمه يا روح الوفه

من يوم فگدك صحنه عالدنيه العفه

گوس الدهر بسهامه لسا ما اكتفنه

يبن الطهر واهل المكر تدري شكثر

* * *

تصوبنه من الظالم بسهم الشدد

وچبدي مثل چبدك يمسموم انمرد

لليوم ما شفنه الفرح صحنه شبعد

شنهو الامر صار العمر مد وجزر

* * *

يا سابع اليمه وينبراس الشيم

گلبي جزع من النوايب والالم

والطاغيه سدد علينه شچم سهم

ومن الغدر شفنه العسر وين اليسر

* * *

حگه الگلب من يشن غارات العتب

وهالظالم بمصحف المعبود انكتب

بآية الحق)تبت يدى أبي لهب(

واهل الكفر كسرو كسر ما ينجبر

* * *

شبّان عدنه وبالسجون ملوعه

وچبودهم مثلك يموسى مگطّعه

يالكاظم وهارون ظلمه شيجرعه

ماتم صبر تدري الهجر مثل الجمر

* * *

جمرة مصابك بيها مستعره المهج

يالنورك بدوحة ضمايرنه ابتهج

نتامل من الباري ساعات الفرج

وطاغي العصر يوم النصر حتماً يفر

* * *

تحمّلنه من الدهر آلام ومحن

موجود هارون الرشيد بكل زمن

يا يوم يخمد جمر نيران الفتن

ما نبتشر الّه تطر شمس الفجر

* * *

يا يوم نسمع ظهر شبل العسكري

وينبجح دلالي ويطيّب خاطري

من الكعبه مسرع يعتني لارض الغري

نعم الذخر وجهه يسر مثل البدر

* * *

ويعتني من وادي الغري لطف كربله

ثلث ميّه وثلاثه وعشر فارس اله

ينادون يا ثارات ابن عقد الوله

الصوت ايهدر فوگ الشگر من كل كتر

* * *

شبلك يموسى يطالب بثار السلف

وبصارمه يميّز الدر من الصدف

ويآخذ بثار حسين وينول الهدف

وگوم الكفر ضدّه تجر بيض وسمر

* * *

من كربلا يعتني لگبرك ممتحن

ويصيح يا جدي فجع گلبي الحزن

انت بسجن وآنه بسجن نفس السجن

يا كاظم الغيظ الگلب مل الصبر

* * *

طهران / ١٩٨١ م

الأصول الخمسة

ابدينك تمسك والنجاح ابسعيك

ما ينفعك غير الصبر والإيمان والنجاح ابسعيك

* * *

الباري وضع خمسة لأصول الإسلام تثبيته بأصوله

هالخمسه مجمع للسنن والأحكام شارحهن رسوله

مجملها اعمل خير واترك الآثام والجفت مسئوله

ادرس اصولك والنجاح ابسعيك

هالخمسه مستوحات من القرآن والنجاح ابسعيك

* * *

أول أصل من هالاصول التوحيد للراد الهدايه

(قل هو الله أحد(صارت تأكيد لليدرس الآيه

عن سورة الاخلاص بالك لتحيد خسرانك الغايه

وحّد الباري والنجاح ابسعيك

وانظر القدرة ربك ابكل امعان والنجاح ابسعيك

* * *

واصل النبوه الجمع شمل الامه بالهادي ارتباطه

هالاصل زاهر من سناء العصمه وبالحق اختلاطه

والاسلمت للهادي تتبع حكمه تلتزم بأسباطه

اتبع رسولك والنجاح ابسعيك

وادرس حياة الهادي مغزاها شچان والنجاح ابسعيك

* * *

وأصل الامامه ابتدأ منه الترجيح للرايد الذروه

لو ردت شرح الاصل تلگه التوضيح ابمستمسك العروه

أصل الامامه اعليه تم التشريح من بيت النبوه

الحق ابيمينك والنجاح ابسعيك

من آية التبليغ اخذ البرهان والنجاح ابسعيك

* * *

وأصل العدل كل التمسك بي فاز بالعدل من يحكم

لمن ينصبونك حكم لا تنحاز بالحكم لا تظلم

صير ابكلامك واقعي بلا ألغاز واليراوغ يندم

اقسط ابحكمك والنجاح ابسعيك

والباري وصانه القسط بالميزان والنجاح ابسعيك

* * *

خامس أصل من هالاصول الآخر ميعاد القيامه

كل بشر من خير الاعمال شذاخر يلگاهن جدّامه

واليمشي عالحبلين ثعلب ماكر بجهنم مقامه

ادرك مصيرك والنجاح ابسعيك

اتصور المحشر وانته واگف حيران والنجاح ابسعيك

* * *

هول الحشر لو ردت تخلص منّه وتتحسن أهوالك

لوذ ابشرف سيد شباب الجنه شد حبل اتصالك

آخره ودنيه بهالشرف تتهنه وتتنزه أعمالك

واذكر امصابه والنجاح ابسعيك

كل دمعه عالمظلوم تطفي النيران والنجاح ابسعيك

* * *

يالمؤمن اذكر سيد أهل الإيمان واتصور الحاله

من جمع ربات الخدر بالصيوان وايودع عياله

وچبدته استعرت من حنين الرضعان وانفطر دلاله

نادنّه ارشد والنجاح ابسعيك

تضمّد گلبنه ابگطع گلب العدوان والنجاح ابسعيك

* * *

زينب تنادي وتشد للسيف أنجاد يا رمز الحميه

انته العليك اليوم توفي الميعاد وعيالك عليه

فرحّت گلبه وراح يم السجاد يعرضله الوصيه

يوليدي اصبر والنجاح ابسعيك

وزينب تلم عيلتي ابحرگ الصيوان والنجاح ابسعيك

* * *

دمشق / ١٩٨٠ م

الحسن العسكري (عليه السلام )

دمع الأصول يفيض بعين الشهاده

أمسه الحسن مسموم وهذا العهد مرسوم

بعين الشهاده

* * *

للهادي رب الكون جاعل أسباط بيها الشفاعه

سيرة المؤمن من گبل ما يحتاط يبدي الاطاعه

والما رصد مبدأها بالاستنباط يعلن ضياعه

حب اثنعش معصوم أشرف عباده

مبدأها كشف هموم وهذا العهد مرسوم

بعين الشهاده

* * *

أهل النُهى تعرِّج على الاستقراء وتكشف بيانه

وتبحث على جوهر كنوز العلياء وتكسب ضمانه

كنزين مكنوزه بارض سامراء شمس الديانه

حدّث عن الكنزين وابني استناده

وحب الگلب مفهوم وهذا العهد مرسوم

بعين الشهاده

* * *

بسيرة الهادي أشرقت شمس الدين ابهجة أنواره

استارث علومه من الائمه الماضين وظهرت أسراره

أقره بأمالي الطوسي هذا التعيين يصدّق اخباره

شرح الاماليات بيها استفاده

للهادي بيها علوم وهذا العهد مرسوم

بعين الشهاده

* * *

ودستور شرع الحسن يسطع أنوار للفكر وافي

منهاجه متقلد بحلية أسرار من بحر صافي

عن هالجواهر لو تريد الاخبار أدرس الكافي

اليدرس علوم الدين يقوه اعتقاده

ودرب الجهل مشوؤم وهذا العهد مرسوم

بعين الشهاده

* * *

بشرع الحسن ظهرت معاجز وآيات والدهر شاهد

وأسراره من نهج السلف مستوحاة ومبدأها واحد

وبهالامور الرايد يصفّي الذات يدرس عقايد

بادئة كل احسان سيرة رشادة

بنهج ثنعش معصوم وهذا العهد مرسوم

بعين الشهاده

* * *

جناح الشهاده يرفرف اعلى التكوين يعزّي نظامه

وعن سمه الامه غربت شمس الدين وعسعس ظلامه

وأضحوا دعاة المعتقد مفجوعين بأصل الامامه

والحسن هذا اليوم تمم جهاده

من سيرة المظلوم هذا العهد مرسوم

بعين الشهاده

* * *

من بني العباس انوجد هالخذلان أصل الظلاله

المتوكل العباسي يشبه مروان بصفحة أعماله

واليوم بالسّم غدر روح القرآن وچبد الرساله

المتوكل اعلى الزيف چان اعتماده

وانكشف هذا اليوم وهذا العهد مرسوم

بعين الشهاده

* * *

دمشق / ١٩٨٠ م

الغريبة

(عگيلي(

زينب يحسين اتلگاها ردت وعيالك وياها

* * *

هاي اختك زينب شاهدها وچتالك عنك مبعدها

اگعد يحسين وناشدها عنها وعن حال يتاماها

* * *

هاي اختك زينب تدريها للشام الگوم ميسريها

وبچم ديوان موگفيها وچم طاغي وشامت حاچاها

* * *

من الطف طلعت مغصوبه وايديها بدمك مخضوبه

متكفله العيله المسلوبه ومثلك لعيالك ترعاها

* * *

طبت للكوفه بيا حاله من جور وزجر الجماله

شاهدها ابن زياد گباله وبايده لراسك راواها

* * *

وابچتلك متشمت بيها وابغلظه وشتم يحاچيها

ما سيطر بلسانه عليها ولا فجّر دمعة عيناها

* * *

اشما ظل يتغطرس ما سيطر واحلامه انهارت واتدهور

تالي بضعنك للشام آمر وانوّت للكوفه بمسراها

* * *

للشام عيالك ودّوها جاروا بالمسره وضهدوها

ما حصلوا غايه الرادوها وزينب اعيّاهم ملگاها

* * *

بالمجلس وگفت منتقمه لا مرعوبه ولا مهتمه

من يزيد وجوره وظلمه او وصلت غايتها ومغزاها

* * *

والطاغي انهارت احكامه وخابت آماله واحلامه

اشما زاد ابظلمه واجرامه لثورتكم ما سد مجراها

* * *

وزينب ردتلك منتصره بالحال اعلم انته وأدره

گوم ونشّف منها العبره نالت منواك ومنواها

* * *

كربلاء المقدسة / ١٩٧٨ م

الانتظار

(عگيلي(

الغايب لو عاد من غيابه كل حگ ويرجع لأصحابه

* * *

ها ها يالمتغيّر لونك إصبر كف دمعات إعيونك

ساعه وتوگفله المديونك وابدقّه اتصفّيله احسابه

* * *

يالمغبون إصبر لا تجزع وابأمرك حكّم واتورّع

شمس الغابت لابد تطلع واتشوف الگوم النهّابه

* * *

هالشمس اعله المؤمن رحمه وللمهموم اتروّح همّه

واعله الجاحد تصبح نقمه والگلب الظالم ريّابه

* * *

والظالم مكشوفه أطباعه يتغير كل ساعه وساعه

ملعونه الذات الطمّاعه وصاحبها انكشفت أنسابه

* * *

والابن اللّي يطلع جاحد اعرف هالسر من الوالد

والثعلب لو راد ايعاند ما يخدع سلطان الغابه

* * *

يالثعلب لا تطغه بأمرك كل الوادم عرفت مكرك

غدّار ومستأصل غدرك واليوم انكشفت اسبابه

* * *

ما فادك مكرك ما فادك لو دگت ساعة ميعادك

ما تگدر تخدع صيّادك لوحط ابگوسه النشّابه

* * *

واشلون الماكر يخدعنه واحنه المتعيّن قائدنه

غايب نترجاه يحضرنه وايلم اجروح المنصابه

* * *

وسلطان الجاير يتحاكم ابمحكمة المهدي ويتغرم

كل گطره السالت من الدم وايرد كل دين الطلاّبه

* * *

دمشق / ١٩٨٠ م

عز علينا فراقك

ظلت يا علي زينب غريبه بهالليله الرهيبه

وتسعر بالگلب نار المصيبه

* * *

اجت زينب لبوها والدموع تسيح تعرضله أمرها

من جرح الگلب صوت العقيله يصيح واتگطع گلبها

نوب اتگوم من عالارض نوب تطيح ما تندل دربها

محتاره العقيله ومتصوبه الليله

تصرخ والگلب شاجر لهيبه

* * *

للمرتضى اتعنّت والدمع مسفوح وتخاطبه بعبره

تگله ليش جسمك عالترب مطروح وبراسك الطبره

گوم اتوسد بروحي وفرشت الروح يمّك على الغبره

بدلالي أچفنك وبروحي أدفنك

محبوب ودفن جثة حبيبه

* * *

تهل دموع وتنادي يحامي الجار يا ليث الحرايب

عگبك يا علي دلالي يلهب نار من جمر المصايب

شيظل بالدار لو فگدت عمدها الدار تهدمها النوايب

وآنه نهدم بيتي من حلّت رزيتي

وغدرات الدهر لتظن عجيبه

* * *

لو ادري يفيد وينفعك العتاب چان الگلب عاتب

لاچن ادري ما ينفع يداحي الباب هالون والمعاتب

لمن شفت عگبك مظلم المحراب دلالي تلاهب

فگدك هدم حيلي واتوجر دليلي

وهيهات الگلب يبطل نحيبه

* * *

عنّي لو رحت وياك روحي تروح يا روح العقيله

دلالي شكثر يحمل هظم وجروح بوداعك الليله

والمجروح يعرف علة المجروح شيضمد دليله

صابنّي الليالي ومضيّعه الغالي

ولو راح الذخر يا هو اليجيبه

* * *

متوسد ابحجر الموت يا حيدر وعيني عليك تربي

يگولون الصبر ينفع وما اگدر اصبر على عتبي

لو بالصخر چان الصخر يتفسّر من صبر البگلبي

شيحمل هالفجيعه يا ضيعة الضيعه

وانظر شيبتك بالدم خضيبه

* * *

يحيدر من تضمّه لجسمك التربان من يكفل بخدري

جاوبها الچ ذاخر گمر عدنان يا زينب ابشري

تگله اشلون لو بي خانت الازمان يا هو اليكفل امري

جاوبها اخبرچ واعتمدي اعلى صبرچ

سهم الفاجعه لگلبچ يصيبه

* * *

ناداها اخبرچ والخبر مكنون واوصيچ بوصيه

من ارض المدينه لكربلا تمشون بضعون المنيه

وتشوفين الهواشم لمن يضحّون برض الغاضريه

تتسلب أيتامچ وتتوجر خيامچ

وجسوم الاهل بالطف سليبه

* * *

طهران / ١٩٨١ م

المصيبة العظمى

يا ناس لتلوموني نار ودمع بعيوني

متصله لوعات مصاب من العرش للمحراب

نار ودمع بعيوني

* * *

ما بين ساق العرش وآفاق اللوح

متصله للمحراب جمرات النوح

والملأ بالعالم العلوي بلا روح

اشرح الحاله بجمر دمعي المسفوح

واعرض بيان احزاني للعالم الإنساني

چم گلب ويّايه ذاب من العرش للمحراب

نار ودمع بعيوني

* * *

گلب النبوه الليله دامي ومصيوب

چم گلب ويّه الهادي بالوعه يذوب

آدم وشيت وسليمان وأيوب

وفراگ يوسف رد لفاه ليعگوب

الليله الرسل بالكوفه لحيدر تريد تشوفه

نزلت تضمد لصواب من العرش للمحراب

نار ودمع بعيوني

* * *

مفجوعه هالليله السور والآيات

والمصحف امسه بين لوعه وآهات

ودمع الزبور اتفايض اعلى التورات

وسالت من الانجيل نفس العبرات

والدين عينه ربيّه يشكي بفگد راعيه

لمن وگع داحي الباب من العرش للمحراب

نار ودمع بعيوني

* * *

من هالخطب ما شفت أجلّ وأفضع

جبريل بالعالم العلوي اتصدع

وميكال گلبه بهالمصاب اتگطع

وعبرات فطرس مثل عبرة صعصع

وامسه بحزن اسرافيل خل تفرح اصحاب الفيل

للمعتقد كوكب غاب من العرش للمحراب

نار ودمع بعيوني

* * *

بآفاق مكه النايبه تتجسم

لاچن عيون الكعبه فاضت من دم

والصفى والمروى اتصل بيها الهم

بعين الحجر الأسود تفايض زمزم

وركن الديانه اتخضب ابدمك يچاتل مرحب

واتصوب الدين صواب من العرش للمحراب

نار ودمع بعيوني

* * *

ارض وسمه اليوم الحزن غطاها

واهل الكفر نامت رغد عيناها

وزينب ابصوت النايبه اسمعناها

يا حيدر تنادي وهتفنه وياها

يا حيدر اخذ عتابي من جمر دمع مصابي

واليعتب يريد جواب من العرش للمحراب

نار ودمع بعيوني

* * *

صرخة عتب صرخة دموع واحزان

يا علي انت اللي حضرته لسلمان

لارض المدائن جهزتله الاچفان

ما تدري بحسين انصرع عالتربان

عالغبره جسم المظلوم متغسل ابفيض دموم

واتچفن بذاري تراب من العرش للمحراب

نار ودمع بعيوني

* * *

طهران / ١٩٨١ م

إخوان الشهادة

عيال أبو اليمه بخيمة العصمه

وصاح ابن ظاهر بهمه وحشم انصاره

* * *

موقف نشوفه بكربلا الليله

بخيمة المظلوم انجمعت العيله

وابو اليمه الموت صار يبديله

شاهد الاصحاب مقدمين رگاب

وصاحوا بصوت الشهاده خل نشن غاره

* * *

حسين بخيامه يستمع هالصوت

لن حبيب يصيح ما يهمنه الموت

هاذي فرصتنه وما نخلها تفوت

وهذا جيش زياد ضد أبو السجاد

لو يخيّرونه الاعادي الموت نختاره

* * *

اليوم ابن ظاهر ناشر الرايه

وصاح يا عابس ادرك الغايه

خل نمد رگاب ونحرس الثايه

شوفوا هذي الخيل محجّله بتحجيل

وهذا أبو اليمه علينه شابح انظاره

* * *

لن زهير يصيح يخوتي الانصار

من بدر هالگوم مطالبه بالثار

ولو نعوف حسين علينه يصبح عار

گوموا فد گومه ندخل الحومه

وهذا ميدان الحرايب خل نشب ناره

* * *

انجمعوا وراحوا لخيمة المظلوم

وللشهم نادوه هالامر محتوم

هالحرايب سوگ والاسعار دموم

والجهاد يريد للامجاد نعيد

وندري جيمان آل اميه جيوشه جراره

* * *

لن أبو اليمه صاح يالاطياب

احنه نتقدم ونفتدي لرگاب

جاوبه عابس ترفض الاصحاب

نريد نتقدم نفتدي بالدم

وما نخلي هالفواطم تبگه محتاره

* * *

اخذوا الرخصة ودخلوا الميدان

جرّدوا السيوف وذلّوا العدوان

استشهدوا للدين وسجلوا عنوان

بروض السعاده تحله الشهاده

والخلود بهالشهاده ضربوا استاره

* * *

طهران / ١٩٨٣ م

مَن المعين؟

تودعنه يبو اليمه

يا هو اليكفل عيالك ويا هو اليحرس أطفالك

تودعنه يبو اليمه

* * *

يبو اليمه حله التوديع گوم او ودّع العيله

حرم تتنطر وداعك وهاليله أشد ليله

رباب وسكنه وام كلثوم ورمله وزينب وليله

يصيحن صوت يبو اليمه

لمن تگرب آجالك يا هو اليحرس أطفالك

تودعنه يبو اليمه

* * *

يبو اليمه ظلام وخوف خيمن فوگ المخيّم

حرم ظلينه يا مظلوم ونجري الدمع ويه الدم

زمان الشوم يفارگنه وندري الشمل ما يلتم

دمع وفراگ يبو اليمه

لمن يسفر هلالك يا هواليحرس أطفالك

تودعنه يبو اليمه

* * *

نشوف اليوم يا مظلوم خدر العايله مرتّب

وباچر لمن تضحون هذا الخدر يتسلب

تظل أيتامك بحيره ونار مخيمك تلهب

جمر وآلام يبو اليمه

وچف الدهر لو نالك يا هو اليحرس أطفالك

تودعنه يبو اليمه

* * *

يخويه حسين أشد كل حال لو شفنه الحجر صابك

يسيل الدم على شيبك وتسعر جمرة مصابك

وسهم المثلث يصيبك ابچبدك والدمه خضابك

بالمثلث يبو اليمه

من ينگطع دلالك يا هو اليحرس أطفالك

تودعنه يبو اليمه

* * *

على التربان بالحومه توگع من ظهر مهرك

وشمر يتعنه للمصرع ويتربع على صدرك

يخضب وجهك بدمك وبسيفه يحز نحرك

واشد كل حال يبو اليمه

من يولينه چتالك يا هو اليحرس أطفالك

تودعنه يبو اليمه

* * *

حرم واطفال يبن امي تظل بمصرعك يمّك

ونشوف الخيل بالميدان بالحافر ترض جسمك

يچفّن جسمك الذاري ويغسّل جثتك دمك

يگطعونك يبو اليمه

ومن تتوسد رمالك يا هو اليحرس أطفالك

تودعنه يبو اليمه

* * *

عگب عينك نشوف النار وسط مخيمك تسعر

ويداهمنه هجوم الخيل ويصدّع گلب هالخدّر

حرم ما تعرف الذلّه وتالي بغصب تتيسر

عگب چتلك يبو اليمه

يا هو اليحدي برحالك يا هو اليحرس أطفالك

تودعنه يبو اليمه

* * *

على التربان من تطيح ويرد المهر خالي

أنشف بالصبر دمعي وأهيأ للسبي عيالي

وعگب هيبة گمر عدنان يحدي الشمر برحالي

وأنادي عليك يبو اليمه

صوت الحزن يبرالك يا هو اليحرس أطفالك

تودعنه يبو اليمه

* * *

طهران / ١٩٨٣ م

زفاف المنايا

يا روحي يجسام خانت بيك الايام

يالضحيت دمك لاجل الاسلام خانت بيك الايام

* * *

يا نسمة الهبّت من الجروح برياض السعاده

يا غصن الحسن لاهل الوفه تفوح يا ساعد وداده

يا شاب العلى التربان مذبوح بحجور الشهاده

يوليدي يعريس يا نسمة الرسريس

يا جفن الغفت برموشه الاحلام خانت بيك الايام

* * *

يعريس الشهاده البالحرب صار ابدال الحنه دمك

يالسجلت بالطف اعظم ادوار من ناصرت عمك

بفراگك دليلي يسعر بنار وإسمع صرخة امك

بعد شيصبر الروح عليك الگلب مجروح

المنيه خطفتك من بين الخيام خانت بيك الايام

* * *

يريع الچبد شيصبر المفجوع من جور المصايب

امل گلبي مثل منحرك مگطوع بسيوف النوايب

اريد اعلگ شموعك بين الظلوع ينبراس الكتايب

يبن الحسن انخاك وابعث روحي وياك

بلچن جرح گلبي الليله يلتام خانت بيك الايام

* * *

يجاسم والدك تنذبح وصّاك وتتقدم ضحيه

وبهاي الشهاده غفت عيناك بفراش المنيه

وصاك الحسن تتحنه بدماك لا تنسه الوصيه

وعمك ناده هالصوت خالد تظل متموت

گلبي وگلبك وگلب الحسن هام خانت بيك الايام

* * *

اچفنك بالگلب والچبد لحدك واغسلك من المدمع

گوم من الثره بروحي اوسدك روحي الك مضجع

يريت انگطع چبدي گبل چبدك ولا شوفك مگطع

طفت عيني ولا شوف بدال الشمع السيوف

ونثّارك صبح بالمعركه سهام خانت بيك الايام

* * *

گلب امك مثل جسمك المصيوب تصوب بالمصيبه

ما حسبت اشوفك يبني مخضوب والجثه سليبه

علينه بكربلا هالامر مكتوب اظل بالطف غريبه

گلبي من الحزن ذاب وهام ابجنح المصاب

وهاشم الك نشرت سود العلام خانت بيك الايام

* * *

يبن الحسن يالحنة چفوفك صارت دمه الطبره

لو صار اليسر تقبل اشوفك متوسد الغبره

بهذا الحال يبني اشلون اعوفك گلبي خلص صبره

اشلون اطلع بالاحزان واعوفك على التربان

وانادي عليك من الكوفه والشام خانت بيك الايام

* * *

طهران / ١٩٨١ م

اين الخدور

يا گمر عدنان من طاحت الرايه

ما ظل خدر للعايله

وحرگوا الصيوان من طاحت الرايه

* * *

زينب اتعنت للنهر مرعوبه

وصاحت ابصرخه ويه الدمع مصحوبه

يا ابا الفضل اختك أنه المهيوبه

وأستار خدري ابرايتك مضروبه

وعگبك يعباس لا خدر لا ثايه

وخدري البنيته ابكربلا

اتوجر ابنيران من طاحت الرايه

* * *

يا ابا الفضل عالخيم غارت الصفوف

يا ريت عندك نظر سالم واتشوف

ويا ريت ما مگطوعه منك الچفوف

چان الحرم ما حست ابلوعه وخوف

من غارت الخيل من هجمت عدايه

ظلت اگلوب اموجله

وجارت العدوان من طاحت الرايه

* * *

يا ابا الفضل بالخيم ريتك موجود

ويا ريت ما صوّبك ذاك العامود

ما چان خيل اعداك داست الحدود

ولا چان خدر الحرم منهن مفگود

راح الخدر راح من راح حمّايه

والحرم ظلت معوله

ومصدر الاحزان من طاحت الرايه

* * *

يا ابا الفضل بالصدر ضاگت الانفاس

هاك اخذ أصوات العتب يا عباس

وانچان عذرك بالعمد صاب الراس

ظلع أبو اليمه ابحافر الخيل انداس

وانتهض من جيت يم جسمه شچايه

وجثته ابدمها امغسله

والچفن تربان من طاحت الرايه

* * *

يا ابا الفضل وين العهد أصبح وين

للنخوه ردتك تنتهض مثل حسين

لتگول عذرك بالسهم صاب العين

ولتگول ما عندي يسار ولا يمين

اتعنت هالعيال للنهر ويايه

ومنها المدامع هامله

وزادت الاشجان من طاحت الرايه

* * *

يا ابا الفضل وانته التكفلت حماي

لا تضن جيتك أشكي من نار اضماي

من الماي جزنه وبعد منريد الماي

لاچن اجيت أرد آخذ الجود وياي

راح أترس الجود ابدمعتي الهمايه

وأروي الگلوب الذابله

وچم گلب عطشان من طاحت الرايه

* * *

چنه الگمر جاوب ابگلبه الدامي

بهذا العتب لتهيجين آلامي

سهم العتب هالنوب فوگ اسهامي

ما خنت عهدچ خانتچ أيامي

ما خنت العهود امسجلها بدمايه

لاچن وحگ سيد المله

حكم الدهر خان من طاحت الرايه

* * *

طهران / ١٩٨٣ م

الشهيد الأول

خانت الكوفه عهدها طول الدهر متسجله

خانت الكوفه عهدها

* * *

عند الحمايل منكتب هالمرسوم

المضيّف بواجب التضييف يقوم

الكوفه بغدرها انفضح سرها المكتوم

غدرت الضيف وغسلته بفيض دموم

هالفعل ناتج حقدها لحد الوفه ما توصله

خانت الكوفه عهدها

* * *

للكوفه مسلم من وصل عالميعاد

ياخذ عهود البيعه من عدهم راد

ما يدري بيها انصاعت لابن زياد

هالگوم ما تختلف عن الاجداد

واضحه بغشها وحسدها معروفه من قال وبله

خانت الكوفه عهدها

* * *

بعثوا كتبهم والكتب خدّاعه

لحسين صاحوا نبدي أمر الطاعه

ومسلم عرف هالمجتمع وأوضاعه

والكوفه يدري لياحكم منصاعه

مسلم يخطط رشدها وهيّه تريد تقاتله

خانت الكوفه عهدها

* * *

مسلم امتاز بأعتقاده وصبره

أول شهيد أصبح بهاي الثوره

وموقف الثوره لو تريد تنظره

تشاهدها ثوره وعالدهر منتصره

ثوره تمتاز بمجدها بهالثوره أول مرحله

خانت الكوفه عهدها

* * *

مسلم شهيد التضحيه والايمان

وابموقفه انهدمت عروش الطغيان

وابفيض دمّه انكتب نهج القرآن

بالشرف مسلم سجل أعظم عنوان

فكرته الحره عقدها وصبر أبو اليمه يمثله

خانت الكوفه عهدها

* * *

گبال الظلم موقفه السامي تخلّد

بثورة حسين أول شهيد استشهد

وظل اسمه بلسان الدهر يتردد

هاشمي وطيّب أصل من أب وجد

هاشم ابجنة خلدها وبسقر گوم الجاهله

خانت الكوفه عهدها

* * *

مسلم غيور وللمظالم ما طاع

وأرموه من قصر الاماره اعلى الگاع

ثاره نأخذ يوم الطفوف وما ضاع

وسيف العقيده للمظالم گطّاع

مسلم لهاشم ضمدها تشهد مواقف كربله

خانت الكوفه عهدها

* * *

ساحه الطف أصبحت مصدر الاحزان

من وصل ظعن الحرم ويّه الوليان

وضحّوا أهالي المرجله والايمان

واعلى الحرم غارت خيول العدوان

والخيم طايح عمدها وصاحت بصوت العايله

خانت الكوفه عهدها

* * *

طهران / ١٩٨٣ م

أنصار الإمام (عليه السلام )

يا محله هالانصار وگفت بهمه

يم أبو اليمه

ورفرف جناح الموت بالغاضريه

* * *

يا محله هالانصار اهل الشهاده

من دخلت الميدان بزود وإراده

واتنثرت الارواح بروض السعاده

مذخوره للدين وتناصر حسين

رفعوا لوه التوحيد ضد آل اميه

* * *

يا محله من تثور للحگ هممهم

للشرع والاحكام ضحوا بدمهم

للذّله ما يرضون ترفض شيمهم

طاهره المرضع صافيه المنبع

والشرف والاحسان عدهم سجيه

* * *

يا حله سيف الموت وسط المعاره

يشعل جمر بالكون من يصب ناره

وانصار أبو السجاد شنّوا الغاره

ثابت عزمهم ضحّوا بدمهم

واتنثرت الاجساد فوگ الوطيه

* * *

يا محله من ينشال سيف ابن ظاهر

وعابس حليف الزود بالهمّه ثاير

وناده زهير بصوت وين الضماير

معروفه الانصار بالحرب من صار

الهم امجاد تنور فوگ الثريه

* * *

يا محله بالشدّات لو شدّوا الحيل

الهم وجوه بدور لو خيّم الليل

بالدمه تصوغ حجول واتحجّل الخيل

معروفه بالزود والكرم والجود

غسّلها چف الموت بدم المنيه

* * *

يا محله من تصيح يرجف المسكون

ولو شنّوا الغارات يتصدّع الكون

بالحرب لجل الدين عزموا يضحون

شوف الكرامه لجل الامامه

وللمعتقد ارواح تنطي هديه

* * *

ضحت لاجل حسين بالحومه الانصار

الحر الرياحي بزود بالمعركه ثار

ومن صارمه الميدان يتلاهب بنار

ضهضب بزوده واثبت وجوده

من سقر للفردوس راشد النيّه

* * *

طهران / ١٩٨٢ م

سوف نسبى

بحال الغرب يحسين شيصبر عيالي

والحرم وين تروح لو شافتك مذبوح

وامگطع گبالي

* * *

زينب تعنت والگلب شاجر بهمه يم أبو اليمه

جمعت عيال المصطفه بخيمة العصمه يم أبو اليمه

وتنادي هذا الموقف بعيني أرسمه يم أبو اليمه

واعرض صور احزان من دمعة اطفالي

ويبگه الدمع مسفوح لو شافتك مذبوح

وامگطع گبالي

* * *

يبن أمي گوس الفاجعه نيشن سهامه بعين اليتامه

ودمعة افراگك يا شهم تصبح علامه بعين اليتامه

وجمر المخيم ينطفي ويسعر ضرامه بعين اليتامه

شيأمن الايتام لو فگدت الغالي

وشيضمد المجروح لو شافتك مذبوح

وامگطع گبالي

* * *

يبن امي لو شفت الجسم منك مگطع بخطة المصرع

ويم جسمك املاك السمه تسجد وتركع بخطة المصرع

للحرب يا رب الحرب هالعيله تطلع بخطة المصرع

وتنادي يا مظلوم خيّبت آمالي

واليسر الها يلوح لو شافتك مذبوح

وامگطع گبالي

* * *

يبن امي واعظم فاجعه لو شفت جمسك مغسل بدمك

وترك دليلي اعلى الترب يا خويه يمك مغسل بدمك

مره يقبّل منحرك مره يشمك مغسل بدمك

والاشد من هالحال يا ثمر دلالي

ما تظل بختك روح لو شافتك مذبوح

وامگطع گبالي

* * *

يبن أمي عگبك احمل سهام المنيه من الغاضريه

واليسر يحسين اليسر يصعب عليه من الغاضريه

يا هواليصدگ بت علي تطلع سبيه من الغاضريه

والحرم صاحت صوت حالك مثل حالي

وتنصب دار النوح لو شافتك مذبوح

وامگطع گبالي

* * *

وچبد الارامل لا تضن يآخذ قراره وتطلع يساره

واشلون گلب الحرم ما تلتهب ناره وتطلع يساره

من ساحة الطف تنسبي لقصر الاماره وتطلع يساره

بالكوفه والشامات من يكفل عيالي

ودرب اليسر مفتوح لو شافتك مذبوح

وامگطع گبالي

* * *

بغداد / ١٩٧٨ م

الصابرة

غاب هلال دنيايه ابطيحت الرايه

يا دهر لا تنساني ما ينّكر عنواني

اشلون اتخون ويّايه ابطيحت الرايه

* * *

يا دهر زينب يا دهر هاك اخذ صوت مصابي واسمع عتبابي

يا دهر تذكر كربلا يوم الخنت بأحبابي واسمع عتابي

زينب تراني يا دهر چانت العفّه حجابي واسمع عتابي

يوم الجيت من طيبه تذكر الهيبه

ابزود اخوتي الكفلوني والكربلا جابوني

ابذله ارضيت حاشايه ابطيحت الرايه

* * *

يا دهر تعرف يا شهم بالطف نصب صيواني ورافع كياني

بزود أبو فاضل منكتب زودي وشرف عنواني ورافع كياني

أيمانه والف رايته ومتوالف بايماني ورافع كياني

يا غدار بالوالي تذكر دلالي

ولحالي چنت تشوفه من گبل گطع چفوفه

خاب اليوم رجوايه ابطيحت الرايه

* * *

يا دهر دلالي انصدع من شفت جسم الاكبر عالثره موذر

اشبه الوادم بالنبي لاچن ابدمه اتعفر عالثره موذر

طبرة العبدي ابهامته واتغسل من المنحر عالثره موذر

الاكبر طاح بالحومه وفاضت دمومه

وذرّني سيف العبدي خلّه المراره ابچبدي

وليله اتلوذ بحمايه ابطيحت الرايه

* * *

يا دهر چم شاب احرمت وابعرسه ما متهني وخيبت ضني

عريس جاسم حنته ابفيض النحر متحني وخيبت ضني

شمعة زفافه ابخيمته طفّوها واشتد ونّي وخيبت ضني

جاسم شاب متهنه ابليلة الحنه

لاچن الصوّب عيني وخلّه الهظم يلفيني

لمن جيت شچايه ابطيحت الرايه

* * *

يا دهر تعرف يا سهم خلّه المدامع تجري وحيّرني بامري

سهم الگطع نحر الطفل بالاثر صوب نحري وحيّرني بامري

سهم ابن كاهل بالگلب جمراته ظلت تسري حيّرني بامري

طفل حسين من سهمه اتخضب ابدمه

لاچن الزيّد همي وابجسمي نشّف دمي

وخلّه النار بحشايه ابطيحت الرايه

* * *

يا دهر تعرف يا سهم متمركز بدلالي وغيّره لحالي

سهم المثلث يا دهر من گطع چبد الوالي وغيّره لحالي

چانت الدنيه زاهيه بوجود اخويه الغالي وغيّره لحالي

لمن غاب والينه جاروا علينه

لو ما لفت آجاله ما تهجم الخيّاله

وفزع الخيل عالثايه ابطيحت الرايه

* * *

للكوفه تذكر يا دهر لمن رحت مسبيه من الغاضريه

ضعن الفواطم بالسبي چان الشمر حاديّه من الغاضريه

بجمع اليتامه امحيّره وعالشاطي عيني ربيّه من الغاضريه

بالشامات والكوفه لحالي تشوفه

سبيت الذي سابيني والنصر صار لديني

وضعني غاب حدّايه ابطيحت الرايه

* * *

طهران / ١٩٨١ م

لوعة الايام

يحسين جارت أيامي من يوم سلبوا أيتامي

ورديت أحسب آلامي من يوم سلبوا أيتامي

* * *

زينب اجت من اليسر يم گبرك

عافتك من يوم اللي گطعوا نحرك

ومن يوم رضّوا بالحوافر صدرك

واليوم رجعت يبو اليمه تخبرك

هالناس جاروا عليها وللشام عگبك سابيها

وسهام عدواني ترامي من يوم سلبوا ايتامي

* * *

صاحت بصوت الفاجعه يا مظلوم

اكشف تراب اللحد يحسين وگوم

اختك واجيت من اليسر أشكي هموم

من يوم عفتك عالثره لهذا اليوم

مجروح گلب اختك تدري واليوم اعرضلك امري

وتشوف چبد اختك دامي من يوم سلبوا ايتامي

* * *

لمن طحت يحسين فوگ الغبره

وجثتك بسيوف الكفر متوذره

ناديتك خيام الحرم مستعره

ما جاوبتني وگلبي ذاب بصبره

والخيل هجمت عالخدّر والنار بخيمنه تسعر

وبحشاي نيران خيامي من يوم سلبوا ايتامي

* * *

وليلة الحادي عشر ليلة آلام

بحال الغرب بس الحرم والايتام

متصدّعه وجارت عليها الايام

مساهره وجفن اللي تجرّح مينام

والليل خيّم عالعيله الله من ذيچ الليله

بهالحال والمدمع هامي من يوم سلبوا ايتامي

* * *

جهجر علينه الفجر وافجع مصباح

شاهدنه روس أهل الشيم فوگ رماح

وحادي الهزل لليسر عالعيله صاح

طلعنه بجسوم وعفنه يمكم الارواح

وتسيل دمعات عيوني والسوط يضرب بمتوني

مرفوع راسك جدّامي من يوم سلبوا ايتامي

* * *

مو هيّنه جسمك يبو اليمه نعوفه

وراسك على روس العوالي نشوفه

وافجع وضع لمن دخلنه الكوفه

شفت اليتامه والحرم مچتوفه

العيال دخلت للمجلس وگبال ظالم متغطرس

مفگود منهن ليحامي من يوم سلبوا ايتامي

* * *

شاهدت ابن زياد وسط الديوان

ونشفت دمعي بالصبر والاحزان

وابخطبتي فجّرت اعظم بركان

وانهدمت عروش الظلم والطغيان

والچان متشمت بينه رديت كل سهم بعينه

وبالزود شدّيت وسامي من يوم سلبوا ايتامي

* * *

بالكوفه عهدك يا شهم وفيناه

والظعن عرّج والمجد سار وياه

وبالشام موقف ثورتك أديناه

وحكم ابن مرجانه بفشل خليناه

بالشام وضّحنه الفكره وهناك كملنه الثوره

بايمان حققت احلامي من يوم سلبوا ايتامي

* * *

بالنصر لارض الشام غادرناها

وگوم آل اميه بفشل خليناها

عيالك اجتي وروس أهلها وياها

انهض يبو السجاد واتلگاها

من الشام ردت يم گبرك وتريد يحسين اتخبرك

لليوم گلب اختك ضامي من يوم سلبوا ايتامي

* * *

طهران / ١٩٨٣ م

الفراسة الحسنية

(سريع(

جسام لوّح ظهر ام العله وبصارمه انشالت أرض كربله

* * *

جاسم لنيران الحرب شابّها روس الاعادي بصارمه شابّها

والجده حيدر بالوغه شابّها لتاريخ جده بالهمم سجّله

* * *

بچفه حسام المعتقد سالمه وعين امه نامت بالخدر سالمه

من صولته جفن الحرب سالمه ومن حملته گلوب العده موجله

* * *

مرهف يقينه من رهيفه أحد گطّاع ما يوصل لحده أحد

ساحة الطف سواها غزوة أحد برمحه وبسيفه للحرب عادله

* * *

من كل وصف جسام اسمه وأجل لمن برز ويّاه لاح الاجل

صاحت اميه ريت جاسم أجل حملته وريت لمهره متخيّله

* * *

صاحت اميه وصوت الها دوه شبل الحسن سلها وتدوّر دوه

وجمر الغضه بوسط الحرايب دوه من حيث جاسم بالرمح شاعله

* * *

گلب الحرب من جمر سيفه يصل محّد گدر يم ابن حيدر يصل

نادته رمله من المخيّم يصل يا سام سيفك خل يذب هلهله

* * *

جاوبها يا رمله الوكت حان الي أدريچ گلبچ بالحزن حان إلي

معرس وردت بهالعرس حان الي وحنتي صارت من دمه المرجله

بالصبر لمتون النوايب أرض أتمنه دمي يسيل فوگ الأرض

بس كون يا رمله لدليلچ أرض والولد بالحومه يمثّل هله

مثّل أجداده ومختلف عنّها وگلوب اميه حسّت بعنّها

والخيل گامت تعثر بعنّها واطرافها بموج الدمه محجّله

* * *

طهران / ١٩٨٣ م

النعي، الأبوذية، الموال

النعي

عن لسان حال العقيله زينب (عليها السلام(

زينب واخبرك من گلب ولهان واصيح بصوت تسمعني يدفان

اخويه حسين مات بغرب عطشان گبل متذب على جسمه التربان

صب ماي اعلى چبده اليشب نيران وگله عالحرم حرگوا الصيوان

وزينب طاحت بولية العدوان بيكم هالأمل يحسين ما چان

* * *

يا هلي ما تقبل شيمكم بالغرب تتسلّب حرمكم

لو بيدي اگضي العمر يمكم بيا بحر غرگانه هممكم

لو اگدر بگلبي اضمكم وراسي اخضبه بفيض دمكم

حرمنه الدهر وسفه وحرمكم

* * *

عن لسان حال الهاشميّات

نرجاك يا حادي الظعينه مر على جسوم الاهل بينه

ودلينه جسم حسين وينه ونخبّره بالجره علينه

ونگله متيسره سكينه بلچن يگوم ويحامينه

من گوم اميه ينجينه وگلب الحرم يگطع ونينه

والينه ما يدري انسبينه لو يدري ما ظن يخلينه

نمشي بيسر بين اعادينه وگوم آل اميه تبارينه

هذا الجره من عگب عينه

* * *

الحسن بن علي (عليه السلام(

سالت عيوني دموع ودموم والجمر حدر الظلع مظروم

برض المدينه مهجتي تحوم ودلالي بالفاجعه مالوم

راح أبو محمد راح مسموم وشجّروا نعشه بنبل هالگوم

هاليوم يوم النايبه اليوم يوم المصايب يوم الهموم

جفن الهواشم فارگ النوم للمرتضى ما وصلته علوم

ما يدري چبد الحسن مخذوم

* * *

يا گمر هاشم شوف حالي منهدم سور الچان عالي

من عگبك تيسرت عيالي وانفگد برض الطف دلالي

وامدوهنه بعالم خيالي وابغيبتك هذا الجرالي

متمحنه بحيرة اطفالي يم النهر غرّب هلالي

وانهدمت بيوت المعالي وتلبدت سود الليالي

وابطيحتك خابت آمالي

* * *

إلى صاحب الأمر الحجّة ابن الحسن (عليه السلام(

مصيوب وايعاتب المصيوب وينك يمن عن عيني محجوب

من غيبتك ذابت الگلوب چم دوب نحمل صبر چم دوب

هالامر يبن الحسن مكتوب نحمل هظم والدمع مسچوب

والمثل بينه صبح مضروب والفلك بينه يدور مگلوب

اشحال الذي يفارگ المحبوب

* * *

الأبوذية في المباراة

أفاطِمُ لو خلتِ الحسينَ مُجدلاً وقد ماتَ عطشاناً بشطِّ فراتِ

الفرات انگطع منّه العذب يوفاه

شسبب ما روّه چبد حسين يوفاه

التهب يا فاطمه من العش يوفاه

وبكتره الفرات يسيل ميّه

* * *

اليومُ نامت أعينُ بكَ لَم تَنَمْ وتسهدت أخرى فعزَّ منامُها

تدري شعمل يا عباسْ بعداك

كسر ظهري وأنه المحتار بعداك

نامت رغد عين الگوم بعداك

ومساهره عيون الفاطميه

خَضبوا وما شابُوا وكانَ خِضابُهم بدمٍ من الاوداجِ لا الحناءِ

مثل حن الورگ زينب حناها

مصاب الاكبر وجاسم حناها

تشوف بدور برض الطف حناها

خضاب الدمه وزفتها المنيه

* * *

صلّت على جسمِ الحسينِ سيوفهم فغدى لصاليةِ الضبى محرابا

ابمهجتي النايبه جالت وصلّت

على اللي چبدته التهبت وصلّت

لجسمه البيض ركعتله وصلّت

وغده محراب لسيوف آل اميه

* * *

ضمآن ذابَ فؤادهُ من غلةٍ لو مسَّت الصخر الأصم لذابا

صبرت اعلى الدهر يا صاح ونيار

لچن گلبي على المظلوم ونيار

ضامي وچبده من العطش ونيار

وتهد صم الصخر ناره السريه

* * *

فمتى نلطمُ بالبيضِ الصفاح أوجهاً قد جدّعت منّا الأنوف

يصفوة هاشم وبرعم نسلها

ظلوع امك أظن فگدك نسلها

يمته سيوف عزّتنه نسلها

ونغمدها بأنوف الجاهليه

* * *

لبسوا القلوبَ على الدروعِ وأقبلوا يتهافتون على ذهابِ الأنفسِ

للخالق انصار حسين وحدّوا

عن الدين ما أصفحوا وحدوا

لبسوا عالدروع گلوب وحدوا

بظعن الموت وانوو للمنيه

* * *

اَيسوقها زجرٌ بضربِ متونها والشمرُ يحدوها بسبِّ أبيها

يبو السجاد هالخدّر متنها

يظل زجر وشمر يضرب متنها

گبالك تنشتم وانته متنها

غريبه يا غريب الغاضريه

* * *

عجباً لها بالأمسِ أنت تصونها واليوم آل أمية تبديها

زجر بالسوط عالحره يراها

وجفنها من دمه المدمع يراها

چانت بالخدر محّد يراها

واليوم اصبحت بين آل اميه

* * *

مالي دَعوتُ فلا تجيبُ ولم تَكن عَوّدتَني من قبلِ ذاكَ صدودا

دليلي اشما يون تدري وناليك

زماني خطفك من ايدي وناليك

شنهو السبب يبن امي وناليك

أنادي وما ترد جواب إليه

* * *

في بأسِ حمزةَ في شجاعةِ حيدرٍ بإبا الحسينِ وفي مهابةِ أحمدِ

حمل الاكبر ولعياله وصفهم

هجم وعداه شتتهم وصفهم

جمع من حيدر وحمزه وصفهم

وبخلقه ورث سيد البريه

* * *

فلتذهبِ الدُنيا على الدُنيا العفا ما بعدَ يومِكَ من زمانٍ أرغدِ

يا هو اللي يسلّي الگلب يومل

ويا هو اللي يباري العيس يومل

على الدنيه العفه ناديت يومل

طحت من عالمهر فوگ الوطيه

* * *

ابوذيات متفرقة

مصيبتكم يشبل الحسن ياليت وعلى جدك خيول الگوم ياليت

ردتك حاضر بكربلا ياليت وتنظر عمّتك بين آل اميه

* * *

الدهر بالگلب لسهامه عيّنها وچبدتي مصاب أبو اليمه عيّنها

السميّه بدارها العامر عينها وزينب باليسر راحت سبيه

* * *

أدمن للگلب يحسين يرحين وبس الهن دموع العين يرحين

خواتك لليسر عالهزل يرحين ويعوفن جثتك بالغاضريه

* * *

مرت عالعقيله ايام شامات يسيره وشاهدتها عيون شامات

تنسه الكوفه لو محنة الشامات لو تنسه ضحايه الغاضريه

* * *

انسلب عگلي يهالغايب ونبهاي أهي غيبه ويمته تفض ونبهاي

يگولون الصبر طيّب ونبهاي أگول الصبر من طعم المنيه

* * *

الموال

يبن الحسن بالعتب طول العمر بسّهم

ما ضگت من الدهر طعم الفرح بسّهم

خل نرشد لكربلا يكفي الدمع بسّهم

ودموم جدك تهب نسمات هاشمها

حافر خيول العده لظلوعه هاشمها

وانچان ثاره اننسه يا فرع هاشمها

گوم اطلب بثار طفله المنفطم بسّهم

* * *

مجدك يبو حسين عالدنيه تعالى وسمه

يا حجة الله يا مالك علومه وسمه

اشما رادت الناس تتباها وتشد اوسمه

بس ليك الگلوب يا قبلة نظرها ترب

وگلوبنه الوالهه برياض حبك ترب

ما من جدال أيحصل هالناس كلها ترب

وانت الذهب يا علي وللكون شخصك سمه

* * *

هلال العمر سيدي يحسين ما تملك

والروح من الحزن للصبر ما تملك

وبكل گلب يا شهم منصوب ما تملك

ودموعي ويه الدمه فوگ الخدود مصاب

مثلك دليلي بسهم جور الزمان مصاب

ومصابك بكربلا أصبح مصاب مصاب

يا من اخوان واهل وانصار ما تملك

* * *

يا من ليالي الهنه بأيامه تاليها

آيات حبك لساني بشوگ تاليها

نسمه ودادك تهب والعشك تاليها

وذكراك بمخيلت افكاري شيّدت دار

وينبوع حبك وسط گلبي اليودك دار

يحسين طال الهجر والفلك بينه دار

خل نصبر نشوف تصفي اشلون تاليها

* * *

الفهرس

مقدمة ٢

في قصائد الگعدة ٤

قم يا أبي ٥

طريق الشهادة ٨

المواعظ ١١

يوم الكفاح ١٥

هتاف الأحرار ١٩

يا شبيه المصطفى ٢٢

لمن الشموع ٢٦

نداء الكفيل ٢٩

ابناء علي (عليه السلام) ٣٢

النبراس ٣٥

لماذا قتلوه ٣٩

الحوار المؤلم ٤٢

كيف ترضى ٤٦

راية الحمد ٥٠

النبي ايوب (عليه السلام) ٥٤

في قصائد اللطم ٥٧

يا غيرة الله ٥٨

العليلة ٦٠

القرآن الناطق ٦٢

الأماجد ٦٤

الفراق ٦٧

يا ابا الفضل ٦٩

فجعت قلبي ٧١

يوسف الصديق ٧٣

ماذا جرى ٧٦

الإمام الصادق (عليه السلام) ٧٨

فاطمة (عليها السلام) ٨٠

وا جداه ٨٢

الرباب (عليها السلام) ٨٥

اشكو لمن ٨٨

الآمال ٩٠

في كل زمان ٩٣

يا باب الحوائج ٩٦

الأصول الخمسة ٩٩

الحسن العسكري (عليه السلام) ١٠٢

الغريبة ١٠٥

الانتظار ١٠٧

عز علينا فراقك ١٠٩

المصيبة العظمى ١١١

إخوان الشهادة ١١٤

مَن المعين؟ ١١٦

زفاف المنايا ١١٩

اين الخدور ١٢١

الشهيد الأول ١٢٤

أنصار الإمام (عليه السلام) ١٢٧

سوف نسبى ١٢٩

الصابرة ١٣١

لوعة الايام ١٣٤

الفراسة الحسنية ١٣٧

النعي، الأبوذية، الموال ١٣٩

النعي ١٤٠

الأبوذية في المباراة ١٤٢

ابوذيات متفرقة ١٤٥

الموال ١٤٦